'Kafan tere bete ka' -- Complete Novel by Vedprakash sharma

[StoryPublisher]

'Kafan tere bete ka' -- Complete Novel by Vedprakash sharma

Summary of ALFAANSE KI SHAADI

Alfaanse ke shabdo me duniya ek jungle hai. insaani jaanvaro se khachakhach bhara ek jungle aur is jungle ke baadshah yaani sher ka naam hai Alfaanse. jaanne vaale ye bhi acchi taarh se jaante hai ki is antarrashtriya mujrim ke pair me chakkar hai, yaani ki ek mulk se dusre mulk ghoomte rehna iski hobby hai aur apni is hobby me mutaabik Alfaanse is baar London pahuch gaya.

sanyog se us waqt London me Bogaan naamak gunde ka danka baj raha tha, is had tak ki London ki police Bogaan par to door, uske kisi chamche tak par haath daalne se katraati thi.

parantu kisi ne sach hi kaha hai ki jhooth ki haandi roz nahi chadhti, Bogaan ke liye vah din durdin hi kaha jaayega jab uske teen gurge uski khidmat ke liye Irvin naam ki ek yuva aur soundarya ka pratibimb si najar aane vaali ladki ko kidnap karke le jaa rahe the. Bogaan ke bhaagya ko shaayad raahu-ketu ne tedhi aankh se dekha tha, tabhi to ve gurge bechaare Alfaanse se takra gaye.

Alfaanse ne na keval Irvin ko unke changul se mukt kiya, balki Bogaan ke gurgo ki kaaya ka bhugoal bhi badal daala. is ghatna ki Bogaan par kya partikriya huyi, yah to hum baad me likhenge, yaha ek baat bataana param aavashyak hai ki Irvin naam ki ye ladki Alfaanse ki khoobsurti aur bahaduri se aasakt ho gayi. kam se kam Alfaanse ke liye ye koyi vishesh baat nahi thi, Irvin se pehle bhi us par bahut si ladkiya aasakt ho chuki thi, parantu us par kabhi koyi asar nahi hota tha. kyonki sarvikhyaat hai ki Alfaanse ladkiyo me koyi ruchi nahi rakha karta tha. maanavta ke naate hi vo Irvin ko apni car me bithakar uske ghar tak chhodne aaya tha, parantu us waqt Alfaanse ki aankhe heere ki taarh chamakne lagi jab ushe pata laga ki Irvin Gardner ki akeli putri hai. Gardner ka parichay keval itna hi tha ki ve security vibhaag ke koyi bahut bade officer hai. jaane kya baat thi ki ushi kshan aisa mehsoos hone laga ki Alfaanse bhi Irvin se mohabbat karne laga hai, pyar ki peenge badhne lagi, Alfaanse aur Irvin ke beech mulakaato ka silsila lamba hota chala gaya aur in mulakaato me yah mohabbat parvaan chadhne lagi, ishi beech Alfaanse ka takraav Bogaan se bhi hua.

nateeje ka anumaan to aap log laga hi sakte hai yaani ki London se Bogaan ka aatank khatam.

uprokt ghatnaao ke teen mahine baad Singhi, Vatan, Vikas aadi ko card mile. in cards ke mutaabik Alfaanse Irvin se shaadi kar raha tha, shaadi ke cards ke saath Alfaanse ne patra dwara sambandhit vyaktiyo ko soochit kiya tha ki apne apraadhi jeevan se ab vah uab chuka hai aur Irvin ke saath ghar basakar shesh jeevan shaanti ke saath gujaarna chahta hai. yah anurodh bhi kiya tha ki shaadi me karyakram anusaar upasthit hone ka upkram kare.

Rajnagar me Alfaanse ne sabhi ko card bheje the lekin Vijay ke naam ka koyi card nahi tha aur Alfaanse ki yah harkat jaha Vikas, Raina, Raghunaath, Monto, Black boy, Ashraf, Vikram, Naahar aur Parvej aadi ko apmaanjanak lagi, vahi Vijay ye sochne par baadhya ho gaya ki aakhir Alfaanse ne ushi ko card kyo nahi bheja hai.

vaise to yah soochna hi ushe chouka dene ke liye kaafi thi ki Alfaanse shaadi kar raha hai. upar se uske naam ka card na hone ne bhi ushe chounka diya tha aur is shaadi ke parti Vijay sandighd ho utha. Alfaanse ki nas-nas se vaakif Vijay ko laga ki yah shaadi nahi, koyi shadyantra hai aur vah shadyantra kya hai, yahi jaanne ke liye Vijay turant James ellen bankar London pahuch gaya.

ab shuru huyi Alfaanse ki shaadi ke peeche chupe rahasya tak pahuchne ke liye Vijay ki investigation. alfaanse Eligabeth hotel ke room no. 71 me thahra hua tha. James ellen bana Vijay bhi ishi hotel me jaa thahra. sabse pehle usne ek waitor se Alfaanse ki picchle dino ki gatividhiyo ki jaankaari ekatrit ki. Alfaanse ka Bogaan se takraav, Irvin se huyi mohabbat ke baare me jaanne ke alawa usne yah bhi jaan liya ki Alfaanse ne British naagrikta prapt kar li hai.

ab vah ek gunde ke roop me pehle Bogaan ke gurgo aur fir unke maadhyam se Bogaan tak pahucha. parantu apne asli maksad me kaamyaab na ho saka. Basant swaami bankar vah toh lene ke liye James bond se bhi mila kintu parinaam vahi raha yaani dhaak ke teen paat.

atah shaadi hone se vah nahi rok saka.

shaadi nischit taarikh me huyi aur agar sach kaha jaaye to ye shaadi nahi poora ho-hulaad tha. kyonki saari duniya ke mashoor jasoos aur apraadhi isme shaamil huve the, aise-aise log, jinhe maanav nahi, bhoot-pret, chudail aur pisaach kehna jyada uchit hai.

Alfaanse ke mehmaano me pramukh the Singhi, Jackson, Tumbaktu, Jacky, Thakur sahab, Raghunaath, Raina, Mike, Harry, Julia, Baagarof, Nusrat-Tughlak, Rehmaan, Vatan, Appolo, Vikas, Dhanushtankaar, Vijay, Black boy, Ashraf, Vikram, Naahar, Parvej aur Aasha aadi.

in sabne milkar Lonodn me aisa humgaama machaaya jishe London vaasi hamesha yaad rakhenge. Singhi, Jackson aur Tumaktu apne naayab tareeko se shaadi me shaamil huve. Singhi ke aagman se poorv us waqt sabhi lights gul ho gayi thi, jab Vijay ne kinhi do vyaktiyo ki baatcheet suni aur is baatcheet me Kohinoor heere ka naam aaya.

sheeghra hi Vijay ne yah pata laga liya ki vah vaarta Graadway naamak ek vyakti aur Irvin ke pita Gardner ke madhya huyi thi. iske baad sansani raat ke teen baje faili, tab jabki fere khatam huve the. Gardner ki kothi ke ek andhere kone me Graadway ki laash padi mili. sabhi chounk pade, kaafi koshish ke baad bhi koyi yah nahi jaan saka ki Graadway ka katl kisne kiski madad se kiya hai.

shaadi ke baad sabhi mehmaan lout gaye.

Bhaarat me aakar Vijay ne Vikas aur Black boy ko bataya ki Graadway ka katl darasal ushi ne kiya hai,

ek saath dono ne chounkkar poocha," kyo "

tab Vijay ne bataya ki Graadway ko maarne se pehle usne ushe torture kiya tha aur us torture ke kaaran hi usne ushe bataya tha ki Kohinoor kyonki duniya ka sabse mulyavaan, naayaab aur gauravmayi heera hai, isliye Britain sarkaar ne uski suraksha ke kade prabandh kiye hai. ye saare prabandh K.S.S. naamak sanstha ki dekhrekh me hai aur K.S.S. ka director khud Irvin ka pita Gardner hai. Graadway khud bhi K.S.S. ka sadasya tha aur ishi vajah se vah Vijay ko bata saka tha ki prithvi ke chaaro taraf ghoomta ek upgrah Kohinoor par najar rakhta hai. is upgrah ka sambandh ek control room se hai, yaani yadi Kohinoor ko koyi khatra hua to upgrah turant control room ko sandesh bhej dega aur yah control room anya kahi nahi, Gardner ki kothi ke tahkhaane me hai.

itna sabkuch pata lag jaane ke baad Vijay ke liye yah samajh paana saamaya si baat thi ki Irvin se shaadi ka dhong rachakar Alfaanse Kohinoor tak pahuchne ki scheme par kaam kar raha hai. yah sambahvna Vikas aur Black boy ko bhi janchi.

ab ye log Alfaanse ki yojna ko naakaam karne aur Kohinoor ko haasil karne ke baare me sochne lage. plan ye bana ki Alfaanse jaise hi Kohinoor ko prapt karega, ye ushe daboch lenge. magar aisa karne ke liye, Kohinoor tak pahuchne ki Alfaanse ki sampoorn yojna jaanna jaroori tha aur jaanne ke liye London jaana.

apni asli surat aur naam se ve London jaa nahi sakte the. Alfaanse, Bond ya London ki nazro me ve kabhi bhi aa sakte the. atah Vijay, Vikas, Ashraf, Aasha aur Vikram kramash Basheer, Margret, Dsouja, Chakram aur Beauty naamo se london pahuche. Vijay ne khud sabhi ke chehro par aisa makeup kiya tha jo kisi bhi rasayan se chootna na tha.

London me in paancho jasooso ki stithi mujrimo jaisi thi aur sachmuch inhone mujrimo ke ek sangathit giroh ki tarah hi badi teji se kaam shuru kiya.

sabse pehle Beauty bani Aasha Kohinoor dekhne us museum me gayi jaha vah rakha tha aur yaha usse kuch aisi bhoolein ho gayi ki museum ke security ke jasoos uske peeche lag gaye. idhar Vijay, Vikas, Ashraf aur Vikram ki kaargujaariyo ki vajah se London ki police ke saath hi secret service vihbaag bhi chounk pada, mr. M ne office me bulakar Bond ko ye bhed bataya ki mr. Gardner K.S.S. ke cheif hai aur kuch log Kohinoor me dilchaspi lete dikhaayi de rahe hai. is parakaar is case me Bond sakriya ho utha.

udhar Alfaanse Irvin ke saath Gardner ki kothi me hi rehne laga tha.

Vijay, Vikas, Ashraf aur Vikram ne jab yah mehsoos kiya ki Aasha ko British jasoos watch kar rahe hai to unhone Aasha se saare sampark tod diye.

apni aapraadhik gatividhiya bina kisi rukavat ke chalaaye rakhne ke liye unhe kisi sthaan ki talaash thi.

Vijay aadi ne Peter house ko chuna. imarat ki back side me dusre maale par ek khidki thi, jishe unhone mukhya dwar banaya tha. ve raat ke andhere me aakar Peter house ka istemaal karte aur suraj nikalne se pehle hi nikal jaate.

investigation karte huve Vijay aadi ne Chemboor naamak ek aise aadmi ka pata laga liya jo K.S.S. ka sadasya hi nahi balki Gardner ka daaya haath tha. Chemboor ka vyaktitv rahasmaye tha kyonki Vikas ne ushe akele me Alfaanse se milte dekha tha. Vijay ne anumaan lagaya ki Chemboor Alfaanse se mila hua ho sakta hai.

Kohinoor ke chaaro taraf ki gayi kadi suraksha vyavastha aur Alfaanse ki poori yojna jaanne ke liye Chemboor par haath daalne ka nischay hua.

udhar, James bond ye to nahi jaan paaya tha ki jo log Kohinoor me dilchaspi le rahe hai ve Bhartiya jasoos hai. magar ye bhaanp gaya tha ki ve jo bhi hai, Chemboor par jaroor haath daalenge, atah Bond swayam Chemboor ki nigrani kar raha tha.

jab Vijay aadi ne Chemboor par haath daala to unka takraav Bond se ho gaya. Chemboor ko kidnap kar laane me ve safal to ho gaye, parantu is takraav ke baad vah ye jaan gaya ki ve Vijay aadi hai. atah usne ushi raat hotel ke ek kamre se Aasha ko giraftaar kar liya.

idhar Chemboor ko lekar ve Peter house pahuche, rahasya ugalvaane ke liye ushe torture kiya, Chemboor toot gaya. usne Kohinoor ke chaaro taraf ki gayi kadi suraksha vyavastha unhe bata di. Chemboor ke bataane par hi unhe pata laga ki museum me jo Kohinoor rakha najar aata hai, vah Kohinoor nahi, Kohinoor ka pritibimb maatra hai, asal Kohinoor kaha aur kin surakshaao ke beech rakha hua hai, yah sunkar to Vijay jaise vyakti ko bhi maanna pada ki Kohinoor ko churana to asambhav ki seema tak kathin hai.

unhone Chemboor se Alfaanse ki Kohinoor tak pahuchne ki yojna poochi, yojna Chemboor ne bataayi bhi kintu Vijay ke khayaal se ye yojna shashakt nahi thi, suraksha vyavastha ko dekhte huve usme kayi khaamiya thi.

sabkuch ugalvaane ke baad unhone Chemboor ko maar daala.

udhar, Bond Aasha se yah ugalvaane ke liye ki vah Aasha hai, ushe buri tarah torture kar raha tha. vah sabkuch sehti rahi magar ek baar bhi usne Aasha hona sweekaar nahi kiya. atah Bond ne apni ek jasoos ko Beauty banakar hotel ke us kamre me rakh chhoda jaha se vah Beauty ke roop me reh rahi Aasha ko giraftaar karke laaya tha.

Peter house me maujood Vijay aadi se achanak hi kisi rahasymayi aadmi ne phone par sambandh sthaapit kiya aur kaha ki vah unke ek-ek rahasya se vaakif hai. apni baato se usne saabit kar diya ki vah sach bol raha hai, vah unke asli naam bhi jaanta tha aur yah bhi ki unhone Chemboor ko maar daala hai. apna parichay gupt rakhte huve usne Kohinoor ki loot me se hisse ki maang ki.

sochne ke liye samay dekar usne sambandh-vichhed kar diya.

Vijay aadi ki haalat ajeeb ho gayi, unhe samajh nahi aa raha tha ki vah aadmi aakhir koun ho sakta hai. Chemboor ki laash ko aane vaali raat ke andhere me thikaane lagaane ka nischay karke ve saavdhaani ke saath khidki roopi apne mukhya dwar se nikal gaye.

raat ke is waqt Irvin ke paas bed par soya Alfaanse utha, choro ki tarah kamre se baahar nikla , uska khayaal tha ki aisa karte waqt ushe Irvin ne nahi dekha hai. kintu uska aisa sochna bilkul galat tha, darasal Irvin ne uski prateyek harkat note ki thi. prateyek raat ki tarah is raat bhi Vijay aadi Peter house me ikhatte huve. yojna ke mutaabik ab ve Aasha ko bhi yaha le aaye the magar bechaare ye nahi jaante the ki ab Beauty ke makeup me vah Aasha nahi balki Bond ki jasoos hai.

us waqt ve hakke-bakke reh gaye jab unhone Chemboor ki laash ko us kamre se gaayab paaya, jaha unhone ushe rakha tha. tabhi phone par rahasmayi vyakti ne kaha ki laash usne kisi aise sthaan par chupa rakhi hai, jaha se ushe laakh talaash karne ke baad bhi vah nahi milegi. laash ka pata vo unhe tabhi batayenga jab ve ushe hissa dena kabool karenge, Vijay ne kaha ki vah saamne aakar souda kare.

usne agli raat ko Peter house aane ka vaada kar diya.

abhi yah log rahasmayi vyakti ki baat kar rahe the ki Alfaanse vaha pahuch gaya, Alfaanse ko yaha dekhkar un sabka chounk padna swabhaavik hi tha, usne Vijay se kaha ki vah Kohinoor ke chakkar me nahi hai, balki sach me Irvin ke saath apna ghar basakar apna shesh jeevan shaanti se gujaarna chahta hai. yahi usne ye bhi kaha ki Irvin uske bacche ki maa banne vaali hai. Alfaanse ne unse prarthana ki ki ve log London se chale jaaye varna Irvin bhi uske baare me vahi sochne lagegi, jo ve soch rahe hai. Vijay aadi ke na maanne par vah ye dhamki dekar chala gaya ki yadi unki vajah se uski family life bigdi to vah ek-ek se gin-ginkar badle lega.

raat ke us waqt bhi Bond Aasha ko torture kar raha tha jab Beauty bani uski jasoos ne tramsmitter par soochna di ki Vijay, Vikas, Ashraf aur Vikram is waqt Peter house me maujood hai. Peter house ko ishi waqt gherkar inhe giraftaar kar lena uchit hai. Bond ne o.k. kehkar transmitter off kiya aur tej kadmo ke saath torture room se baahar nikal gaya.

bas, Alfaanse ki shaadi me aapne ishi drishya tak ka kathanak padha tha, isse aage ka kathanak lekar aaya hai," Kafan Tere Bete Ka "

To be continued........

 

[StoryPublisher]

British secret service ke gupt office me baitha James bond secret service ke cheif mr. M se atyadhik utsaahit swar me keh raha tha," maine Kohinoor me

dilchaspi lene vaalo ka pata laga liya hai sir "

" very good " M ka chehra chamak utha," koun hai ve log "

" ve ushi desh ke jasoos hai sir, jis desh se hamare bujurg Kohinoor yaha laaye the "

" y..yaani Bhartiya " mr. M ucchal pade.

" ji haan " Bond ne garveeli muskaan ke saath kaha," ve Bhartiya jasoos hi hai, Vijay, Vikas, Ashraf, Vikram aur Aasha, ye sab makeup me naam badalkar London me sakriya hai, Beauty naamak jis ladki ka havaala aapne mujhe diya tha, darasal vo Beauty nahi balki Bhartiya secret service ki jasoos Aasha hai "

" oh god "

" is waqt Aasha meri kaid me hai aur baaki chaaro ko bhi aap meri giraft me hi samjhe "

" kya matlab "

" mai aapke paas ye gujaarish lekar aaya hu ki ishi waqt aadesh jaari karke Smith Street par stith Peter house naamak imarat ko shashastra sainiko se

ghirvakar unhe giraftaar karva lijiye "

" kya ve charo ishi imarat me hai "

" yes sir, unke saath Beauty bani hamari ek jasoos hai "

" hum samajh nahi paa rahe hai Bond ki aakhir tum keh kya rahe ho, sabse pehle sanshep me tum hame apni poori report do, hamari koun si jasoos Beauty

bankar kaise pahuch gayi "

James bond ne ek kshan bhi ganvaana uchit nahi samjha aur shuru ho gaya. mr. M uske munh se nikalne vaale ek-ek shabd ko bahut dhyaan se sunte rahe.

--------------------------------------

" ab tumhaara kya iraada hai " saari report lene ke baad mr. M ne poocha.

" ek kshan bhi ganvaaye bina hame unhe gher lena chahiye "

kuch sochte huve mr. M ne kaha," hamare khayaal se aisa karne se koyi laabh nahi hoga "

" kya matlab "

" bahut mushkil se hamare haath aisa mouka laga hai, jab Sanyukt Rashtra Sangh me hum Bhaarat ko neecha dikha sakte hai, ye saabit karke ki ve Bhartiya

jasoos hai aur London me Kohinoor ko churaane ke liye hi sakriya the, kintu filhaal na to hamare paas unke Bhartiya jasoos hone ka koyi saboot hai aur na hi ye saabit karne ka koyi saboot hai ki ve Kohinoor ke chakkar me the. aise haalaat me unhe giraftaar karna nirarthak hoga "

" keh to aap theek rahe hai, lekin... "

" lekin kya "

" iske liye hum kar kya sakte hai "

" is waqt ve tumhaari najro me to hai hi, agent 003 bhi unke saath hai aur ve ushe Aasha hi samajh rahe hai, yaani jaahir hai ki uske jariye tumhe unki har

yojna, har activity ki poorn jaankaari rahegi, gherkar unhe kisi bhi kshan, kahi bhi giraftaar kiya jaa sakta hai. to kyo na un par us waqt haath daala jaaye,

jab na keval unhe Bhartiya jasoos saabit kiya jaa sake, balki ye bhi saabit kiya jaa sake ki ve Kohinoor ke chakkar me the "

" raay to aapki theek hai magar isme khatra bahut hai "

" kis kism ka khatra "

" ve charo ek se badhkar ek kaaiya hai, ve filhaal to nahi jaante ki Beauty Aasha nahi hai, lekin 003 ki halki si chook par jaan sakte hai aur yadi aisa ho gaya

to na keval 003 ki buri gat banayenge, balki satark bhi ho jaayenge, us avastha me na keval unki yojnaaye aur activities hi jaanna asambhav hoga, balki

unhe pakadna bhi "

M ne bade ajeeb se swar me kaha," is kism ke khatre uthaane se hamara Bond kab se katraane laga "

" mai katra nahi raha hu sir, keval haalaat par gour kar raha hu, soch raha hu ki is waqt haalaat hamari giraft me hai, kal stithi badal bhi sakti hai "

" tumhaare khayaal se stithi badalne par kya ho sakta hai "

" ye bhi mumkin hai ki ve Kohinoor ko churaane me kaamyaab ho jaaye "

mr. M ke chehre par aisi muskaan ubhar aayi jaise Bond ne koyi bachkaani baat keh di ho, bole," is taraf se tum bilkul nischint raho Bond, hum shart lagakar

keh sakte hai ki ve to ve, swayam god bhi Kohinoor ko churaane me kaamyaab nahi ho sakta "

" aisa daava aap kis aadhaar par kar rahe hai "

" Kohinoor ke chaaro taraf faili suraksha vyavasthaao ke aadhaar par "

" ve bahut shaitaan hai sir, dimaagi star par Vijay se bada shaitaan is saari duniya me nahi hai aur physically duniya ka sabse bada shaitaan Vikas hai. jab ve kaam karne par aamada honge to Kohinoor ke chaaro taraf ki gayi vyavasthaaye toot-tootkar bikhar jaayengi "

" aisa tum keval isliye keh rahe ho, kyonki tum un vyavsathaao ke baare me kuch nahi jaante ho "

" kya aap mujhe bata sakte hai "

" tumhaari tassalli ke liye batani hi hongi " kehne ke baad mr. M tape-recorder ke tarah shuru ho gaye. Bond dhyaan se sunta raha, beech-beech me usne

prashan bhi kiye, jinka uttar dete huve M ne ushe poorn suraksha vyavastha ke baare me bata diya.

sunkar Bond ko ascharya hua aur yah vishvaas bhi ki Kohinoor tak pahuchna Vijay-Vikas ke liye laghbhag asambhav sa hi hai, Bond kaafi aashvasht najar aane laga.

M ne poocha," ab kaho Bond kya khayaal hai "

" vaakayi, suraksha ke bahut kade prabandh kiye gaye hai "

" ab tum apni aage ki scheme batao "

" aap theek keh rahe hai, is waqt unhe giraftaar kar lena aasaan jaroor hai lekin laabhprad nahi. unhe tabhi giraftaar kiya jaana uchit hoga jab hum unhe Bhartiya jasoos hone ke saath-saath yah bhi saabit kar sake ki ve Kohinoor ke chakkar me hai, parantu.... "

" parantu kya "

" mai transmitter par 003 se keh chuka hu ki unhe giraftaar karne ke liye tatkaal Peter house ko ghera jaa raha hai aur ab yadi aisa nahi kiya gaya to vah uljhan me pad jaayegi "

" transmitter par ushe nayi yojna se avgat karaya jaa sakta hai "

" vahi karna hoga aur unhe Bhartiya jasoos saabit karne ke liye bhi kayi prabandh karne honge, shatranj ke is khel me hame maat bhi mil sakti hai sir, isliye hame apne baadshah ke chaaro taraf ek sudridh kila bana lena chahiye "

" kya matlab "

" waqt aane par Aasha hamare liye vajeer saabit ho sakti hai, isliye ushe kisi aise sthaan par rakhna chahiye, jaha ve kabhi na pahuch sake "

" is waqt Aasha kaha hai "

" meri kothi ke torture room me "

" ushe fouran yaha yaani secret service ke kaidkhaane me daal do. saat janam tak koshish karne ke baad bhi unme se koyi yaha nahi pahuch sakega "

" yahi theek rahega, mai abhi 003 ko nayi yojna se avgat karata hu " kehne ke turant baad Bond angoothi roopi transmitter par 003 se sambandh sthaapit karne ki chesta karne laga.

--------------------------------

Irvin itni teji se uthi, jaise ki vah haad-maans ki nahi, bijli se harkat me aane vaali plastic ki gudiya ho, uski jheel si gehri, chamakdaar aur khoobsurat neeli aankho me ajeeb chamak thi.

handle pakadkar usne darvaaje ko apni taraf kheenchna chaha.

darvaaja baahar se bolt tha, atah nahi khula.

ab vah pinjre me fansi khoobsurat hirni ki tarah saare kamre ko dekhne lagi, bedroom me ab bhi night bulb ka prakash bikhra hua tha, Irvin ke sudoul aur gadraaye jism par is waqt jheena gown tha. pusht vaksho ko kaid kiye brazzer spasht chamak rahi thi, kintu uska dhyaan apni shaaririk avastha ki taraf bilkul nahi tha, is waqt vah sirf aur sirf is kamre se baahar nikalne ke liye bechain najar aa rahi thi.

is kamre se, jisme kuch hi der pehle Alfaanse ek tarah se ushe kaid kar gaya tha. kadachit vah ye jaanna chahti thi ki raat ke is waqt ushe soti samajhkar choro ki tarah aakhir Alfaanse kaha gaya hai aur jaate waqt kamre ka darvaaja baahar se kyo band kar gaya hai.

achanak us hirni ki badi-badi aankhe ek khidki par atak gayi, bandook se nikli goli ki tarah vah uski taraf lapki. agle hi pal usne na sirf chitkhani khol di balki dabe paanv bina koyi aahat utpann kiye choro ki tarah khidki paar karke kamre ke baahar se gujarne vaali gallery me pahuch gayi.

gallery me madhim prakash tha.

Irvin poori saavdhaani ke saath gallery paar karne lagi, mod ghoomne ke baad vah ek kamre ke band darvaaje ke sameep thithak gayi.

yah kamra Irvin ke pita Gardner ka tha.

yaani vahi kamra jaha se is kothi ke tahkhaane me chupe control room tak jaane ka gupt raasta shuru hota hai, Irvin ne kisi chaalaak billi ki tarah daaye-baaye dekha.

dono taraf ki gallery sannate me doobi padi thi.

dabe paanv vah band darvaaje ke atyant sameep pahuchi aur fir usne apni saans tak rok li aur aankh key-hole se sata di.

kamre me laal rang ke night bulb ka prakash bikhra pada tha.

saamne hi double bed tha aur us par gehri neend me leen mr. Gardner spasht najar aa rahe the. unke sirhaane steel ki ek majboot safe kamre ke farsh me gadi thi.

bas, kamre ka itna hi drishya Irvin ko chamka.

kuch der tak vah saans roke key-hole se aankh sataye rahi, parantu Alfaanse najar nahi aaya aur na hi aisa koyi aabhaas mila jo kamre me Alfaanse ki maujoodgi ka prateek ho.

ab saans roke rehna Irvin ke liye kathin ho gaya tha.

atah vah sheeghrata se darvaaje ke sameep se hati, dabe paanv do-teen kadam door hatkar usne ruki huyi saans chhodi.

is waqt uske chehre par ajeeb se bhaav the.

baaye haath ko usne ghoonse ki shakal di aur bahut jor se apni daayi hatheli par maarkar badbadaayi," aakhir kaha chala gaya "

parantu kaafi der tak bhi ushe apne is sawaal ka jawaab nahi mila.

aakhir niraash Irvin apne kamre ki taraf lout gayi, khidki ke jariye kamre ke andar pahuchi aur khidki ko poorv ki tarah andar se bolt kar liya.

thaki aur chakit si vah bed par let gayi.

takiye par sir rakhkar kamre ki chatt ko ghoorti huyi na jaane kayi der tak vo kya sochti rahi, aankho me door-door tak neend ka koyi naam-o-nishaan nahi tha.

us waqt achanak hi Irvin ki tandra bhang huyi jab usne gallery me se ubharne vaali halki si padchap suni, koyi dabe paanv gallery me chal raha tha.

fir, padchap uske kamre ke darvaaje ke kareeb ruk gayi.

 

[StoryPublisher]

kisi ne bahut hi dheeme se darvaaje ke dusri taraf laga bolt sarkaaya aur ishi kshan na jaane Irvin ko kya soojha ki usne ekdum se aankhe band kar li. aisa pose bana liya jaise sadiyo se so rahi ho.

uska dil asamanya gati se dhadak raha tha aur palko ki jhiri se vah nirantar darvaaje ki taraf dekh rahi thi. darvaaja bahut hi aahista se khula.

Irvin ne dekha ki darvaaja kholne vaala Alfaanse tha.

choukhat par khada vah saans roke bed par soyi huyi si najar aane vaali Irvin ko ek minute tak dekhta raha.

leshmaatra bhi aahat utpann kiye bina alfaanse ne darvaaja andar se band kiya aur jaate waqt jis saavdhaani se kapde pehne the, ushi saavdhaani se utaare, taange aur dabe paanv aakar aahista se bed par let gaya.

uske mastak par paseene ki nanhi-nanhi boonde ubhar aayi thi.

sachmuch sone ke liye usne aankhe band kar li thi, parantu vah ye nahi jaanta tha ki palko ki jhiri se ushe ab tak dekh rahi Irvin ki aankho me door-door tak neend nahi hai.

Irvin ne yah jaahir nahi kiya ki usne Alfaanse ki ek-ek harkat dekhi hai.

bahut hi kam shabdo me apni poori yojna samjhaane ke baad James bond ne poocha," kya tum itne lambe samay tak safaltapoorvak Aasha ka abhinay kar sakti ho "

" mai poori koshish karungi "

" very good " Bond ne kaha," ab hame apne maksad me kaamyaab hone ke liye chand prabandh karne hai "

" jaise "

" sabse pehle hame ye saabit karne ke liye pramaan jutaane hai ki Basheer, Margret, Dsouja aur Chakram koyi nahi balki bhartiya secret agent Vijay, Vikas, Ashraf aur Vikram hai "

" iske liye pramaan bahut aasaani se jutaaye jaa sakte hai "

" kaise "

" ye log jab aapas me baat karte hai to na sirf ek-dusre ka naam lete hai, balki bolte bhi asli aawaj me hi hai. atah agar inke beech hone vaali vaarta tape kar li jaaye to... "

" good, magar aawaj kaise tape hogi "

" vah bhi aasaan hai, ve keval raat ke samay me hi Peter house rehte hai, suraj nikalne se pehle hi yaha se nikal jaate hai, din ke kisi bhi samay aap yaha taperecorder fit kar sakte hai, agli raat ko yaha par aane par ye jo bhi baatein karenge vo sab tape ho jaayengi "

" very good " James bond ki aankhe chamak uthi," is tareeke se hamara dusra uddeshya bhi poora ho jaayega, yaani ki inke beech hone vaali baato ka vishay nischay ki Kohinoor hi hoga "

" ji haan "

" iska matlab hai, hame jyada din intjaar nahi karna padega. jo hum aaj karne jaa rahe the vo kal karenge, in sabki aawaj tape hone ke baad lekin iske liye tumhe ek kaam karna padega "

" hukum kijiye " dusri taraf se kaha gaya.

" kal din me tum transmitter par mujhse sambandh sthaapit karke us samay ki jaankaari dogi jab unme se koyi bhi Peter house me maujood na ho, taaki mai poori nischintita ke saath vaha tape fit kar aau "

" mai inform kar dungi "

safalta ki poorn aasha se James bond ka chehra damakne laga tha, bola," unki aage ki ranneeti kya hai, yaani is waqt baithe ve aapas me kya baatein kar rahe hai "

" is waqt unki baato ka vishay Alfaanse hai "

Bond chounk pada," Alfaanse "

" ji haan, jab maine transmitter par aapko inke yaha hone ki soochna di thi, usse kuch hi der pehle Alfaanse Peter house me inse milkar gaya tha "

Bond ke ascharya ka thikaana na raha, vah chakit swar me bola," Alfaanse unse milne peter house pahucha tha "

" ji haan "

" magar kaise, kyo m..mera matlab hai ki kya tum bata sakti ho ki ushe kaise pata laga ki ye sab Peter house me hai aur usne inse kya baatein ki "

" maine inke aur Alfaanse ke beech hone vaali poori baatein suni thi "

" mai vistaarpoorvak jaanna chahta hu "

aur dusri taraf transmitter par hi Beauty bani Bond ki jasoos ne Vijay group aur Alfaanse ke beech me hone vaali baatein bata di, yeh bhi ki Vijay group ne saari jaankaari lene ke baad Chemboor ko maar daala hai aur yeh bhi ek rahasyamay blackmailer Chemboor ki laash ko gaayab karne ke baad is group se Kohinoor me chori ka hissa chahta hai.

sambandh vicched karte samay Bond ka chehra poori tarah gambheer tha.

-----------------------------------

mr. M kaafi der tak apne saamne baithe vichaarmagan se Bond ko dekhte rahe. unhe Bond ke bolne ki prateeksha thi jabki transmitter par baat karne ke baad maano Bond kisi dusri hi duniya me gum ho gaya tha, jab mr. M ne uske chehre par hulki-hulki si chinta ki lakeerein dekhi to unse raha nahi gaya aur bole," kya sochne lage Bond "

" aa..haan, s..sorry sir " chounkte huve Bond na jaane kis duniya se nikalkar secret service ke office me aaya, bola," mujhe maamla utna seedha nahi lag raha hai, jitna hum samajh rahe the "

" kya matlab "

" transmitter par jo kuch bhi 003 ne bataya hai, vah aapne bhi suna hai aur vah saari report mujhe is saare maamle me punarvichaar karne ke liye baadhya kar rahi hai "

" hum samjhe nahi "

" Kohinoor ke chakkar me akele Vijay ka group hi nahi, dusre log bhi hai, jaise Chemboor ki laash ke aadhaar par Vijay aadi se hissa maangne vaala blackmailer "

" aur "

" shaayad Alfaanse "

" A..Alfaanse " mr. M ucchal se pade.

" haan " bahut hi shaant aur gambheer swar me Bond ne kaha," is baare me mai itna hi keh sakta hu ki Alfaanse ke baare me Vijay jo kuch bhi soch raha hai vo sach ho sakta hai "

" chalo maan liya ki Irvin se shaadi usne ishi maksad se ki hai, fir... "

" haan, ab to yahi maankar mujhe apni aage ki ranneeti nirdhaarit karni hogi, abhi tak mera dhyaan sirf Vijay ki team tak hi tha, ab Alfaanse aur us rahasmay blackmailer ko bhi dimaag me rakhna hoga, maamla kaafi chakkardaar sa najar aa raha hai "

" tum koyi bhi ranneeti taiyaar karne ke liye swatantra ho "

" vah blackmailer kal raat ko Vijay aadi se milne Peter house pahcuh raha hai, 003 ki taraf se line clear hone ki soochna milte hi mai kal din me Peter house me tape fix kar aaunga, inke aur blackmailer ke beech hone vaali saari vaarta tape ho jaayegi. vah tape inhe Bhartiya jasoos aur Kohinoor ke chakkar me saabit karne ke liye kaafi hoga. bas, inke beech ki vaarta khatam hote hi hum kal raat ko hi inhe Peter house se giraftaar kar lenge "

" yahi theek rahegaa "

" kal aap Peter house ko gherne ke liye poori police force taiyaar rakhiye "

" vah to rahegi hi, lekin.. "

" lekin kya "

" Alfaanse ke baare me tumne kya socha hai "

" ushe watch karne ke liye mai Gardner ki kothi me ek naukar ke roop me pravisht hona chahta hu, saara intjaam aapko karna hai, Irvin aur swayam Gardner ko bhi maalum nahi hona chahiye ki unka naya naukar, naukar nahi balki James bond hai "

--------------------------------

 

[StoryPublisher]

003 ne nanha sa transmitter off kiya, angoothi apne baaye haath ki tarjani me daali aur bathroom ka darvaaja khol diya, bathroom se baahar abhi usne pehla kadam rakha hi tha ki anayaas hi ek jabardast cheek uske kanth se ubal padi.

saara shareer sookhe patte ki tarah kaanp utha tha uska, chehra safed pad gaya tha, hontho ka rang neela aur aankho me khauf ubhar aaya tha.

apne sthaan par jadvat si khadi vah Vikas ko dekhti reh gayi thi.

bathroom ke kivaad ke is taraf khada Vikas ushe khoonkhaar najro se dekh raha tha. is waqt Margret ka chahra patthar ki tarah sakht najar aa raha tha aur aankho me naach rahi thi shaitaaniyat.

ek kshan ke liye 003 bhi hakki-bakki se khadi reh gayi thi, magar agle hi kshan usne bathroom me andar jump lagakar darvaaja band kar lena chaha, lekin ladke ne usse kahi jyada furti ka pradarshan karte huve ek jordaar ghoonsa uske jabde par raseed kar diya.

003 ke kanth se dusri hridyavidarak cheekh nikli.

hava me ucchalkar vah door jaa giri thi.

tabhi gallery me bhaagte kadmo ki aawaj ubhri, aur agle hi pal Vijay, Ashraf aur Vikram hadbadaaye se vaha pahuche, Vijay ne poocha," kya hua pyaare, apni gogiyapaasha ke saath fighting ki reharsal kyo kar rahe ho "

magar ladke ne suna hi nahi.

vah jhapatne ke se andaaj me aage badha, farsh par padi karaah rahi 003 ke kanth se khoon beh raha tha, haath badhakar Vikas ne poori berahmi ke saath uske baal pakde aur ushe uthaata hua kisi khatarnaak bhediye ki tarah gurraya," bol Aasha aunty kaha hai "

Vikram bol utha," p..paagal ho gaye ho kya Vikas, ye Aasha hi to ... "

uska vaakya poora nahi ho saka tha kyonki Vijay ne beech me hi uske munh par haath rakh diya tha, idhar Vikram Vijay ko prashanvaachak najro se dekh raha tha aur udhar Vikas ne apne chehre ki bharpoor takkar 003 ke chehre par de maari.

ek cheekh ke saath 003 ka saara chehra lahuluhaan ho gaya.

palak jhapakte hi Vikas ke haath me ek taaja blade najar aane laga tha. blade ka dhaardaar sira usne 003 ki naak ki jad me rakha aur nirnayak swar me gurraya," yadi tune mujhe fouran Aasha aunty ka pata nahi bata diya to mai ek jhatke se teri naak kaat daalunga aur fir shayad apne se jyada badsurat ladki dhoondhne se bhi tujhe poore London me nahi milegi "

-----------------------------

mr. M se vidaayi ke liye James bond abhi kursi se uthkar khada hi hua tha ki angoothi roopi transmitter punah spark karne laga, Bond ne chounk kar pehle angoothi ki taraf dekha, fir M ki taraf, jabki M swayam chakit mudra me ushe hi dekh rahe the.

ek kshan unhone prashanvaachak mudra me ek-dusre ko dekhte ganvaaya, fir Bond ne bahut tezi se transmitter on kiya, dusri taraf se buri tarah ghabraayi, dard me doobi aur boukhlaayi si aawaaj sunaayi di," hello, hello, 003 reporting, hello "

" mai Bond bol raha hu, kya baat hai, tum itni ghabraayi huyi kyo... "

" s...sab gadbad ho gaya sir, aah.. "

Bond cheekh sa pada," kya hua 003, bolo, kya baat hai "

" y..ye log mera rahasya jaan gaye hai, bathroom se nikalte hi Vikas ne mujhe pakad liya, aah, usne meri naak kaat daali hai sir, kisi tarah inke changul se nikalkar mai punah bathroom me ghus gayi hu, darvaaja andar se band kar liya hai, dusri taraf se ye log darvaaja todne ki koshish kar rahe hai, m..meri madad kijiye sir, ye log mujhe maar daalenge "

Bond ne dhyaan se suna, transmitter par aisi aawajein ubhar rahi thi jaise kuch log kisi darvaaje ko todne ki koshish kar rahe ho.

usne jaldi se poocha," ve tumse kya jaanna chahte hai "

" Aasha ko vaha se hata lijiye sir, ye log mujhse uska paata pooch rahe hai aur jaldi hi ye darvaaja toot jaayega, fir shayad mai us raakshas ki yaatnaao ke saamne sthir na reh saku "

" chinta mat karo 003, tum unhe apne flat ka pata batakar keh do ki Aasha vaha hai, kuch der ke liye to ve santusht ho jaayenge, jyada se jyada tumhaare flat par pahuchenge, tab tak mai Aasha ko na sirf apni kothi se secret service ke kaidkhaane me pahucha dunga balki tumhaare flat par inke swagat ka bhi intjaam kar lunga. ab kisi kism ki yojna banane ka samay nahi raha hai, tum aisa abhinay karo jaise toot gayi ho "

" y..yes sir, darvaaja tootne vaala hai, over and all "

dusri taraf se sambandhvichhed kar diya gaya, jabki Bond transmitter off karta hua M se bola," saare mansoobo par paani fir gaya hai, jaldi kijiye, kuch hi der me ve chaaro 003 ke flat par pahuchne vaale hai, poora intjaam kar dijiye, kisi bhi stithi me ve vaha se bachkar nahi nikalne chahiye, Peter house ko bhi ghirva lijiye, vaha shaayad 003 mile, lagta hai ki bechaari apni naak ganva baithi hai "

" aur tum "

" mai apni kothi par jaa raha hu, Aasha ko yaha mehfooz pahuchana pehla aur sabse mahattvpoorn kaam hai, jaldi kijiye sir "

mr. M ne jhapatkar receiver utha liya aur Bond ne bina kisi kism ki aupcharikta ka pradarshan kiye office se baahar jump laga di.

lohe ke band dwar ke baahar khadi car ka horn do baar baja.

choukidaar ne apni shaktishaali torch on ki aur uske teevra jhaag car ki windscreen par fenke, jab usne dekha ki torch ki roshni se aankhe michmichaane vaale uske maalik James bond hi hai tab usne torch off kar li aur gate kholne ke liye aage badha.

darvaaja khula aur car teevra gati se andar daakhil ho gayi, udhar choukidaar ne darvaaja vaapis band kar diya, udhar car porch ke antim sire par jaakar ruki. darvaaja khula aur Bond teji se baahar nikla.

is waqt vah aavashyakta se adhik furti me najar aa raha tha, laghbhag bhaagta hua vah imarat ka mukhya dwar paar karke hall me pahuch gaya.

hall me maujood kad-kaathi se majboot ek naukar ne kaha," good evening sir "

" evening " kehne ke baad Bond ne poocha," yaha koyi aaya to nahi tha "

" no sir "

" kaidi ke paas koun hai "

" Loving torture room me hi hai sir "

" ushe mere paas bhejo " aadesh dene ke saath hi Bond hall ke saath hi attached bathroom ki taraf badh gaya, majboot kad-kathi ka aadmi uske aadesh ka paalan karne hetu daayi taraf ki gallery me badh gaya, bathroom ke dwar tak pahuchte-pahuchte ekaek hi Bond ko jaane kya soojha ki vah thithka, unchi aawaj me bola," ya thahro, mai swayam hi vaha chalta hu "

fir ve dono gallery me aage badh gaye.

----------------------------------

 

[StoryPublisher]

darvaaje ke baahar khadi car ka horn is baar bhi do baar baja. choukidaar ne jab torch on karke uske jhaag wind screen par fenke to uski khopdi ghoom gayi, kaaran vah drishya tha jishe vah aankhe faade hakka-bakka sa dekhta reh gaya.

vo bhi uske maalik James bond hi the, jo wind screen ke paar driving seat par baithe uski torch se nikalne vaale teevra jhaago se aankhe michmichakar bachne ka prayaas kar rahe the.

choukidaar ki buddhi ulat gayi.

badi teji se ghoomkar usne porch ke antim sirey par khadi car ko dekha, vah abhi tak vahi khadi thi aur yah dekhkar uske hosh ud gaye the ki vah car uske maalik ki nahi thi.

ab usne boukhlakar apni torch ka prakash darvaaje ke baahar khadi car ke bonat par daala aur is car ko pehchaante hi uske hosh ud gaye, kyonki darasal yahi car uske maalik ki car thi. udhar, driving seat par baitha Bond car ki headlight me chamakte na sirf apne choukidaar ko dekh raha tha balki kothi ki seema me porch ke antim sirey par khadi car par bhi uski najar pad chuki thi.

Bond ki chatthi indri ne ushe khatre ka ehsaas karvaaya.

ek jhatke se Bond ne car ka darvaaja khola aur dir hava me lagaayi ek hi jump me vah lohe ke band dwar se gujarta hua dhamm se choukidaar ke saamne jaa khada hua.

boukhlakar choukidaar ne furti se apne kandhe se bandook utaarkar us par taan di aur apne swar ko sakht banane ki bharpoor cheshta karta hua bola," hands up, koun ho tum "

" kya bakte ho Hedrick, mai tumhaara maalik hu, James bond "

" m...maalik, fir vah koun tha "

" koun " Bond ne jhapatkar dono haatho se uska girebaan pakad liya," kiski baat kar rahe ho "

" k..kuch der pehle us car me jo aaya tha "

" kya bakte ho, koun tha vah, kitni der pehle aaya tha aur ab kaha hai "

" v..vah bhi to aap hi the sir, paanch minute pehle hi to aaye the "

" uff, vah mai nahi tha bevkoof, teri baato se lagta hai ki mere makeup me yaha koyi aaya tha, tu dhokha kha gaya, jabki vah car bhi meri nahi hai "

" jaroori to nahi sir ki aap hamesha apni hi car me aaye "

" ab vah kaha hai, kitni der pehle aaya tha "

" p..paanch minute pehle, abhi vah andar hi to hai, magar sahab.. "

uska vaakya poora hone se pehle Bond ne na keval uska girebaan chhod diya balki aandhi-toofaan ki tarah imarat ke andar ki taraf bhaaga, raaste me hi usne apni jeb se revolver bhi nikaal liya tha. is samay Bond har taraf se poori tarah choukas tha.

-----------------------------------

" tum ishe kandhe par laad lo Loving " torture room me maujood Bond ne jallad sareekhe vyakti ko aadesh diya aur Loving naamak us jallad sareekhe vyakti ne bina kuch bhi bole ek button dabaya.

torture chair par behosh padi Aasha ke bandhan khul gaye.

Loving ne ushe plastic ki bani hulki si gudiya ki tarah uthakar kandhe par laad liya, tabhi majboot kad-kaathi ke vyakti ne Bond se poocha," kya aap ishe yaha se le jaa rahe hai sir "

" haan " Bond ka uttar bada hi sanshipt tha.

" kya mai pooch sakta hu sir ki kyo "

" yaha khatra hai, iske saathi yaha pahuch sakte hai "

" oh "

" chalo " Bond ne aadesh diya aur ve teeno torture room se baahar nikal aaye.

sabse aage Aasha ko kandhe par daale Loving tha, uske ek kadam peeche majboot kad-kaathi vaala vyakti aur uske peeche-peeche Bond ek gallery se gujar rahe the, gallery ke antim sirey par cement ki bani seedhiya thi, ye seedhiya gallery ki chhat tak chali gayi thi.

unhe tay karne ke baad ve ek kamre me pahuche.

abhi ve kamre ke khule huve darvaaje ki taraf badh hi rahe the ki darvaaje par kisi jinn ke samaan Bond prakat hua, uske haath me revolver tha.

ek saath teeno maano farsh se chipakkar reh gaye.

darvaaje par khada Bond haath me revolver liye sachmuch kisi jinn ke samaan hi muskura raha tha, uski chamakdaar aankhe is waqt Bond par hi sthir thi.

Loving aur uske saathi ke to maano hosh hi ud gaye the.

khopdi naach uthi, samajh me nahi aaya ki ye chakkar kya hai, ek Bond unke saath hai aur dusra revolver liye saamne khada hai, boukhlakar usne apne saath vaale Bond ki taraf dekha jabki usne gurrakar darvaaje par khade Bond se poocha," koun ho tum "

" Bond ki aankho ko dhokha dena itna aasaan nahi Vijay " kutil muskuraahat ke saath darvaaje par khade Bond ne ek-ek shabd ko chabaate huve kaha.

" kya bakte ho "

" ab koyi naatak kaam nahi aayega Vijay, tum fans chuke ho, vaise mujhe hairat hai ki itni jaldi tum yaha pahuch kaise gaye aur vah bhi mere makeup me "

" oh, tum shaayad in logo ko dhokha dena chahte ho " kathit Vijay ne Bond se kaha, fir bola," magar ye log itne murkh bhi nahi hai ki apne maalik ko bhi na pehchaan sake, Loving, pakad lo ishe, yah Aasha ka koyi saathi lagta hai jo ki mere makeup me tumhe dhokha dena chahta hai "

" bevkoofi mat karna Loving " darvaaje par khade Bond ne chetaavni si di," yaad karo, kuch hi der pehle 003 se transmitter par baat karne ke baad yaha se jo Bond gaya tha usne koun se kapde pehan rakhe the, ve jo maine pehan rakhe hai ya ve jo isne pehan rakhe hai "

" kapdo se kya hota... "

magar is baar uska vaakya poora nahi ho saka, kyonki majboot kad-kaathi vaale vyakti ne ushe pakad liya tha aur ushi ka anusaran Loving ne bhi kiya tha, behosh Aasha ko usne farsh par daal diya tha.

Vijay samajh gaya ki ab kam se kam Bond hone ka daava karna to bekaar hai.

darvaaje par khade Bond ke hontho par vijayi muskaan thi, usne vahi khade-khade kaha," tum shaayad bhool gaye Vijay, maine kaha tha ki yadi chupkar, man me durbhaavna liye tumne London me kadam rakha to Bond tumhe bakhshega nahi "

" koun Vijay, kiski baat kar rahe ho mr. Bond "

Bond ke hontho par naachne vaali muskaan aur gehri ho gayi, bola," mai jaanta hu ki ab tumhaare paas yahi ekmatra hathkanda reh gaya hai. ant tak tumhaari koshish rahegi ki mai tumhe Vijay saabit na kar saku, magar tum ek baar fir bhool rahe ho Vijay ki mera naam Bond hai, jo Bond tumhe itni jaldi giraft me le sakta hai, vah ye bhi saabit karke dikha dega ki tum Vijay ho aur Kohinoor ko churaane ki neeyat se London aaye ho "

" pata nahi ki aap kya keh rahe hai mr. Bond, mai Beauty ka saathi jaroor hu lekin mera naam... "

" mujhe jaanne ki jaroorat nahi hai " Bond ne uski baat beech me hi kaat di," apne haath upar utha lo, mai dushman ko baato me uljhakar dhokha dene ki tumhaari neeti se acchi tarah vaakif hu "

idhar Vijay ne haath upar kiye, udhar ushi samay Bond ki peeth par ek jordaar thokar lagi, itni jordaar ki munh se ek cheekh nikalta hua Bond hava me uchhalkar munh ke bal kamre ke farsh par gira aur door tak fisalta chala gaya.

ishi beech revolver bhi uske haath se nikal chuka tha.

yah saara kaam palak jhapakte hi ho gaya tha, Loving aur uska saathi abhi kuch samajh hi nahi paaye the ki Vijay ne bijli ki si furti se ek-ek ghoonsa unke sir par maara.

cheekho ke saath ve kate vriksho se lehraaye.

haalanki Bond bahut teji se uchhalkar khada hua tha, kintu Vijay usse pehle hi farsh par pade uske revolver par jump laga chuka tha, Bond ne abhi Vijay par jump lagaane ka upkram kiya hi tha ki darvaaje se gurrahat ubhri," stop mr. Bond "

Bond ne thithakkar darvaaje ki taraf dekha.

Margret bana darvaaje par Vikas khada tha, haath me hathiyaar ki dukaan se churaayi gayi gun lekar, likhne ki aavashyakata nahi hai ki gun ka rukh Bond ki taraf hi tha, usne kathor aevam sthir swar me kaha," agar tumhaare jism me hulki si bhi harkat huyi mr. Bond to meri ungli ke ek ishaare se tumhaara jism chalni me badal jaayega "

" t...tum " beabs sa Bond daant pees utha.

" yes bete, mai us car ki dikki me tha jo abhi bhi porch ke antim sirey par khadi hai, mera kaam kisi khatre me fanse apne saathi ki madad karna tha, vahi mai kar raha hu "

" guru ko saathi kab se kehne lage ho "

isse pehle ki Vikas kuch kehta, Vijay bol pada," Britain ka mahajasoos thoda crack ho gaya lagta hai Margret, ye mujhe Vijay aur tumhe na jaane kya samajh raha hai "

" mai ek hi goli me iski akal durust kar sakta hu Basheer "

" filhaal iski jaroorat nahi hai " Vijay ne Bond ka revolver apni jeb me daala aur farsh par behosh padi Aasha ki taraf badhta hua bola," hum sirf Beauty ko iski giraft se nikaalne yaha aaye the aur vah kaam laghbhag poora ho gaya hai "

 

[StoryPublisher]

kasmasakar Bond gurraya," mai tumhe kisi bhi haalat me Kohinoor tak nahi pahuchne dunga Vijay "

" mat pahuchne dena " behosh Aasha ko apne kandhe par laadne ke baad Vijay ne bade aaraam se kaha aur darvaaje ki taraf badh gaya, Vikas ke najdeek jaakar usne poocha," choukidaar kaha hai "

" ushe behosh karne me hi to itni der lag gayi "

Bond ka dil chah raha tha ki vah ishi waqt un dono ko kaccha chaba jaaye, kintu kya karta, bhaad sa munh faade gun lagataar ushe ghoor rahi thi, kasmasakar reh gaya vah.

kamre ka darvaaja band kar diya gaya.

Loving aur uska saathi darvaaje ki taraf jhapte, parantu darvaaja baahar ki taraf se bolt ho chuka tha, Bond kamre me maujood phone par jhapta, current gaayab tha.

Bond buri tarah jhunjhula utha, tabhi baahar se ek car start hone ki aawaj is kamre tak aayi.

" Peter house se kya baramad hua sir "

" 003 ke alawa kuch bhi nahi, haan aise chinh avashya mile hain ki kuch log vaha rehte the, parantu ve log koun the ye baat kisi bhi tarah se saabit nahi ki jaa sakti "

" kya vaha se Chemboor ki laash bhi nahi mili "

" nahi "

ajeeb si jhunjhulahat me Bond ne apne daaye haath ka ghoonsa baaye haath par maara aur daant bheenchkar bhunbhunaata sa bola," m..maine kaha tha na sir ki ve log bahut kaaiya hai, haalaat par hamari majboot pakad dekhte hi dekhte khatam ho gayi, ab hame nahi pata ki ve kaha hai, Aasha ke roop me hamare paas vajeer tha, ab vah bhi nahi raha, hum kuch bhi nahi kar sake "

" m..magar Bond, itni jaldi, yah sab kaise ho gaya, ve log 003 ke flat par kyo nahi pahuche, unhe kaise pata chala ki Aasha tumhaari kothi me hai "

" in sawaalo ke jawaab to keval 003 hi de sakti hai, bechaari, is saare jhamele me fanskar vah apni naak hi ganva baithi, kaash, hum uski information milte hi unhe giraftaar kar lete "

mr. M abhi kuch kehne hi jaa rahe the ki intercom bhinbhina utha, unhone receiver uthaaya, kuch der dusri taraf se bolne vaale ki aawaj sunte rahe aur fir ye kehkar receiver rakh diya ki hum aa rahe hai.

ve apni kursi se uthte huve bole," 003 hosh me aa gayi hai Bond "

bina kuch kahe bina Bond bhi teji se uth khada hua.

5 minute baad ve ek aise kamre me the, jahan ek unche bed par 003 leti thi, sameep hi gale me stethescope vaala doctor khada tha, 003 ki naak par patti bandhi huyi thi, Bond ne usse kaha," report do 003, vaha kya hua tha "

" Vikas mujhse Aasha ka pata pooch raha tha, usne blade se meri naak kaat daali, parantu maine ushe kuch nahi bataya, naak kat te hi mai behosh ho gayi thi "

" k..kya maatlab " Bond ne chounkar poocha," kya naak katne ke baad tumne transmitter par mujhse baat nahi ki thi "

" no sir "

003 ke is jawaab ne dono ko aawaak kar diya, kayi pal tak ve hairatangej drishti se ek-dusre ko dekhte reh gaye aur fir Bond ki aankho me achanak hi aisi chamak ubhar aayi jaise vah sabkuch samajh gaya ho.

jabki mr. M chakit swar me budbudaaye," yeh sab kya chakkar hai Bond, 003 kehti hai ki naak kat te hi vah behosh ho gayi thi jabki transmitter par... "

" ab saara chakkar meri samajh me aa raha hai sir "

" kaisa chakkar "

" jab naak katne ke baad bhi isne Aasha ka pata nahi bataaya aur behosh ho gayi to Vijay samajh gaya ki 003 torture se tootne vaali nahi hai aur tab transmitter par iski aawaaj me Vijay ne baatein karke mujhse maalum kar liya ki Aasha meri kothi me hai "

" oh, 003 ki aawaaj ki itni perfect nakal "

" uska naam Vijay hai sir, vah meri aur aapki aawaj ki nakal bhi itne hi perfect tareeke se kar sakta hai. baharhaal ab haalaat bilkul badal chuke hai, saari gintiya mujhe ek baar fir zero se ginni padegi, aap Gardner ke yaha ek naukar ki jaroorat paida kijiye "

---------------------------------

agle din, dopahar ko prakaashit hone vaala akhbaar padhne ke baad Ashraf ne ek taraf ucchala aur bola," had ho gayi, police ne poora Peter house chaan maara parantu Chemboor ki laash nahi mili "

" milni bhi nahi thi pyaare " Vijay ne kaha.

Vikram ne poocha," kyo "

" Kohinoor me se ek percent hissa chahne vaala hamara saathi vafadaar hai "

uska jikr aate hi ekaek jaise sabko saanp soongh gaya. yah rahasymay vyakti unke liye aatank ka ek ajeeb sa kaaran ban gaya tha, Vikas bola," pata nahi koun hai vah "

" waqt aane par ushe bhi bhugat lenge pyaare " Vijay ne kaha," filhaal jitni badi samasya hamare liye vah hai, utni hi badi Lumad, Bond aur Britain ki police aadi ban gayi hai "

" vah kaise " Vikram ne poocha.

" haalaat bahut badal gaye hai pyaare Vikramaditya, ab unke liye sawaal ye nahi raha hai ki hum koun hai aur kis chakkar me hai, ab unki koshish sirf ushe saabit karke dikhaane ki hogi jo vo jaante hai, atah hame ek-ek kadam phoonk-phoonkar rakhna hai, udhar Bond ko hamare aur Lumad ke beech hone vaali baato ka bhi pata lag gayi hai, sambhav hai ki Lumad ke prati bhi vah satark ho gaya ho "

" isse hum par kya fark pad sakta hai "

" bahut fark padta hai pyaare "

" mai samjha nahi guru "

" yadi Bond Lumad ke prati satark ho jaata hai to ab vah nischay hi kisi na kisi maadhyam se Lumad ki gatividhiyo par najar rakhega, Lumad ka abhiyaan Kohinoor tak pahuchna hai, uske raaste me Kohinoor ke chaaro taraf ki gayi suraksha vyavastha to thi hi, is stithi me Bond bhi uske liye ek bada gatirodh banega. Kohinoor ki chori me Alfaanse ke safal hone ki sambhaavna ksheen pad jaayegi aur jab uski safalta hi sandehjanak rahegi to hamare safal hone ka to sawaal hi paida nahi hota " baat sabke samajh me aa gayi isliye vaha sannata chaa gaya.

is waqt ve London shahar se kareeb dus kilometer door jungle me stithit khandahar me maujood the, ye khandahar kisi jamaane me shikaargaah raha hoga, apni aapraadhik gatividhiyo ko jaari rakhne ke liye is khandahar aur Peter house ki khoj unhone London me aate hi kar li thi.

pehle unhone Peter house ko chuna tha, kintu ab yaani Peter house ka bhed khulne ke baad unhone apna padaav is khandahar me daala tha.

 

[StoryPublisher]

Aasha ko saath liye Vijay, Vikas Bond ki car samet raat ke samay hi Bond ki kothi se seedhe yaha pahuche the, udhar Peter house se yaha pahuche the Ashraf aur Vikram.

Aasha hosh me aa chuki thi, ye jaankar ushe kaafi santosh mila tha ko ab vo apne saathiyo ke beech me thi. Bond dwara kiye gaye torture ki vajah se vo abhi tak nirbal aur jakhmi thi.

is waqt vah khandahar ke ek bheetari kamre me aaraam kar rahi thi.

ve sab ek baramde me baithe uprokt baatein kar rahe the.

sannata kaafi der tak unke beech kundli maare baitha raha, ekaek Vikas bola," agar aapki ijaajat ho guru to ek raay pesh karu "

" ijjajat hai " Vijay ne is tarah kaha jaise kisi baadshah ne apne mulajim ko hukum sunaaya ho.

" ye baat theek hai ki hamari safalta-asafalta crimer uncle ki safalta-asafalta par nirbhar hai parantu fir bhi hame is baare me sochkar hame apna samay barbaad nahi karna chahiye. mai samajhta hu ki crimer uncle ke marg me bhale hi chahe kitne bhi gatirodh utpann ho parantu antatah vah apne maksad me kaamyaab ho hi jaayenge aur hamara maksad unke kaamyaab ho jaane par Kohinoor unse chheen lena hai. atah hame apni yojna ko kaaryanvit kar dena chahiye, kahi aisa na ho ki hum pichad jaaye "

Vijay bola," yeh baat tumne ek laakh take ki kahi hai pyaare "

-------------------------------------

Alfaanse Gardner ke bedroom ke sameep thithka.

bahut hi dhyaan se usne gallery ka nirikshan kiya, dono taraf poori tarah sannata vyapt tha. din ka kareeb ek baja tha aur mr. Gardner kothi se baahar gaye huve the.

bedroom ka darvaaja locked tha.

Alfaanse ne furti ke saath apni jeb se ek chaabi nikaali aur darvaaje ke key-hole me daal di. chaabi ke ghoomte hi click ki hulki si aawaj ke saath lock is tarah khul gaya maano chaabi ishi lock ki ho.

lock khulne ke baad ek kshan bhi ganvaaye bina Alfaanse key-hole se chaabi nikaalkar kamre ke andar sama gaya aur darvaaja usne ishi chaabi ka istemaal karke andar se lock kar liya.

ab vah Gardner ke bedroom me tha.

Alfaanse ne ek najar saare kamre me doudaayi aur ant me aankhe us choti si, kintu behad majboot safe par thithak gayi jo double bed ke daayi taraf, sirhaane farsh ke saath attached thi.

kayi kshan tak Alfaanse safe ko vishesh drishti se ghoorta raha.

fir ekaek hi is tarah chounka jaise kuch yaad aaya ho, vah dabe paanv theek us deewar ki taraf badha jo safe ke saamne thi, is deewar me ek almaari bani huyi thi, almaari ki chhat par vibhinn kism ke kayi khilone rakhe huve the.

Alfaanse ek stool par chadh gaya.

almaari par rakhe khilono me se usne ek gainda utha liya, rubber ka bana hua yah kaafi bada aur akarshak gainda tha. gainde ke mastak par bani aankh ne ushe ajeeb si vichitrata pradaan kar di thi.

gainde ke prashth bhaag yaani pet vaale hisse me ek chain thi.

Alfaanse ne chain kholi aur fir gainde ke andar se ek camera nikala, yah ek chota sa, magar shaktishaali camera tha. ek choti si ghadi bhi camera ke saath fix thi.

camera ke saath fix ghadi me 7 baj rahe the.

Alfaanse ne shutter kholkar camere ke andar se ek film nikaali, jeb se ek khaali case nikaalkar film usme daali tatha ek nayi film jeb se nikaalkar camera ke andar fix kar di aur fir shutter band karne ke baad usne attached ghadi me 9 baja diye.

itna kaam karne ke baad camera gainde ke andar rakha, chain band ki aur almaari ke upar anya khilono ke beech ushi position me rakh diya jisme uske chhedne se pehle tha.

gainda apne maathe par maujood aankh se safe ko ghoor raha tha.

santusht hone ke baad Alfaanse stool se utra, dabe paanv kamre ke darvaaje ki taraf badha aur jeb se chaabi nikalkar ushe abhi key-hole me daalne hi vaala tha ki thithak gaya.

kamre ke baahar ki gallery se kinhi vyaktiyo ke kadmo ki aawajein ubhri thi.

deewar se stakar Alfaanse ne apni saanse tak rok li thi, vah us waqt tak us position me raha jab tak ki band darvaaje ke saamne se gujarkar kadmo ki aawajein gum na ho gayi.

usne roki huyi saanse chhodi.

key-hole se aankh satakar gallery me jhaanka, uske kaan cheenti ke chalne se paida hone vaali aawaj ko sunne tak taiyaar the. poori tarah se aashvasht hone ke baad hi usne lock khola, gallery me aaya aur baahar ki taraf ka lock punah band kar diya.

andar se lock kholne aur baahar se lock band karne me usne mushkil se teen minute ka samay ganvaaya tha, chaabi ko jeb me daalkar vah masti ke saath seeti bajata hua gallery paar karne laga.

us waqt vah ek hall me pahucha tha jab ek naukar se uska aamna-saamna hua, naukar ne ushe dekhte hi sammanit swar me poocha," kuch pesh karu sahab "

" Irvi kaha hai "

" apne kamre me hai sahab, kahi baahar jaane ki taiyaari kar rahi hai "

" mai udhar hi jaa raha hu, ek cup coffee taiyaar karke le aao " kehne ke baad usne naukar ka jawaab sunne ki koyi cheshta nahi ki aur tej kadmo ke saath hall paar karke apne kamre ki taraf badh gaya, kamre me pravisht hote huve Alfaanse ne poocha," kaha jaane ki taiyaari hai Irvi "

" shopping karne, tum bhi chalo na " dressing table ke saamne baithi Irvin ne kaha.

" sorry Irvi " Alfaanse bed par laghbhag girta hua bola," meri tabiyat theek nahi hai, thodi der aaraam karunga "

" k..kyo, kya hua " brush haath me liye vah uske najdeek aa gayi.

" vishesh kuch nahi, bas sir me hulka sa dard hai "

" to leto, mai sir daba deti hu "

" oh no Irvi, bahut halka sa dard hai, tum kyo disturb hoti ho, maine coffee ke liye keh diya hai, peekar kuch der ke liye aankhe band karunga to theek ho

jaayega, tum jaao "

" sach keh rahe ho na "

" bilkul sach, accha ye batao, mere liye kya laaogi "

" jo tum kaho "

bas, kuch der unke beech me ishi kism ki baatein hoti rahi, naukar Alfaanse ko coffee de gaya, kuch hi der baad Irvin taiyaar hokar shopping ke liye chali

gayi.

bistar par adhleti avastha me pade Alfaanse ne aaraam se coffee khatam ki. fir teji se utha aur kamre ka darvaaja andar se band kar liya.

na keval darvaaja balki saare roshandaan aur khidkiya bhi usne anadar se band kar liye the, kamre me andhera chaa gaya tha.

Alfaanse ne furti se film dekhne vaala ek parda stand par khada kiya, uske saamne fix kiya us projector ko, jiske jariye film dekhi jaati thi. apni jeb se gainde

ke andar se nikaali gayi film nikaalkar projector me fix ki aur usne button dabakar projector on kar diya.

parde par ek silent rangeen film chal rahi thi.

stand par fix parde par bedroom ka drishya bilkul spasht najar aa raha tha, vishesh roop se double bed aur uske sirhaane rakhi huyi safe.

projector ki charkhi dheere-dheere ghoom rahi thi, saath hi ghoom rahi thi us par chadhi huyi reel, kintu parde par maujood drishya me koyi parivartan nahi

aa raha tha.

thodi der baad parde par mr. Gardner najar aaye.

aankho me jaane kya aasha liye Alfaanse unhe dhyaan se dekhne laga, parde par ve kapde utaarte najar aa rahe the, fir ve screen se baahar nikal gaye, jab

punah screen par aaye to unke jism par night suit tha.

dekhte hi dekhte ve bed par late gaye.

aur aage ki saari film me mr. Gardner soye huve hi the, reel khatam ho gayi. Alfaanse ke chehre par jaane kyo niraasha ke bhaav ubhar aaye, vo bechaara nahi

dekh saka tha ki parde par chalne vaali is film ko darvaaje ke key-hole se sati ek rahsyamay aankh ne bhi dekha hai.

---------------------------------

 

[StoryPublisher]

club ka naam tha Gotakhor club.

haalanki is club me ve sabhi kaam hote the jo kisi bhi club ke kaaryakram me hote hai. parantu gitakhori club ka ek vishesh aur aisa manoranjan tha jo

London ke kisi anya club me nahi tha. atah is club ke sadasya aksar vahi log bana karte the jo gotakhori me vishesh dilchaspi rakhte ho.

club ke paas gotakhori ki anek poshake tatha oxygen ke cylinders the. club ke jis bhi sadasya ka jab jee chahe gotakhori ki poshak pehne, peeth par cylinder

laade aur Tames nadi me chalaang laga de.

jab tak jee chahe Tames ki gehraaiyo me kisi jaljeev ki tarah athkheliya karta rahe.

saaptaahik chande ke alawa sadasyo se gotakhori ka koyi pound nahi liya jaata tha. haan, un logo se se gotakhori ki keemat li jaati thi jo club ke member

nahi hote the.

yaani ki club ki taraf se baahari vyaktiyo ke liye bhi gotakhori ka prabandh tha. parantu unse prati ghante ke hisaab se poshak aur cylinder ka kiraaya liya

jaata tha.

yeh club ki aay ka ek accha saadhan tha, kyonki pratidin bahut se baahari vyakti club se poshak aur cylinder lekar gotakhori kiya karte the.

prati sandhya ki tarah aaj bhi club ke baahar poshak tatha cylinder prapt karne ke liye baahari vyaktiyo ki line lagi huyi thi aur ishi line me 9ve number par

Vijay khada tha.

is waqt Vijay ke Basheer vaale chehre ke upar makeup ki ek aur parat thi.

is samay vah gore rang, neeli aankho tatha sunahre baalo vaala britisher najar aa raha tha, thodi par french cut daadhi thi aur naak kuch choudi si najar aa

rahi thi.

number aane par register me usne apna naam Lords likha.

15 minute baad usne laal rang ki gotakhori ki poshak pehan rakhi thi, peeth par oxygen cylinder tha aur mastak par bahut hi choude frame vaala gotakhori

ka chashma.

Tames ke kinaare par pahuchkar usne ek najar dhyaan se kinaare se kaafi door hatkar parantu Tames ke samanantar panktibadh si khadi un dher saari

imarato ko dekha, uski najar ek paanch manjili imarat par thithak gayi.

is imarat ke mastak par lage board par likha tha-- bank sansthaan.

aankho se hi vijay ne Imarat se lekar Tames tak ek saral rekha kheenchi, gotakhori ke chashme ko aankho par fit kiya aur Tames ke swachh jal me chalaang

laga di.

ab vah paani ke andar tair raha tha.

uske alawa paani ke andar kayi aur gotakhor athkheliya kar rahe the, parantu kisi ki bhi taraf dhyaan diye bina Vijay kisi sansanaate huve teer ke samaan

Tames ke tal ki taraf utarta chala gaya.

nadi ke tal me jagah-jagah chikne aur bade-bade patthar pade huve the.

Vijay ne kaskar ek patthar ko pakad liya aur khud ko bahaav ke saath behne se roka, is stithi me khud ko sthir karke usne chaaro taraf dhyaan se dekha.

tej bahaav ke baavjood tal par pade bhaari-bhaari patthar tas se mas nahi ho rahe the, itni gehraayi me aaspaas ushe koyi anya gotakhor bhi najar nahi aa

raha tha.

vah aashvasht sa hua.

darasal itni gehraayi me koyi saadharan gotakhor utar bhi nahi sakta tha. ve log jo gotakhori sirf manoranjan ke liye karte the, nadi ke tal tak pahuchne ka

khatarnaak kaam kyo karte.

bahaav me fanskar ve kisi bhi patthar se takra sakte the. aisi avastha me kisi ke bhi jakhmi ho jaane, gotakhori ki poshak fat jaane, chashma toot jaane ya

oxygen cylinder ke hi foot jaane ka khatra rehta tha isliye saadhaaran gotakhor tal tak pahuchne ka khatra nahi uthaate the.

acchi tarah se aaspaas ka nirikshan karne ke baad Vijay ne vo patthar chhod diya aur ab vah khud ko tal ke samanantar rakhkar kinaare ki deewar ki taraf

tairne laga.

vah swayam ko Tames ke tal se ek gaj upar rakhe huve tha.

kisi machhli ke samaan tairta huva vah sheeghra hi Tames ki ek deewaar ke sameep pahuch gaya aur fir deewar ke sahare-sahare, tal se ek gaj upar rehkar

vah bahaav ke viruddh tairta raha.

beech-beech me vah apni waterproof wristwatch me samay bhi dekhta jaa raha tha.

lambe samay tak bahaav ke viruddh lagataar tairte rehne ke kaaran Vijay kaafi thak gaya tha, saans phool gayi thi isliye sameep hi pade ek patthar ka

sahara lekar khada ho gaya.

paanch minute usne apni ukhdi huyi saans ko niyantrit karne me kharch kiya.

fir patthar ki back se nikalkar tairta huva deewar ke sameep pahucha tatha deewar ko ajeeb dhang se thokne-peetne laga.

kabhi vah deewar ko thokar maarta to kabhi ghoonsa.

andaaj kuch aisa tha jaise dekh raha ho ki deewar kitni majboot hai.

kam se kam ek ghante tak deewar ke sahare-sahare tairat huva apni majbooti ko parakhta raha aur fir usne phosphorus se deewar me ek jagah cross ka

nishaan laga diya.

phosphorus se bana cross door se hi saaf chamak raha tha.

cross ka yah nishaan usne deewar par jaha lagaaya tha, vah sthaan nadi ke tal se keval do feet upar tha aur itna kaam karne ke baad Vijay kuch is tarah

paani ko cheerta huva satah ki taraf badha jaise cross ka ye nishaan lagaane hi vah yaha aaya tha.

sheeghra hi vah Tames ki satah par najar aaya aur fir nadi se baahar nikalne ke liye kinaare ki taraf tairne laga. kinaare tak pahuchte-pahuchte usne ek aise

vyakti ko gotakhori ki poshak pehne Tames me koodte dekha, jishe dekhte hi uske jism me jhurjhuri si doud gayi.

Tames me koodne vaala vah vyakti James bond tha.

----------------------------

 

[StoryPublisher]

" iska matlab ye hua guru ki aap nishaan laga aaye ho "

" beshak "

" magar kya jaroori hai ki ye nishaan bank sansthaan ke theek seedh me hi ho"

" jis hisaab se humne naap-tolkar nishaan lagaaya hai us hissab se to bilkul seedh me hi hona chahiye "

Vikram bola," yadi nishaan bilkul accurate jagah nahi hoga to accurate ke aaspaas jaroor kahi hoga, ab hame apni isse aage ki kaaryavaahi par vichaar karne

chahiye "

Ashraf ne samarthan kiya," Vikram theek keh raha hai "

" aage ki kaaryavaahi par vichaar karne se pehle hame ek aur baat par vichaar karna hoga "

" vah kya " Aasha ne poocha.

" gotakhori ka shouk apne Bond pyaare ko bhi hai "

sabhi ek saath chounk pade," k..kya "

" ji haan, jab hum Tames se baahar aa rahe the to humne apne in mrignayno se dekha ki gotakhori ki poshak pehne James bond ne Tames me jump lagaayi hai,

baad me apne tareeke se humne maalum kiya to pata laga ki Bond club ka sadasya hai aur hafte me teen din gotakhori jaroor karta hai "

" bantadhaar " Vikram badbadaaya.

Ashraf bola," kambakkht ye aadmi hai ya jinn, jaha dekho pahuch jaata hai "

laghbhag sabhi ke chehro par samaan chinh ubhar aaye the. aankho me vahshat ke halke se bhaav bhi the, fir bhi khud ko kaafi had tak sambhaalkar Vikas

ne kaha," magar is baat se hame itna aatankit hone ki jaroorat nahi hai, jis tarah dusre log gotakhori karte hai, vah bhi karta rahe "

" kya tum uski tulna saadharan logo se karte ho "

" aisa nahi hai guru, magar... "

" magar kya "

" kya ushe khwaab chamkega ki hum Tames ke andar koyi surang bana rahe hai "

Aasha boli," Vikas theek keh raha hai Vijay, nadi ke andar se surang banaaye jaane ki kalpana to koyi virla bhi nahi kar sakta, swayam humne nahi ki thi.

jab tumne nadi me se surang banane ki ghoshna ki thi to humme se koyi us par yakeen nahi kar paaya tha. hum sabhi samjhe the ki tum hamesha ki tarah

koyi atpata sa mazaak kar rahe ho. parantu jab tumne yakeen dilaaya ki tum hamesha ki tarah serious ho to hum sabko laga ki nischay hi tumhaare dimaag

ka koyi pench dheela ho gaya hai, itne tej bahaav vaali nadi me se surang banaye jaane ki kalpana bhala koun kar sakta hai "

" mai to abhi tak vishvaas nahi kar paa raha hu ki ye surang ban paayegi " Vikram bola.

" charcha surang ki nahi pyaaro, Bond ki chal rahi thi, apne diljale ne kaha tha ki Bond ko khwaab nahi chamkega, beshak ye baat sach hai. vah hargij

kalpana nahi kar sakega ki hum Tames ke andar se surang bana rahe hai. meri baat par gour farmaaiyega, aisa vah keval tab tak nahi soch paayega jab tak ki

ushe koyi aadhaar nahi mil jaata "

" matlab "

" aadhaar milte hi vah saara maajra samajh sakta hai aur koyi bahut chota sa point bhi uske liye aadhaar ka kaam kar jaayega, Bond unme se hai jo band

lifafa dekhkar uske bheetar ka majmoon yu ka yu bata sakta hai "

" yaani "

" Tames ke aaspaas ya nadi ke andar usne hame dekh liya to nischay hi pehchaan jaayega aur yadi usne humme se kisi ko bhi pehchaan liya to fir duniya ki

koyi taakat ushe ye pata lagaane se nahi rok sakegi ki hum vaha kya kar rahe the "

" yaani ki saara kaam hame poori satarkta ke saath karna hoga "

" hum mahaj yahi kehna chahte hai "

" theek hai guru " Vikas ne sabka pratinidhitv karte huve kaha," saari kaaryavaahi ke douraan hum sab jaroorat se jyada satark rahenge "

" nisandeh "

" jaha tum nishaan lagakar aaye ho, vaha deewar kaisi hai "

" mittidaar, beech-beech me se patthar bhi nikalne chahiye "

" to fir drill machine ka prabandh kiya jaaye "

" hamari sabse adhik aur mahttvpoorn jaroorat drill machine hi hai, uske bina nadi ke andar se surang banane ka shriganesh nahi ho sakta "

" drill machine, machino ki kisi bhi dukaan se khareedi jaa sakti hai "

" dukano par milne vaali machine to kaam kar jaayegi, parantu uska drill hamare liye kisi kaam ka nahi hoga, hame kharaad machine par taiyaar kiya gaya

special drill chahiye "

" kya matlab " Aasha ne poocha.

" drill motoryukt machine me fix us suye jaisi vastu ko kehte hai jo kisi bhi deewar me chhed kar sakti hai, machine me jitne jyada vyaas ka drill fix kiya jaayega deewar me utne hi vyaas ka chhed ban sakta hai aur baazar me jyada se jyada 2 inch ka vyaas drill mil sakta hai, jabki hame kam se kam ek foot vyaas ke drill ki jaroorat hai. nadi ki deewar me hame chhed nahi karna hai balki poori ek surang banani hai "

" ye special drill bhala hum kaha se laayenge "

" kharaad machine par itne bade drill ban sakte hai, magar bante isliye nahi hai kyonki sadharantaya itne bade drills ki kabhi kisi ko jaroorat nahi padti. log drill machine ka istemaal deewar me chhed karne ke liye to karte hai lekin surang banane ke liye nahi "

" to kya hame ye special drill kisi kharaad par taiyaar karvaana hoga "

" yahi ekmatra raasta hai "

" m...magar isse to hum logo ki najro me aa sakte hai, sabse pehle to kharaad machine vaala hi poochega ki hum itne bade drill ka kya karenge. ajeeb baat hone ki vajah se vah iska jikr kisi aur se bhi kar sakta hai aur agar failti huyi baat police tak pahuch gayi to.... "

" sabse badi samasya yahi hai pyaare jiska hal hum sabko milkar sochna hai " Vijay ke is vaakya ke baad un paancho ke beech sannata chaa gaya, sabhi ek-dusre ka munh taakne lage jaise kisi ko kuch na soojha raha ho.

is waqt ve khandahar ke ek aise kamre me baithe the jiski chatt ka ek bada hissa na jaane kitne varsho pehle gir chuka tha. kamre ke andar baithe-baithe hi aakash ko dekha jaa sakta tha. is waqt unke beech ek bahut moti mombatti jal rahi thi.

aakash par taare timtima rahe the.

mombatti ke ird-gird baithe ve uprokt baatein kar rahe the. mombatti ki lo kaanp rahi thi aur uske saath ki kaanp raha tha unke chehre par maujood peela prakash. aur fir unke beech chhaaye is sannate ko bhadd ki ek jordaar aawaj ne tod daala.

ek saath sabhi chounkar ucchal pade.

kamre me koyi badi hi bhaari vastu giri thi aur jab is vastu par Aasha ki najar padi to na chahte huve bhi uske kanth se ek bhayankar cheekh ubal padi.

saara khandahar jaise is cheekh se jhanjhana utha.

shesh chaaro ke munh se cheekh to nahi nikli lekin Vijay sahit un sabke roye jaroor khade ho gaye the, dil dhak-dhak karke dhadakne lage the kyonki kamre me padi vah bhaari cheej kuch aur nahi balki ek laash thi.

Chemboor ki laash.

 

[StoryPublisher]

un sabhi ki drishti laash par aise chipak kar reh gayi, jaise kisi jaanvar ki laash par giddh ki drishti chipak jaati hai. sabhi ki aankho me khauf ki halki-halki si parchaaiya naach rahi thi.

Vikas ne chehra uthakar chhatt ke toote huve hisse ko ghoora, laash ushi ke maadhyam se neeche giraayi gayi thi. ekaek Vikas gurraya," koun ho tum, saamne aao "

" hi-hi-hi " vaatavaran me ek bhayanak hansi ki aawaj goonj uthi," is tarah gusse se kyo bulaate hai sahab, pyar se bulaaiye na, hum doude chale aayenge "

Vijay ne unchi aawaj me poocha," tum is waqt yaha kyo aaye ho "

" lijiye janaab, aap to is naacheej ko nimantran dekar bhool gaye, khair, hum yaad dila dete hai. jara apni-apni khoobsurat kalaiyo me bandhi wristwatches me samay dekh le, theek vahi samay hai jo mere aur aapke beech kal raat phone par fix hua tha. haan, milne ka sthaan jaroor badal gaya hai, lekin isme bhi meri nahi, aap hi ki galti hai janaab. mai pehle Peter house hi gaya tha, jab aap vaha nahi mile tab hi mai yaha aaya hu "

" tumhe jo bhi baat karni hai, saamne aakar karo " Vijay ne unchi aawaj me kaha.

" jo hukum, bandaparvar " inhi shabdo ke saath tooti huyi chhatt se ek insaani saaya dhamm se farsh par kood gaya.

ve sabhi chounk pade.

Vikas ne jeb se revolver nikal liya tha kintu usne fire nahi kiya, apne shesh saathiyo ki tarah vah bhi aagantuk ko sthir nigaaho se dekhne laga.

uske poorn jism par chust syaah libaas tha.

chehre par kaala nakaab.

nakaab ke andar se uski aankhen jhaank rahi thi magar prakash mombatti ka hone ke kaaran uski aankho ke rang ko nahi pehchaana jaa sakta tha.

vo sab abhi ushe dekh hi rahe the ki usne Vikas se kaha," ye tamancha jeb me rakh lijiye hujoor, maa kasam hame bahut dar lagta hai "

uski baat par dhyaan diye bina Vikas gurraya," koun ho tum "

" banda saamne hai fir koun ho ka to sawaal hi nahi uthta "

" jyada smart banne ki koshish mat karo " Vikas ki gurrahat kisi bhediye ki si gurrahat me badalti chali gayi," mai tumhaare nakaab ke peeche chhupe is chehre ki baat kar raha hu "

" oh, aapka matlab ye tha, magar gustaakhi maaf kare hujur-e-aala, ye raqeeb aisa nahi kar sakta, kyonki aisa hote hi aap mera ye sundar-salona mukhda dekh lenge "

uske is vaakya aur khaas tour se bolne ke andaaj se Vikas ko itna gussa aaya ki saare jism me ek ajeeb si sansani doudti chali gayi, jee chaha ki trigger dabakar ek aisi goli abhi uske chehre par maare ki uske chehre ke parkhachhe ud jaaye, magar aisa nahi kar saka Vikas, haan, kathor swar me kaha jaroor usne," mai tumhe abhi goli maar sakta hu "

" apna hi nuksaan karenge janaab "

" kya matlab "

" mere jism par maujood ye libaas aur ye nakaab bhi bullet-proof hai, yaani aapki goli mera kuch nahi bigaad sakegi lekin mujhe itna jaroor pata chal jayega ki aap mujhse dosti nahi dushmani chahte hai aur fir aapko meri dushmani ka swad chakhna padega "

" hamara kya kar loge tum "

" mera khayaal hai ki sarkaar mere yaha aagman se aap itna to samajh hi gaye honge ki aap log duniya ki najar se to chupp sakte hai, meri najro se nahi. aap jaha bhi jaayenge mujhe pata chal hi jaayega aur fir kisi bhi sthaan par aapko British police gher legi, mai unhe aisa saboot bhi de sakta hu jisse ve aapko antar-rashtriya adalat me Bhartiya jasoos saabit kar sake "

is baar Vijay bola," aur pyaare, yadi hum sab milkar tumhe ishi waqt yaha daboch le to "

" jo kaam mai karta, vahi mera saathi karega, usse mai kehkar aaya hu ki yadi mai teen ghante tak na pahuchu to vo na sirf saare saboot James bond ke havaale kar de, balki unhe ye soochna bhi de de ki aap log kaha hai "

" iska matlab ye hua pyaare ki tum poori tarah se taiyaar hokar aaye ho "

" taiyaar rehna padta hai hujoor, varna aap jaisi mahaan hastiya to mujhe aise chat kar jaaye jaise chote-chote bacche toffee chat kar jaate hai "

" revolver jeb me rakh lo pyaare diljale " Vijay ne ghoomkar Vikas se kaha," filhaal ye hamare kabje se baahar ki vastu bankar aaya hai "

na chahte huve bhi Vikas ne revolver jeb me rakh li.

" ab bolo pyaare, kya chahte ho tum "

" phone par bata chuka hu hajrat, fir dohraata hu, Kohinoor ki keemat ka ek percent "

" shaayad tum jaante ho ki hum Kohinoor ko bechenge nahi "

" fir bhi uski keemat ka andaaja lagakar aap mujhe ek percent de sakte hai "

" keemat kaise tay hogi "

" mai American sarkar se Kohinoor ka souda karunga, jo keemat vo aank denge, ushi ka ek percent aap mujhe de dijiyega "

" kaafi chaalu kism ke aadmi ho "

" kya kare hujoor, vyaapar me banna padta hai "

" khair, agar hum tumhaara offer sweekar kar le to "

bade hi aatamvishvaas se kaha usne," ye juranvaaji to hujoor ko karni hi padegi "

uske is jawaab par ek baar to Vijay jaisa aadmi bhi bhannakar reh gaya, ek pal tak vo bina kuch bole nakaab se jhaankti uski aankho ko dekhta raha, fir bola," kya tum hamare dwara souda sweekar kar lene ki kisi prakaar ki guarantee chahoge "

" sarkaar haan keh de, yahi sabse badi guarantee hai "

" kay matlab "

" isme matlab ki gunjaaish hi kaha reh gayi hai bandaparvar, aapne guarantee ki baat ki, maine keh diya ki aapki haan hi mere liye guarantee hai, aakhir vyaapar karta hu aur vyaapar me aadmi ki jubaan ka to aetbaar karna hi padta hai "

isme shak nahi ki uske uprokt shabdo ne Vijay jaise kaaiya vyakti ko bhi chakrakar rakh diya tha, apni kism ka ye pehla hi vyakti tha jo is roop me itne confidence ke saath baat kar raha tha varna is kism ke blackmailer aksar hi kisi kism ki guarnatee chahte hai ki jisse samay aane par party apne vaade se na mukre.

kuch bhi sahi lekin is vyakti ke aatamvishvaas ne Vijay ko prabhaavit kiya tha, vo bola," kya tum hamari pol na kholne ke badle me hi ek percent maang rahe ho "

" aur aap kya chahte hai "

" kya is abhiyaan me hamare saath nahi rahoge, matlab ki hamari madad nahi karoge "

" saath rehna aur madad karna do alag-alag cheejein hai, spasht baat hai ki mai aake saath nahi rahunga, haan jo ho sakegi, vo madad mai kar dunga "

" kis kism ki madad kar sakte ho "

" aapko kis kism ki madad chahiye, keh kar dekhiye, yadi mai kar sakunga to jaroor karunga, yadi baat mere vash ke baahar hogi to mai spasht inkaar kar dunga "

" kya tum ek drill ka intjaam kar sakte ho "

" aapko ek foot vyas ki drill chahiye na "