• Hello Friends You can Register on the Forum and by posting you can earn money too.

'Kafan tere bete ka' -- Complete Novel by Vedprakash sharma

  • Thread starter Thread starter StoryPublisher
  • Start date Start date
ek baar fir Vijay ushe dekhte hi reh gaya, uska ye vaakya saboot tha ki ushe unki yojna ke baare me poori jaankaari hai, magar chehre par koyi spasht bhaav paida na karke bola," haan "

" mai drill ka intzaam kar dunga "

" very good, to samjho ki tumhaara ek percent pakka "

" thankyou very much " iske saath hi vah apne pet par haath lagakar is tarah jhuka jaise kisi raja se uphaar milne par koyi mulajim jhukta hai.

Vijay ne Chemboor ki laash ki taraf ishaara karke poocha," magar tum ishe saath liye kyo ghoom rahe ho "

" souda na hone tak iska mere paas hona jaroori tha, ab ye aapke havaale hai, ishe aapne maara hai, atah agar iski laash ko bhi aap hi thikaane lagaye to iski aatma prasann ho uthegi "

projector ki charkhi dheere-dheere ghoom rahi thi aur uske saath hi ghoom rahi thi uske upar chadhi huyi film, shesh kamre me andhera tha aur projector ke saamne stand par fix parde par film chal rahi thi, projector ke peeche khada Alfaanse bahut dhyaan se us film ko dekh raha tha.

film bilkul silent thi.

night gown pehanne ke baad mr. Gardner ne abhi-abhi apne pairo me sleepers daale the aur us waqt projector ke peeche khade Alfaanse ki aankhein buri tarah chamak uthi jab usne parde par Gardner ko us choti si safe ki taraf badhte huve dekha.

Alfaanse ne aankhe padre par gada di.

Gardner ne safe ke number adjust karne shuru kiye, Alfaanse parde par najar aane vaale ek-ek number ko dhyaan se dekhta raha, vishesh roop se prateyek chakri ke us number ko jishe mr. Gardner teer ke nishaan ke saamne adjust kar rahe the, unhone nimn kram me numbers teer ke saamne adjust kiye.

pehli chakri ka 5, dusri ka 7, teesri ka 9, chouthi ka 3, paanchvi ka 2 aur chathi ka punah 5 aur fir unhone safe ka majboot handle pakadkar daayi taraf ghuma diya, safe ka chota sa kintu majboot kivaad khulta chala gaya.

Alfaanse ne safe lock number kanthasht kar liya tha - 579325.

ab parde par safe ka bheetari bhaag spasht najar aa raha tha, safe ke andar laal rang ka ekmatra phone rakha tha, Gardner ne receiver credel se uthaaya aur dusre haath ki ungli se phone par ek number ring kiya, ek-ek number ko Alfaanse ne bahut dhyaan se dekha tha.

Gardner ne 2542591 ka number dabaya tha.

bas, iske baad unhone receiver vaapis credel par rakh diya, vo safe ke najdeek se uthe aur kamre ke attached bathroom ki taraf badhe, parde par Gardner bathroom ka darvaaja kholkar uske andar jaane tak spasht chamke, fir bathroom ka darvaaja unhone andar se band kar liya.

ab parde par Gardner nahi the.

haan, bathroom ka band darvaaja, khuli huyi safe aadi ab bhi Alfaanse ko saaf najar aa rahi thi, 5 minute baad safe ek jhatke se apne aap hi band ho gayi.

saare numbers ko avyavasthit hote Alfaanse ne parde par saaf dekha.

vah samajh gaya ki mr. Gardner tehkhaane me jaane vaali antim seedhi par pair rakh chuke hai.

Alfaanse ne jaldi se switch off kiya, parde par andhera chaa gaya, fir vah saare saamaan ko bahut hi tezi se sametne laga, aaj uske chehre par safalta ki jabardast chamak thi.

vah behad khush tha, shaayad isliye kyonki nahi jaanta tha ki vah rahasyamay aankh is waqt bhi ushe nirantar dekh rahi hai, jisse shayad uski koyi bhi harkat kabhi nahi chupi hai.

-----------------------------------

rahasyamay blackmailer ke chale jaane ke baad sabse pehle in chaaro ne Chemboor ki laash se chutkaara paane ka nischay kiya, khandahar ke peeche ki taraf ke jungle me hi unhone ek kabr khodi aur Chemboor ki laash ko usme dafan kar diya.

is kaam me do ghante barbaad ho gaye the.

nipatne ke baad ve punah ushi tooti huyi chhatt vaale hall me baithe the, ek anya nayi mombatti unke beech rakhi jal rahi thi aur lau se nikalne vaala peela prakash unke chehrro par thirak raha tha.

us hall me kaafi der se chaaye huve sannate ko Aasha ne toda," ab hame kya karna hai Vijay "

" ramayan ka akhand paath karna hai " Vijay ne utni hi gambheerta se kaha jitni gambheertapoorvak Aasha ne prashan kiya tha.

parinaamswaroop na keval Aasha balki Vikram aur Ashraf bhi bura sa munh bana kar reh gaye, Vikas ne avashya kaha," kya ramayan ka akhand paath karne se hame is blackmailer se chutkaara mil jaayega guru "

" filhaal hame isse chutkaara paane ki koyi jaroorat nahi hai "

na chahte huve bhi Ashraf bol pada," kya matlab "

" matlab ye hai pyaare jhaan-jharokhe ki filhaal vah hame kisi prakaar ka nuksaan nahi pahucha raha hai, ulte madad hi kar raha hai, apne iraado me kaamyaab hone ke liye hame sabse jyada drill ki jaroorat hai, aisi jaroorat jishe poori karne ke naam par hum sabne chehre latka liye the aur vah bade aaraam se hamari is jarorat ko poora karne ka vaada karke chala gaya "

" kya yah sochne vaali baat nahi hai guru ki vah hamari madad kyo kar raha hai "

" Kohinoor me se hisse ka laalach kiski khopdi ka diwala nahi nikaal sakta "

" mujhe nahi lagta Vijay ki vah sirf ek percent ke chakkar me hai "

" fir kya lagta hai "

" vah kisi bahut hi sulhji huyi aur sudridh scheme par kaam kar raha hai " Vikram ne shanka vyakt ki," aur uski is scheme ka maksad maatr Kohinoor ki keemat ka ek percent haasil karna nahi ho sakta "

" tumhaare khayaal se kya ho sakta hai "

Vikram se pehle hi Ashraf bol pada," sambhav hai ki hamare aadhaar par usne bhi vahi scheme bana rakhi ho yaani ki vah soche baitha ho ki hamare safal hote hi vah Kohinoor ko humse chheen lega "

" hum paanch hatte-katte mustande kya mitti ke maadho hai "

" haan guru " uttejit sa Vikas ekdum bol pada," hum mitti ke maadho hai "

bade aaraam se poocha Vijay ne," vah kyo pyaare "

" chehre par nakaab pehne vah hamare paas yaha aaya, humse baatein ki, balki kahunga ki vah hame dhamkaata raha, vyangaatmak andaaj me ek tarah se hamara apmaan karta raha, hum paanch the aur vah akela, hamare paas hathyaar the, vah shaayad nihatha hi tha, fir bhi vah humse apni shartein manva gaya aur hum uska chehra tak nahi dekh sake "

" kuch bhi sahi Vijay " Aasha boli," mujhe lagta hai ki vah koyi bahut hi kaaiya vyakti hai, uske baat karne ka andaaj aur vo laaparvaah chaal, uff yaad karke bhi mere to saare jism me jhurjhuri si doud jaati hai, yadi sach poocha jaaye to mujhe bahut dar lag raha hai usse "

jhunjhulaaya sa Ashraf badbadaaya," pata nahi ki ye kambakkht hai koun "

" aur hamare peeche kaha se lag gaya " Vikram ne baat poori ki.

" is kism ke sainkado prashan uth sakte hai yaaro jinka filhaal hamare paas koyi jawaab nahi hai aur jab tak jawaab nahi hai hame koyi choo-chataak nahi karni chahiye. uski prateyek iccha ke saamne jhukne aur har sahrt maankar kaam karte chale jaane me hi hamari bhalaayi hai "

" haan " Vikas gurra utha," jaise ki hamara koyi astitv hi na ho "

" uttejit ho jaane se hamari taakat nahi badh jaayegi pyaare, jara socho ki vah ek second me hamari saari yojna ko choupat kar sakta hai. James bond ko keval ek phone karega vo aur hamare saare mansoobe mitti me mil jaayenge, yojna tinke-tinke hokar bikhar jaayegi "

Ashraf keh utha," ye sach hai, yakeenan vah hamare baare me jaroorat se jyada jaanta hai "

" usse nipatne ke liye aakhir kiya kya jaa raha hai "

" filhaal to kuch nahi kiya jaa raha hai aur mere khayaal se kuch kiya jaana bhi nahi chahiye " Vijay ne bade aaraam se kaha.

" kyo " Vikas ne poocha.

" kyonki na to abhi iski jaroorat hai aur na hi abhi iska samay aaya hai "

" mai samjha nahi "

" jaroorat isliye nahi hai kyonki agar hum har kaam uske kahe anusaar karte rahe to kam se kam tab tak to vo hame kisi bhi kism ka nuksaan pahuchaane ki sochega bhi nahi, jab tak ki vah humse vo laabh na utha le jiski ki vah apeksha kar raha hai, ur kuch karne ka samay isliye nahi aaya hai kyonki filhaal ki paristithiyo me uski madad ke bina shayad hamara safal ho paana bhi sambhav nahi hai "

" to fir kab aayega vah waqt "

" ye sochkar hame pareshaan ya chintit nahi hona chahiye, waqt apne waqt par hi aata hai. matlab ye ki usme ulajhkar hum apne main lakshya aur lumad tak pahuchne ki yojna se nahi bhatakna chahiye "

" matlab "

" filhaal blackmailer ke sthaan par lumad se vichaar-vimarsh karna aur uski gatividhiyo par najar rakhna hamare liye jyada mahattvpoorn hai "

Vikas ne kaha," hamare raaste me anek rode hai, crimer uncle, James bond aur guru aap hi sochiye ki hum sab aapke prateyek aadesh par kaam karne ko taiyaar hai. magar sirf tab tak jab tak ki mujhe lagega ki stithi aapke niyantran me hai "

" aur pyaare yadi tumhe laga ki stithi hamare niyantran se baahar hai to "

" tab mai aapki saari yojnaaye uthakar ek taraf rakh dunga aur apne dhang se kaam karunga " ye shabd Vikas ne poori dridhta ke saath kahe the.

is baar Vijay kuch bola nahi, thode sakht se andaaj me Vikas ko ghoorta raha. vaatavaran thoda tanaavpoorn ho gaya aur fir achanak hi Vijay ko jaane kya soojha ki vo fatafat Vikas ko aankh maarne laga.

Vikas boukhla sa gaya.

-----------------------------

 


Alfaanse London me buri tarah se prasiddh ho chuka tha. is had tak ki London me nivaas karne vaala ek-ek baccha ushe shakal se pehchaanta tha aur uski vajah thi uski shaadi, vishesh roop se chadhat ka vah dhoom-dhadaka jo duniyabhar ke jasoos aur apraadhiyo ne ekjut hokar London ki sadko par machaaya tha.

darasal ab yahi prasiddhi Alfaanse ki raah ka sabse bada roda thi.

ushe aise bahut se kaam karne the jinke baare me vah ye chahta tha ki kisi ko pata na lage ki ve kaam Alfaanse ne kiye hai aur aise hi ek vishesh kaaam se aaj dopahar ke samay gaadi lekar Gardner ki kothi se baahar nikla tha.

us waqt uske paas keval ek suitcase tha.

shaam tak vah picnic manane aaye kisi vyakti ki tarah Tames me snaan karta raha, us waqt kareeb 5 baje the, jab vah apna suitcase liye ek cabin me ghuss gaya.

kareeb 20 minute baad vah cabin se baahar nikla lekin agar sach likha jaaye to vah Alfaanse nahi lag raha tha, huliya poori tarah badle huve tha vah, makeup itna shaandaar tha ki saadhaaran vyakti ushe pehchaan hi nahi sakta tha.

suitcase haath me liye vah parking me pahucha.

dher sarai gaadiyo me khadi apni gaadi par usne aisi nigaah daali jaise ki us gaadi se uska kabhi koyi sambandh na raha ho, sadak par aakar usne ek taxi li, pichhli seat par baithkar driver ko pata bataya aur gaadi aage badh gayi.

40 minute baad taxi Mark street ke ek ilaake me ruki.

Alfaanse ne payment karke taxi vahi chhod di aur fir suitcase haath me liye ek taraf ko badh gaya, 10 minute baad vah ek sankari si gali me maujood puraane se makaan ke saamne khade hokar callbell baja raha tha.

darvaaja ek budhi mahila ne khola, Alfaanse ne ushe dekhte hi kaha," hello Maria "

" hello mr. Target " na jaane kyo Alfaanse ko dekhte hi us buddhi mahila ki aankho me ek ajeeb si chamak aa gayi. ek aisi chamak jaise ushe yaha dekhkar Maria ko laga ho ki ushe bahut bada khajaana milne vaala hai.

Alfaanse ne poocha," kya mr. Volume ghar par hai "

" kyo nahi, aaiye mr. Target, vo aapka hi kaam kar rahe hai " buddhi mahila ka uski aagvani ka andaaj aisa tha jaise ki koyi apne kisi bahut hi mahattvpoorn vyakti ki aagvani kar raha ho. Alfaanse ko ek sankari si gali me gujaarne ke baad vah ek kamre me le gayi.

is kamre me ek atyant hi buddha vyakti mej ke peeche ek kursi par baitha apne kaam me vyast tha. mej par ek table lamp rakha hua tha aur uske holder me fanse 200 watt ke bulb ka prakash chaaro taraf bikhra pada tha.

mej par ek bahut hi khoobsurat sa lagne vaala rangeen photograph pada hua tha. idhar-udhar bikhre huve the kaanch ko tarashne vaale vibhinn aujaar.

buddhe vyakti ki umra 80 ke aaspaas thi aur uske saare baal safed ho chuke the aur naak par vah mote lenses vaala ek chashma rakhe huve tha. kisi tej dhaar aujaar se vah cricket ki gend jaise sheeshe ke thos padarth ko taraash raha tha.

buddhe Volume ka dhyaan bhang hua.

usne najar uthaakar dekha aur Alfaanse par drishti padte hi bola," oh, mr. Target, aao, dekho, mai aap hi ka kaam kar raha hu "

" thankyou " kehta hua Alfaanse mej ke is taraf padi huyi ek kursi par baith gaya.

Alfaanse ko dekhkar khud Volume ke chehre par bhi vaise hi bhaav ubhar aaye the jaise Maria ke chehre par abhi tak maujood the.

Alfaanse ne sawaal kiya," aakhir kab tak taiyaar ho jaayega ye "

" sirf ek hafta aur lagega, dekho, jara khud hi dekho ki mai kis had tak tumhaari iccha ki cheej bana raha hu " kehne ke saath hi usne ek haath se photograph aur dusre haath se thos sheeshe ki vah gend si uthakar Alfaanse ki taraf badha di.

Alfaanse ne dono vastuve hath me le li, photograph laghbhag us gend jaisi hi kisi vastu ka tha aur yaha hum apne paathko ko yah bata dena jaroori samajhte hai ki vo photograph Kohinoor ka tha aur Volume kaanch ka ek nakli Kohinoor bana raha tha.

kaafi der tak Alfaanse nakli Kohinoor aur photograph ki tulna karta raha, vah bahut hi bareek najar se uski tulna kar raha tha. usne Volume ko ve kuch asamantaaye batayi jo ushe najar aa rahi thi, jawaab me Volume ne kaha," inhi asamantaao ko door karne ke liye to mai tumse ek hafta aur maang raha hu "

" uski mujhe fikr nahi hai, lekin mujhe hu-ba-hu yahi cheej chahiye "

" cheej bilkul yahi milegi mr. Target lekin.. "

" lekin "

" d..darasal jaha tak mera khayaal hai ye photograph kisi bahut hi keemati heere ka hai aur aap mujhse ishe keemati heere ka duplicate taiyaar karva rahe hai "

" dekho mr. Volume " ekaek hi Alfaanse ka lehja bahut hi sakht aur khurdura ho gaya," aapse mai pehle bhi keh chuka hu ki mai koun hu, ye photograph kiska hai ya mai iska duplicate kyo taiyaar karva raha hu aadi aise hi sainkado sawaalo ke baare me sochne ka kaam tumhaara nahi hai, is kaam ki tumhe poori keemat mil rahi hai aur tumhe keval us keemat se matlab hona chahiye, is kism ke sawalo ke jawaab se nahi "

" aap pehle meri baat poori sun le, uske baad hi agar aap kuch kahe to behtar hoga "

kathor si drishti se ushe ghoorte huve Alfaanse ne kaha," bako "

" m..mera khayaal hai ki aap kisi ko photograph vaala heera dene ke badle me duplicate dekar usse rakam ainthne ki yojna banaye huve hai "

" chalo maan liya ki aisa hi hai, fir "

" bas, mai yahi kehna chahta hu ki aap apni is scheme me safal nahi honge "

" kyo "

" kyonki kaanch aur heere me jameen-aasmaan ka antar hota hai, itna bada heera jo bhi khareedega vo poori jaanch-padtaal karega aur mai daave ke saath keh sakta hu ki bhale hi dekhne me yah bilkul us heere jaisa hi lage parantu ishe choote hi koyi bhi vyakti bata sakta hai ki ye heera nahi balki kaanch hai "

" yah sab sochne ka kaam mera hai " Alfaanse ka lehja shushk ho utha.

" aap theek keh rahe hai kintu maine ye baat mahaz isliye spasht ki hai ki kahi kal aap mujhe iske liye dosh dene lage, kehne lage ki mere dwara taiyaar kiya gaya heera kisi ko dhokha dene me saksham nahi hai. haan, dekhne maatr se mera duplicate is heere jaise hi najar aayega, yadi photograph kheenchi jaaye to vo bhi theek aisa hi hoga "

" mujhe keval ishi guarantee ki jaroorat hai "

" us par mere dwara taiyaar kiya gaya duplicate bilkul khara utarega "

" thankyou, aur suno, ab is baare me tum kuch nahi sochoge ki mai is duplicate ka kya karunga "

" theek hai, vah sab baatein to maine apni stithi spasht karne ke liye hi kahi thi "

Alfaanse ne vishay badla," to ek hafte baad ye bilkul taiyaar milega "

" ji haan, kya aap kuch laaye hai "

Alfaanse ne suitcase khola, Maria aur Volume ki buddhi aankho me chamak ubhar aayi, vaisi hi chamak jaise khajaane ko dekhkar Alibaba ki aankho me ubhri hogi.

-------------------------------------------------

uske darvaaje se nikalte hi Maria ne jaldi se mukhya dwar ki chitkhani chadhaayi aur furti se ghoom gayi. bahut hi tezi se choti si gallery paar ki usne, uske buddhe jism me is waqt gajab ki furti thi, vaisi hi jaise kisi 16 saal ki ladki ke jism me ho sakti hai.

bhaagti huyi vah kamre me pahuchi.

buddha Volume paaglo ki tarah dollars ki ek gaddi ko gin raha tha, mej par paanch gaddiya padi huyi thi, unhe dekhte hi Maria naach si uthi.

Volume ki taraf vah lapakti huyi boli," maza aa gaya Volume darling, hum dhanvaan ho gaye hai, ab hamare saare sapne poore ho jaayenge "

" abhi to aur dega ye " Volume khushi ke kaaran kaanp raha tha.

" hum aish karnege darling, khoob aish " kehne ke saath hi vah Volume se jaa lipti, Volume ne bhi gaddi chhodkar ushe apni baaho me bhar liya aur fir unke buddhe honth jud gaye, kuch is tarah jaise ki yah unki suhaagraat ho.

ek lambe chumban ke baad Volume ne kaha," dekho, mai kehta tha na darling ki mai ek kalakaar hu, abhi tak kisi ne meri kala ko pehchaana nahi hai, jis din koyi kadrdaan mil gaya us din hum malamaal ho jaayenge, Target kala ka paarkhi hai "

" oh, Volume darling, tum hajaar saal jiyo " prem deewani si hokar Maria usse lipat gayi. apne lambe daampatya jeevan ka anand aaj unhone pehli baar hi mehsoos kiya tha, mej par padi gaddiyo ne unke jeevan me ras ghol diya tha, pagla se gaye the ve aur is tarah se athkheliya karne lage jaise ki teen-ager lover ho.

ve us waqt bhi apni athkheliyo me hi vyast the jab achanak callbell baj uthi, ve ekdum se chitakkar alag ho gaye.

" koun ho sakta hai " Maria ke munh se nikla.

" hoga koyi aas-pados me rehne vaala chuha, darvaaja kholkar ushe tarkaao "

" ye gaddiya daraaj me rakh lo " kehne ke saath hi Maria kamre ke darvaaje ki taraf badh gayi, kyonki tab tak callbell dusri baar baj chuki thi, Volume jaldi-jaldi gaddiyo ko daraaj me rakhne laga.

udahr jab gallery paar karne ke baad Maria ne makaan ka mukhya dwar khola to saamne chamakdaar neeli aankho vaala angrej yuvak khada tha.

" kahiye " Maria ne poocha," aapko kisse milna hai "

" mr. Volume se "

" kya kaam hai "

" mujhe unse ek khaas kaam hai "

" sorry, is waqt ve bahut vyast hai, aap unse agle hafte miliye " kehne ke baad Maria abhi darvaaja band karne hi vaali thi ki yuvak achanak hi baaj ki tarah jhapat pada. Maria ne cheekhne ke liye munh faada lekin bechaari ki cheekh halak me hi dabi reh gayi.

yuvak ka faulad jaisa haath dhakkan bankar uske munh par chipak gaya tha.

cheekh halak me hi ghutkar reh gayi thi.

uske bandhano me jakdi Maria chatpata kar uske bandhno se nikalne ka praayas kar rahi thi aur ye prayaas bhi vah keval chand minute hi kar saki thi kyonki yuvak ne uski kanpatti ki koyi aisa nas daba di thi jiske parinaamswaroop uske kanth se ek hichki si nikli aur fir vah ekdum nischal hokar yuvak ki baaho me jhool gayi.

yuvak ne uske behosh jism ko furti ke saath dheere se gallery me lita diya.

usne darvaaja andar se band kiya aur fir tezi se gallery paar kar gaya, kamre me ghusne se pehle vah apne coat ki jeb se revolver nikal chuka tha.

yuvak ne kamre me kadam rakha aur ushe dkehte hi Volume ke chehre ka rang fakk se ud gaya, boukhlahat me cheekh sa pada vah," k..koun ho tum "

" jyada jor se cheekhne ki koshish mat karo " yuvak ka lehja atyant hi sard tha," varna agar ye revolver cheekh pada to fir tum kabhi nahi cheekh sakoge "

Volume ke chehre par havaiya udne lagi thi, buddha shareer kaanpne laga, aankho me khauf ke saaye najar aane lage the, badi himmat karke vah bola," aap koun hai aur Maria kaha hai "

" gallery me padi hai "

" kya...tumne ushe "

" abhi sirf behosh kiya hai "

" a..aap kya chahte hai "

Volume ke uprokt sawaal ke jawaab me aagantuk ne ekdum se kuch nahi kaha balki revolver ko uspar taane satark drishti se kamre ka nirikshan karne laga.

aagantuk ki drishti mej par thithak gayi thi aur us taraf dekhte waqt uske aankho me aisi bhaav ubhre the jaise ki vah sabkuch samajh gaya ho.

Volume ne himmat karke punah poocha," aapne apna uddeshya nahi bataya "

" vah aadmi, jo mere aane se kuch hi der pehle yaha aaya tha, koun tha "

is sawaal ko sunkar Volume kaanpkar reh gaya, kuch bol nahi saka vah.

" jawaab nahi diya tumne " aagantuk ki aawaj me bhediye ki si gurrahat thi.

" ji.ji unka naam Target hai "

ushi sakht swar me agla prashan," yaha kyo aaya tha "

" j..ji ye mai aapko nahi bata sakta "

aagantuk ke ghoorne ka andaaj aisa ho gaya jaise ki abhi Volume ko kaccha chaba jaayega, bola," keval is baar mai tumhe maaf kar raha hu, yadi dusri baar tumne mere kisi sawaal ke jawaab me aise atpate shabd kahe to behichak mai tumhe goli maar dunga, samjhe "

Volume ko kaato to khoon nahi, peela pad gaya tha bechaara.

aagantuk ne Volume ko kuch jyada aatankit karne ke liye apne haath me dabe revolver ko kuch is tarah se ghumaaya ki Volume ka dhyaan us taraf jaaye," ye na samajhna ki mai Target ko jaanta nahi hu ya mujhe yah nahi maalum ki vah yaha kyo aaya tha, mai jaanta hu ki vo tumse us photograph me maujood heere ka duplicate banva raha hai "

" y..yadi aap sabkuch jaante hi hai to mujhse kya.. "

uski baat ko beech me hi kaatkar aagantuk ne kaha," kya tum jaante ho ki vah photgraph kis heere ka hai "

" n..nahi "

" target uska duplicate kyo taiyaar karvaana chahta hai "

" usne mujhe kuch bhi nahi bataya hai, is kism ke mere kisi bhi sawaal ke jawaab me vah hamesha yahi kehta raha hai ki mujhe keval apni rakam se matlab hona chahiye "

" is kaam ka vah tumhe kya de raha hai "

" 10 hajaar dollar "

" hu " aagantuk ne ek lamba hukaara bhara, jaise ki vaastustithi ko samajhne ki koshish kar raha ho, bola," to yah 10 hajaar dollar ki cheej vah mujhe dus laakh me bechna chahta hai "

" j..ji " Volume kahe bina nahi reh saka," mai kuch samjha nahi "

" usne muhse dus laakh me is heere ka souda kiya hai jiska photograph tumhaare paas hai, is haramjaade ki neeyat par mujhe pehle se hi shak tha isliye hi mai uspar najar rakhe huve tha, ab baat saaf ho gayi hai ki vah mujhe duplicate heera dene ke chakkar me hai "

" maine to usse pehle hi kaha tha ki koyi bhi khareed-daar mere is duplicate ke chakkar me nahi aayega "

" vah apne aapko bahut jyada smart samajhta hai " aagantuk badbadaya aur fir achanak hi lehja badalkar bola," mera naam mr. Fischer hai aur mai heero ka vyapaari hu, agar tum chaho to mai tumhe Target se jyada rakam de sakta hu "

" k..kya matlab "

" mai tumhe 15 hajaar dollar dunga badle me tum mere yaha aagman ko gupt rakhoge, Target se nahi kahoge ki mai yaha aaya tha aur uski saari yojna samajh chuka hu "

" m..mai kisi chakkar me to nahi fans jaaunga na "

" bilkul nahi, balki haan, agar tumne aisa nahi kiya to na keval nuksaan uthaaoge, balki mumkin hai ki apni jaan se bhi haath dho baithoge "

" m..mai samjha nahi "

" agar tumne ushe mere yaha aagman aur in ho rahi baato ke baare me kuch bhi kaha to samajh sakte ho ki jo duplicate tum taiyaar kar rahe ho vo uske liye bekar ho jaayega aur vah tumhe ek dollar bhi nahi dega, us stithi me mere dwara tumhe kuch diye jaane ki sambhaavna to hai nahi. vah samajh jaayega ki ab mai ye heera usse khareedne vaala nahi hu. is prakar apni yojna ke choupat ho jaane ki avastha me vah aape se baahar ho sakta hai aur yah sochkar ki uski yojna ko tumhi ne choupat kiya hai, tumhe maar bhi sakta hai "

Volume ki taange kaanpne lagi.

 


" agar tum ushe kuch nahi bataoge to 15 hajaar dollar mai tumhe dunga aur vah bhi ishi bhram me rahega ki is nakli heere ko asli samajhkar mai usse khareedne vaala hu, atah kaam poora hone par tumhe tumhaari rakam dekar nakli heera lekar khushi-khushi yaha se chala jaayega. ab dono stithiya tumhaare saamne hai, khud hi faisla kar lo ki tumhe kya karna hai "

" a..aapki baat maankar mai kisi jhamele me to nahi fans jaaunga "

" fansoge nahi, balki yu kaho ki jis jhamele me tum fans chuke ho, usme se meri baat maankar hi nikal sakte ho "

" t..theek hai, mai aisa hi karunga "

" good " kehne ke saath hi aagantuk ne jeb me haath daala aur dollars ki ek gaddi nikalkar uski mej par daal di," baaki rakam tumhe tab milegi jab tum duplicatre taiyaar karke Target ko doge "

----------------------------

" kaha chale gaye the bhai " Alfaanse ko dekhte hi sofe se uthkar mr. Gardner bole," Irvin to tumhe dhoondhti-dhoondhti paagal ho gayi "

" aisa kya ho gaya " muskurata hua Alfaanse uske najdeek jaa pahucha.

" baitho " Gardner ne sofe ki taraf ishaara kiya," ye to ushi se poochna ki kya hua tha, hame to sirf itna pata hai ki Irvin shaam se tumhaare liye pareshaan hai "

kuch kehne ke liye Alfaanse ne abhi munh khola hi tha ki,

" aa gaye mahashay " Irvin ki karaari aawaj hall me goonji, Gardner aur Alfaanse ne chounkar udhar dekha, gallery ko paar karne ke baad tamtamyi si Irvin tez kadmo ke saath unki taraf badh rahi thi.

Alfaanse ke hontho par badi hi pyaari si muskaan ubhar aayi.

jabki Irvin dhamkti huyi theek Alfaanse ke sir par aa khadi huyi aur uske munh se nikli adhikaar bhari gurrahat," kaha gaye the aap "

" picnic par gaya tha bhai "

" akele "

" haan "

" kyo "

" kyo ka kya matlab, bada ajeeb sawaal hai "

" mujhme kaante lage hai kya "

" oh " Alfaanse thahaka laga utha," tumhaara matlab ye tha "

" jab aap akele picnic par jaane ki aadat nahi chhod sakte the to mujhse shaadi kyo ki, kya mai bevkoof hu jo paaglo ki tarah aapko dhoondhti firi. jab mai shopping ke bahane baahar chalne ke liye kehti hu to aapke sir me dard ho jaata hai aur fir akele gaayab ho jaate hai. kaha picnic manaayi thi "

" offo bhai, tum to Bhartiya patni ki tarah ladti ho " Alfaanse hans raha tha.

beech me mr. Gardner tapke, bole," kyo nahi ladegi bete, shaadi bhi to Bhartiya riti-rivaajo ke saath huyi hai "

" aap beech me mat boliye daddy, ye mere aur inke beech ka maamla hai " gusse me tamtamaai si Irvin ne chand shole pita ki taraf ucchale aur fir Alfaanse ki taraf palatkar boli," haan to janaab, jawaab nahi diya aapne, jara mai bhi to sunu ki aaj kaha picnic manaayi thi aapne "

Alfaanse ne hanste huve kaha," Tames ke kinaare "

" vaha se kaha gaye the "

" kahi bhi nahi, vahi tha "

" jhooth mat boliye, Tames ke kinaare parking me sirf aapki car thi, aap nahi "

Alfaanse ka dil dhakk se reh gaya, dimaag me ekaek vichaar utha ki kya Irvin ko uske Target vaale roop ka pata chal gaya hai aur kya vah jaan gayi hai ki vo Volume se milne gaya tha, kintu usne sheeghra hi apne dimaag ko niyantrit karke poocha," ye tum kaise keh sakti ho "

" mai khud vaha gayi thi "

" fir "

" fir kya, vaha keval aapki car thi, aap nahi "

" offoh, kya mai car ke andar hi baitha rehta "

" andar nahi janaab, maine aapko car ke baahar dhoondha tha, Tames nadi ke kinaare door-door tak, vaha maujood logo se aapke baare me maalum bhi kiya, sabne yahi kaha ki unhone kaafi der se aapko Tames ke kinaare nahi dekha hai, kareeb ek ghanta car ke paas rehkar maine aapka intzaar kiya "

" pata nahi tumhe kaise nahi mila mai, vahi to tha mai "

" offoh, ab chhodo bhi Irvin beti, gussa thok do " Gardner ne unki nok-jhok ka anand lete huve kaha aur fir jor se aawaj lagayi," Merlin "

" j..ji maalik " ek naukar doudta hua hall me aaya.

" freeze me se nikaalkar hamari beti ko kuch thanda pilaao aur Alfaanse ko bhi "

" ji maalik " naukar freeze ki taraf mud gaya.

is naukar ko Alfaanse ne pehli baar hi dekha tha, isliye drishti ushi par chipak kar reh gayi, mr. Gardner bole," dekh kya rahe ho bete, Merlin hamara naya naukar hai, ishe maine aaj hi rakha hai "

Merlin freeze se teen coca-cola nikalkar le aaya tha, Alfaanse ko laga jaise is naukar ko pehle bhi kahi dekha ho.

---------------------------------

" or guru, yadi Volume ne Alfaanse guru ko sabkuch bata diya to " Vijay ki saari baatein bahut dhyaan se sunne ke baad Vikas bola.

" nahi batayega pyaare "

" aap itne vishvaaspoorvak kaise keh sakte ho "

" humne bhi kacchi goliya nahi kheli hai pyaare diljale, jab hum Target bane huve lumad ka peecha karte huve Mark street par pahuche the aur Volume se milne andar chale gaye the to apne dhang se humne maalum kiya tha ki Volume dampati bahut gareeb hai aur jawaani se lekar ab tak hamesha doulat ke liye taraste rahe hai. lumad ke dus hajaar ke chakkar me hi ve is jhamele me fanse hai aur pandrah dene ka vaada karke humne unke saamne aisa daana daal diya hai jishe chuge bina ve nahi reh sakenge aur fir unke dil me humne ye dar bhi baitha diya hai ki yadi unhone hamare vaha aane ke baare me lumad ko bataya to lumad ushe jaan se maar dega "

" vah to mai samajh gaya "

" khuda pehalvaan tumhaara bhala kare, ab to sochne vaali baat ye hai ki isme koyi shak nahi reh gaya hai ki Kohinoor ko churaane ki scheme par apna lumad bahut tezi se kaam kar raha hai, jabki hamari surang banni abhi shuru bhi nahi huyi hai, kahi aisa na ho ki vah hamare vaha pahuchne se pehle hi daanv maar jaaye "

" hame is khatre ke prati poori tarah satark rehna hai "

" rehna nahi hai bete, kaho ki hai, agar nahi hote to chori-chupe lumad ko watch kyo karte "

" keval watch karne se kaam nahi chalega guru "

" to fir kya kare "

" kuch apni scheme ke baare me bhi sochiye "

" sochna kya hai pyaare, sirf drill machine ki vajah se ruke pade hai, vah mil jaaye to kaam shuru kar de "

drill machine ka jikr aate hi sabke mastishkpatal par vah rahasymayi blackmailer ubhar aaya, khaamoshi chaa gayi. unke beech patthar par rakhi mombatti ka peela prakash unke chehro par kaanpta raha, ve khandahar ke us tooti chatt vaale hall me baithe baatein kar rahe the.

Ashraf ne apni wristwatch me samay dekhte huve kaha," samay ho gaya hai, ab tak ushe aa jaana chahiye tha "

" mai haajir hu hujoor " hall me blackmailer ki aawaj goonji.

chounkkar sabhi ne aawaj ki disha me dekha, darvaaja paar karke unhe ek kaali parchaayi si apne najdeek aati huyi dikhaayi di.

parchaayi ke kandhe par koyi bahut badi machine ladi huyi thi.

vah unke najdeek aakar bola," bas mujhme yahi ek aib hai sarkar ki mai waqt ka bahut paaband hu, theek diye huve samay par pahuch jaata hu "

 
jaane kyo uttejnavash Vikas ka saara shareer kaanpne laga, iccha ho rahi thi ki jhapte aur us rahsymayi blackmailer ke chehre se nakaab nochkar fenk de, parantu apni is iccha ko badi sakhti se daba liya usne.

blackmailer jhuka, machine usne jameen par tika di thi.

jabki Vijay ne apni hi tone me kaha," acche baccho ko waqt ka paaband hona hi chahiye "

" shukriya janaab "

" apne shukriya ko jeb me sambhaalkar rakho pyaare, aade waqt par kaam aayega. hame iski jaroorat nahi hai kyonki hamari jeb pehle se hi shukriya se labalab bhari hai "

" dekh lijiye ki machine me laga drill aapke kaam ka hai na "

" bilkul kaam ka hai pyaare " Vijay ne mombatti ki roshni me hi najro se drill ko parakhte huve kaha," isse nadi ki deewar me to kya tumhaare sir me bhi suraakh ban jaayega "

" sir me suraakh isse jara jyada accha banta hai " blackmailer ne jeb se mouser nikalkar dikhaate huve kaha.

" iska kya matlba pyaare "

" sirf ye janaab ki ye pistol aise kayi logo ke siro me surang bana chuka hai jinhone mujhse souda to kar liya kintu waqt aane par jyada smart banne lage "

" chii, chii " Vijay ne bada bura sa munh banaya," bade badbudaar log the ve "

mouser jeb me rakhte huve blakmailer ne bade aaraam se kaha," ummeed hai sarkar ki aap vaise badbudaar log banne ki koshish nahi karenge kyonki is mouser ke shikaar ki laash ko antim sanskaar ke liye bhi koyi nahi milta hai, atah laash me keede pad jaate hai "

is spasht dhamki ko sunkar Vikas tilmila utha, agar ushe khayaal na hua hota ki is waqt jo kuch bhi uske man me aa raha hai vah karne se Vijay guru ki saari yojna dhari reh jaayegi to vah is blackmailer ko kaccha chaba jaata.

khoon ka ghoont sa peekar reh gaya ladka.

jabki Vijay kuch aise andaaj me drill ka nirikshan kar raha tha jaise ki usne blackmailer ke munh se nikalne vaale shabd sune hi na ho, usne aage kaha," ab mai chal raha hu, aasha hai ki aap log kal se apna kaam shuru kar denge "

" tum kaha jaa rahe ho pyaare, hamare saath nahi rahoge kya "

" ji nahi "

" agar apne kaam me hame fir tumhaari jaroorat padi to "

" haalanki mai aapki koyi bhi madad karne ke liye baadhya nahi hu aur fir aapko bhi dusro se madad lekar kaam karne jaisi koyi gandi aadat nahi daalni chahiye. fir bhi yu samajhiye ki mai har pal aapke ird-gird hi kahi rahunga aur aise prateyek avsar par aapki khidmat me haajair ho jaaunga jab vaastav me aapko meri madad ki jaroorat hogi "

koyi kuch nahi bola, jaise ki bolne ke liye kisi ke paas kuch reh hi nahi gaya tha. keval Vikas aisa tha jo bahut kuch kehna chahta tha lekin vo sab kuch apne seene me dafan kiye huve tha.

------------------------------

agle din ki dopahar baarah baje.

mr. Gardner us paanch manjili imarat me stith apne office me baithe kinhi kaagjo me sir khapa rahe the, jiske mastak par likha hai 'bank sansthaan'.

mai Alfaanse ki shaadi me likh chuka hu aur paathak jaante hai ki is imarat aur vishesh roop se is office me us sthaan ke liye raasta jaata hai, jaha Kohinoor rakha hai.

mr. Gardner ka office bilkul gol hai, chamakdaar ispaat ka bana hua, farsh tak ispaat ka bana hua hai, kaksh ki haalat bilkul kisi office ki tarah hi hai.

furniture farsh ke saath attached hai.

kaksh ke beechobeech ek badi mej hai, mej ke us paar mr. Gardner baithe hai aur ek khaali kursi mej ke is taraf hai.

ekaek hi unki mej par rakhi phone ki ghanti gahnghanaayi.

mr. Gardner ne receiver utha liya, bole," hello "

" mai guard number 2 bol raha hu sir " dusri taraf se aawaj aayi.

" kya baat hai "

" aapki beti aur daamaad aapse milna chahte hai "

chounk pade mr. Gardner, bole," kyo "

" kehte hai ki koyi jaroori kaam hai "

" unse kaho ki mai shaam ko ghar par hi baat karunga "

" maine kaha tha sir, magar ve kehte hai ki ishi samay kaam hai "

mr. Gardner chup se ho gaye, jaise kuch soch rahe ho, kuch der baad bole," khair, unhe bhej do "

receiver credel par rakhne ke baad guard Alfaanse aur Irvin ki taraf ghooma, bola," aap jaa sakte hai, cheif office me aapka intjaar kar rahe hai "

" thankyou " kehkar Alfaanse ne Irvin ka haath pakda aur darvaaja paar kar gaya, shayad likhne ki jaroorat nahi hai ki darvaaje par maujood 5 guards ne unhe abhi tak roka hua tha.

ab ve us hall me se gujar rahe the, jaha bahut se clerk baithe vibhinn bank se sambandhit khaate dekh rahe the.

darvaaja paar karne ke baad Irvin ka haath pakde Alfaanse baayi taraf ghoom gaya tatha us hall ko paar karne laga jisme clerk baithe the. sachmuch, khud ko in clerks ki najaro se bachakar hall me se gujarna naamumkin hi tha, hall paar karne ke baad Alfaanse daayi taraf maujood ek gallery me mud gaya.

gallery me tube-lights ka dudhiya prakash bikhra pada tha.

Irvin ka haath pakde Alfaanse bahut hi dhyaan se saari stithi ka jaayja lete huve gallery paar karne laga, gallery me poori tarah se khaamoshi chaayi huyi thi.Alfaanse jaanta tha ki is gallery me ushe kahi computer milega, vah computer jo apne saamne se gujarne vaale prateyek vyakti ka vaastvik naam Gardner ke office me relay kar deta hai, magar kam se kam filhaal ushe is computer se darne ki koyi jaroorat nahi thi.

sheeghra hi ushe computer najar aaya aur ushe bahut dhyaan se dekhte huve Alfaanse bina vichlit huve ya thithke computer ke saamne se gujar gaya.

-----------------------------------

kursi par baithe mr. Gardner bahut dhyaan se theek apne saamne vaali deewar me parakt huyi ek choti si screen dekh rahe the. ekaek hi screen par do naam ubhre, Alfaanse, Irvin.

padhne ke baad mr. Gardner santusht ho gaye, ve jaante the ki jis kshan ye naam screen par ubhar rahe hai, ushi kshan Alfaanse aur Irvin gallery me rakhe computer ke saamne se gujar rahe hai aur ve sachmuch Alfaanse aur Irvin hi hai aur unke makeup me aur koyi nahi hai.

Gardner ne daraaj kholi.

daraaj ke andar poora ek switchboard tha, prateyek switch par a se z tak ke akshar likhe huve the, yaani un switches ki sankhya 26 thi, unhone a button dabaya.

screen se na keval Alfaanse aur Irvin ke naam gaayab ho gaye, balki ek ispaat ka shutter bhi screen par dhak gaya, ab bilkul nahi lagta tha ki us ispaat ke peeche koyi screen hai.

shutter deewar ka hi ek hissa tha.

Gardner ne b switch on kiya, ek anya shutter hata aur vaha ek choti si screen najar aane lagi, mr. Gardner ki drishti us screen par atak gayi.

do minute baad kaksh ke andar bell bajne ki aawaj goonji.

Gardner ne c switch on kar diya.

ab screen par Alfaanse aur Irvin ke chitra ubhar aaye. kaksh ka darvaaja band tha lekin screen ke maadhyam se mr. Gardner darvaaje par khade un dono ko spasht dekh rahe the.

kuch der tak vo dhyaan se unhe dekhte rahe, fir unke dwara b aur c switch off karte hi screen ispaati shutter ke peeche chup gayi aur d button on karte hi darvaaja sarsarakar jameen me sama gaya.

ab Irvin aur Alfaanse unke saamne the.

" aao " Gardner ne muskuraate huve kaha.

office ko bahut dhyaan se dekhte huve Irvin ka haath pakde Alfaanse us tankinuma kaksh me daakhil ho gaya, chaaro taraf dekhta hua vah mej ke sameep pahuch gaya.

muskuraate huve Gardner ne poocha," kya dekh rahe ho bete "

" ajeeb office hai aapka "

" kyo, aisi kya vichitrata najar aa rahi hai tumhe isme " Gardner muskura raha tha.

" deeware, chatt tatha farsh aadi sabkuch eant aur pattharo ka nahi balki ispaat ka bana hua hai, dekhne me ye office lohe ki ajeeb si tanki najar aata hai "

" suraksha jaroori hai bete "

" itni kadi suraksha kis cheej ke liye ki gayi hai "

" tum is office ko saare London ka strongroom keh sakte ho, un banks ke khaato me jitne dollar darj hai, vah saara cash yaha rakha jaata hai, arbo-kharbo dollar, aur us doulat ke liye hi itni kadi suraksha ki gayi hai "

" oh " Alfaanse santusht sa najar aaya.

" baitho "

" m..magar daddy yaha kursi to ek hi hai "

" tum khadi raho, is ek kursi ka matlab hai ki is office me humse ek samay me keval ek hi aadmi mil sakta hai, tum baitho bete "

baithte huve Alfaanse ne poocha," fir aapne hum dono ko andar kyo bula liya "

mr. Gardner ke hontho par ek chanchal muskuraahat ubhar aayi, bole," yeh sochkar ki tum me se kisi ek ko bulaane se shayad vah samasya hal nahi hogi jiske liye tum yaha aaye ho "

" k..ktya matlab " Alfaanse chounk pada.

" tumhaare yaha aane se hum samajh sakte hai ki tumhaare beech me fir jhagda ho gaya hai, faisla karvaane hamare paas aaye ho aur faisla kisi ek ki gair-maujoodgi me nahi ho sakta "

" offofh daddy, aap bade vo hai " Irvin ne pair patke.

apni beti ki is ada par mr. Gardner thahaka lagakar hans pade jabki Afaanse ne kaha," aapne bilkul vipreet anumaan lagaya hai daddy, hum yaha jhagde ki vajah se nahi balki isliye aaye hai kyonki hamare beech sulah ho gayi hai "

" sulah "

" ji haan "

" to fir yaha aane ki jaroorat kyo pad gayi, jab miya-bivi raaji hai to isme kaaji kya karega, ghumo-firo, enjoy karo "

" ushi ki to aapse ijjajat lene aaye hai "

" hum samjhe nahi, pati-patni ko enjoy karne ke liye bhala kisi ki ijjajat lene ki kya jaroorat hai, tumhaari umra hai, majey karo "

" baat darasal ye hai dad ki humne chaar-paanch din ke liye kisi hill station par jaane ka faisla kiya hai "

" oh, to ab London me aapka enjoyment bhi nahi hoga "

" hamara program aaj hi nikalne ka hai isliye yaha aakar aapko inform karne ki jaroorat aan padi, varna inform kiye bina jaana theek nahi tha na "

" vah to theek hai lekin "

Irvin beech me tapki," lekin kya "

" lagta hai ki sulah kuch jyada hi jordar ho gayi hai " Gardner ne kaha aur fir swayam hi is tarah thahaka lagakar hans pade jaise unhone koyi shaandaar chutkula sunaaya ho.

Irvin pair-patakti hi reh gayi.

hanste huve Gardner ne kaha," jaao bhai, jaao. khoob ghumo-firo, hum to chahte hi ye hai ki tum dono khush rahi, itni si baat ke liye yaha aakar tumne apna samay barbaad kiya hai, hamari ijjajat to tum phone par bhi le sakte the "

Alfaanse sochne laga tha ki kahi uske yaha aagman par Gardner kisi prakar ka shak to nahi kar raha hai. kahi yaha aakar usne galti to nahi kar di, magar kam se kam ek baar yaha aana aur is office ki bhougolik stithi dekhna uske liye nitaant jaroori tha.

--------------------------------

 


bank sansthaan ke baahar porch me unki gaadi khadi thi, baahar nikalkar ve gaadi me pahuche, Alfaanse driving seat par pahucha aur Irvin uski bagal me, porch se gaadi nikalkar Alfaanse ne abhi sadak par nigaah daali hi thi ki Irvin ne bade hi pyar se pukara," aashu "

jaane kaha khoye Alfaanse ne hukaar si bhari," hu "

" kya tum pehle bhi kabhi daddy ke office me aaye the "

" n..nahi to " Alfaanse ekdum chounk pada," k..kyo "

" to fir tumhe kaise maalum pad gaya ki imarat ke andar daddy ka office kidhar hai, darvaaja paar karne ke baad tumhe kisi guide ki jaroorat nahi padi, seedhe office me pahuch gaye "

Alfaanse ke dimaag me ek visfot sa hua.

haath-pair sunn se pad gaye aur ek hi pal me paseene ki dher saari boonde uske chehre par ubhar aayi. nischay hi vah ek bahut badi galti kar chuka tha, aisi galti jo sirf uski laaparvaahi ki vajah se hi huyi thi magar vah Alfaanse hi kya jo apne aantrik bhaavo ko chehre par ubharne se na rok paaye, usne ek thahaka lagaya, bola," tum bhi kamaal ki baat karti ho Irvi, kya tumne nahi dekha tha ki ek guard ne ishaare se mujhe bata diya tha ki daddy kidhar baithte hai "

" m..maine to nahi dekha "

" bas, isliye to chakkar khaa gayi "

is prakaar ki do-chaar baatein mila kar aur is vishay ko hansi me udaakar usne Irvin ko to santusht kar diya, lekin uske dil-o-dimaag me mukhya samasya Irvin nahi, khud Gardner aur ve paanch guards the jinki duty mukhya darvaaje par rehti hai.

vah ye sochkar pareshaan tha ki jo baat Irvin ke dimaag me aayi hai vahi baat yadi un paancho me se kisi guard ke ya swayam Gardner ke dimaag me aayi hogi to.

Irvin ki tarah vah aur kisi ko sntusht nahi kar sakega..

Alfaanse ko maanna pada ki vah is ek halki si laaparvaahi ki vajah se bahut badi bhool kar chuka hai.

fir bhi, jo ho chuka tha, Alfaanse ushe vaapis nahi laa sakta tha. haan, man hi man usne ye nischay jaroor kiya tha ab vah prateyek pal sajag rahega, ek pal ke liye bhi laaparvaah nahi hoga, aise bhoolein laaparvaahi me hi hoti hai aur jis mission par vah kaam kar raha hai, halki si bhool bhi us mission ko chinn-bhinn kar sakti hai.

baahar jaane ka ye program usne Merlin ke roop me Bond ko pehchaanne ke baad banaya tha.

ishi tarah ke vichaaro me khoya hua vah gaadi ko kothi me le gaya.

agle 5 minute ke baad kothi ke andar un dono ke kisi hill station par jaane ki taiyaari ho rahi thi. is taiyaari me dusre naukaro ke saath Merlin bhi juta hua tha.

Merlin ki najro se drishti bachakar Alfaanse kayi baar ushe dekh chuka tha aur ab to ye kehna chahiye ki Alfaanse kisi se bhi Merlin ke Bond hone ki shart laga sakta tha.

usne Merlin ke chehre par apne baahar jaane ki pratikriya swaroop utpann hone vaale bhaavo ko padhne ki koshish ki thi parantu ushe uske chehre par koyi vishesh bhaav najar nahi aaya tha.

aata bhi kaise, aakhir uska naam bhi James bond tha.

baahar jaane ka program Alfaanse ne Bond ki vajah se hi banaya tha, ye sochkar ki unke 4-5 din baahar jaane ki baat sunkar Bond bor sa hoga, sochega ki agar Alfaanse Kohinoor ke chakkar me hota to 4-5 din yu barbaad na karta, vo program usne Bond ke dimaag me ye baat bithaane ke liye banaya tha ki ab Alfaanse saadharan insaan aur accha pati bankar apni jindagi jee raha hai.

magar kaifiyat ye thi ki ek bathroom me khade Merlin ke munh se Bond ki aawaj nikal rahi thi, ek chote se transmitter par vah baar-baar keh raha tha," hello..hello mr. M "

" yes " dusri taraf se M ki aawaj ubhri.

" 007 reporting sir, over "

" report, over "

" aaj subah Alfaanse ne achanak hi Irvin ko saath lekar kisi hill station par jaane ka program bana liya hai, mujhe lagta hai ki ye program banavati hai. Alfaanse kisi khaas maksad se kahi jaana chahta hai. atah aap uske peeche kuch jasoos laga de jo uski pal-pal ki report mujhe dete rahe "

" vah kab jaa raha hai "

" taiyaariya jaari hai, mere khayaal se ek ghante me vo nikal jaayega "

" kis hill station par jaa raha hai "

" ye mujhe abhi tak pata nahi lag saka hai '

" theek hai, mai do secret agents ko uski nigrani ke liye niyukt kar deta hu aur haan, abhi tak tum kis nateeje par pahuche, kya tumhe lagta hai ki vo Kohinoor ke chakkar me hai "

" abhi mai koyi bhi dhaarna vyakt karne me asamarth hu "

" aisa kyo "

" kal raat aur aaj subah se us par barabar najar rakhe huve hu kintu usne koyi bhi aisi harkat nahi ki hai jisse mujhe lage ki vo Kohinoor ke chakkar me hai, parantu Irvin aur uski nok-jhonk se mujhe pata laga hai ki vah kal shaam apni gaadi Tames ki parking me khadi karke gayab hua tha, yahi rahsymayi ghatna hai "

" oh, ushe tumpar koyi shak to nahi hua na "

" filhaal to aisa nahi lagta "

Tames ke tal par pahuchne ke baad Ashraf ne khud ko ek bade patthar se jakadkar aaraam kiya tha aur fir tal ke kareeb ek gaj upar rehkar tal ke samanantar hi vah bahaav ke vipreet taira, kuch der ki koshish ke baad vah us sthaan par pahuch gaya jaha uske chaaro saathi pehle se hi maujood the.

paancho ke jism par gotakhori ke libaas the, peeth par oxygen clyinder aur aankho par gotakhori chashme. in chashmo ke maadhyam se ve apne aas-paas ki stithi ko bilkul saaf-saaf dekh sakte the.

ve log jaha ekatrit huve the, ye vahi sthaan tha jaha Vijay ne phosphorus se nishaan lagaya tha, nishaan abhi tak ushi tarah chamak raha tha.

nadi ki is deewar ke sahare ek moti aur majboot rassi ke sirey par bandhi vah drill machine latak rahi thi aur uske saath hi latak rahi thi 1524 volt ki ek battery jo chaaro taraf se ek water-proof kaagaj me band thi, machine aur battery bahaav ke saath-saath dheere-dheere hil rahi thi.

machine aur battery picchli raat ko raat ke andhere me hi rassi se baandhkar ek sthaan par latka di thi. is waqt ve ek vishaal patthar ki jad me baithe the.

paani is patthar ke upar se aur daaye-baaye se hokar gujar raha tha aur jaha ve baithe the vaha bahaav itna kam tha ki ve aaraam se bina kisi ka sahara liye baithe the. unke sameep baithkar hi Ashraf apni fooli saanso par niyantran haasil karne ki koshish karne laga.

dus minute baad achanak hi Vijay ne daaye haath ko mutthi ki shakal dekar angootha upar uthaaya aur jawaab me un chaaro ne bhi turant aisa hi kiya.

ye shaayad kaam shuru karne ka sanket tha kyonki agle hi pal Vikas ne rassi ka vah sira pakad liya jisme machine aur battery bandhi thi, fir vah nadi ki deewar ek sahare is rassi par chadhta chala gaya.

15 minute ki lagataar koshish ke baad Vikas us sthaan par pahuch gaya jaha is rassi ka dusra sira tha, ye sira deewar me bandhi teen vishaalkaay keelo me gada hua tha aur jaha ye keelein gadi huyi thi vaha se paani ki satah mushkil se ek foot upar thi.

ab rassi par latka vah in siro ko keelo se kholne me jut gaya.

kaamyab to vah ho gaya magar is kaam me ushe dus minute lag gaye the.

udhar neeche nadi ke tal me ve chaaro pehle se hi taiyaar khade the, rassi ke dheeli hote hi unhone machine aur battery ko sambhaal liya tha aur bahut hi aahista se ushe tal par rakha. upar rassi se keel ka sampark toot-te hi Vikas ke shareer ko ek jhatka sa laga parantu rassi ke is sirey ko usne chhoda nahi balki majbooti se pakde rakha.

Aasha aur Ashraf ne drill machine ko tal par rakha. ushe bahaav se saath behne se rokne ke liye unhe kaafi taakat lagani pad rahi thi.

Vijay aur Vikram ke haath me rassi thi jishe ve bahaav ke vipreet disha me kheench rahe the aur unhe bhi kaafi taakat lagaani pad rahi thi.

10 minute me unhone poori rassi kheench li.

rassi ke antim sirey ke saath hi Vikas bhi unke najdeek aa gaya tha. aur fir in paancho ne milkar drill ko uthakar vishaal patthar ki jad me rakha.

ab patthar ke saaye me machine aur battery aaraam se rakhe the.

Vijay ne apni gotakghori ke libaas ki jeb me se mote-mote taar nikaale aur fir baaki sab un uljhe huve taaro ko suljhaane me madad karne lage. battery ke dono plugo ke kareeb unhone do chote-chote chedd kiye. taaro ke nange siro ka sambandh un plugo se kiya, fir unhi taaro ke dusre siro ka sambandh machine se.

sambandh jodne ke baad unhone jaise hi battery on ki, halki si gadgadahat ke saath machine chaalu ho gayi aur usme laga ek foot vyaas ka drill viduyt gati se ghoomne laga, machine ko chaalu dekhkar sabhi ki aankhen chamakne lagi.

do minute tak machine chalti rahi aur fir Vijay ke ishaare se Asharf ke dwara battery off karte hi machine bhi band ho gayi.

is beech apni jeb se chaaku nikaalkar Vikas us lambi rassi ke 4 barabar tukde kar chuka tha aur ve chaaro tukde machine ki chaaro taango me baandh diye gaye the.

paancho ne milkar machine ko uthaaya ur us sthaan par le gaye jaha ki cross ka nishaan tha, tej bahaav ke kaaran apna kaam karne ke liye unhe na sirf aavashyakta se dugni-tiguni shakti lagaani pad rahi thi balki samay bhi jyada lag raha tha.

machine me lagi drill ki nok ko theek cross par rakha gaya.

machine unhone tal par tika di. 4 vyakti ushe vahi pakde khade rahe, Vijay machine ki ek taang me bandha rassi ka sira daayi taraf le gaya, jeb se ek vishaalkaay keel aur bhaari hathoda nikaala, keel deewar me gaadi aur fir rassi ka ye sira usne us keel me baandh diya.

is prakaar machine ke chaaro pairo se smabandhit rassi ke chaaro sirey 4 bhinn dishaao me baandhe gaye, ab bahaav ke saath machine ke behne ka koyi dar nahi tha.

atah chaaro ne machine chhod di.

bahaav ki vajah se abhi bhi machine thodi hil rahi thi.

Vijay ne tal par pade dher saaere chote-chote patthar uthakar machine ke pair ke chaaro taraf rakhne shuru kar diye. uske saathiyo ne bhi yahi kram jaari kiya to kuch der baad machine ke chaaro pair chote-chote pattharo se ghire huve the.

ab bahaav ke prabhaav se machine me halka sa bhi kampan nahi tha.

machine ko vahi chhodkar ve vishaal patthar ki jad me chale aaye, battery yahi rakhi thi, dono taaro ki madad se battery aur machine ka sambandh sthaapit tha.

Vijay ke ishaare par Aasha ne battery start kar di, paani me ghurr-ghurr ki hulki si aawaj goonjne lagi, machine chaalu ho gayi aur drill ghoomne laga aur ghoomta hua vah drill ab deewar me dhansne laga.

deewar se mitti nikalkar paani ke saath behne lagi, paani matmaila hone laga.

battery ke sameep, patthar ki jad me baithe paancho apne kiye ki kaarastaani dekhne lage, viduyt gati se ghoomta hua drill deewar me dhansta jaa raha tha.

ek ghante tak bina kisi vighn ke machine chalti rahi.

fir achanak hi machine ke chalne se utpann hone vaali aawaj me fark aa gaya. is parivartan ko mehsoos karke sabne prashanvaachak nigaah se Vijay ki taraf dekha.

Vijay ne haath badhakar battery off kar di.

machine band ho gayi.

fir vah tairta hua machine ke sameep pahucha, waterproof kaagaj ke upar se hi usne ek button off kiya. drill ek jhatke me deewar se nikalkar machine me sama gaya.

ab Vijay ko deewar me ek foot vyaas ka bhatt spasht najar aaya, jisme drill ke nikalte hi paani bar gaya tha, Vijay ne us bhatt me haath daala, kohni tak uski kalaayi bhatt me chali gayi.

bhatt ke andar vaale hisse me Vijay ko kisi patthar ka ehsaas hua.

spasht tha ki drill ke raaste me vah patthar aa gaya hai, isliye machine ke chalne se utpann hone vaali aawaj me fark aa gaya hai.

kaafi mehnat ke baad Vijay ne us patthar ko nikal liya.

button on karte hi drill punah ek jhatke ke saath bhatt me ghuss gaya, uske ghuste hi saara paani bhatt se baahar nikal aaya, udhar Vijay ne vahi se ishaara kiya aur idhar Vikram ne battery start kar di. machine punah chalne lagi aur drill apna kaam karne lagi.

ab machine se utpann hone vaali aawaj saamanya thi.

------------------------------------

 


Alfaanse aur Irvin ko hill station gaye huve aaj choutha din ho gaya tha, Merlin ke roop me James bond abhi tak mr. Gardner ki hi kothi me maujood tha. parantu ab ushe lagne laga tha ki is kothi me rehkar vah apna samay barbaad karne ke alawa aur kuch nahi kar raha hai.

kaaran thi ve reports jo Alfaanse ko watch karne vaale jasoos bhej rahe the.

kehna padega ki Bond ke liye vo khabarein ekdum niraashajanak aur neeras thi. prateyek report me ve yahi kehte ki ve yaha ghoomne gaye, vaha khaana khaaya, vaha beer pi, ityadi. report me ek bhi point aisa nahi hota tha jisse Bond ki us khabar ko bal mil paata ki Alfaanse Kohinoor ke chakkar me hai.

jasooso ki report ke mutabik Alfaanse 5 minute ke liye bhi Irvin se alag nahi hota tha. Bond ne baar-baar poocha ki kahi Alfaanse ko khud par najar rakhe jaane ka aabhaas to nahi ho raha hai, har baar yahi report aayi ki aisa nahi hai.

vah Irvin ke saath apni hi duniya me mast hai.

itna jyada ki vah Irvin se najar hatakar apne aaspaas dekhta bhi nahi hai.

transmitter par milne vaali inhi reprots ne Bond ko vichlit sa kar diya tha. vah ye sochne par baadhya ho gaya tha ki kahi vah Alfaanse par shak karke apna samay vyarth to nahi ganva raha hai.

kahi aisa to nahi hai ki uska dhyaan Alfaanse par kendrit karke Vijay aadi apne hi kisi chakkar me lage ho, sochte-sochte ushe apna yahi vichaar jyada uchit lagne laga, paksh me tark bhi milne lage.

jaise ki ye, Vijay-Vikas ke baare me koyi bhi soochna nahi aayi thi. picchle ek hafte se unki koyi gatividhi hi najar nahi aa rahi thi.

kya ve apna mission beech me hi chhodkar Bhaarat lout gaye hai.

Bond acchi tarah jaanta tha ki kam se kam Vijay Vikas aisi cheej nahi hai. fir, kyo ve kisi bill me chupe shaant baithe hai, kya is hafte me unhone kuch nahi kiya.

Bond ye bhi nahi maan sakta tha.

vo jaanta tha ki na hi Vijay ek hafte tak shaant baithne vaala hai aur na hi Vikas. ek baar ko to Bond ye maan sakta tha ki Vijay shaant baith sakta hai kyonki vo tarkbuddhi se sochne vaala aur neeti se kaam nikalne vaala jasoos hai parantu vah jaanta tha ki Vikas in sab baato ko nahi maanta. yadi ushe jid chadh jaaye to fir vah Vijay ki bhi ek nahi sunega aur Bond hargij ye nahi maan sakta tha ki vo ek hafte tak shaant baith sakta hai.

nischay hi vah shaitaan apne lakshay ki taarf badhne ke liye kuch na kuch kar raha hoga.

magar kya.

koyi aisi ghatna bhi nahi ghati hai jisse unki kisi bhi gatividhi ka koyi aabhaas mile.

yahi sab sochte-sochte Bond ke sir me dard hone laga, vah ye nischay nahi kar saka ki yaha rehkar Alfaanse ko watch kare ya fir baahar jaakar us khatarnaak tukdi ki khoj kare.

ushe lag raha tha ki yadi Alfaanse Kohinoor ke chakkar me hota to itne mahattvpoorn dino ko hillstation par barbaad na kar raha hota.

uska dimaag kund sa ho gaya tha.

usne socha ki agar saare maamle par vah fresh dimaag se soche to shaayad kisi nateeje par pahuch paaye. fresh hone ke liye ushe gotakhor club ka smaran ho aaya. usne mehsoos kiya ki yadi vah jee bharkar gotakhori kare to uska dimaag bilkul fresh ho jaayega. parantu gotakhori ke liye ushe yaha se apni kothi jaana hoga, vaha apne us Merlin vaale roop ko tyaage aur Bond bankar fir club jaaye. nischay karke vah uth khada hua.

------------------------------

nadi ke garbh me surang banane ka jo kaam chal raha tha, vah chouthe din bhi bina kisi vighn baadha ke samaapt ho gaya tha. ve teen feet vyaas ki teen gaj gehri ek gali si bana chuke the aur is gali me hamesha paani bhara rehta tha.

kal se surang ke kaam me ek naya mod aana tha.

pratidin ki tarah ve ek-ek karke nadi se nikalne lage, sabse pehle Ashraf nikla tha aur tames se baahar aate hi vah ek cabin me ghuss gaya, gotakhori ke liye jo poshaak ushe aaj mili thi uski peeth par 5 likha hua tha.

yaani ki vah poshaak 5 number thi.

cabin me jaakar usne khud ko poshak, cylinder aur gotakhori ke chashme aadi se mukt kiya, dus minute baad vah cabin se baahar nikalkar counter ki taraf badha. pratidin ki pratikriya hone ki vajah se ab vah is saari kaaryavaahi ka abhyast ho chuka tha.

ab ushe ye cylinder aur ye libaas conuter clerk ke register me entry karvakar jama karvaane the.

shaayad likhne ki jaroorat nahi hai ki uska chehra is waqt ek angrej yuvak ke facemask ke peeche chupa hua tha, is chahre par gulaabi rang ki jhuki huyi

moonche aur frenchcut daadhi thi. uski naak ke dono nathuno me do chote-chote spring lage the jisse naak kuch fooli si najar aati thi, aankho ka rang gehra

neela tha.

garj ye thi ki ek najar me Ashraf ko pehchaana nahi jaa sakta tha.

parantu libaas jama karvaane ke baad vah jaise hi muda, vaise hi uske pairo tale se jameen khisak gayi, na chahte huve bhi thithak sa gaya vah, taange

kaanp si uthi.

uski drishti James bond par padi thi aur anjaane me vahi chipakkar reh gayi thi.

Ashraf hakka-bakka reh gaya, apne sthaan par kisi statue ke samaan khada reh gaya tha vah, kayi pal tak kinkartavyavimudh sa Bond ko dekhta raha.

udhar, apne sthaan par thithakkar Bond bhi ushe dekh raha tha.

ekaek hi Ashraf ko khayaal aaya ki vah ye kya bevkoofi kar raha hai, atah ek jhatke se usne apne kadam aage badha diye, Bond par se najre hataayi aur aage

badh gaya.

us waqt usne saanse tak rok li jis kshan ushe Bond ke sameep se gujarna pada.

vah gujar gaya, surakshit.

James bond ne ushe roka nahi tha.

magar Ashraf ko aisa lag raha tha ki Bond abhi bhi ushi jagah khada ushe hi ghoor raha hai, apni peeth par Bond ki drishti chubhan ushe mehsoos ho rahi

thi aur yah chubhan kisi suyi ki si chubhan ke samaan thi.

anjaane me hi uski chaal tej ho gayi.

buri tarah dhak-dhak karta uska dil uski peeth par maano hathode ki tarah chot kar raha ho, jee chah raha tha ki vah bhaage, badi teji se bhaagta chala

jaaye yaha se.

magar tabhi uske vivek ne uske kaan me kaha," aisa karna bevkoofi hogi "

fir bhi gallery ke ek mod par mudne ke baad vah swayam par saiyam nahi rakh saka aur sachmuch bhaagne ke se andaaj me club ko paar karne laga, saamne

hi club ka mukhya dwar tha.

baahar nikalne ke liye vah jaldi se us taraf lapka.

aur mukhya dwar par pahuchne ke baad vo ek baar apne peeche dekhne ka lobh chhod na saka aur us waqt to uske jism ke sabhi masamo ne dher saara

paseena ugal diya jab usne Bond ko apne peeche lapakte dekha.

Ashraf ke tirkan kaanp gaye.

ab ushe is baat me koyi shak nahi reh gaya tha ki Bond ushe pehchaan gaya hai aur yah sacchayi hai ki dil me ye vichaar uthne ke baad Ashraf ne club ke

mukhya dwar se baahar jump laga di tatha is baar vaastav me kisi dhaavak ki tarah doudne laga.

vah ret par doud raha tha, sadak abhi door thi.

daayi taraf, paas me hi parking thi, jaha bahut si cars khadi thi.

Ashraf ko laga ki Bond ke mukhya dwar tak pahuchne se pehle vah car tak nahi pahuch paayega, aisa mehsoos karte hi usne tezi se parking ki taraf doudna

shuru kar diya.

sheeghra hi vah ek Neele rang ki car ke peeche sama gaya.

car ki body se peeth tikakar nidhaal sa vah apni ukadhi huyi saanso ko kaabu me karne ka prayaas karne laga, vah jaanta tha ki abhi vah khatre se baahar

nahi hai isliye usne jhaankar club ke mukhya dwar ki taraf dekha.

vaha ushe James bond najar aaya.

Bond ki saanse fooli huyi thi aur vah bahut hi dhyaan se apne chaaro taraf uchak-uchak kar aur vishesh roop se sadak ki taraf dekh raha tha.

car ke peeche se jhaankar dekh raha Ashraf khuda se dua kar raha tha ki Bond ka dhyaan uski taraf na jaaye.

ekaek Bond ne kisi ko roka, Ashraf ne Bond ko usse baat karte dekha.

ushe laga ki Bond usse pooch raha hai," kya tumne kisi aadmi ko bhaagte huve dekha hai "

" haan " Ashraf ne us aadmi ki gardan kuch aise hi andaaj me hilti dekhi.

fir Ashraf ko laga jaise Bond ne poocha ho," bhaagkar vah kidhar gaya tha "

" idhar " Ashraf ko aisa hi laga jaise us vyakti ne ye kaha ho, kyonki vah saaf dekh raha tha, vah vyakti is neeli car ki taraf ishaara karke hi kuch keh raha

tha.

Bond bhi is taraf dekhne laga.

 
Ashraf romachit ho utha, uske saare shareer me cheentiya si doudne lagi. ab ushe laga ki James bond aasaani se uska peecha chhodne vaala nahi hai.

Bond abhi tak parking ki taraf hi dekh raha tha

fir, us waqt to Ashraf ko apni mout sir par mandraati huyi najar aayi jab usne Bond ko us vyakti se vida lekar parking ki taraf badhte huve dekha. kayi

kshan tak to Ashraf ki samajh me hi nahi aaya ki vo kya kare aur jab usne rengkar car ke neeche sama jaane ka faisla kiya to ek adhed umra ki mahila ki

cheekh sunkar ucchal pada.

udhar mahila ko cheekhti dekhkar Bond bhi chounka tha.

mahila ko apne bilkul najdeek dekhkar Ashraf hadbada gaya tha.

aatankit si mahlia ushe is haalat me dekhkar cheekh padi," who are you "

aur Ashraf ek kshan bhi ganvaaye bina kisi babue ki tarah ucchla, koyi anya raast na dekhkar vah jeb se pehle hi revolver nikaal chuka tha, yahi revolver

usne mahila ki kanpatti par rakh diya aur yah dekhkar us taraf lapakta hua James bond thithak gaya.

Ashraf paaglo ki tarah cheekha," stop Bond, stop. otherwise I will kill her "

Bond ke chehre par beshumaar uttejna naach uthi.

" hands up, I say hands up " Ashraf punah chillaya.

daant peeste huve Bond ne apne dono haath upar kar liye.

Ashraf ne fir chetaavni di," agar tumne koyi bhi harkat ki to mai ishe goli mar dunga "

" mai tumhe chhodunga nahi " Bond gurraya.

Ashraf jaanta tha ki mout theek uske sir par mandra rahi hai, jitni jyada der vo vaha rukega utna hi khatra badh jaayega, raahgeer rukkar ye tamasha dekhne

lage the, Ashraf ne adhed mahila ke haath me fansa chaabi ka guccha dekh liya tha.

mahila ki sitti-pitti gum thi, kaato to khoon nahi.

aankho me ummeed liye vo Bond ko dekh rahi thi ki shayad vah uski kuch madad karega, parantu bechaara Bond, bahut kuch chahkar bhi vah kuch nahi kar

paa raha tha, kanoon ushe Ashraf ko pakadne ke liye kisi begunaah ki bali dene ki ijjajat nahi deta tha.

vah kuch bhi nahi kar saka aur vah mahila to Ashraf ke aadesho ka paalan karne ke liye baadhya thi. vo neele rang ki car ushi ki thi, Ashraf ke hukm par

usne car ka lock khola.

mahila ko cover kiye huve car me samate Ashraf ne chetavani di," agar tumne mera peecha karne ki koshish ki to mai is mahila ko goli mar dunga. tum jaante

ho Bond ki car drive karni mujhe bhi aati hai "

car start hokar aage badh gayi.

car drive mahila nahi baalki uski kanpatti par rakha Ashraf ka revolver kar raha tha.

neeli car ke parking paar karte hi Bond aandhi-tufaan ki tarah parking me khadi apni car ki taraf lapka aur agle hi kshan uski car neeli car ka peecha kar

rahi thi. uske chehre par bahut hi sakht bhaav the, apni jeb se revolver nikalkaar usne car ki side vaali seat par rakh liya tha.

yadi vah chahta to apni car ko mahila ki car se aage lejaakar mahila ki car ka raasta avrudh kar le to ye uske baaye haath ka khel tha, lekin vah aisa nahi

karna chahta tha, kyonki vah jaanta tha ki aisi avastha me Ashraf sachmuch hi us mahila ko maar daalega.

sahi baat ye thi ki Bond nirnay nahi kaar paa raha tha ki vah kya kare isliye vah sirf neeli car ka peecha karte chala jaa raha tha. dekhte hi dekhte dono

gaadiya London shahar se baahar nikal aayi, ab sadak ke dono taraf khet the.

achanak hi Bond ne neeli car ka agla darvaaja khulte dekha aur fir us khule huve darvaaje se ek insaani saaya lehraaya tatha Bond ke kuch samajhne se pehle

hi ikh ke khet me jaa gira, maanav aakriti ke jism par vaahi kapde the jo Bond ne Ashraf ke jism par dekhe the aur Bond ke dimaag me jhat se vichaar

koundh gaya ki Ashraf ikh me kooda hai.

usne poori taakat se brakes dabaye.

gaadi charmarahat ke saath ruk gayi.

vah ikh se kuch aage nikal aaya tha, haath me revolver sambhaale vah furti se gaadi se baahar nikla.

neeli car ab sadak par lehraane ke baad seedhi chalne lagi thi, Bond ne us taraf se dhyaan hataya aur ikh ki taraf douda.

najdeek pahuchkar vah thithka, ushe yaad aaya ki Ashraf ke paas ek revolver hai aur is samay vah ushe dikhaayi nahi de raha hai, lekin ho sakta hai ki ikh

me se Ashraf ushe saaf-saaf dekh raha ho.

nischay hi vah revolver ushi ki taraf taane huve hoga.

ye sochkar Bond atyant satark ho gaya, kisi bhi tarah ke khatre se bachne ke liye yaha tak ki khud ko goli see bachaane ke liye bhi usne khud ko taiyaar kar

liya tha.

revolver haath me liye vah bhi ikh me ghuss gaya tha.

10 minute baad jab apni khoj ke parinaamswaroop usne maanavaakriti ki khoj ki to vah daant peeskar reh gaya. ganno ke beech me adhed mahila ka behosh

jism pada hua tha, uske jism par Ashraf ke kapde the.

---------------------------------------

James bond ke chehre par bahut hi gambheer bhaav the, buri tarah se tamtamata hua vah gotakhori club ke counter ki taraf badh raha tha, tej aur lambe-

lambe kadmo ke saath.

" aao mr. Bond, tum itne uttejit kyo ho " counter clerk ne uska swagat kiya.

najdeek pahuchkar Bond ne counter par bahut jor se mukka maara. ye mukka uski jhunjhulaahat ka prateek tha, us jhunjhulaahat ka jo ushe apni asafalta ke

liye khud par ho rahi thi.

fir ekaek hi usne mehsoos kiya ki vah khud ko sambhaal nahi paa raha hai. yadi counter clerk jaisa maamuli vyakti uski maansik stithi bhaanp jaayega to

ishe Bond ki ayogyita hi kaha jaayega, yahi sochkar Bond ne khud ko sambhala.

dimaag ko tanaavmukt kiya aur ab vah saamanya najar aa raha tha.

" kya mai tumse kuch pooch sakta hu mr. Bond " counter clerk bola.

" kya poochna chahte ho " Bond ne saamanya swar me hi prashan kiya.

" yahi ki tum mr. Vaan ke peeche kyo bhaage the "

" V..Vaan, kya tum ushe jaante ho " Bond ne utsuk hokar poocha.

" ji bilkul, register me uske sign bhi hai aur address bhi "

" kya usne gotakhori ki poshaak li thi "

" haan, ushe hi to jama karvakar vah lout raha tha "

" oh, mai uski entry dekhna chahta hu "

" sure " kehne ke saath hi counter clerk ne register khol diya, Bond swayam hi register par jhuk gaya aur usne keval do minute me ye dekh liya ki Vaan ke

naam se Ashraf ne subah 9:30 baje gotakhori ka libaas liya tha aur shaam 5 baje jama karvaaya tha. register me Vaan ke sign me chipi writing ko vo fouran

pehchaan gaya tha. Ashraf ki writing ko vo pehchaanta tha aur ushe ye samajhne me bhi der na lagi ki register me diya gaya address bhi nitant kaalpanik

hai.

magar ye sawaal Bond ke dimaag me atak kar reh gaya ki 9:30 se 5 baje tak ke lambe samay me Ashraf ne gotakhori libaas ka kya kiya hai. itne lambe samay

tak shayad koyi bhi vyakti gotakhori nahi karta hai.

" kya yah vyakti aaj pehli baar hi gotakhori karne aaya hai " Bond ne poocha.

" ji nahi, mr. Vaan picchle 4-5 din se lagataar aa rahe hai "

" k..kya, 4-5 din se " Bond chounk pada.

" haan "

" kya vah roj ishi tarah se gotakhori karta hai, yaani ki 9:30 se shaam 5 baje tak "

" ji haan, is baat ko mehsoos karke to mai khud bhi hairaan hu, piccle 5 saal se mai is counter par hu, maine kabhi nahi dekha ki kisi ne 1-2 ghante se jyada ke

liye kabhi poshak li ho, kisi ne jyada samay liya ho to 3-4 ghante lag gaye honge. magar picchle 4-5 din se mai dekh raha hu ki mr. Vaan ke atirikt 4 aise

vyakti aur hai jo subah poshak lete hai aur shaam ko jama karvaate hai "

" c..chaar vyakti " is baar to Bond ucchal hi pada.

" aap chounk kyo rahe hai "

" kya un chaar vyaktiyo me se koyi ladki bhi hai "

" ji haan, unka naam miss Rubiya hai "

" oh " uske jehan me visfot sa hua fir usne clerk se bina kuch kahe adheertapoorvak register khol liya, 5 minute me hi usne vo paancho naam talaash kar liye jo

subah poshak lekar shaam ko jama karva rahe the.

writing unhi chaaro ki thi.

ab Bond ko isme koyi shak nahi reh gaya tha ki ye Ashraf, Vikram, Vijay, Vikas aur Aasha hai.

kintu ye sach hai ki is sach ko jaanne ke baad uski buddhi kuch aur ulat gayi thi.

spasht tha ki vo poori tukdi picchle 4 din se lagataar Tames me gotakhori karti rahi hai, magar kyo, itni der tak gotakhori karte rehne ka kya arth hai.

ishi sawal ka jawaab Bond ko samajh me nahi aa raha tha.

ushe gehre vichaaro me doobta dekh counter clerk bola," kya sochne lage mr. Bond "

" kya tumne kabhi socha ki ye paancho itni der tak gotakhori kyo karte hai "

" jaroor socha, lekin kabhi kisi parinaam par nahi pahuch paaya "

" kya tumnbe kabhi bhi inme se kisi se iske baare me poocha "

" iccha to kayi baar huyi thi lekin pooch na saka, kyonki poshak ghanto ke hisab se kiraaye par di jaati thi aur ve poori payment karte the. unse ye prashan

karne ka mera koyi vaidhaanik adhikar nahi banta tha, vaise bhi hamare niyamo me is baat par koyi paabandi nahi hai ki jyada se jyada grahak ko kitne

ghanto me poshak loutaani hai "

Bond chup reh gaya.

counter clerk ne kaha," tumne ye nahi bataya ki Vaan aadi ke baare me tum ye sab sawaal kisliye pooch rahe ho, kya ve koyi apraadhi hai "

" haan " Bond ne bada sanshipt sa uttar diya.

" kya kiya hai unhone, koyi hatya ya bank robbery "

" tum ye sab sochkar apna dimaag kharaab mat karo " ekaek hi Bond ka lehja sard ho gaya," aur dekho, jo baatein is waqt mere aur tumhaare beech me huyi hai,

 
unka jikr tum kisi se bhi nahi karoge, raat ko apni patni se bhi nahi, agar tumne aisa kiya to mujrimo ki madad karne ke aarop me tumhe jail bhej diya jaayega aur fir saari jindagi vahi sadte rahoge "

kaanp gaya clerk, paseene-paseene ho gaya vah, bola," b..bhala maine unki kya madad ki hai Bond, mai to unhe jaanta tak nahi "

" mai jaanta hu ki tumne unki koyi madad nahi ki "

" f..fir tum "

" yadi tumne in baato ka jikr kisi se bhi kiya to yahi samjha jaayega "

" m..mujhse tumne koyi bhi baat ki hi kaha hai "

" very good " Bond ne uska kandha thapthapaate huve kaha," ve kal bhi aayenge, tum picchle 4 din ki tarah unhe poshak de doge, chupchaap, unki taraf

vishesh najro se dekhoge bhi nahi. us waqt mai peeche vaali kothri me chupa sabkuch dekh raha hounga, mere sanket ke bina tum kuch bhi nahi karoge "

bechaara counter clerk soch raha tha ki kis musibat me fans gaya hu.

---------------------------------

us waqt raat ke 10 baje the jab Alfaanse aur Irvin apni-apni yaatra khatam karke chouthe din hi lout aaye the, dher saare naukaro aur Gardner ne khud

unka swagat kiya.

ekaek hi usne pooch liya," kya baat hai dad, sab najar aa rahe hai, lekin aapka vah naya naukar, kya naam tha uska, haan, Merlin, vah najar nahi aa raha "

" vah aaj hi chutti par apne gaanv lout gaya hai bete "

Alfaanse ne chutki lete huve kaha," chutti par gaya hai ya hamesha ke liye chutti kar gaya hai "

" nahi bhai, do din ki chutti par gaya hai "

iske baad bahut saari aupchaarik baatein hoti rahi, mr. Gardner tour ke baare me poochte rahe aur Alfaanse aur Irvin chatkhaare lekar batate rahe, 12 baje

mehfil tooti.

goodnight kehkar mr. Gardner apne kamre me chale gaye, Alfaanse aur Irvin bhi apne bedroom me aa gaye. Alfaanse ki aankho me neend ka door-door tak

koyi naam-o-nishaan nahi tha.

hota bhi kaise aaj raat ushe ek bahut hi khaas kaam ko anjaam dena tha.

us waqt raat ke 2 baje the jab Alfaanse dheere se utha, uske jism par night suit tha. usne pairo me sleeper daale aur hanger se gown utaarkar apne jism par

daal liya.

gown ki jeb usne baahar se hi tatoli, kisi vishesh vastu ko jeb me paakar vah santusht hua, ek aakhiri baar usne Irvin par apni drishti daali, uske naak se

halki-halki seeti baj rahi thi, uske gehre kharrate is baat ke gavaah the ki vah gehri neend me hai.

Alfaanse dabe paanv darvaaje par pahucha, bina kisi kism ki aahat utpann kiye bina usne chitkani kholi aue baahar nikal gaya.

gallery me abhed shaanti thi.

vah mr. Gardner ke kamre ke sameep pahuch gaya, pehle usne key-hole se jhaankar andar ka drishya dekha, night bulb ki madhyam roshni me bed par soye

pade mr. Gardner spasht chamak rahe the.

santusht hone ke baad Alfaanse ne jeb se chaabi nikaal lock khola aur andar pravisht ho gaya, andar jaane ke baad usne andar se darvaaje ko lock kar diya.

chaabi jeb me rakhne ke saath hi usne ek jeb se ek rumaal aur dusri jeb se ek choti si sheeshi niakal li thi. bed ke sameep pahuchkar usne sheeshi me se do boond

rumaal par tapkaayi aur sheeshi jeb me rakh li.

rumaal ko Gardner ki naak ke sameep le gaya vah, bas rumaal ko uski naak ke sameep hi le gaya tha Alfaanse, ushe uski naak par rakha nahi tha usne.

do minute tak yahi stithi rahi, fir usne rumaal apni jeb me vaapis rakh li, ab uske haath me rumal ki jagah ek nakli chipkali najar aa rahi thi, bilkul asli lagne

vaali nakli chipkali.

vah bed ke sirhaane farsh se attached safe ki taraf badha, apne jism ko safe ke back side me kar liya usne aur chipkali ko vahi se ucchalkar Gardner ke chehre

par fenka.

chipkali uske maathe aur fir naak se takraane ke baad chaati par gir gayi lekin uske jism me ratti bhar bhi hulchal najar nahi aayi aur yah dekhkar safe ke

peeche chupe Alfaanse ki aankho me safaltamayi chamak spasht ubhar aayi.

ab vah nirvighn vaapis bed ke sameep aaya, sabse pehle usne nakli chipkali uthakar jeb me rakhi, uske baad us wristwatch ko dhyaan se dekhne laga jo

Gardner ke baaye haath me maujood thi.

ab usne apne gown ki jeb se dusri wristwatch nikaali aur bahut hi bareek najar se dono ka muayana karne laga, dono ghadiya bilkul same thi, ek hi model aur

ek hi company dwara nirmit.

Alfaanse ne bade aaraam se chain kholkar Gardner ki kalaayi se ghadi utaar li, fir vahi farsh par baithkar usne Gardner ki wristwatch se uski chain alag ki

aur us wristwatch me laga di jo vah apne saath laaya tha.

chainrahit wristwatch usne apni jeb me daali aur Gardner ki chain vaali dusri wristwatch ko usne Gardner ki kalaayi me vaapis pehna diya.

itna kaam karne ke baad uska dhyaan Gardner ke galey me pade tabeej par gaya, bina ek bhi kshan hichke usne dori samet tabeej ko Gardner ke galey se nikal

liya aur fir usne tabeej ko kholkar dekha.

usme hairpin jaisi koyi vastu thi, picchla sira ek hi tha, jabki agla sira do bareek bhaago me vibhakt ho gaya tha. theek sarp ki jeebh ke samaan.

picchle sirey par rubber ki ek dot thi.

Alfaanse jaanta tha ki yahi us antim hall ki chaabi hai jisme vah shaandaar heera rakha hua hai.

Alfaanse ne jeb se saabun ke do chote-chote tukde nikale aur us ajeeb si chaabi ka aks us par le liya. chaabi ko tabeej me punah rakhne ke baad usne tabeej ko

vaapis Gardner ke galey me daal diya.

Alfaanse ki aankhe buri tarah chamak rahi thi, vajah shayad ushe uske aaj raat ke mission me safalta milna hi tha, poori tarah santusht hone ke baad is

kamre se nikalne ke liye vah darvaaje ki taraf badha parantu surkh rang ki us aankh ko vah nahi dekh saka tha jisne ki key-hole se uski har ek harkat ko

dekha tha aur ushe darvaaje ki taraf badhte dekhte hi kisi bhoot ke samaan key-hole se gaayab ho gayi thi.

-----------------------------------------

 


" jab mujhe Bond ko chakma dene ki koyi aur tarkeeb na soojhi to apne kapde utaare, driving seat par khud baitha aur revolver ki nok par us adhed mahila ko

uske kapde utaarne aur mere kapde pehanne ka hukum diya "

" aur usne tumhaara hukum maan liya "

" tani huyi revolver bhala aadmi se kya nahi kara deti "

" chii..chii..chii, tum to poore dus numbari nikle pyaare jhaanjharokhe " Vijay ne bura sa munh banate huve kaha," laanat hai, tumne to saara brahmcharya hi

khoonti par taank diya "

" isme brahmcharya par aanch kaha se aa gayi "

" lo suno diljale, is saale ne aavranheen naari ka avlokan kiya hai aur kehta hai ki brahmcharya par koyi aanch nahi aayi, ab tum aanch ki baat karte ho, us

car me to poora brahmcharya jalkar raakh ho gaya hoga. bas, rehne do, hame aage nahi sunna varna gad-gadakar aasmaan gir jaayega, dharti fat jaayegi, tum

saale apne saath hame bhi le dooboge "

Vijay ki is bakvaas par sabhi muskura uthe.

Vikas ne poocha," haan to uncle, uske baad kya hua "

" jab usne mere kapde pehan liye to maine achanak hi uski kanpatti par revolver ke daste se vaar karke ushe behosh kar diya aur fir mouka dekhkar uske

behosh jism ko ek ikh ke khet me ucchaal diya "

" peeche aa rahe Bond ne socha ki ikh ke khet me aap koode hai, atah usne apni gaadi ikh ke sameep hi rok li aur jab tak ushe haqikat ka pata chala hoga tab

tak aap na keval vaha se bahut door nikal gaye honge balki vah car bhi aapne chhod di hogi "

" haan "

Aasha ne poocha," jab tumne uske behosh jism ko baahar fenka hoga, us waqt steering par koyi bhi nahi raha hoga, un kshano me koyi bhayanak accident bhi

ho sakta tha "

" poori sambhaavna thi lekin ye khatra uthaane ke liye mai vivash tha "

" aur tumne khatra utha liya pyaare " Vijay bola.

" haan "

" kitne vajan ka khatra raha hoga "

" k..kya matlab " Ashraf chounk pada.

Vijay ne ajeeb se andaaj me haath hilaate huve kaha," kamaal hai miya, vajan ka matlab bhi nahi jaante tum, weight, ek kilo, do kilo, chaar kilo, kitne vajan

ka khatra raha hoga vah jishe tumne utha liya tha "

daant pees utha Ashraf," kaam ki baato ke beech mujhe tumhaari bakvaas bilkul acchi nahi lagti Vijay "

" yah baat maine isliye kahi hai pyaare kyonki ab hum sabko us khatre se kayi guna jyada vajni khatra uthaane ko taiyaar ho jaana chahiye "

" kya matlab "

" matlab ye ki tumhaari bevkoofi ne saara gud-gobar kar diya hai "

" kya kehna chahte ho "

" is baat ke prati maine tum sabko pehle hi satark kar diya tha ki club me Bond bhi aata hai aur kisi bhi waqt usse aamna-saamna ho sakta hai, fir ushe

dekhte hi tum itne nervous kyo ho gaye, yadi tum nervous na huve hote, khud par niyantran rakhte to mumkin tha ki vah tum par dhyaan hi nahi deta aur

dhyaan na dene ki surat me vah tumhe pehchaanta hi nahi aur agar pehchaanta hi nahi to ye saara lafda hi nahi hota "

" is baat ko sweekar karta hu Vijay ki mujhse bahut badi galti ho gayi hai, mai sachmuch nervous ho gaya tha aur khud ko sambhaal na saka tha, lekin sach

baat to ye hai ki mujhe khud ko sambhaalne ka mouka hi nahi mila tha. stithi hi yahi thi ki usme mere alawa tumme se koyi aur bhi fansa hota to yahi hota,

libaas jama karvaane ke baad mai jaise hi muda, Bond mere saamne tha, itna najdeek ki mere hosh ud gaye, uska dekhne ka andaaj hi aisa tha jaise ki vo

mujhe pehchaan gaya ho, bas, fir to ghabrahat me jo ho gaya vo kam tha "

" magar pyaare, tumne hum sabke liye musibat ke beej bo diye hai "

Vikas ne poocha," aisa aap kis aadhaar par keh raha hai guru "

" uska naam Bond hai, hum pehkle hi keh chuke hai ki vo lifaafa dekhkar majmoon bhaanp jaane vaali cheej hai, is ghatna ke baad usne nischay hi club ka

vah register tatola hoga jisme libaas lene aur jama karvaane ki entry hoti hai. ushe aise poore paanch naam mile honge jo picchle kuch dino se subah libaas

lete hai aur shaam ko jama karvaate hai. vah hum sabki writing bhi acchi tarah se pehchaanta hai, atah vah acchi tarah se smajah gaya hoga ki picchle 4

dino se hum sab poore-poore din gotakhori karte rahe hai "

" oh " Ashraf ke honth gol ho gaye.

chinta ki lakeerein sabke chehre par ubhar aayi thi.

Vijay ne aage kaha," Bond itna bevkoof nahi hai ki is baat se santosh kar le ki hum poora-poora din Tames me sirf gotakhori hi karte rahe hai, vaj jaroor

sochega ki 4 poore din humne Tames me kya kiya hai "

" kya uski soche surang tak pahuch jaayengi " Aasha ka swar kaanp raha tha.

Vikram jaldi se bola," mera khayaal to hai ki nahi "

Vijay ke hontho par badi hi pyaari si muskaan ubhar aayi jishe dekhkar Vikram thoda jhenp sa gaya, bola," tum muskura kyo rahe ho, is baare me tumhaara

kya khayaal hai "

" ye apne paksh me sochne ki aadat chhod do pyaare vikramaditya, is waqt hum apraadhi hai aur apraadhi ko positive nahi hamesha negetive sochna

chahiye, tabhi uski umra badh sakti hai "

" aapka kya khayaal hai guru " Vikas ne poocha," kya uska dimaag surang tak pahuch jaayega "

" halanki surang tak Bond ka dimaag pahuchna mushkil hai, magar asambhav nahi kaha jaa sakta aur agar kuch der ke liye apne vikramadiyta ki baat maan

li jaaye to usse khatre ka vajan ghatega nahi "

" mai samjha nahi "

" Bond barabar hamare itne samay tak Tames me rehne ke kaaran ko talashta rahega aur iske liye vah jaal bichayega "

" kaisa jaal "

" kal jab hum pratidin ki tarah club ke counter se libaas lenge to vah kahi chupa hua hame dekh raha hoga aur fir Tames ke paani ke andar vah hamara peecha

karega, ushi sawaal ki talaash me jiska ushe jawaab nahi mil raha hai "

baat sabhi ko jami, isliye chup reh gaye, chehro par chinta ki lakeerein spasht ubhar aayi thi, kaafi der tak sawaliya najro se ve ek-dusre ko dekhte rahe. fir

Vikas bola," kahi aap ye to nahi kehna chahte hai guru ki hum kal Tames me jaakar surang ko aage badhaane ka kaam nahi karenge "

" tumhaare bacche jiye pyaare, hum yahi kehna chahte hai "

" m..magar ye stithi to parso bhi rahegi " Ashraf bola.

Vijay ne bade aaraam se kaha," ji haan "

" iska matlab to ye hua ki Bond ke dar se ab hum club se kabhi bhi gotakhori ki poshak nahi le paayenge. bina gotakhori ki poshak ke Tames ke tal me jaana

naamumkin hai aur jab tak hum tal tak pahuchenge hi nahi to surang ko aage banane ka kaam thapp aur jab surang hi nahi banegi to Kohinoor ko prapt

karne ki baat hume dimaag se nikal deni chahiye "

" kaafi samajhdaar ho gaye ho pyaare diljale, moong ki daal to tumhe bahut din se mili nahi hai, fir ye bheemseni kaagaj tumne kis cheej me milakar khaaya "

Vijay ki bakvaas par koyi dhyaan na dete huve Vikas ne kaha," ye to koyi baat nahi huyi guru, kya James bond ke dar se hum apne Kohinoor ko haasil karne

ka lakshya hi chhod denge "

" ye baat tumse kis chidimaar ne kahi "

" to aapki baato ka kya matlab hai "

" ye ki ab hame bina club ki madad ke Tames me kaam karne ki tarkeeb ladani chahiye "

Aasha boli," gotakhori ki poshak aur vishesh roop se oxygen ke cylinder ka intjaam karna kya tum majaak samajhte ho "

" haan " Vijay ne ek jhatke se kaha, kuch aise andaaj me ki ve chaaro kayi pal tak uska chehra hi dekhte reh gaye, bol kuch nahi sake. ve ye samajhne ki

koshish kar rahe the ki Vijay majaak kar raha hai ya sachmuch uske dimaag me koyi scheme hai, jab koyi kuch samajh nahi saka to Vikas bola," vah kaise "

" tum sab bhool rahe ho ki is abhiyaan me hamara ek saathi aur bhi hai, saathi bhi aisa jishe hum trikaldarshi samajh sakte hai, vah sabkuch sunta aur

dekhta hai "

" kahi aapka ishaara us blackmailer ki taraf to nahi "

" jo poori drill machine ka intjaam kar sakta hai vah hamare liye poshak aur oxygen clyinder ka intjaam nahi karega "

" bilkul karunga janaab, sir ke bal karunga " vaha goonj uthne vaali blackmailer ki aawaj se sabhi chounk pade.

sab ek jhatke se khade ho gaye.

sabki najre ushi par thi, us par jo mombatti ke prakash me ek kaale saaye jaisa najar aata tha. jaane kyo Vikas ko usse chidh si ho gayi thi, jaane kyo ushe

saamne dekhte hi Vikas ki nasho me doudne vaala khoon khoulne lagta tha.

Vijay ne kaha," dekho pyaare, maante ho na ki hamara saathi trikaaldarshi hai, hame musibat me dekhte hi prakat ho gaya, kyo pyaare, tum hamari madad

karoge na "

" jaroor hujoor lekin... "

" lekin kya "

" agar aapko meri ek shart manjoor hogi to "

" vo shart bhi bolo "

" mera hissa ek se badhkar do percent ho jaayega "

uske is vaakya ke baad sabko saanp soongh gaya. Vikas ka dil chaha ki vah Vijay guru se kiya gaya vaada todkar ucchle aur is blackmailer ka gala daba de.

apni si prabal aakansha par kabu rakhne me ushe bahut jyada maansik shram karna pada.

jabki Vijay ne kaha," ye to hamare saath naainsaafi hai kaale miya "

" vah kaise sarkar "

" tumse jara sa kaam keh rahe hai to tumne apna hissa hi dugna kar diya "

" aap ishe jara sa kaam keh raha hai bandaparvar, mai hi jaanta hu ki ishe karne ke liye hame kitne paapad belne padenge, yakeen nahi hai to aap khud karke

dekh lijiye, yadi aap kar sake to bahut acchi baat hai, mai ek percent ka hi bhaagidaar rahunga "

" tum jaante ho pyaare ki ye kaam bhi hum kar sakte hai lekin isme samay lagega aur samay hamare paas nahi hai "

" tabhi to janaab se hissa dugna karne ki gujarish kar raha hu "

" majboori hai pyaare, do percent hi sahi, kab tak prabandh kar doge "

bade pyaar se kaha usne," kal shaam tak le lijiye janaab "

jaane kyo Vikas ko us blackmailer ke saamne Vijay guru ka itna bauna hona bilkul accha nahi lag raha tha, yadi uska bas chalta to vo us blackmailer ko

kaccha chaba jaata.

--------------------------------

 
us waqt raat ke kareeb dus baje the aur James bond apne bedroom me, bed par adhleti avastha me chatt ko ghoor raha tha, uske chehre par chinta ke saath

hulki si jhunjhulaahat ke bhi bhaav the, aankho me neend ka door-door tak naamonishaan nahi tha.

ekaek hi angoothi roopi transmitter spark karne laga. vah yahi transmitter tha jispar Alfaanse ke peeche lage jasoos ushe report dete the, usne transmitter on

karke baat ki to pata chala ki Alfaanse aur Irvin lout aaye hai.

ye jasoos London se hi bol raha tha.

Alfaanse aur Irvin ka lout aana Bond ko aakarshit na kar saka, kyonki is waqt uska dimaag poorntaya Vijay aur uske saathiyo par kendrit tha.

jaane kya sochkar usne report dene vaale jasoos ko apni kothi par hi bula liya.

paune 11 baje tak vah gora-chitta aur majboot kad-kaathi ka vyakti Bond ke saamne sofe par kuch aise andaaj me baitha hua tha, jaise Bond ke kisi aadesh

ki prateeksha kar raha ho, British secret service me vah Bond ka junior jasoos tha.

kaafi der ki khaamoshi ke baad usne poocha," kya mai jaan sakta hu sir ki aap kya soch rahe hai "

darasal Bond ne ushe isliye bulaaya tha kyonki vah chahta tha ki saare haalaat par kisi ke saath baithkar discuss kare, ushe lag raha tha ki jis gutthi ko vo

suljha nahi paa raha hai shayad vah discuss karne se khud hi sulajh jaaye.

is junior jasoos ka naam John tha, kareeb do ghante tak vah John ke saath discuss karta raha. maksad sirf ye pata lagana tha ki koyi vyakti subah se shaam

tak Tames me gotakhori kyo karega. kintu Bond ab bhi kisi aashajanak nirnay par nahi pahuch saka.

----------------------------------

dopahar ka samay.

James bond ke jism par gotakhori ka libaas tha, peeth par gas cylinder, naak aur munh se saans lene ke liye oxygen mask, aankho par chashma lagaye vah

Tames ke swacch aur tej bahaav vaale paani me idhar-udhar fir raha tha.

vah is waqt ek khoobsurat macchli jaisa lag raha tha, parantu aisi macchli, jiski paani me se oxygen prapt karne ki kshamta samapt ho gayi ho, tadapta,

chatpatata sa fir raha tha vah.

gotakhori kar rahe ek-ek vyakti ko usne dhyaan se dekha tha, kintu kisi icchit vyakti ko na paakar vah nirash hi hua tha, ab vah teji se Tames ke garbh me

badhne laga.

suabh ke waqt Tames ke chaaro taraf bichaaya gaya uska jaal khaali hi raha tha, uske paancho shikaar me se koyi ek bhi na fans saka.

poshak lene vaale ek-ek vyakti ko usne dhyaan se dekha tha, kintu koyi laabh nahi nikla. gyarah baje tak intjaar karne ke baad usne gotakhori ke liye

swayam ek suit liya aur Tames me kood pada.

yaha bhi ushe abhi tak niraasha hi haath lagi thi.

Bond Tames ke tal me pahuch gaya tha, vaha pade bade-chote pattharo ke beech vah tairta raha, kabhi bahaav ke saath to kabhi bahaav ke vipreet.

vah kuch talaash kar raha tha.

aisi koyi vastu jisse vo Vijay aadi ki gotakhori ka sambandh Kohinoor se jod sake aur maje ki baat ye thi ki ushe khud nahi maalum tha ki vah kya talaash

kar raha tha. aisi kya vastu ho sakti hai jiska sambandh Kohinoor se jud sake.

apne chaaro taraf Bond ko paani me ghuli niraasha hi niraasha najar aa rahi thi.

--------------------------------------

raat bahut andheri thi, isliye 10 baje hi kaafi gehra gayi maalum padti thi.

vishesh roop se Tames ke aaspaas sannata chaa gaya tha. paani ke behne se utpann hone vaali kal-kal ki aawaj jo din me bahut hi acchi aur karnpriya lagti

thi, is waqt bhayanak aur daravani si maalum pad rahi thi.

door-door tak koyi praani najar nahi aa raha tha, magar...

jara thahariye, shayad upar mai kuch galat likh gaya hu.

spasht bhale hi na chamak rahe ho, parantu paanch vyakti kaale saaye ke roop me jaroor dekhe ja sakte the, haan unke alawa door-door tak vaastav me koyi

nahi tha.

poori khaamoshi ke saath ve Tames ke kinaare pahuche.

jaha ve khade the vaha se peeche ki taraf yadi ek seedhi rekha kheenchi jaaye to vah rekha seedhi bank sansthaan naamak imarat ke mukhya dwar par jaakar

samapt hoti thi.

unke jismo par gas cylinder samet gotakhori ka poora libaas tha.

unme se ek ne jeb se ek lambi par majboogt rassi nikali, fir is rassi ka ek sira apni peeth aur pet par belt ke samaan baandhne ke baad dusra sira apne barabar

me khade saathi ko deta hua bola," lo pyaare jhaanjharokhe "

Ashraf ne apne pet aur kamar par rassi ko ek baar lapeta tatha sira apne barabar me khadi Aasha ko pakda diya.

is prakar Aasha aur Vikram ko lapetne ke baad rassi ka antim sira Vikas ke pet par bandha.

ab ve paancho ek hi rassi se sambandhit the.

ye prabandh shayad unhone Tames ke garbh me chhaaye andhere aur paani ke tej bahaav se bachne ke liye kiya tha, is prakaar bahaav ya andhere ke kaaran

unhe ek-dusre se bichad jaane ka koyi dar nahi tha.

ab paancho ne ek saath naak aur munh par oxygen mask fix kiye, aankho par chashme lagaye tatha Tames me jump laga di, unke koodne se utpann hone vaali

aawaj raat ki khaamoshi me door-door tak goonjti chali gayi, kintu us par dhyaan dene vaala koyi nahi tha.

ve paancho ek saath tairte huve Tames ke tal ki taraf badh rahe the.

gotakhori ki jo caps unhone pehan rakhi thi, un par waterproof searchlights fix thi, jinhe unhone Tames ke garbh me pahuchte hi on kar liya tha.

ab teevra roshni paani ko cheerti huyi unke aage-aage chal rahi thi.

paani ke andar gehre sannate ke beech apne aaspaas ke bhaag ko roshan karte ve paanch saaye bade rahsayamayi prateet ho rahe the.

kareeb ek ghante baad ve ushi vishaal patthar ki jad me pahuche, jiske neeche unhone battery rakhkar sabse pehle din drill chaalu ki thi.

yaha kuch der baithkar unhone apni thakaan door ki.

us taraf jaha unhone pehle din drill fix karke surang banane ka kaam shuru kiya tha, is waqt kuch bhi najar nahi aa raha tha. vaha paani hi paani tha balki

ye kehna chahiye ki ye pehchaan tak nahi ho rahi thi ki unhone drill machine vaha rakhi tak thi.

kuch der sustaane ke baad ve uthe, fir ushi taraf taire, pankti me sabse aage Vijay tha, vah deewar tatolne laga, sheegra hi uski searchlight par fix prakash ek

gol dahane par pada.

yani vah unke dwara taiyaar ki jaa rahi surang ka munh tha.

teen feet vyaas ka gol munh.

Vijay is munh ke andar daakhil ho gaya aur ab uske andar tairne laga, rassi me bandhe uske saathi bhi peeche-peeche hi aa rahe the, surang me labalab paani

bhara hua tha, kintu usme tairne me unhe koyi dikkat nahi thi.

surang me paani keval bhara hua tha, bahaav ka to vaha kuch matlab hi nahi tha. haan, nadi ke paani ki apeksha surang ke andar ka paaani bahut ganda jaroor tha.

surang 12 feet lambi thi yaani ki ve abhi tak surang ko 12 feet lambi bana paaye the, jaha surang band thi vahi unki drill machine aur battery maujood thi.

ab surang ke andar hi ve apna-apna kaam karne me jut gaye.

paani ganda hone ki vajah se unki cap se nikal rahi roshni kaafi maddham si najar aa rahi thi. lekin ve apne-apne kaam me yu vyast the jaise ki pehle se

nirdhaarit karke aaye ho ki gufa me pahuchne ke baad kisko kya kaam karna hai.

ant me stithi ye aa gayi ki Vijay, Vikas, Ashraf aur Vikram ne drill machine ko uthakar ulta kar liya, uska drill unhone surang ki chatt se sata diya.

battery surang ke sameep rakhi thi, uske sameep baithi thi Aasha.

battery unhi do taaro ke dwara drill machine se sambandhit thi, ve chaaro abhi apne ghutno par baithe the aur apne haatho par drill machine ko sambhaale

huve the. abhi ve balance bana rahe the.

balance banane ke baad ve sthir ho gaye.

unka sthir hona hi jaise Aasha ke liye sanket tha.

usne battery on karne vaala switch daba diya aur iske saath hi un chaaro ke haatho me sadhi huyi drill machine chaalu ho gayi.

surang ki chatt me sparsh hua, drill teji se ghoomne laga.

drill ke aaspaas ke paani me manthan sa shuru ho gaya aur saath hi surang ki geeli mitti ko kaat-ta hua drill ek bhatt banane laga.

paani me ghulti huyi mitti paancho par girne lagi.

paani bahut jyada matmaila ho gaya tha.

drill badi teji se ghoomta, apne chaaro taraf mitti ko ucchalta surang ki chatt me dhansta chala jaa raha tha, is prakar ab surang jameen se upar ki or uthne

lagi thi.

-----------------------------------

 
You must log in or register to reply here.

Similar threads

S
Ye dil to tere pas hai
Replies
0
Views
2
StoryPublisher
S
sexstories
XXX Kahani Apne he Bete se pyar ho gya
2 3
Replies
26
Views
9K
sexstories
sexstories
sexstories
Incest Shareef maa se chhote bete ki paltu kutia banne tak ka safar
Replies
0
Views
5K
sexstories
sexstories
sexstories
Shareef maa se chhote bete ki paltu kutia banne tak ka safar
14 15 16
Replies
155
Views
24K
sexstories
sexstories
sexstories
Desi Chudai Kahani - Pavitra rishta (maa bete ka)
2 3 4
Replies
36
Views
13K
sexstories
sexstories
Back
Top