• Hello Friends You can Register on the Forum and by posting you can earn money too.

'Kafan tere bete ka' -- Complete Novel by Vedprakash sharma

  • Thread starter Thread starter StoryPublisher
  • Start date Start date


secret phone par Vijay black boy se pooch raha tha," tumne Ashraf, Vikram, Naahar, Aasha aur Parvej aadi ko unke morcho par tainaat kar diya hai na

pyaare kaale ladke "

" yes sir " dusri taraf se black boy ne kaha.

" aur koyi vishesh soochna "

" ji haan, vibhinn desho se Bhartiya jasooso ki report mili hai, in reports se maalum padta hai ki laghbhag saare vishv me Kohinoor, Irvin ke katl aur

Alfaanse dwara khaayi gayi kasam ki charcha hai, pratyek mulk ka top jasoos Alfaanse ke khilaaf Vikas ki madad karne ke liye Bhaarat aana chahta hai,

Russia se report mili hai ki Bagarof Vikas ki madad karne ke liye Bhaarat aane ke sawaal par apne cheif tak se takra baitha hai, yahi stithi China ke

huchang aur Pakistaan ke Nusrat-Tughlak ki hai, Bangladesh se report mili hai ki Bhaarat aane ke liye Rehmaan apne desh ke rashtrapati se mila hai "

" pata nahi kaale ladke, aaj tak hum khud nahi samajh sake ki is jallaad ladke me aisi kya khaas baat hai jiski vajah se iske dushman bhi isse beintehaa

mohabbat karte hai, iska kattar se kattar dushman bhi kambakkht ki mout nahi chahta "

" Britain ke alawa laghbhag sabhi desho se aisi hi reports mili hai, balki Newyork me stith hamare jasoos ne to ye soochna bheji hai ki Harry armstrong

Bhaarat ke liye ravana ho bhi chuka hai "

" lagta hai pyaare ki lafda lamba hi failega "

" kya itni madad ke baad bhi Alfaanse Vikas se badla lene ke apne faisle par punarvichaar nahi karega sir "

" lumad par kisi baat ka koyi fark nahi padta hai pyaare, khair, Britain ki aur vishesh roop se Bond ke sambandh me kya report mili hai "

" vaha se abhi tak koyi report nahi mili hai sir "

kuch der tak Vijay chup raha, jaise kuh soch raha ho, fir bola," filhaal gupt-bhavan me tumhaari seat hum sambhaalte hai pyaare, tum Raina behan ke paas

jaao, ushe saantavna do, vah bahut jyada aatankit hai, saanketik dhang ne tum ushe ye bhi bata dena ki saari duniya ke jasoos Vikas ki madad ke liye

Bhaarat pahuchne hi vaale hai, shayad ye jaankar Raina ko kuch dhaandhas bandhe "

" ok sir "

Vijay is waqt gupt bhavan me black boy ki kursi par baitha poore Rajnagar me tainaat jasooso se report le raha tha, abhi tak unme se kisi ki bhi report me

koyi khaas baat najar nahi aayi thi.

ekaek hi vah us waqt chounka jab vah transmitter spark karne laga jis par duniya ke kisi bhi kone se sampark kiya jaa sakta tha, is tranmitter par duniya ke

vibhinn desho me faile Bhartiya jasoos sampark sthaapit kiya karte the.

Vijay ne yahi sochkar transmitter on kiya ki shayad aisa hi koyi jasoos duniya ke kisi kone se report dena chahta hai, lekin traasmitter on hote hi jo aawaj

ubhri ushe sunte hi Vijay yu uchhal pada jaise bichhu ne dunk maara ho.

aawaj Singahi ki hi thi," hello mr. cheif of Indian secret service "

" koun hai aap aur kya bak rahe hai " aawaj badalkar Vijay gurra utha.

dusri taraf se vynagya me doobi Singahi ki aawaj goonji," banne ki koshish na kare, kyonki mai jaanta hu ki aap vahi hai jo mai keh raha hu, aapse pehle bhi

mai kayi desho ke secret service ke cheifo se baat kar sakta hu "

" aap koun hai "

" Singahi "

" koun Singahi "

" duniya me aaj shayad aisa koyi vyakti nahi hai jo Singahi ke naam se aparichit ho, haan, aapki tarah log mujhe na jaanne ka bahana jaroor karte hai, khair,

aaj subah prasarit hone vaale BBC bulletin me aapne ye to sun hi liya hoga ki Kohinoor mere paas hai "

" fir "

" mai ushe bechna chahta hu "

" hame usse kya matlab "

" kya Bhaarat Kohinoor khareedne ka ichhuk nahi hai "

ek kshan sochta raha Vijay, fir bola," tum Kohinoor ki kya keemat chahte ho "

dusri taraf se vyangya me doobi Singahi ki hansi goonj uthi, bola," musibat to yahi hai janaab ki Kohinoor ek hi hai aur ushe khareedne ke liye vahi rashtra

taiyaar ho jaata hai jisse bhi mai sampark karta hu, atah uljhan me pad gaya hu ki Kohinoor kishe du, khair, is uljhan se bachne ka raasta maine nikaal liya

hai, tender system "

" kya matlab "

" seedhi si baat hai ki mai Kohinoor ushi desh ko bcchunga jo mujhe iski sabse jyada keemat dega, atah mere agli baar sampark sthaapit karne tak aap achhi

tarah se sochkar rakhe ki aap Kohinoor ki kya keemat de sakte hai "

Vijay ne kuch kehne ke liye abhi munh khola hi tha ki udhar se sambandh vichhed ho gaya aur Vijay ko apna dimaag kisi bajarbhattu ki tarah hawa me

naachta hua mehsoos hua.

transmitter off karke vo black boy ke aane tak Singahi aur uski kahi baato me hi dooba raha, black boy ne aane par bataya ki ye jaanne ke baad Raina kaafi

had tak samanya ho gayi hai ki Vikas ki madad karne ke liye duniya bhar ke jasoos betaab hai aur Harry aa raha hai.

tab Vijay ne ushe transmitter par huyi Singahi ki baato ka vivran suna diya, sunkar black boy bola," is maamle me aapki kya raay hai sir "

" hamari raay to pyaar filhaal tel lene chali gayi "

" kya matlab "

" hamara desh bahut gareeb desh hai, jab tak duniya me America, China, Russia aur Britain jaise desh hai, tab tak ye baat to khwaab me bhi nahi sochi jaa

sakti ki unke mukable Kohinoor ko hum khareed sakte hai, fir bhi tum sarkar se baat kar lo "

" ok sir "

-----------------------------------

aatankit Raina ne badi mushkil se raat gujaari.

saari raat jaagti rahi thi vah, uske saath hi Raghunath bhi jaaga tha aur abhi mushkil se ek ghante pehle yaani 5 baje vah Raina ke kaafi anurodh ke baad

soya tha.

saari raat halki si aahat se bhi unhe aisa lagta tha ki jaise Alfaanse aa gaya hai.

us waqt subah ke sava 6 baje the jab Raina ne kitchen me jaakar chaay banayi aur pandrah minute baad hi vah haath me chaay ki pyaali liye Vikas ke kamre

ke band darvaaje par dastak de rahi thi.

andar se kisi ne bhi darvaaja nahi khola, koyi halki si bhi pratikriya na huyi.

pehle to Raina ne yahi socha ki Vikas aur Dhanushtankaar gehri neend me hai lekin jab kaafi det tak bhi darvaaja na khula to uska maatha thanka.

darvaaje ko peetne lagi vah.

samay beetne ke saath hi pyaali uske haath se chhut gayi aur vah paaglo ki tarah Vikas-Vikas chillane lagi.

yaha tak ki uski aawaj sunkar Raghunath bhi vaha aa gaya.

Raina ki baat sunkar vah bhi davaaja peetne laga aur Vikas-Vikas chillane laga, hajaar tarah ki shankaao se ghiri Raina ab foot-foot kar rone lagi thi.

Raghunath ne darvaaja tod diya, andar ka drishya dekhkar ve dono bhouchakke reh gaye.

bed bilkul khaali tha, farsh par Dhanushtankaar ka jism behosh avastha me pada tha, kamre me Vikas ka koyi naam-o-nishaan nahi tha.

ek khidki ke teen sariye farsh ki taraf mude pade the.

Raghunath udhar hi lapka, saaf jaahir tha ki darvaaje ke sthaan par yahi raasta apnaaya gaya hai, boukhlaayi si Raina saare kamre me apne laal ko

dhoondhti fir rahi thi, uski drishti bed par pade ek kaagaj par padi.

Raina ne jhapartkar ushe utha liya, padha, likha tha,

adarneeya Vijay guru ji,

charan sparsh,

bade dukh ki baat hai ki aapne mujhe Jaydrath bana diya hai, mere chaaro taraf aapne aur nanaji ne kuch aisi hi vyuh rachna kar di hai jaisi Arjun se

bachaane ke liye kauravo ne Jaydrath ke chaaro taraf ki thi.ye sab vyuh rachna isliye ki gayi hai taaki crimer uncle mujh tak na pahuch sake, ye vyuh rachna

mere liye aapke dilo me bhare pyar ki parichaayak hai aur mai aapke pyar ki kadr karta hu. magar please guru, apne bachhe ko Jaydrath mat banao,

Abhimanyu hi rehne do, Jaydrath kaayar tha, bujdil tha, darpok tha jo Arjun ke dar se us vyuh ke beech me chupa raha, Vikas sabkuch ho sakta hai guru

lekin darpok nahi ho sakta, crimer uncle se takraane ke liye mai khud is vyuh se baahar jaa raha hu, log agar kahe ki Alfaanse ke dar se Vikas sehme huve

chuhe ki tarah apne bil me chup gaya hai to vo meri nahi aapki aur crimer uncle ki touheen hogi, aur ye bachha abhi itna naalaayak nahi hua hai ki apne guru

ki touheen hone de.

aap hi ka beta

Vikas.

------------------------------

 


jis prakaar Raghunath ki kothi ke baahar tainaat Naahar ne Vijay ko ye soochna de di thi ki kothi ke bheetar se kisi darvaaje ko todey jaane ki aur Raina-

Raghunath ke cheekhne-chillane ki aawaje aa rahi hai, ushi tarah kothi ke baahar stith force ne thakur sahab ko bhi bheetar ki asamaanya stithi ki soochna

de di thi.

laghbhag ek saath hi ve dono kothi par pahuche.

police ke dher saare officer kothi ke andar aa gaye the, thakur sahab un par garam ho rahe the, ek kone me munh chupaaye Raina foot-foot kar ro rahi thi.

Vijay ne ek sipaahi ko Dhanushtankaar ko hosh me laane ka aadesh diya hi tha ki uske galey me latka locket roopi transmitter spark karne laga, vah teji ke

saath bathroom ke andar ghuss gaya.

darvaaja band karke jab usne transmitter on kiya to Ashraf ki aawaj ubhri," hello, Ashraf reporting sir "

" hum bol rahe hai " Vijay ne bharraye se swar me kaha.

" America se abhi-abhi aaye vimaan se Harry utara hai sir, mai ushe spasht dekh sakta hu, custom par uska saamaan check kiya jaa raha hai "

" ushe aane do aur suno, ab tumhe apni duty ka nirvaah kuch aur mustaidi ke saath karna hai kyonki kal raat ke kisi waqt me Vikas apni kothi se nikal gaya

hai, sambhav hai ki vah Rajnagar ya Bhaarat se hi baahar jaane ki koshish kare "

" y..ye aap kya keh rahe hai sir, Vikas..... "

magar Ashraf ki poori baat sune bina hi Vijay ne sambandh vichhed kar diya, locket ko galey me daalkar vah bathroom se baahar nikla, kisi se phone par

baat karke thakur sahab ne receiver credel par abhi-abhi rakha hi tha, Raghunath ki taraf ghoomkar ve bole," hame abhi-abhi soochna mili hai ki Harry aa

chuka hai, humne ushe yaha laane ke aadesh diye hai "

udhar hosh me aane par Dhanushtankaar apni diary me likhkar keval itna hi bata saka ki raat ko 3 baje farsh par baithe-baithe hi ushe neend aa gayi thi aur

uske baad vah abhi jaaga hai, yaani ki uski report poori tarah se nirashapoorn thi.

kaafi der tak kothi me kohraam machta raha, magar ab is kohraam se hona kya tha.

ek kone me baithi Raina is tarah se aansu baha rahi thi jaise ushe ab Vikas ke bachne ki koyi ummeed hi na rahi ho aur laghbhag yahi samay tha jab Harry ne

vaha kadam rakha, sabse pehle thakur sahab, fir Raghunath aur fir Vijay ke charan sparsh kiye usne, tab vah kone me baithi ro rahi Raina ke paas

pahuchkar bola," m..mai aa gaya hu mousi "

aansuo se bhara chehra ekdum se upar uthaya usne, rote-rote aankhe sooj gayi thi uski, Harry ko vaha khada dekhakar uski rulaayi aur bhi jor se foot padi.

ladka jhuka, poorn shraddhapoorvak uske charan sparsh kiye usne, fir uske kandhe pakadkar bola," chii, mousi tum roti ho, Vikas ki maa hokar roti ho, vo

koyi rasgulla nahi jo ushe koyi bhi hajam kar jaaye "

Raina ki hichkiya nahi ruki.

kandhe majbooti se pakadkar ushe apne saamne khadi karte huve vo bola," mai aa gaya hu Raina maa, tera dusra beta, mere jeete ji agar Vikas ko kharoch bhi

aa jaaye to mera naam Harry nahi " bhaavavesh me Raina ne Harry ko apne seene se laga liya aur uski rulaayi kuch jyada hi jor se foot padi, Vijay vichitra

nigaaho se Harry ko dekh raha tha.

------------------------------------

ab akeli Raina hi kothi me reh gayi thi, thakur sahab, Vijay, Raghunath aur yaha tak ki Dhanushtankaar bhi Vikas ki khoj me nikal gaye the.

Harry bathroom me naha raha tha.

nahaane ke baad ushe bhi Vikas ki talaash me nikal jaana tha, kisi ko nahi maalum tha ki Vikas ko kaha dhoondhna hai magar fir bhi deewano ki tarah ve

sab Rajnagar ki sadko par nikal gaye the.

Raina ek kone me udaas aur gumsum si baithi thi, ekaek hi jor se bathroom ka darvaaja khulne ki aawaj ne uski tandra bhang ki, barbas hi chehra uthakar us

taraf dekha usne.

dekhte hi Raina uchhal pade, aise jaise ushe bichhu ne dunk maar diya ho.

uske munh se nikla," t...tum "

" haan mai, thakur sahab aur Vijay ke banaye huve jaal ke beech se gujarta hua yaha pahucha hu "

" m..magar Alfaanse bhaiya, tumne achha hi kiya jo seedhe yahi aa gaye, mere paas, mujhe tumse bahut saari baate karni hai "

vah antarrashtriya mujrim hi tha, sachmuch Alfaanse.

yaha Harry bankar aaya tha vah, parantu is waqt uske chehre par koyi makeup nahi tha, sakht aur kathor chehre vaala Alfaanse.

uski aankhe yu bhabhak rahi thi jaise ki angaare dekak rahe ho.

ushe dhyaan se dekhne ke baad ek baar to Raina ke samooche jism me sihran si doud gayi aur fir usne Alfaanse ko kisi bhediye ki tarah gurrate suna," vah

kutta to mere saamne aane se pehle hi bhaag gaya hai, mai chahta to uske saamne aane tak Harry hi bana reh sakta tha, magar nahi, maine aisa nahi kiya,

jaanti ho kyu "

" k..kyu "

" mujhe tujhse kuch baate karni hai "

" kis tarah bol rahe ho Alfaanse bhaiya, mujh tu kehkar to shayad tum kabhi nahi bole "

" shukar kar Raina ki tujhe, teri kokh ko gaali nahi de raha hu "

" itna gussa theek nahi hai Alfaanse bhaiya "

" mai jaanta hu ki kya theek hai aur kya nahi " kehkar dekhakta chehra liye Alfaanse ne khoon se sana hua night gown Raina ki taraf badha diya, bola," ye lo "

" ye kya hai Alfaanse bhaiya " Raina ne kampit swar me poocha.

" Kafan Tere Bete Ka "

" b..bhaiya " Raina cheekhte huve peeche hati, night gown farsh par gir gaya.

Alfaanse ne gown par apna joota rakha, ushe kuchalte huve vo bola," ye meri Irvi ka night gown hai, dekh, ispar meri Irvi ke khoon ke dhabbe hai, jis waqt tere laadle ne ushe maara tha tab vo yahi pehne thi, mai bakhsunga nahi Raina, khoon ka badla khoon hai, tere laal ke parkhachhe na udaa diye to mera naam bhi Alfaanse nahi "

" y..ye tum kya keh rahe ho bhaiya, tum Vikas ko maaroge "

" us kutte ko sirf maar daalne se mera kaleJa thanda nahi hoga, boti-boti kaatkar fenk dunga Raina, katre-katre karke cheel-kouvo ko khila dunga us haraamjaade ko "

" aisa mat kaho bhaiya, please aisa mat kaho, kya galti ho gayi hai mere Vikas se "

" huh, galti poochti hai, tujhe nahi maalum "

" sach maano bhaiya, Vikas nahi jaanta tha ki tum Irvin se itna pyar karte ho, vo to ye maane baitha tha ki apne kisi maksad ko poora karne ke liye tumne Irvin se shaadi ki hai, agar ushe pata hota ki tum Irvin se itna pyar karte ho aur uski mout par itna gussa karoge to vo Irvin ko kabhi na maarta, vo to bas, choti si galatfahmi ki vajah se.... "

" to unhe tera beta maarta firega jinhe koyi pyar nahi karta "

niruttar si ho gayi Raina, shayad isliye vishay badalkar boli," p... pata to lage bhaiya ki tumhaare aur Vikas ke beech me hua kya hai "

" ushi se nahi poocha "

" hajaar baar poochne par bhi usne kuch nahi bataya "

halki si muskaan ubhr aayi Alfaanse ke hontho par, bahut hi jehreeli muskaan, vaisi hi jaisi apne shikaar ko dasne se pehle vishkanya ke hontho par ubharti hai, kisi sarp ke samaan hi fufkaara vah," batata to tab jab aisa koyi shadyantra mai rach raha hota "

" t..to kya Vikas ne jhooth bola tha "

" nahi, vah bhala jhooth kyo bolega, tera beta jo hai vo, tera laadla, tere kaleje ka tukda, jhooth to mai bol raha hu, mai, kyonki mai gair hu "

" aisa kyo kehte ho bhaiya, kya mai tumhaari behan nahi, kya is ghar se tumhe kabhi koyi pyar nahi mila aur fir kya Vikas khud tumhaare kaleje ka tukda nahi hai "

" n..nahi " Alfaanse cheekh pada," is kaleje me ab dhadhakte jwalamukhi ke alawa kuch nahi hai aur ab ye jwalamukhi us haramjaade ki mout se hi thanda hoga "

" agar ye jwalamukhi khoon se hi thanda hoga to lo Alfaanse bhaiya, khadi hu mai tumhaare saamne, nikaalo chaaku aur baha do mera khoon, m..magar mere bete ko bakhs do "

" mai tere bete ki tarah kaayar nahi hu jo aurato ke khoon se apna chaaku rangta firu, mera chaaku ushi par jhapat-ta hai jisne jurm kiya ho "

" nahi bhaiya, aisa mat kaho, dekho, mai apna aanchal faila rahi hu, bheekh maang rahi hu tumse, mere bete ko bakhs do, tumhe meri raakhi ki kasam "

" thuu " Alfaanse ne Raina ke aanchal me thook diya.

" b..bhaiya " Raina dahaade maar-maarkar ro padi.

 
" us waqt kaha tha tera ye aanchal jab vo kameena meri Irvi par vaar kar raha tha, tab kaha thi teri raakhi ki saugandh jab us haramjaade ne mera ghar ujaad diya, Alfaanse ko pyar karna nahi aata tha Raina, us abhaagi Irvin ne pyar karna sikha diya tha mujhe, jishe Alfaanse ne apni jaan se jyada chaha, ushe hi khatam kar diya tere bete ne, yu, jaise ki vah koyi gaajar-mooli ho, dhikkaar hai Alfaanse par agar vah Irvi ki mout ka badla na le to, farsh par pade is gown ko utha lena Raina, ye kafan hai tere bete ka, vaada raha, tere bete ki boti-boti karke tere paas bhijva dunga, is gown me baandhkar un botiyo ko kisi chita ke havaale kar dena "

ekaek hi Raina ka chehra sakht ho gaya, jaise samajh gayi ho ki Alfaanse par uske gidgidaane ka koyi asar nahi hone vaala, thode sakht swar me vo boli," hinsa se sirf hinsa ka janam hota hai bhaiya, kya Vikas ko maarkar tum khud bach sakoge "

thode vyangyapoorn swar me bola Alfaanse," kyo, mujhe koun koun maarega "

" Vijay bhaiya, thakur sahab, black boy bhaiya, aur duniya ke ve saaare jasoos jo Vikas ki madad ke liye nikal chuke hai ya nikalne vaale hai, kya ve sab tumhe chhod denge, tum akele ho aur idhar ve sab hai, kal ho sakta hai ki Singahi aur Jackson bhi Vikas ki madad ke liye aa jaaye "

" tu bhool gayi Raina, Alfaanse ek sher ka naam hai aur ek jungle me keval ek hi sher hota hai, jungle me aur bhi sainkado jaanvar hote hai magar ve sabhi jungle ke baadshah ke ishaaro par naachte hai, sher kisi ke ishaaro par nahi naachta "

" sher bhi naachta hai lumad miya, sher bhi naachta hai " Vijay ki aawaj ne un dono ko hi chounka diya tha.

Alfaanse firkani ki tarah ghooma.

roti huyi Raina bhaagkar Vijay se lipat gayi.

" tum " Alfaanse ka chehra kanpattiyo tak surkh ho gaya.

" hame ring master kehte hai pyaare " Vijay ne apne haath me pakde huve hunter ko fatkaara," jara sochkar batao ki ringmaster ke hunter ke aage aadamkhor sher ko bhi naachna padta hai ya nahi "

bade hi khaufnaak dhang se muskura utha Alfaanse, bola," ringmaster sirf ushi sher ko nacha sakta hai jo paaltu ho, pinjare me kaid kiya gaya ho, jungle me ghuskar koyi ringmaster apne hunter ko fatkaar kar to dekhe "

" lo miya, tumhe bhi hum abhi pinjare me band kiye dete hai " kehne ke saath hi Vijay ne kamre ka vo ekmaatra darvaaja band kar diya jisse vo andar aaya tha.

chitkhani chahakar vah ghooma.

" pinjare me sher ke saath kaid hone vaale ringmaster bevkoof hote hai, agar tum sher ki aadato se parichit hote to jaroor jaante ki aise ringmaster ko sher faadkar khaa jaata hai "

" dekhna to ab yahi hai meri jaan ki tum hame faadkar khaate ho ya hum tumhe apne is hunter par nachaate hai " kehkar Vijay ne Raina ko ek taraf hata diya.

jaane kyo un dono ko aamne-saamne dekhkar Raina ki taange kaanp rahi thi, Vijay ke haath me kaantedaar hunter tha, aisa jo har vaar ke saath shikaar ki khaal hi nahi, uska gosht tak noch laaye, Alfaanse nihattha hi tha, magar takraane ke liye bilkul taiyaar, uski aankhe angaare barsa rahi thi.

" hum tumhe ushi kshan pehchaan gaye the lumad miya, jis kshan tumne Harry ke roop me is kothi me kadam rakha tha, Raina behan ko kya daraate-dhamkaate ho, is hunter ke saamne gurrao "

" apni baat karo bete, tum kitni der tak mere saamne thahar paaoge "

" vahi samjhaane aaya hu lumad pyaare " kehne ke saath hi Vijay ne saany se uspar hunter ka vaar kiya, magar vah Alfaanse tha, furti se na sirf usne jhuk kar khud ko bacha liya balki sher ki tarah hi Vijay par jhapta.

bijli si koundhi.

Vijay ke nukeele boot ki jordaar thokar uske munh par padi.

ek cheekh ke saath Alfaanse peeche palat gaya, bina ushe avsar diye Vijay ne hunter se uspar vaar kiya, saany ki jordaar aawaj ke saath hunter Alfaanse ke jism se takraaya.

shirt ke katro ek saath-saath kaante uski khaal aur gosht bhi noch laaye.

Alfaanse ke chehre par peeda ke aseemit bhaav ubhre, magar Vijay ne ushe sambhalne ka mouka nahi diya, kyonki vo jaanta tha ki Alfaanse ko aisa koyi bhi mouka dena shikast ko aamantrit karna hai, kamre me saany-saany ki aawaje goonjti rahi.

saath hi goonjne lagi thi Alfaanse ke munh se nikli cheekhe.

ek kone me khadi Raina sehmi si un do takkar ke jaanbaajo ka khooni yuddh dekh rahi thi, tabhi kuch logo ne baahar se band darvaaja khatkhataya, Raina ka dhyaan udhar gaya.

darvaaja kholne ki mansha se usne udhar abhi pehla kadam uthaya hi tha ki Vijay cheekh pada," darvaaja mat kholna Raina, tumhe meri kasam hai "

Raina yu thithak gayi jaise sangemarmar ki murti me badal gayi ho.

ab baahar ki taraf se darvaaje ko todne ki koshish ki jaane lagi thi aur yaha, yaani ki kamre ke andar nirvivaad roop se is waqt Vijay haavi tha, uske hunter ke kaante Alfaanse ki kameej ke katro, uske khoon aur ghosht ke jarro se lisde pade the.

Alfaanse farsh par gir pada tha aur Vijay paaglo ki tarah us par hunter maarta jaa raha tha aur ek kshan aisa aaya jab Alfaanse ne jhapat kar hunter ka agrim kaante vaala sira pakad liya.

Vijay ne ek jordaar jhatka diya.

Alfaanse ke haath se khoon ki boonde tapak padi.

magar hunter chhoda nahi jaalim ne, balki is hunter ko pakad kar khada bhi ho gaya aur fir usne ek itna tej jhatka diya ki Vijay ke haath se na keval hunter chhut gaya, balki veg ke saath Vijay deewar se jaa takraaya.

deewar se uska sir takraya tha, atah aankho ke saamne rang-birange taare naach gaye the, sambhalne me ushe ek pal laga aur is ek pal me hi paase palat chuke the.

ab hunter Alfaanse ke haath me tha aur jism tha Vijay ka.

Vijay ke kanth se cheekhe nikalne lagi magar Alfaanse par to maano junoon sawaar tha, Vijay se halki si, maatra ek chook huyi thi aur fir ushe sambhalne ka ek bhi avsar nahi diya Alfaanse ne.

paaso ko is tarah se palat-ta dekh kar Raina boukhla gayi.

darvaaja tootne hi vaala tha.

Alfaanse ne Vijay ko buri tarah se jakhmi kar diya tha, is kadar ki Vijay behosh ho gaya.

jab Raina ne mehsoos kiya ki Vijay hil-dul nahi raha hai, ab uske kanth se koyi cheekh bhi nahi nikal rahi hai to Raina ghabra gayi.

udhar, haath me hunter liye hinsak pashu sa lag raha Alfaanse Raina ki taraf ghooma aur idhar Raina hadbadakar band darvaaje ki taraf lapki, ek jump lagakar Alfaanse ne ushe beech me hi pakad liya.

yahi kshan tha jabki bhadaak ki jordaar aawaj ke saath darvaaja toot gaya.

magar tab tak Alfaanse na keval Raina ko pakad chuka tha balki jeb se revolver nikalkar uski kanpatti par rakh bhi chuka tha.

darvaaje par bahut saare police vaalo ke saath swayam thakur sahab maujood the, bheetar ka drishya dekhkar ve sab na keval thithak gaye balki chehre safed pad gaye the unke.

Alfaanse ke munh se sachmuch kisi jakhmi aur hinsak sher ki si gurrahat nikli," agar kisi ne ek bhi kadam aage badhaaya to mai Raina ko goli maar dunga "

revolver haath me liye thakur sahab daant pees rahe the.

" raasta chhodo, mujhe jaana hai " Alfaanse gurraya.

ek-ek shadb ko chabakar thakur sahab bole," tum Rajnagar se bachkar nahi nikal sakoge Alfaanse, bhalaayi ishi me hai ki surrender kar do "

" mai jaanta hu thakur ki meri bhalaayi kisme hai, saamne se hat jaao varna... "

uska vaakya poora hone se pehle hi Raina cheekh padi," tumhe meri kasam hai daddy, ishe raasta mat dena, agar ye yaha se nikal gaya to mere Vikas ko nahi chhodega, agar ye mujhe goli maarta hai to maarne dijiye lekin ishe pakad lijiye "

shesh afsaro ne aadesh ke liye thakur sahab ki taraf dekha.

duvidha me fanse thakur sahab gusse ki adhikta ke kaaran khade-khade kaanp rahe the, unke chehre aur aankho me aise bhaav the jinse mehsoos hota tha ki yadi unka mouka lage to ve abhi, ishi waqt Alfaanse ko kachha chaba jaaye.

unki is avastha par Alfaanse thahaka lagakar hans pada, bola," kanoon aur police ke ye numaainde patthardil hote hai Raina, ek maa, ek patni ke jajbaato ki kadr karna ye kya jaane "

" ye sab kuch tum theek nahi kar rahe ho Alfaanse "

" theek to usne kiya tha jishe bachaane ke liye saari duniya ikhatti ho gayi hai " Alfaanse ka ek-ek alfaaz jehar me bujha hua tha, bola," raasta do thakur, yadi meri is chetaavani ke baad bhi raasta nahi diya gaya to kasam se, Raina ki laash padi hogi yaha "

police kaayi ki tarah fat gayi.

muskura utha Alfaanse aur Raina ko cover kiye us raaste par badhta hua bola," agar chidiya ke ek bachhe ne bhi mera peecha karne ki koshish ki to mere saath ushe Raina ki bhi laash milegi "

Raina cheekh-cheekh kar kehti reh gayi ki ve log uske marne ki chinta na kare.

ye ek bahut bada hall tha, cement ke 5 khambo par is hall ki vishaal chatt tiki huyi thi aur in 5 me se ek ke saath is waqt bandhi huyi thi Raina.

uske atirikt hall me keval do shakhs the.

 
Alfaanse aur Rajnagar me stith uska shaagird Maange khan.

Rajnagar me Alfaanse ke liye is hall ka prabandh Maange khan ne hi kiya tha, Raina ko saath liye Alfaanse Raghunath ki kothi se thakur sahab ki gaadi me

bhaaga tha, uski chetavani ke kaaran kisi ne bhi uska peecha karne ki koshish nahi ki thi magar wireless dwara ye jaroor prasarit kiya jaata raha tha ki vah

kidhar jaa raha hai.

thakur sahab ki gaadi me lage wireless ki vajah se ye baat Alfaanse ki jaankaari me bhi thi aur ant me usne ishi wireless ke jariye thakur sahab ko chetavani

di thi ki yadi us par najar rakhi gayi to vah Raina ko maar daalega.

is chetavani ke parinaamswaroop wireless par mout ka sannaata sa chaa gaya tha, fir usne Raina ko behosh kar diya tha.

thakur sahab ki gaadi ek aisi jagah roki thi jaha Maange khan ek car liye pehle se hi khada tha, vaha se is hall tak ka safar ushi car se kiya gaya tha.

police ko abhi tak nahi maalum tha ki Alfaanse yaha hai.

hosh me aane par Raina ne khud ko is khambe ke saath bandhi huyi paaya tha, us waqt Alfaanse Maange khan se keh raha tha," mai Vikas ko chetavani

dene TV station jaa raha hu Maange, Raina ka khayaal rakhna "

" m..magar "

darvaaje ki taraf badhta hua Alfaanse thithka, palatkar bola," kya kehna chahte ho "

" kya mai pooch sakta hu ki TV par aap kya kahenge "

" us bujdil ko saamne aane ke liye lalkaarunga, kahunga ki yadi kisi sherni ka doodh piya hai to saamne aaye, yaha, is hall ka pata dunga ushe "

" m..magar master is tarah to police ko bhi yaha ka pata mil jaayega "

" fikr mat karo Maange, jab tak Raina hamare kabje me hai, tab tak pata lagne ke baavjood bhi police kuch nahi kar paayegi, us kaayar ko to yaha bulana hi

hoga "

" mai haajir hu guru " achanak hi us hall me Vikas ki aawaj goonji.

un dono ke saath hi Raina ne bhi ek jhatke ke saath darvaaje ki taraf dekha aur us maa ke kanth se ek daravani cheekh nikal gayi, Maange khan ke saare

shareer me jhurjhuri si doud gayi aur Alfaanse ke chehre par saakshat mout naachne lagi.

darvaaje ke beecho-beech khade ladke ke hontho par mand-mand muskaan thi, Raina ne cheekhkar ushe yaha se bhaag jaane ke liye kaha magar Vikas bola,"

please mummy, sirf dekhti raho "

" t..tu haramjaade, yaha kaise pahuch gaya "

" aapke paas agar duniya ke har bade shahar me Maange khan jaisa wafadaar shaagird hai to kam se kam Rajnagar me to hamare paas Gulfaam uncle hai

guru, jo gundo ki duniya ka hisaab rakhte hai "

" khair, achha hi kiya jo yaha aa gaye "

" aap mujhe dhoondh rahe the guru aur mai aapko, fir is mulakaat me to kisi kism ki der hone ka sawaal hi nahi uthta tha, magar yakeen kijiye, mere saath

Gulfaam bhi nahi aaya hai "

" marne ke liye taiyaar ho jaa " kehne ke saath hi Alfaanse ne apne pet par bandha hua kaantedaar hunter khol liya jiske kaante abhi tak Vijay aur khud

Alfaanse ke khoon se sarabor the.

behichak ladka kamre me daakhil hua aur muskurata hua bola," yadi maine aisa koyi kaam kiya hai guru to sachmuch mai marne ke liye taiyaar hokar hi

yaha aaya hu "

" tune meri Irvi ko maar daala aur ab kehte hai... "

" sach yahi hai guru ki Irvi ko maine isliye maar daala kyonki mai samajhta tha ki aap usse katayi pyar nahi karte hai, agar meri soch galat thi, agar mere us

kritya se aapki bhaavnaao ko koyi thes pahuchi hai to mai haajir hu, is jism ki boti-boti noch daaliye "

" tum jaante ho ki is kism ki koyi draamebaaji kam se kam Alfaanse ke saamne nahi chalegi "

feeke dhang se muskura utha Vikas, bola," mujhe dukh hai guru ki sachaayi ko aap draamebaaji maan rahe hai, maa kasam, ye sachaayi hai ki Vikas yaha

aapse takraane nahi, aapka mukabala karne nahi, balki us gunaah ki saza bhogne aaya hai jo galatfehmi ka shikaar hokar maine kar diya hai "

" to ye le, bhog uski saza " ye shabd kehte hi Alfaanse ka haath bijli ki si teji se chala aur saany ki jordaar aawaj ke saath hi hunter Vikas ke jism par pada.

hunter Vikas ke jism par pada tha aur cheekh Raina ke halak se nikal gayi thi.

hunter ka ye vaar Vikas ki kameej ke resho ke saath uski khaal aur gosht ke reshe bhi noch laaya tha, magar cheekhna to door, halki si siskaari tak nahi nikli

ladke ke munh se, kisi chattaan ki tarah adig, apne sthaan par khada muskurata raha vah.

ushe yu muskurata dekh Alfaanse ki rago me doudne vaala khoon maano dugne veg se ubal pada, junoon sa sawaar ho gaya uspar, hunter vaala haath bijli ki

gati se chalne laga, saany-saany ki aawaj ke saath hunter Vikas ke jism par pad raha tha.

ekaek hi Vikas cheekh pada," maaro guru, jor se, aur jor se, meri khaal utaar lo, khoon ki ek-ek boond baha do, gosht ka jarra-jarra bikher do is hall me, ye sab,

ye saara jism, is jism me bhara ek-ek kartab aapki hi den hai, agar apne dwara taiyaar kiye gaye Vikas ka aapne yahi anjaam karna tha to maaro, khatam kar

do mujhe "

ek pal thaharkar Alfaanse cheekh pada," m..mujhe bhaavuk kar dena chahta hai kutte, meri bhaavnaao se khelkar khud ko bachana chahta hai tu, arey, is

jism me maine vo saare kartab isliye to nahi bhare the na kameene ki ek din tu meri hi bivi ki hatya kar de, us Irvi ko maar daale jo Alfaanse ke jeene ka

andaaj badalne vaali thi "

" aap ro rahe hai guru "

" koun haraamjaada ro raha hai " aankho me aansu bhare, daant bheenche Alfaanse cheekh pada," in aankho me to khoon hai, khoon, aur fir apne hi lagaye

huve ped ko kaat-te waqt bhala koun nahi ro padega, magar jab ped aadamkhor ban jaaye to ushe kaatna bhi jaroori hota hai, le...le....le "

baar-baar cheekhte huve Alfaanse ne itne hunter maare ki ab laakh chahkar bhi Vikas farsh par khada na reh saka, Raina ke cheekhne ki prvaah kiye bina

Alfaanse us par hunter barsaata hi raha, na chahte huve bhi ab Vikas ke kanth se cheekhe nikalne lagi thi.

uske jism par maujood kapde taar-taar ho chuke the, buri tarah se jakhmi tha vah, lahuluhaan.

uske aaspaas farsh par khoon ki boonde aur gosht ke jarre chitraaye huve se pade the, Raina yu cheekh rahi thi jaise sach me paagal ho gayi ho, Maange khan

thar-thar kaanp raha tha.

hunter maarta-maarta jab Alfaanse thak gaya aur jab usne ye mehsoos kiya ki ab chahkar bhi Vikas farsh par khada nahi ho sakega to khoon me sana hunter

ek taraf fenk diya usne.

jeb me haath daala, chaaku nikaala, click ki aawaj ke saath chaaku khul gaya.

Raina dahaad uthi," bakhs do bhaiya, mere laal ko bakhs do "

Raina ki us pukaar ka Alfaanse par leshmaatra bhi fark nahi pada, chaaku uske haath me tha, uska fal pehle se hi khoon me sana hua tha, khoonkhaar

pashu sa Alfaanse gurraya," pehchaan is chaaku ko kameene aur is par lage khoon ko, ye vahi chaaku hai jisse tune meri Irvi aur uske pet me pal rahe bachhe

ko maara tha, is chaaku par laga khoon meri Irvi aur mere bachhe ka hai, Alfaanse ke kanoon ke mutabik khoon ka badla khoon hai Vikas, ishi chaaku se

tera ant hoga, marne ke liye taiyaar ho jaa "

dard se bilbilata, buri tarah jakhmi Vikas kisi keede ki tarah farsh par rengta hua cheekha," m..mujhe maar daalo guru, mujhe maar daalo, ye kaisa insaaf hai

tumhara ki mujhe tadpa rahe ho, maine to tumhaari Irvi ko itna nahi tadpaaya tha, ab ye dard, ye kasak sehan nahi hoti guru, agar apne bete se jara sa bhi

pyar hai to please, jaldi se mujhe maar daalo "

buri tarah thahaka lagakar hans pada Alfaanse.

daant bheenchkar Raina cheekh uthi," uth Vikas, arey, yadi maa ka doodh piya hai to khada hokar mukabala kar is darinde ka, yu bina mukabala kiye

gishat-ghisat kar markar apni maa ke doodh ko mat laja, mai kehti hu, teri maa kehti hai mere laal, uth, vahi jouhar dikha de apne jisse is desh ka har

dushman kaanpta hai "

" n..nahi mummy, nahi, jo jurm maine kiya hai uski saza bhogne aaya hu mai, dekhte kya ho Alfaanse guru, kya ye aakhiri vinti bhi nahi maanoge meri, mai

kehta hu ki aage badho "

chaaku liye Alfaanse uski taraf badha.

najdeek pahuchkar Alfaanse ne apna chaaku vaala haath upar uthaya, Vikas ke hontho par antim muskaan ubhri, Raina ne kaskar apni aankhe band kar li,

magar tabhi Alfaanse ko aisa laga jaise kisi adrishya shakti ne uske jabde par ghoonsa maara ho.

ghoonsa bahut hi shaktishaali tha, atah cheekhta hua Alfaanse door jaa gira, chaaku uske haath se chitak kar ek khambe se takraya tha, aisa hote hi akela

Alfaanse hi nahi balki Vikas, Raina aur Maange khan bhi chamatkrit reh gaye.

hall me koyi paanchva vyakti najar nahi aa raha tha.

Alfaanse furti ke saath uchhalkar khada ho gaya aur boukhlaaya sa apne chaaro taraf dekhne laga, tabhi hall me Singahi ki aawaj goonji," tum koyi bahut

badi bahaduri nahi dikha rahe the Alfaanse "

" t..tu haramjaade, is kutte ka himayati bankar tu aaya hai, meri Irvi ko baadnaam karne ki koshish to tune hi ki hai, hisaab to tujhse bhi chukta karna hai

 


mujhe, yu adrishya rehkar kya vaar karta hai, mard ka bachha hai to saamne aa, dekhu to sahi ki tu is hall se bachkar kaise niklega "

" kisi ne sach hi kaha hai ki khoobsurat aurat samjhdaar se samajhdaar mard ki aankho par apne jaadu ki patti baandh deti hai, dimaag ko apni khoobsurti

me is kadar jakad leti hai ki jo bilkul saaf hota hai, mard ushe bhi nahi samajh paata, khoobsurat naagin ke character ko bhi nahi "

Alfaanse gurraya," mai Irvi ke liye gaali bardaasht nahi karunga Singahi "

" lo, dekho inhe " Singahi ke in shabdo ke saath hi bahut se photo hava me uchhalkar Alfaanse ke chehre se takraaye, har ek photo me Chemboor ke saath Irvin thi, har ek photo ek se badhkar ek aapattijanak thi, Singahi ki aawaj fir goonji," ye hai tumhaari Irvi, yahi, jiske liye tum paagal huve jaa rahe ho, jiske liye is bachhe ki ye haalat bana di tumne "

Raina aankhe faad-faad kar farsh par pade un photos ko dekh rahi thi, jabki Alfaanse keh utha," ye trick photogrpahy se banaye gaye photo mujhe dhokha

nahi de sakte Singahi, mai nahi maan sakta ki Irvi aisi thi "

" jaanta hu ki filhaal tum nahi maanoge, kisi ne galat nahi kaha hai ki khoobsurat ladki ka jaadu sir chadhkar bolta hai, magar tumhaare is paagalpan ki

bhent mai Vikas ko nahi chadhne dunga, kuch na kuch aisa jaroor karunga jisse tumhaare sir par sawaar is bhoot ko utaar saku "

" tere farishte bhi nahi rok sakenge mujhe " kehne ke saath hi Alfaanse ne ek kone me pade chaaku par jump lagaayi magar abhi vah hava me hi tha ki uske

jabde par ek thokar padi.

ek cheekh ke saath Alfaanse ulat gaya, fir adrishya Singahi ne ushe hosh nahi lene diya, haalanki Maange khan bhi Alfaanse ki madad karne laga tha lekin

adrishya Singahi ke saamne bhala unki kaha chalti.

atah kuch hi der baad dono behosh ho chuke the.

idhar, peeda ki adhikta ke kaaran shayad Vikas bhi behosh ho chuka tha.

chehre par chamtkrit reh jaane vaale bhaav liye kambhe se bandhi Raina boukhlaayi si shunya me nihaar rahi thi, ekaek hi uske bahut sameep se Singahi ki

aawaj ubhri," thakur sahab ko dekh liya Raina beti aur Vijay ko bhi, aedi-choti ka jor lagaane ke baavjood bhi ve Alfaanse ko nahi rok sake, yadi mai sahi

waqt par nahi pahuch jaata to agle hi pal kuch bhi baaki nahi reh jaana tha "

" m..mai kis munh se aapka shukriya ada karu mahaan Singahi " Raina kaanpte swar me keh uthi.

" shukriya ki koyi baat nahi hai beti, Vikas ko bachaane me bhi mera swarth hai "

" s..swarth "

" yahi meri kamjori rahi hai, Vikas jaise bahaduro ki aisi mout nahi dekh sakta mai "

poori shraddha ke saath keh uthi Raina," aap sachmuch mahaan hai "

" is bevkoof ke sir se paagalpan abhi utara nahi hai aur Vikas ko turant hi achhe doctor ki jaroorat hai, atah mai ishe apne saath le jaa raha hu beti, darna

nahi, Singahi vaada karta hai ki tumhaare bete ko kuch nahi hoga aur bahut jald hi ye tumhaare saamne vaise hi khada hoga jaise ye is hall me aaya tha "

Raina chaahkar bhi virodh na kar saki.

fir usne dheere-dheere farsh par pade Vikas ke jism ko gayaab hote dekha aur dekhte hi dekhte Vikas ka jism poori tarah se adrishya ho gaya.

" uske baad kya hua beti " thakur sahab ne poocha.

" Singahi ke jaane ke kareeb dedh ghante baad Alfaanse ko hosh aaya, maine us par vyangya kase, lekin meri baat ka jawaab dena to door usne meri taraf dhyaan bhi nahi diya aur Maange khan ko hosh me laane ki koshish karne laga, Maange khan ke hosh me aate hi ve dono yaha se chale gaye aur uske baad ab aap log aa gaye ho "

" kya jaate waqt unme se kisi ne tumse kuch nahi kaha "

" nahi "

" kamaal hai "

" magar aap sab log yaha par kaise pahuch gaye "

" abhi, mushkil se 15 minute pehle Alfaanse ne khud mujhe phone karke kaha tha ki tum yaha milogi " Raghunath bola," maine fouran ye khabar thakur sahab ko di aur fir force lekar hum log yaha aa gaye "

" iska matlab ki ye jagah unhone hamesha ke liye chhod di hai "

" vo to theek hai Raina beti lekin ye to vahi baat ho gayi ki hum kuve se bache to khaayi me jaa gire, is waqt Vikas Singahi ke kabje me hai aur Singahi Alfaanse se kahi jyada bada aur khatarnaak mujrim hai, jaane vah Vikas ke saath.... "

" mai poori tarah se santusht hu daddy "

" kya matlab " chounkte huve thakur sahab ne poocha.

" Rajnagar me ya duniya ke kisi bhi kone me kisi ke bhi sanrakshan me Vikas itna mehfooz nahi rehta jitna ki vo ab hai, mai jaanti hu ki ab Vikas ko duniya ki koyi taakat nahi maar sakti "

swayam Raghunath, thakur sahab aur unke saath aaye kayi police officer Raina ko chounk kar dekhne lage, aur uske chehre par santushti ke bhaav dekhkar kuch aur chounk pade.

--------------------------------

vo five star hotel ka shaandaar kamra tha jisme is waqt Alfaanse aur Maange khan maujood the, ek mej par viraam ghadi rakhi huyi thi aur ve dono bahut hi dhyaan se viraam ghadi ki harkat karti suiyo ko dekh rahe the, viraam ghadi me do suiya thi.

ek badi, ek choti, badi suyi disha batati thi aur choti doori, unka saara dhyaan ishi viraam ghadi par kendrit tha ki tabhi darvaaje par kisi ne hulki si dastak di, ve dono ek saath chounke, parantu Alfaanse ke chehre par jald hi samanya bhaav bikherte chale gaye, bola," oh, coffee boli thi, waiter hoga, darvaaje par se hi usse tray le lo, andar mat aane dena "

Maange khan uthkar aage ki taraf badh gaya.

Alfaanse punah viraam ghadi ki suiyo me kho gaya, abhi ushe khoye huve thoda hi samay hua tha ki Maange khan ki cheekh saare kamre me goonj uthi. Alfaanse ne chounk kar sir uthaya aur darvaaje ki taraf dekha.

" t..tum " Alfaanse gurra utha.

" haan, hum hi hai lumad pyaare, tumhaare aashiq " kamre me daakhil hote huve Vijay ne kaha.

udhar Maange khan na keval furti se uchhalkar farsh par khada ho chuka tha balki ishaare ke intjaar me Alfaanse ki taraf dekh raha tha, Vijay ko yaha dekhkar Alfaanse ka chehra fir se sakht hota chala gaya," mai tumhe jinda..... "

" na, na, lumad pyaare " uski baat ko beech me hi kaat-te huve Vijay ne haath uthakar kaha," ab is angry youngmen vaali acting ki kya jaroorat hai, tumhaari aur diljale ki sanyukt yojna safal ho gayi hai, saala chacha diljale ko le gaya hai aur ab ye viraam ghadi bata rahi hai ki chacha ka adda kaha hai "

" k...kya matlab " Alfaanse boukhla utha," kya tum ye sab jaante ho "

" hum sab jaante hai lumad pyaare, trikaaldarshi jo thehre "

" tumhe Vikas ne bataya hoga "

" nahi pyaare, tum dono ne to khud ko tees maar khan samjha tha lekin hum bhi poore chaalis maar khan hai, yadi hum tumhaari madad na karte to apne is shadyantra me tum kabhi bhi kaamyaab nahi hote "

" tumne bhala hamari kya madad ki "

" is galatfahmi me mat rehna lumad pyaare ki apne tularaashi ki kothi par tum hame sachmuch shikast dekaar Raina ke saath nikal gaye the, hum us waqt tak itne nahi pitey the ki behosh ho jaaye, haan, behoshi ka naatak jaroor kar rahe the, vaise bhi Vikas ke chaaro taraf humne jo jaal bichaya tha vo dikhavati tha, apne saare aadmiyo ko humne aadesh de diya tha ki unhe tumse Vikas ko bachane ka mahaz naatak karna hai, bachana nahi hai "

" kyo "

" kyonki agar hum Vikas ko bachaane ki vaastavik koshish karte to haalaat itne na bigadte ki Vikas ki madad ke liye chacha ko aana padta, aur agar aisa na hota to tumhaari scheme fuss saabit ho jaati "

" tum vaakayi genius ho, lekin ye to batao ki tumhe ye ehsaas kab hua ki mai Vikas ke khoon ka pyasa hone ka sirf naatak kar raha hu "

" Irvin ka katl karne ke peeche ka kaaran Vikas tumhaara us ghar se sambandh vichhed karna bata raha tha, ye bahana tab tak to thos tha jab tak ki tumne control room vaala kissa nahi nibta liya tha lekin uske baad bekaar tha, us kaam ke nikalne ka baad us ghar se tumhaara naata tod dene se koyi laabh nahi tha aur bhale hi apna diljala dimaag se chahe paidal hi kyo na ho, lekin vo fir bhi aisa koyi kaam nahi karta jisse koyi laabh na ho ya jo tarko ki kasauti par khara na utarta ho "

" well " Alfaanse prashansha kar utha.

" udhar, jab surang me tum humse mile to diljale ko gaayab dekhkar tumne ek baar bhi ye swabhaavik prashan nahi kiya ki diljala kaha hai, fir jab humne Irvin ke baare me vo kaha jo hume Bogaan ne bataya tha to pata chala ki chacha tumhe vo sab pehle hi bata chuka hai, vida hote samay tumne ye bhi kaha ki tumhe Singahi ke vartmaan thikaane ki koyi jaankaari nahi hai, in sab baato se hi hamara maatha thanak gaya tha, baad me jab Vikas ne bataya ki usne Irvin ki hatya kar di hai, to tum dono shaitaano ki saari scheme hamare bheje me ghusti chali gayi "

" kya tum bata sakte ho ki hamari kya scheme thi "

" Singahi ke hamle ke baad tum mushkil se 15 ya 20 minute behosh rahe hoge, hosh me aate hi tumhe ve baate yaad aayi jo Singahi ne kahi thi yaani ki saare case ke douraan uska sudarshan chakra kis tarah se ghoomta raha tha, tumhe ushi waqt yakeen ho gaya hoga ki Irvin vaakayi charitraheen hai varna uski dhuri ke bina Singahi ka sudarshan ghoom hi nahi sakta tha, ushi kshan tumne Singahi se Kohinoor vaapis prapt karne ki yojna bana li, pehle ye pata lagana jaroori tha ki Singahi ka thikaana kaha hai, iske liye tumne transmitter par diljale se sampark sthaapit kiya, saare haalaat ushe bataye aur scheme samjha di "

" ye scheme kya thi "

" yahi ki diljala Irvin ki hatya kar dega, tum Irvin ke hatyaare se badla lene ki kasam khaaoge, fir Vikas ko is avastha me pahucha doge ki ant me Singahi ushe bachakar apne adde par le jaaye, Irvin ke pyar me tum andhe ho gaye ho, iski aadhaarshila tumne hamare dimaag me tabhi rakh di thi jab humne Irvin ko apshabd kahe the, hamara khayaal hai ki jab tum surang ke raaste se jaa rahe the tab Vikas Irvin ka katl karke lout raha tha, raaste me tum ushe kahi mil gaye hoge aur is viram ghadi se sambandhit transmitter tumne ushe de diya hoga "

" sachmuch Vijay, tumhe dhokha dena naamumkin hai "

" humne ye socha ki jo scheme tumne banayi hai, uspar Britain me amal kar paana kaafi mushkil hoga kyonki usme Bond aur Britain ki police bhi aade aati, atah suvidha ke liye hum diljale ko Bhaarat le aaye, yaha drama kuch jyada hi shashakt raha "

" agar tum pehle hi sabkuch samajh gaye the to fir ye sabkuch Vikas par spasht kyo nahi kiya "

" tum aur diljala agar sava sher ho to hum dedh sher hai pyaare " Vijay ne ajeeb se andaaj me chaati fulaate huve kaha," jab tumhi humse apne saare patte chupakar khel rahe the to hum apne patte tumhe kyo dikhaate, haan, black boy ko vo atpata sa aadesh dekar humne saanketik bhasha me sabkuch bata jaroor diya tha magar shayaad vah samjha nahi "

" khair, ab kya iraada hai "

" dono yaar milkar chacha ki taang todne chalenge "

" baitho, jara dekh to le ki vo Vikas ko kaha lekar jaa raha hai " kehne ke saath hi viraam ghadi ki or dekhte Alfaanse ne Vijay ko apne bagal me baithne ka ishaara kiya aur drishti viraam ghadi par poori tarah se jama di, Vijay bhi bahut dhyaan se dekhne laga.

------------------------------

 


mr. M ke transmitter par Singahi ki aawaj ubhri," ek baar fir mai aap se pooch raha hu ki Kohinoor ki aap mujhe kya keemat denge "

" hum pehle bhi keh chuke hai ki us keemat se 100 crore British pound jyada jo duniya ke kisi bhi desh ne fix ki hai "

" mai ek badi duvidha me fans gaya hu mr. M "

" kahiye "

" jo baat aap keh rahe hai vahi America bhi keh raha hai, unke kehna hai ki duniya ka jo bhi desh Kohinoor ki jitni keemat lagayega ve usse ek crore jyada American dollar denge "

" duvidha tumhaari hai Singahi, hal bhi tumhe hi karni hai " saamne baithe Bond ko dekhkar M ne kaha.

" to suno, China aur Russia ke paschimi border se dedh hajaar kilometer door poorv me ek pattharo ka jungle hai, naam shayad aapne bhi suna hoga, is jagah ka naam stone forest hai, ye naam shayad kisi ne bahut soch-samajhkar hi rakha hoga, kyonki yaha meelo door tak pattharo ke alawa aur kuch nahi hai, chote-bade, har kism ke patthar maujood hai yaha, sabse kamaal ki baat ye hai ki yaha ki jameen pathreeli nahi, khair, yaha jo sabse bada patthar hai vo poora ek pahaad hai, itna jyada uncha aur vishaal hai ki aajtak uske top par koyi nahi chadh paaya hai, ekdum khurdura aur kaala patthar hai ye, iske nichle aur upari sirey utne hi bade hai jitna ki kisi khel ka maidaan hota hai, kamaal ki baat ye hai ki ye patthar jameen se juda hua nahi hai, jameen par sirf rakha hua hai, magar hajaaro haathiyo ki taakat bhi ushe tas se mas nahi kar sakti "

" aap to patthar ki khoobi bayaan karne lage "

" apne kisi pratinidhi ko aapne ishi patthar ke top par bhejna hoga "

" kisliye "

" vahi par mane Americi pratinidhi ko bhi bulaya hai, hum bhi vahi milenge, dono partiya aamne-saamne baithkar faisla karengi ki Kohinoor kishe chahiye "

" hame manjoor hai "

" ek hafte baad, aaj hi ke din, ishi samay "

" theek hai, magar hamara pratinidhi us patthar ke top par pahuchega kaise "

" aap helicopter ki sevaaye le sakte hai "

" ok "

" kishe bhej rahe hai aap "

mr. M ne kaha," James bond ko "

" theek hai magar yaad rakhiye, Kohinoor ki keemat bhale hi vaha tay ho magar pratinidhi peshgi ke roop me vaha kuch na kuch lekar jaroor pahuchna chahiye, taaki dono partiyo me nirnay hone ke baad souda pakka kiya jaa sake aur ye bhi yaad rakhiye ki ye peshgi Kohinoor ki hogi "

" hum samajh rahe hai "

udhar se sambandh vichhed kar diya gaya, mr. M ne apne maathe par ubhar aayi paseene ki boondo ko pouncha aur fir bole," souda tay karne ke liye bhi ajeeb jagah talaash ki hai jaalim ne, kya tum ye samajhte ho Bond ki vaha uska adda hoga "

" Singahi itna bevkoof nahi hai ki itni aasaani se apne adde ka pata bata de aur na hi is tarah khule aakash ke neeche uska adda ho sakta hai "

" yaani tumhaare khayaal se vah jagah Singahi ne keval milne ke liye chuni hai "

" yes sir "

" ho sakta hai " M ne kaha," tumhaari raay ke mutabik Singahi se itni aage tak ki baat humne kar to li hai, tum jaante ho ki America humse kahi jyada ameer desh hai, usse jyada to kya hum utni keemat bhi nahi de sakte jitni America de dega "

rahasymay aur katu muskaan ke saath James bond ne kaha," apne hi Kohinoor ko yadi 007 keemat dekar vaapis laaya to fir vah 007 hi kaha rahega "

transmitter par ek patthar ka jikra Vikas laghbhag ushi andaaj me karta chala gaya, jis andaaj me Singahi ne M se kiya tha, jab Vikas ruka hi nahi to Vijay ne kaha," bas...bas pyaare diljale, bor kyo kar rahe ho, humne tumse kisi patthar ki tareef karne ke liye nahi kaha hai, balki ye poocha hai ki chacha ke adde ki position kya hai "

" disha aur doori to viraam ghadi se aapko maalum ho hi gayi hogi guru "

" bilkul ho gayi hai pyaare "

" to maine jo address diya hai, yaani ki stone forest, vo viraam ghadi dwara batayi gayi disha aur doori se tally karta hai ya nahi "

" cent-percent tally karta hai pyaare "

" is jungle me sabse jyada kshetrafal vaala patthar... "

" fir vahi patthar, ama tum is patthar ke daaye-baaye bhi badhoge ya nahi "

" is patthar ke daaye-baaye badhna bekaar hai guru, kyonki darasal yahi Singahi dada ka adda hai aur is waqt mai ushi patthar ke andar se bol raha hu "

" kya matlab " chounkte huve Vijay ne poocha.

" darasal ye vishaal patthar andar se khokhla hai guru, kyonki sadiyo se patthar yahi aur ishi stithi me pada hai isliye kisi ko gumaan bhi nahi ho sakta ki patthar andar se khokhla hai aur ye khokhla sthaan hi uska adda hai "

" kamaal hai pyaare "

" is adde me aane-jaane ka ek hi raasta hai aur vah patthar ke sheersh me se hai, mai keh hi chuka hu ki is patthar par chadhna kisi achhe-khaase pahaad par chadhne jaisa hai, aaj tak jameen se shayad koyi bhi is patthar par nahi chadha hai "

" itni mehnat karke bina kisi vajah ke patthar ke sheersh par to vahi chadhega pyaare jiske sir par foda ho, jab kisi ko patthar ki visheshta maalum hi nahi to patthar ke sheersh par kya koyi dhaar dene jaayega "

" sheersh ke beechobeech ka dus gaj vargaakaar hissa ek taraf hat jaata hai aur fir is sthaan se ek lift dwara patthar ke andar tak jaaya jaata hai, patthar ko andar se inhone bahut si manjilo me baant rakha hai, jis bhi manjil par chaho, lift ruk jaati hai "

" aur "

" Singahi ka office bilkul nichli manjil par hai, ishi office par bahut saari screens lagi huyi hai, in screens par Singahi patthar ke chaaro taraf ke drishya dekh sakta hai "

" yaani ki patthar ke paas fatakna khatre se khaali nahi "

" ji haan "

" aur "

" jyada vistaarpoorvak mai aapko nahi bata sakunga, kyonki adde par bahut kuch hai aur yadi kisi guard ko shak ho gaya ki itni der tak toilet me mai kya kar raha hu to gadbad ho jaayegi, aap samajh hi sakte hai ki yaha pag-pag par khatra hai "

" so to hai pyaare, magar tum ye batao ki Kohinoor tak pahuche ya nahi "

" vishvaaspoorvak kuch nahi keh sakta guru, lekin haan, anumaan hai ki Kohinoor Singahi ke office me hi kahi maujood hai aur vaha har waqt Singahi rehta hi hai "

" yaanki ki daanv lagana mushkil hai "

" bahut kathin hai, fir bhi maine ek din chuna hai, aaj se choutha din "

" is din me aisi kya khaas baat hai pyaare "

" Kohinoor khareedne ke silsile me Mike aur Bond aa rahe hai, vaarta patthar ke sheersh par hogi aur unhe ye nahi bataya gaya hai ki patthar ke andar headquarters hai, patthar ke sheersh par unhe kuch aisi bhaasha me bulaya gaya hai ki ve sirf ishe milne ka ek sthaan hi samjhenge "

" hum samajh gaye pyaare "

" subah 10 baje ka waqt tay hua hai, jaahir hai ki us waqt Singahi dada apne office me nahi honge isliye maine tabhi ka waqt chuna hai "

" very good "

" meri madad ke liye yadi aap ushi samay vaha pahuche to uchit hoga "

" bilkul pahuch jaayenge pyaare, bilkul bhi fikr na karo "

" ok guru, over and all " dusri taraf se ubharne vaali Vikas ki is aawaj ke saath hi sambandh vichhed ho gaya aur transmitter off karte huve Vijay ne Alfaanse se kaha," ab bolo lumad bhai "

" kya bolu "

" is baar chacha saala patthar ke andar ghuskar baitha hai, ab sochna ye hai ki us patthar ko jiski apne diljale ne itni tareef ki fatah kaise karna hai "

kuch sochte huve Alfaanse ne kaha," screens ke jariye Singahi patthar ke chaaro taraf dekh sakta hai, iska matlab ye hai ki patthar ke najdeek pahuchna hi ek samasya hai "

" uske sheersh par to keval helicopter se hi pahucha jaa sakta hai pyaare "

" helicopter to khud hi itni aawaj karega ki hamara vaha tak pahuchna gupt nahi rahega "

ekaek hi Alfaanse ke dimaag me ek idea aaya, chutki bajaate huve vo bola," good, raat ke samay screens par ushe kuch dikhaayi nahi dega Vijay, vaha chaaro taraf andhera hota hoga aur hum bhi ushi andhere ka hissa ban jaayenge "

" chalo maan liya pyaare ki raat ka laabh uthakar hum patthar ke kareeb pahuch bhi gaye to bhi hum uspar chadhnege kaise, maan lo ki khoonti vagairah gaad kar parvatarohiyo ki tarah us par chadhna shuru bhi kar de to diljale ke mutabik patthar itna vishaal hai ki ek raat me chadhkar uske sheersh par pahuchna naamumkin hai, khoontiya gaadte huve chadhne me to vaise hi kaafi samay lagta hai, jaha suraj nikla nahi ki hum screens ke daayre me aa gaye "

" vaakayi, patthar ke sheersh par pahuchna ek samasya hogi "

" magar fir bhi hamare dimaag me ek idea aa raha hai pyaare "

" kya " Alfaanse ne utsuktapoorvak poocha.

" hamare paas ek bandar hai aur bandar bina khoontiyo ka prayog kiye insaan se kahi jyada furti se aise patthar par chadh sakta hai "

" very good, kya idea hai " Alfaanse bola," vaakayi me Vijay, tumhaare saath jitne bhi kshan gujaaro, utni hi baar tumhaara bheja choom lene ka dil karta hai "

-----------------------------------------

maachis ke barabar transmitter ko off karke Vikas ne joote ki aedi me rakha aur baahar nikal aaya.

bathroom ke baahar hi hari vardi pehne do shashastra guards uske saath ho liye.

pichhle 4 din se Vikas yahi tha, chamatkaarik upchaar ki vajah se ab vah poorn roop se swasth tha, uske sabhi jakhm bhar chuke the, unme ab koyi peeda nahi thi, haan, jakhmo ke daag abhi bhi baaki the.

in daago ke baare me Singahi ne aaj subah hi usse kaha tha," fikr mat karo bete, tumhaare jism par in jakhmo ka koyi nishaan nahi rahega, doctor Kotso jo marham aur khaane ki davaayi de rahe hai vo khud unhi ke dwara ijaad ki gayi aur aajmaayi huyi hai, jyada se jyada do ya teen din me tum poorn roop se swasth ho jaaoge "

aur isme koyi shak nahi tha ki doctor Kotso ke naam se pukaare jaane vaale us shakhs ki daavayi vaakayi me chamatkaari thi, 4 dino me jakhmo ka poori tarah bhar jaana chamatkaar hi to tha.

vah jaanta tha ki Singahi ke adde par Singahi ko hi dhokha dena naamumkin sa tha, magar jin paristhithiyo me Singahi ushe yaha laaya tha shayad unhi ke kaaran uske man me ek kshan ke liye bhi ye vichaar nahi aaya tha ki vah yaha kisi yojna ke antargat aaya hai uisliye in do guards ke alawa us par aur koyi vishesh najar nahi rakhi jaa rahi thi.

fir bhi Vikas ne itni saavdhaani barti thi ki 4 din me aaj usne Alfaanse se sambandh sthaapit karne ke liye transmitter ka prayog kiya tha.

dusri taraf Alfaanse ke sthaan par Vijay ko paakar vah chounka tha lekin Vijay ne saara maamla sanshep me ushe bata diya tha.

Sinaghi ko uske yaha pade rehne se koyi shak paida na ho ishi vajah se usne aaj subah yaha se jaane ki ichha prakat ki thi, jishe ye kehkar Singahi ne bade aaraam se thukra diya tha ki vah ushe tab tak baahar nahi jaane dega jab tak Alfaanse ke sir se ye Irvin ke pyar ka bhoot nahi utar jaata.

Vikas chup reh gaya tha, Kohinoor, Bond aur Mike se sambandhit baate ushe khud Singahi ne bataayi thi.

is baat par khush hota hua vo aage badh raha tha ki usne transmitter par baate bhi kar li hai aur kisi ko kaano-kaan khabar bhi nahi huyi.

hamesha ki tarah dono guards uske peeche hi the.

 
ve ek gallery se gujar rahe the, doodhiya prakash se bhari aisi shaandaar gallery jaisi keval five star hotels me hi dekhi jaa sakti hai, Vikas ye dekhkar chakit tha ki baahar se kitne khurdure aur bhadde dikhne vaale patthar ke andar kitna shaandaar adda banaya gaya hai.

gallery paar karke vo ek hall me pahucha, hall ke beecho-beech ek gaddedaar bed tha aur pichhle 4 dino ka adhikaansh samay usne ishi bed par gujara tha.

beemaar sa vah punah bed par let gaya.

------------------------------

us waqt 9 baje the jab unhe stone forest ka vo vishaal patthar najar aaya jiski unhe talaash thi, door se hi, do haathiyo ki unchaayi vaale patthar ki back se unhone us patthar ko dekha, ushe jo raat ke is andhere me sannaate ke beech khada daravana raakshash sa mehsoos ho raha tha, patthar sachumch unki kalpanaao se kahi jyada vishaal aur uncha tha.

haalanki itna bada pahaad mil jaana swabhaavik baat hai, magar pahaad kyonki pahaad hota hai isliye ushe dekhkar ascharya nahi hota, magar is patthar ko dekhkar to Vijay aur Alfaasne jaise vyaktiyo ki aankho me bhi hairaani ke bhaav ubhar aaye, pahaad dhalva hote hai, atah unpar chadhne ki kalpana ki jaa sakti hai, lekin patthar to patthar hi hota hai, yaani bilkul khada, atah chadhkar iske sheersh par pahuchne ki kisi ne kalpana bhi nahi ki hogi.

aur is patthar par chadhne ka dus-saahsik kaarya karna tha Dhanushtankaar ko, ekaek hi Alfaanse bola," Vijay "

" farmaao pyaare "

" is patthar ke andar Singahi ke basne ke idea ki bhi daad deni hogi, agar Vikas hame andar ki mool stithi nahi batata aur agar hum us viraam ghadi ke sahaare hi yaha taak aaye hote to viraam ghadi keval yaha tak aakar is patthar ki taraf sanket karke ruk jaati, tab hum kalpana bhi nahi kar sakte the ki ye patthar andar se khokhla hoga, balki is viraam ghadi ko hi kharaab samajhkar ishe ispar patak kar chaknachoor kar dete "

" tumhaari baat solaah aane sahi hai lumad bhai " Vijay ne kaha," lekin samay kam hai, ab hum is patthar aur chacha ke dimaag ki daad dene ki bajaay aage badhe to hamare liye jyada uchit hoga "

" chalo " Alfaanse bola.

haalanki vaha se unhe patthar kaafi najdeek najar aa raha tha, parantu fir bhi uski jad tak pahuche me unhe tees minute lag gaye, Vijay ke kandhe par baitha Dhanushtankaar baar-baar apna chehra uthakar saare raaste par us patthar ke sheersh ko hi dekhta raha tha, shayad man me uthti is baavna ke adheen ki is vishaalkaay patthar par usne vijay praapt karni hai, man hi man ushe dar laga ki shayad ek raat me vah sheersh par nahi pahuch paayega.

jad me baithkar jab unhone patthar ke sheersh ko dekhna chaha to laghbhag unhe ulat hi jaana pada.

Vijay bola," ab saara daaromdaar tumhaare upar hai gaandiv pyaare "

andar se bhale hi Dhanushtankaar ki himmat jawaab de rahi ho lekin pratyaks me usne khud ko taiyaar hi dikhaya, tab Vijay bola," to pyaare ho jaao shuru, samay kharaab karne se kya laabh "

Dhanushtankaar ne apne coat ki jeb se addha nikala, haan, is abhiyaan par chalne se pehle vah apne saath adhha ki lekar chala tha, dhakkan kholkar usne do-teen ghoont chadhaaye.

is beech Vijay ne apne kandhe se rassi ka guchha nikaalkar na keval khol liya tha balki uska ek sira Dhanushtankaar ki choti si patloon me bandhi belt ke saath baandh diya tha.

dhakkan band karke usne addha jeb me rakha.

bade hi shraddha ke saath usne Vijay ke charan sparsh kiye, ushe pyar karte huve Vijay ne kaha," sambhalkar chadhna gaandiv pyaare, chookte hi neeche tumhaari laash aakar giregi "

jab usne Alfaanse ke pair chuve to Alfaanse ne kaha," tum jaroor safal hovoge Monto "

fir Dhanushtankaar ne apni saahsik yaatra shuru kar di.

jo rassi vah apne saath lekar aaye the vo Vikas dwara batayi gayi patthar ki unchaayi se 20 gaj jyada hi thi, ek hi patthar par ve dono gumsm se aamne-saamne baithe apne beech padi rassi ke guchhe ko dekh rahe the, us guchhe ko jo dheere-dheere kam ho raha tha, iske kam hone ki gati Dhanushtankaar ke patthar par chadhne ki gati se sambandhit thi, shuru-shuru me rassi kaafi tej gati se kam huyi thi magar ab gati samanya thi.

beech-beech me ve radium dial vaai wrist-watches me samay dekh lete the, unke dil keval is aashanka se dhadhak rahe the ki sahi samay tak Dhanushtankaar sheersh par pahuch bhi paayega ya nahi, jabki patthar par chadhte huve Dhanushtankaar ka dil jabardast sharirik shram karne ke kaaran buri tarah se dhadhak raha tha.

saanse dhounkni ki tarah chal rahi thi uski.

haath aur taange dukhne lagi thi.

patthar khurdura tha isliye vah chadh bhi paa raha tha, agar vah chikna hota to shayad vo chadh bhi na paata, bahut hi dhyaan se vah ek ke baad dusra kadam aage badhaata.

jaha vah hota vaha se pehle apna haath badhakar vah upar ke kisi ubhre huve hisse ko pakadta tha, tab us par chadhta, itni saaavdhaani ke baavjood kayi baar uske haath-paanv fisle, kayi baar girne se bacha tha vo.

aisi stithi anek baar aa rahi thi ki haath badhaane par ushe koyi khurdura aur ubhra hua bhaag na milta, aise prateyek mouke par ushe jump leni padti thi, upar ke khurdure bhaag tak pahuchne ke liye.

aur aisi prateyek jump par usne apna jeevan daanv par lagaya tha, jara si bhi anumaan me galti ushe mout ki gart me bhej sakti thi.

jab vah buri tarah se thak jaata, saanse aur taange aage badhne se inkaar kar deti, ushe lagta ki ab vah aur upar nahi chadh paayega to vah sustaane lagta.

ekaek hi uski najar wristwatch par padti.

samay ko apne se kahi jyada tej bhaagta dekh kar vo apni jeb se adhha nikaalta, kuch ghoont halak me utaarkar galey ko tar aur dimaag ko nashe me choor karke fir se chadhne lagta.

ek samay aisa aaya jab usne ek ubhre huve gaddhe me haath daala to do kabootaro ke udne ki aawaj sannaate me goonjti chali gayi, fadfadaane ke baad kabootaro ke achanak udne ki aawaj itni darawani thi ki Dhanushtankaar girte-girte bacha tha.

sehamkar usne apne ko ekdum se patthar ke saath chipka liya tha.

ye baat ushe kuch der baad samajh me aayi thi ki kabootaro ke is jode ne vaha apna basera banaya hua tha aur ve usse darkar ude hai, ye sochkar muskura utha Monto ki aise samvedansheel samay me kabootaro ke fadfadaane ki aawaj bhi kitni darawani lag sakti hai.

sanshep ye hai ki aise kayi tarah ke khatro ko paar karte huve vo ant me teen baje ke kareeb patthar ke sheersh par pahuch hi gaya, upar pahuchne ke baad usne ek minute bhi aaraam nahi kiya kyonki yojna ke mutabik vah pehle hi ek ghanta late the, jeb se ek moti keel nikaalkar usne vaha thoki, apni belt se rassi ak sira kholkar uspar baandha, majbooti ko parkha aur fir jis hathodi se usne keel gaadi thi vahi usne neeche fenk di.

------------------------------

2 bajne ka baad jitna bhi samay gujar raha tha vah Vijay aur Alfaanse par bahut bhaari pad raha tha, dil kuch jyada hi asamnya gati se dhadhak rahe the aur ve vyagratpoorvak us rassi ko kam hote huve dekh rahe the, kyonki 3 baje tak ka samay gujaarna unke liye mushkil ho gaya.

us samay ve uchhalkar khade ho gaye jab unke aaspaas hi kisi patthar se hathodi ke takraane ki aawaj aayi.

ye sanket tha Monto ki yaatra khatam aur unki yaatra shuru hone ka.

ab ve dono teji ke saath us rassi par chadhne lage, haalanki itni unchaayi par bhi rassi ke dwara chadhna koyi hansi-khel nahi tha lekin fir bhi jitna khatarnaak aur dus-saahas se bhara kaam Monto ne kiya tha, uske muakabale ye kaam kuch bhi nahi tha, sheersh par pahuchne me unhe teen ghante lage.

yaani ki suabh ke 6 baje ve sheersh par the, yaha hava bahut tej thi, jhakkad se chal rahe the, jism par maujood kapde chust hone ke baavjood fadfada rahe the.

udhar, poorv me gagan surkh hone laga tha.

patthar ke sirey se unhe surya ka upari sira bhi chamak raha tha, Alfaanse teji ke saath rassi ko kheenchkar uska guchha banane laga, Vijay patthar ke chaaro taraf faile stone forest ko dekh sakta tha, jaha ve the, vaha surya ki rashmiya pahuchne lagi thi jabki neeche stone forest me abhi tak andhera tha, Vijay ne Dhanushtankaar se poocha," yaha chupne ki koyi jagah talaash ki gaandiv pyaare "

Dhanushtankaar ne baayi or ishaara kiya.

ye dekhkar Vijay chakit reh gaya ki vaha ek chota sa antriksh rocket apna munh aasmaan ki taraf uthaaye choti-choti teen taango par khada tha, bas, baaki ka samoocha patthar ekdum maidaan ki tarah smatal tha.

yaani ki chupne ki kahi koyi jagah nahi thi.

shaayad isliye Dhanushtankaar ne us yaan ki taraf ishaara kiya tha, yaan ke andar chupne ka alawa chupne ki koyi jagah nahi thi, Dhanushtankaar ne apni diary nikaalkar likha," maine apne silenceryukt revolver se yaan ke darvaaje ka taala tod daala hai "

" arey jiyo mere pyaare " Vijay ne kaha aur fir Dhanushtankaar ko god me uthakar pyar se choomne laga, ishi beech Alfaanse ne na keval saari rassi kheench li thi balki Dhanushtankaar dwara gaadi gayi keel bhi ukhaadkar apni njeb me rakh li thi.

ab ve laghbhag doudte huve yaan ki taraf badhe.

patthar ke sheersh par poori tarah se dhoop fail gayi thi, yaan ke andar pahuchkar unhone sakhti ke saath yaan ka darvaaja andar se band kar liya tha.

yaan sampoorn aadhunik suvidhaao se paripoorn tha.

bahut si TV screens bhi thi, achhi tarah samajhne ke baad Alfaanse ne ek screen on ki to ye dekhkar unki aankhe chamak uthi ki iske dwara ve patthar ke sheersh ko dekh sakte the.

Dhanushtankaar ne jeb se sigaar ki dibbi nikaali aur ushe Vijay ko dikhaate huve apne chehre par yaachna ke se bhaav utpann kar liye, jaise ki keh raha ho," please, ek sigaar "

" piyo gaandiv pyaare, lambe-lambe sutte kheench kar piyo "

----------------------------------

 


" v..vo dekho Vijay, adde ke andar jaane ka ekmaatra raasta " josh ki adhikta ke kaaran Alfaanse laghbhag cheekh hi pada.

screen par sachmuch patthar ke sheersh par ek bahut bada vargakaar hissa hata hua najar aa raha tha, vah darvaaja theek beech me tha, teeno ki drishti us par chipak gayi.

Vijay ne samay dekha, paune 10 baj rahe the.

achanak hi patthar ke garbh se ek gadgadata hua helicopter baahar nikla, uski gadgadahat ki aawaj unhe yaan ke andar tak aayi thi, patthar ke garbh se nikalne ke baad helicopter bahut hi teji se aakaash ki taraf uda, patthar ka ek chakkar lagaya usne aur fir patthar ke sheersh par hi land kar gaya.

uske andar se Singahi ko nikalte unhone spasht dekha.

tabhi darvaaje ko paar karke patthar ke garbh me se ek lift nikli, lift ka darvaaja khulte hi paanch hari vardi vaale shashastra guards baahar nikle, unhone teen folding kursiya aur ek mej lift se baahar nikaali, lift vaapis chali gayi aur raasta band ho gaya.

ab koyi nahi keh sakta tha ki patthar ke andar jaane ke liye yaha koyi raasta hai, Singahi un guards ko bol-bolkar kuch samjha raha tha, yaan ke andar chupe ye teeno uski aawaj to nahi sun sakte the, magar jo kaaryavaahi ho rahi thi ushe dekh bhalibhaati sakte the.

beech me mej aur uske teen taraf teeno kursiya daal di gayi, paancho shashastra guards patthar ke sheersh par chaaro taraf bikhar gaye aur Singahi aaraam se un teeno me se ek kursi par baith gaya.

Vijay badbadaya," Bond aur cylce chain ka intjaar hai "

" m..magar Vijay, adde ke andar se Singahi helicopter dwara yaha kyo aaya hai "

" chacha bahut chaalaak hai pyaare, Bond aur cycle chain par vah yahi jataana chahta hai ki vah khud bhi unhi ki tarah yaha aaya hai "

abhi Vijay ka vaakya poora hua hi tha ki yaan ke andar punah halki si gadgadahat ki aawaj ne pravesh kiya aur screen par ek nahi balki do helicopter chakraate najar aaye.

" lo pyaare " Vijay bola," Kohinoor ke dono khareeddaar aa pahuche hai "

unke dekhte hi dekhte do minute ke antraal se dono helicopter land huve, Bond aur Mike helicopter se baahar nikle.

un dono ke hi haatho me bhaari atachiya thi.

un atachiyo ko dekhkar jaane kyo Alfaanse ki aankho me chamak utpann ho gayi, jabki Vijay keh raha tha," Bond ki ataichi kuch jyada hi bhaari maalum padti hai lumad bhai, ushe lekar Bond se theek se chala bhi nahi jaa raha "

Alfaanse chupchaap screen par najar aane vaali kaifiyat ko dekhta raha.

--------------------------------

paune 10 bajte hi pichhle teen dino ki tarah Vikas ne kaha," breakfast "

" s..sorry sir " do me se ek guard ne wristwatch dekhte huve ratey-rataye swar me kaha," abhi samay nahi hua hai, sirf paune 10 baje hai, breakfast ka samay saadhe 10 ka hai "

" please Robin " uska naam lekar Vikas ne yaachna si ki," bahut bhookh lagi hai, kabhi to niyam tod diya karo yaar, kisi ko bhookha maarne me tumhe kya khushi milti hai "

" sorry, mahamahim ka aadesh hai ki... "

magar Vikas ne uska vaakya poora nahi hone diya, shabd badalkar vahi yaachna karne laga, jab had hi ho gayi aur Vikas ne ye kaha ki agar ishi waqt ushe naashta na mila to vo bhookh se mar jaayega, fir uski laash ko breakfast karate rehna to vo dono guards ek-dusre ki taraf dekhkar muskuraaye, taras khaakar dusre ne kaha," aaj to inki baat maan hi lo Robin "

muskurata hua Robin muda, hall ka darvaaja kholkar vah baahar nikal gaya, Vikas jaanta tha ki naashta lekar ushe loutne me sirf 5 minute lagenge, atah in 5 minuto me hi ushe apna kaam karna hai, Robin ko baahar gaye abhi 30 second hi gujre honge ki darvaaje ki taraf dekhte huve Vikas ne kaha," arey, tum abhi tak gaye nahi Robin "

jhonk me guard ne palatkar darvaaje ki taraf dekha aur palang par khade Vikas ne kisi gorrille ki tarah uspar jump laga di, guard hadbada gaya, magar chook usse ho chuki thi, Vikas ka ek haath uske munh par dhakkan banke chipka aur dusre ki karaat gardan par padi.

ek ghuti-ghuti si cheekh ke saath vah farsh par lamba ho gaya.

Vikas ne furti se ushe kheenchkar ek kone me daala, douda aur darvaaje ke saath vaali deewar se satkar haanfne laga, ushe Robin ka intjaar tha.

apne baaye joote ki aedi se chota sa revolver nikaalne ke baad usne coat ki secret pocket se chota sa silencer nikala aur ushe revolver ki naal par abhi fix kiya hi tha ki darvaaja khula, haath me tray liye Robin andar daakhil hua.

kamre me apne saathi ko gaayab aur bed ko khaali dekhkar abhi vah chounka hi tha ki revolver taane Vikas uske saamne aa gaya, Robin ke chehre par hairat ke aseemit bhaav ubhre hi the ki daant bheenchkar Vikas gurraya," na..na.. cheekhna mat, varna mai tumhe goli maar dunga aur tum is revolver ki naal par lage silencer ko to dekh hi rahe ho "

hakka-bakka se khada reh gaya Robin, uski gun uske kandhe par latak rahi thi, Vikas ne aadesh diya," tray ko aaraam se mej par rakh do "

aadesh ka paalan karne ke alawa bechaara Robin aise haalaat me aur kar bhi kya sakta tha, aage badhkar usne tray ko mej par rakh diya, abhi usne tray ko mej par rakha hi tha ki uske sir par revolver ke daste ka itna jordaar vaar hua ki uski aankho ke aage aatishbaaji naach uthi.

munh par dhakkan bane huve ek haath ne uski cheekh ko uske halak se baahar nahi nikalne diya.

ushe behosh karne ke baad Vikas ne jaldi se apne kapde utaare aur 10 minute baad vah ek guard hi najar aa raha tha.

cap ka chajja usne antim kon tak apne maathe par jhuka liya aur darvaaja kholkar baahar aa gaya, baahar aakar vah sir jhukaaye teji se gallery paar karne laga.

uska lakshya Singahi ka office tha.

office uska dekha hua tha aur kam se kam yojna banate huve usne bilkul nahi socha tha ki ushe vaha tak pahuchne me koyi dikkat pesh aayegi, vah pichhle ek hafte se yaha tha aur is beech usne ye note kiya tha ki Singahi ke ye guards aapas me itne ghule-mile huve nahi hai, anavashyak roop se baat bhi nahi karte hai aur ye bhi jaroori nahi ki ve sab ek-dusre ka chehra pehchaante ho.

gallery ke baad ushe ek hall paar karna pada, is hall me bahut saare guards kayi machines par kaam kar rahe the, sir jhukaaye unke beech teji se Vikas kuch aise andaaj me chalta chala gaya jaise ushe kisi sthaan vishesh par pahuchne ki jaldi ho, aisa karne ke peeche uski do bhaavnaaye thi.

pehli ye ki vo jaldi apni manjil par pahuche aur dusri ye ki ushe is kadar vyast dekhkar anavashyak roop se koyi tokey nahi.

vah us gallery me pahuch gaya jisme ki Singahi ka office tha.

ye dekhkar uski baanche khil uthi ki gallery is waqt sunsaan padi hai, office ke band kamre ke saamne vah thithka, handle ghumakar darvaaja kholna chaha to pata laga ki vah locked hai.

ek kshan bhi vyarth kiye bina Vikas ne jeb se silenceryukt revolver nikaalkar darvaaje ke lock par ek nahi do goliya maari.

pitt..pitt ki aawaj ke saath hi lock toot gaya.

Vikas teer ki tarah andar pahucha.

ab badi teji se kamre ki talaashi lene me jut gaya vo, ushe maalum tha ki saadhe 10 baje doctor aur nurse uska checkup karne ke liye aayenge, kamre ki stithi hi unhe saari kahaani bata degi, atah saadhe 10 baje tak vah lift me pahuch jaana chahta tha.

magar Kohinoor mile tab na.

bina Kohinoor ke to uska ye saara mission hi bekaar tha.

20 minute ki bharpoor koshish ke baad bhi ushe Kohinoor nahi mila, saadhe 10 bajne me keval 5 minute reh gaye the, Singahi ki mej ke sameep khada vah hadbadaya sa chaaro taraf dekh raha tha ki achanak hi uski drishti mej par rakhe papervat par padi.

aah, vah papervat nahi Kohinoor tha.

mej par rakhe kuch kaagaj dabe huve the usse, ye sochkar Vikas romanchit ho utha ki apne office me Singahi aajkal Kohinoor se papervat ka kaam le raha hai, usne jhapatkar kohinoor uthaya, jaancha, parkha, santusht hote hi vah darvaaje ki taraf douda nahi balki jhapat sa pada.

---------------------------------------

 


Kohinoor ki neelami si ho rahi thi sheersh par.

mukabala tha Mike aur Bond ke beech.

apni kursi par baitha hua Singahi dheeme-dheeme muskurata hua unke beech chal rahe muakabale ka lutf utha raha tha.

James bond vahi karta gaya jo vah sochkar aaya tha, yaani ki Mike jo bhi kehta vo usse ek crore dollar upar keh deta, stithi ye aa gayi ki vah rakam bahut peeche chhut gayi thi, jitne me Americi sarkar ne ushe Kohinoor khareedne ki anumati di thi.

fir jab Bond ne charam seema ke baad bhi hajaar dollar upar bol diye to Mike ajeeb si avishvashneeya drishti se Bond ko dekhne laga, Bond ke hontho par vijayi muskaan thi.

Singahi ne kaha," bolo mr. Mike "

" Kohinor ishe hi de dijiye " Mike jhunjhulaaye se andaaj me bola.

" vaakayi Kohinoor ki kadr Britain hi jaanta hai isliye vah naayaab heera Britain ke paas hi rehna chahiye, mubarak ho mr. Bond "

" thankyou " kehte huve Bond ne ataichi uthakar mej par rakh di, bola," ye peshgi rakhiye mr. Singahi aur souda pakka kijiye, aap chahe to ishe kholkar dekh sakte hai "

ataichi ko kholne ke liye Singahi ne abhi haath badhaya hi tha ki uski wristwatch spark karne lagi, Singahi chounk pada, wristwatch ka sambandh adde ke andar stith control room se tha aur uske is tarah se spark karne ka matlab tha khatra.

patthar ke andar koyi gadbad hai, Singahi ke dimaag me badi teji se vichaar kounda," magar kya "

patthar ke garbh me bhala kya gadbad ho sakti hai aur is waqt ushe pehli baar khayaal aaya ki patthar ke andar Vikas hai jo kuch gadbad kar sakta hai, magar filhaal vah is gadbad ko check nahi kar sakta tha, kyonki aisa karne ke liye darvaaja kholna jaroori tha aur Singahi nahi chahta tha ki Mike aur Bond ko is patthar ke khokhlepan ka pata chale.

atah unhe jaldi se tarkaane ke liye Singahi ne ataichi ke dono locks ko kholne ke liye dabaav daala aur uska aisa karna hi maano gajab ho gaya.

ataichi ke daaye-baaye se ispaat ke bane do haath na keval nikle balki Singahi ki gardan par aa jame, boukhlakar Singahi kursi samet peeche ulat gaya, magar uski gardan se ispaati haath nahi hatey the balki ataichi bhi uske seene aur pet se chipak gayi thi.

vaha maujood saare guards abhi kuch samajh bhi nahi paaye the ki revolver nikaalkar Bond garja," koyi bhi mujhpar hamla karne ki koshish na kare, kyonki ab ye ataichi mere hukum ke bina Singahi ko nahi chhodegi, meri mout ke saath hi tumhaara mahamahim bhi khatam ho jaayega "

paancho guards kinkartavyavimdh se khade reh gaye.

Mike ka haath apni jeb ki taraf jaa hi raha tha ki Bond revolver ka rukh uski taraf ghumakar gurraya," dont move mr. Mike, haath upar utha lo "

Mike ne aadesh ka paalan kiya aur vah bhi dilchasp drishti se Singahi ki taraf dekhne laga, is waqt ajeeb stithi me tha vah duniya ka mahaantam apraadhi, ataichi kisi chamgaadad ki tarah uske jism se chipki huyi thi, band ataichi ke faulaadi haath Singahi ki gardan par the.

apne haatho se Singahi ataichi ke haatho ko hataane ki bharpoor koshish kar raha tha.

us dilchasp drishya ko dekhkar vaha sabhi chamatkrit se the, vahi Bond thahaka laga utha," ab vah ataichi tumhe nahi chhodegi Singahi, tumhaare adrishya aur currentyukt hone ke saare art bekaar hai, vah un yaano ka chota roop hai jo bina maanav ke dusre grah par bheje jaate hai "

Singahi nirantar apne se chipi ataichi se joojh raha tha.

Bond ne aage kaha," is ataichi ko London se control kiya jaa raha hai, ye vahi se hat sakti hai aur vaha se ye tab hategi jab mai is transmitter par unhe aisa karne ka aadesh dunga aur aisa aadesh mai tab dunga jab tum Kohinoor mujhe sounp doge "

guards ki samajh me nahi aa raha tha ki is avsar par ve kya kare.

" ye ataichi apne aap me ek bahut hi vinaashkaari bomb bhi hai, mere aadesh dete hi vaha London ke control room me baitha vyakti ek button dabayega aur ye bomb fat jaayega "

Vijay aadi yaan ke andar screen par hi ye drishya dekh rahe the.

" bolo Singahi, Kohinoor mere havaale kar rahe ho ya nahi "

Singahi kuch bola nahi, keval ataichi se joojhta raha.

transmitter on karke Bond ne kaha," hello... hello John, Bond here, haatho ka pressure badha do "

is aadesh ke turant baad hi Singahi ne mehsoos kiya ki ataichi ke faulaadi haatho ka dabaav uski gardan par badh raha hai, uska gala bhinchne laga.

ab saans lene me bhi kathinaayi ho rahi thi ushe.

Bond ne chetavani si di ushe," bolo Singahi, bolo, Kohinoor dete ho ya.... "

vaakya adhoora hi reh gaya, kyonki tabhi sheersh ka darvaaja sarr se khula aur ek lift aakar darvaaje par khadi ho gayi, darvaaja khulte hi uske andar se Vikas ne baahar jump lagayi.

" t..tum " Bond chakit," is patthar ke garbh se "

" ye patthar khokhla hai Bond, dada ka adda yahi hai "

guards ki guns abhi Vikas ki taraf ghoomi hi thi ki,

pitt...pitt...pitt.

saara vaatavaran ek nahi, kayi guns ke garjano se kaanp utha aur ek hi pal me ve paancho guard cheekhkar shaheed ho gaye.

Singahi ke alawa sabhi ne chounk kar yaan ki taraf dekha.

Vijay, Alfaanse aur Dhanushtankaar ko dekhkar jaha Mike aur Bond bhouchakke reh gaye, vahi Vikas cheekh pada," Kohinoor mil gaya hai guru "

gun sambhaale ve teeno yaan ke darvaaje se koodkar us taraf bhaage jabki Vikas ka vaakya sunte hi Bond ke kaan khade ho gaye the, transmitter par bola," John, tumne Vikas ka vaakya suna hoga, quick John, Singahi ko chhodkar Vikas ko pakdo "

ek jhatke se ataichi ne Singahi ko chhod diya.

Singahi aajaad hua hi tha ki Vijay ne gun ke barrel ki jordaar chot uski kamar par ki, ek cheekh ke saath hi Singahi munh ke bal jaa gira.

Alfaanse ka ghoonsa Mike ke chehre par pada tha.

apne baaju failaaye hava me tairti ataichi Vikas ki taraf lapki, mutthi me Kohinoor dabaaye Vikas usse bachne ke liye bhaaga aur saath hi cheekha," ushe roko Bond, Kohinoor tumhaara hai aur vaada karta hu ki tumhe hi milega "

" mujhe vaada nahi Vikas, Kohinoor chahiye "

" lo " doudte huve Vikas ne Kohinoor Bond ki taraf uchhal diya, Kohinoor badi safaayi se lapak kar Bond ne jeb ke havaale karte huve kaha," thanks "

tab Vikas ne cheekhkar kaha," agar sachmuch ye ataichi bomb ka kaam bhi kar sakti hai Bond to ishe jaldi se darvaaje ke andar daakhil kar do, neeche se guards yaha pahuch gaye to bachna mushkil ho jaayega "

transmitter par John ko Bond kuch aise hi aadesh dene laga.

yahi vo kshan tha jab vaha ek helicopter ke start hone ki aawaj goonji, jab tak doudta hua Mike uske najdeek pahucha, tab tak helicopter upar uth chuka tha.

idhar, mouka lagte hi Singahi bhi yaan ki taraf bhaaga.

Vijay aur Dhanushtankaar uske peeche lapke.

yaan ke kareeb pahuchkar Vijay ne uske shareer par jump bhi laga di kintu ushe ek teevra jhatka laga aur vah vaapis aa gira.

kadachit bhaagte huve Singahi ne apne jism ko currentyukt kar liya tha.

unke dekhte-dekhte yaan ek jordaar dhamaake ke saath teer ki tarah sansanata hua aakash ki taraf chala gaya.

idhar Vikas ne cheekhkar Mike se kaha tha," helicopter sambhaalo uncle "

is prakaar, ek helicopter Mike ne tatha dusra Vikas ne sambhaal liya, fir Vijay aur Dhanushtankaar doudkar Mike ke helicopter me chadh gaye aur Bond Vikas ke helicopter me.

ek saath dono ne patthar ka sheersh chhod diya.

Vijay ne Mike se poocha," dollaro se bhari tumhaari vah bhaari si ataichi kaha gayi pyaare cycle chain "

" ushe kambakkht Alfaanse le uda hai "

sunkar Dhanushtankaar khii..khii karke hans pada, Vijay ne turant hi ushe kadi drishti se ghoora aur Dhanushtankaar ne turant apne honth kaskar band kar liye the, jaise bhavishya me is prakaar khilkhilakar kabhi na hasne ki pratigya kar raha ho.

udhar, dusre helicopter me Vikas keh raha tha," ye mat samajhna Bond uncle ki maine tumhaari us karamati ataichi se darkar tumhe Kohinoor diya hai "

" nahi to kya samjhu " Bond vyangyapoorvak muskuraya.

" Bhaarat ke pradhaanmantri par hamari pol khul gayi thi yaani ki unhe maalum ho gaya tha ki hum avaidh dhang se Kohinoor ko haasil karne London gaye the aur ushi jhamele me Kohinoor Singahi dada ke haath lag gaya hai "

gambheer hote huve Bond ne poocha," fir "

" unhone hame bahut latada, kaha ki beshak Kohinoor Bhaarat ka ha, magar ushe prapt karne ka ye tareeka bahut sharamnaak hai, Britain se Kohinoor rajnitik star par vaarta se hi liya jaayega, unhone humse ye bhi kaha ki Singahi se Kohinoor prapt karke Britain ke haatho me sounpna hamari naitik duty hai "

" aur tumne vahi naitik duty nibhaayi hai "

" haan "

" chalo yu hi sahi, magar Bond haara nahi hai "

" ab jara us ataichi ka kamaal to dikha do " kehte huve Vikas ne jhaankar neeche us vishaaltam patthar ko dekha, sheersh ka darvaaja abhi bhi khula pada tha, magar ataichi kahi bhi najar nahi aa rahi thi, Vikas bola," vah ataichi to patthar ke sheersh par kahi najar hi nahi aa rahi hai "

Bond seedha Vikas ko jawaab dene ke sthaan par transmitter me bola," hello John "

" yes sir " dusri taraf se aawaj ubhri.

" yaan kaha hai "

" khokhle patthar ke andar, is waqt vah us patthar ke beechobeech hai "

" good, ushe blast kar do John "

Bond ke in shabdo ke 30 second baad hi stone forest me ek karnbhedi dhamaka goonja, Bond tatha Vikas ne us vishaaltam patthar ke parkhachhe udte huve dekhe.

apne helicopter se Mike, Vijay aur Dhanushtankaar ne bhi us vishaal patthar ko khand-khand hote dekha aur khilkhilakar hanse ke chakkkar me Dhanushtankaar fir se khii..khii kar utha, Vijay ne kathor drishti se ushe ghoora, is baar Dhanushtankaar ne honth band nahi kiye, khii...khii karta hi raha vah.

THE END

 
You must log in or register to reply here.

Similar threads

S
Ye dil to tere pas hai
Replies
0
Views
2
StoryPublisher
S
sexstories
XXX Kahani Apne he Bete se pyar ho gya
2 3
Replies
26
Views
9K
sexstories
sexstories
sexstories
Incest Shareef maa se chhote bete ki paltu kutia banne tak ka safar
Replies
0
Views
5K
sexstories
sexstories
sexstories
Shareef maa se chhote bete ki paltu kutia banne tak ka safar
14 15 16
Replies
155
Views
24K
sexstories
sexstories
sexstories
Desi Chudai Kahani - Pavitra rishta (maa bete ka)
2 3 4
Replies
36
Views
13K
sexstories
sexstories
Back
Top