Romance वेवफा थी वो complete

[StoryPublisher]

#126

Sab log baari baari se Kamal aur Priya ki taraf hi dekhe jaa rahe they………..Kamal bhi ab chup-chap khada huya Priya ki taraf dekh raha tha , jo ab foot-foot kar rone lagi thi ………….

Fir Kamal ne aage bolna shuru kiya ………..

“Mr.Chaudhary ko goli marne ke baad , Karan waapas wahin pahunch gaya , jahaan se yeh aaya tha , yaani Priya ki gaadi ke andar………..aur Priya kamre se baahar nikal kar neeche ki taraf jaane lagi ……………baahar aate hi iski nigaah ghar ke andar aate huye Rajiv ke oopar padi…………yeh turant hi ulte paanv laut gayi , aur apne kamre mein ghuss gayi …………….fir Rajiv wahan pahuncha , usne Mr.Chaudhary ko jameen par gire huye dekha ………aur unko check karne laga ……….tabhi Priya wahan waapas aa gayi …………yeh show karte huye ki wo abhi pehli baar hi wahan pahucnhi hai ………….isne Rajiv ko dekhte hi cheekhna shuru kar diya aur wahan se bhaagti huyi neeche aa gayi …………Rajiv bhi darr gaya aur iske peeche peeche hi neeche ki taraf aa gaya ……………Priya seedhe Sharad ke kamre mein gayi aur usko bataaya ki Rajiv ne Mr.Chaudhary ko goli maar di hai …….Sharad , jaisi position mein tha , waise hi uth kar Priya ke saath wahan aa gaya aur aate hi Rajiv ke oopar hamla bol diya ………………Jab Sharad aur Rajiv , aapas mein bhide huye they ….Priya wahan se bhaag kar , oopar apne room mein gayi ………………..wahan se isne Rajiv ke photographs aur wo letter liya , jo isko Karan ne diya tha ……….aur unn dono cheejo ko isne Mr.Chaudhary ke room mein , unki table ke oopar rakh diya……”

“iske aage ki kahani aap sab ko maloom hi hai………police wahan pahunch gayi ………unhe Mr.Chaudhry ke room se jo bhi kuch mila , wo yeh bataane ke liye kaafi tha ki unn ke oopar hamla Rajiv ne hi kiya hai ……..aur baaki ka kaam Rajiv ne wahan se bhaag kar kar diya ……………..”

fir Kamal ne peechhe ghoom kar Karan ki taraf dekha aur bola ……….. ”Karan ke oopar mujhe shaque tabhi ho gaya tha , jab mujhe yeh maloom pada ki Rajiv ke mobile ki calls ko divert kiya gaya tha ……….kyon ki sirf iss hi paas, yeh kaam karne ke liye mauka tha…………..par mere paas uske aur Neha ke rishte ka koyi saboot nahi tha ………….par fir tumhaare Bittu ne iss rahasya se bhi parda utha diya ……………….mujhe iss Bittu ki talaash mein poore 3 din tak ,Indore , Delhi , Mumbai aur dehradoon ki khaak chhan-ni padi ...............tab maooom pada ki Bittu , darasal Karan ka hi bachpan ka naam hai ....................”akhiri line usne meri taraf dekhte huye kahi ……….

Sharad aur Nidhi , lagataar Priya ki taraf dekhe jaa rahe they …………aur unki aankhon mein badhte huye nafrat ke bhaav saaf dikhayi pad rahe they ………….fir maine kamal ki taraf dekha aur agla sawaal kiya ……………

“Par kuch baaten meri samajh mein abhi tak nahi aayi Kamal ……….Neha hamesha mere saamne , Karan ki buraayi karti rehti thi……… jab ki wo uska saathi tha ………….? ……aur uske oopar jo hamla hua tha , uski kya wajah thi ..?? “

Karan ne muskurate huye meri taraf dekha aur fir bola …………

“yeh Karan ka hi plan tha ………………jaisa maine pehle hi bataya , Neha ko inn logo ne sirf ek mohre ki tarah istemaal kiya tha …………wo bechaari karan ke pyar mein iss tarah paagal thi ki , uski har baat maan jaati thi ..............chahe wo baat jaayaj ho , ya nahi ...............uski maut to nischit hi thi , agar wo uss din wahan , jungle mein apne aap ko goli na maarti ….to Karan usko apne haaton se khatam kar deta ……………saath hi saath Karan ko yeh bhi malom tha ki , Neha apni jaan de sakti hai …………..par Karan ka naam nahi bolegi ……..iss hi liye wo Neha ko wahan jungle mein akeli chhod kar bhaag gaya tha ………….Neeraj ki maut ke baad , usne Neha ko zinda sirf iss liye rakha tha , jiss se ki uske haatho mein tumhari ek kamzor nas hamesha rahe ……….aur wahan bank robbery ke fai hone ke baad Neha uske liye bekaar thi ”

“Neha , tumse Karan ki buraayi , Karan ke kehne par hi karti thi ………….isliye ki , jab tumhe yeh maloom pade ki Neha ke jariye tumhe blackmail kiya jaa raha hai , tab tum Karan ke oopar shaque na karo ………….yeh ek psychological chaal thi ..... dushman ka dushman apna dost hota hai …………aur yahi tumne samjha bhi …………”

“Neha ke oopar hamla bhi Karan ki planning ka hi hissa thi ………..tumne ek din phone par Neha ko Karan se kuch baat karte huye sun liya tha , Neha ne yeh baat Karan ko bataayi , aur tab Karan ne yeh plan banaya …………..tumhe aisa laga ki hamla tumhaare oopar kiya ja raha hai , jabki inki planning sirf Neha ko ghaayal karne ki hi thi ………..jiss se tumhaara vishwaas fir se Neha ke oopar kaayam ho sake ……….aur wahi hua bhi …………..tumhe yeh laga ki Neha ne tumhaari jaan bachane ke liye , apni jaan jokhim mein daal di ……………”

Kamal ab chup ho gaya tha …………..mere dimaag ke saare sawaal lagbahg khatam ho chuke they ………..maine sabki taraf dekha , PC aur DCP ke chehro par koyi bhaav nahi they ………….Anil Chaudhry ek-tak Priya ki taraf dekhe jaa rahe they …….jaise unhe abhi tak viswaas hi nahi hua ho ki jo unhone suna wo sach hai ………..Priya ab chup thi ,par apna sar neechhe jhukaaye huye baithi thi ………Sharad ne apne sar ko dono haatho se pakda huya tha , aur neeche jameen ko ghoore ja raha tha …………..Nidhi , sar ko neeche jhukaye huye dheere dheere subak rahi thi ……….aur Karan , uski nigaahein mere oopar hi thi ….iss samay bhi uski aankhon mein apne liye bepanaah nafrat mujhe saaf dikhayi pad rahi thi ……..

Fir Police Commissioner khade huye aur unke saath hi unke baaki officer bhi ………….wo Anil Chaudhary ki taraf mude aur unse bole ……….

“Chaudhary saahab ………..Karan ke maamle mein kanoon apna kaam karega ………..Neeraj ke murder , Mr.Vijay chaudhary ke oopar hamla aur Bank vault mein robbery ki planning ……..inn saare ilzamaat mein ham iske oopar case chalayenge ……….., jahan tak Priya ki baat hai , ham inka faisla Mr.Vijay chaudhary ke oopar chhor rahe hain ………agar wo chaahenge to inn ke oopar attempt to murder ka case chalega ………nahi to sirf criminal planning ka …………”

______________________________

 

[StoryPublisher]

#127

abhi koyi kuch jawaab deta , iss se pehle hi Akhilesh aage aaya aur bola ……….

” Iss baare mein main bhi kuch clear karna chahta hoon Sir………….darasal , Mr.Chaudhary ke hosh mein aane ke baad , jab hamne unse pooch-taachh ki thi to , unhone kuch bhi bataane se mana kar diya tha ………..tab hamein aisa laga tha ki wo sab kuch jaante huye bhi , kuch chhipa rahe hain ………….uss samay hamara yeh maan-na tha ki , wo Rajiv ko bachane ki koshish kar rahe hain ……..par ab maloom pada ki wo kis ko bacha rahe they………unki nigaah mein , unke gunehgaar Priya aur Sharad they ……….."

"aur chahe aulaad kitni bhi khudgarj aur Naalayak ho jaaye ………maa-baap kabhi bhi apni aulaad ka bura nahi chah sakte ………”

ab tak chup ho chuki Priya ne fir se foot-foot kar rona shuru kar diya tha ……..aur baaki sab ke chehro par bhi mayoosi ke bhaav saaf dikh rahe they …………

Ladies police Priya ko wahan se baahar le gayi ……….aur fir uske peechhe peechhe hi Chaudhary parivaar ke sabhi log baahar nikal gaye …………Karan ko bhi wahan se baahar le jaaya gaya aur sabse aakhir mein nikalne waale logo mein main , Kamal aur Akhilesh hi they …………..

Fir ham teeno wahan maujood ek office mein aa gaye ………….teeno ke baithne ke baad Kamal ne chay mangva li aur ham teeno chay peene lage ……..fir ek sawaal jo pichhle 3 dino se mere dimaag mein ghoom raha tha , maine Akhilesh se poochh liya ……

“SP saahab ………ek baat abhi tak meri samajh mein nahi aayi ….. poora shahar ,yahan rehne waale log aur Chaudhary parivaar ke log , yahan tak ki Kamal bhi mujhe mere naye get-up mein nahi pehchaan paya tha …….fir aapne kaise mujhe pakad liya …….?? “

Akhilesh ne muskura kar pehle Kamal ki taraf dekha aur fir meri taraf dekhte huye bola ……..

” aap logo ke saath dikkat yeh hai ki , aap police ko bilkul nikamma aur bekaar samajhte hain………aap khud ek bahut bade engineer hote huye , yeh baat nahi samajh paaye ki wahan Hospital ke waiting room mein , cctv system laga huya tha ……..jisko ham log lagataar watch kar rahe they ……….uss din , subah se shaam tak aap wahan baithey rahe ………….aur aap akele aise shakhs they , jo na kisi se mile aur na kisi se baat ki ………..hamein aap ke oopar shaque hua aur hamne aapke kuch still photographs lekar unko check kiya ……………fir jab hamein yakeen ho gaya ki Sardar ji ke get-up waala aadmi Rajiv hi hai ………hamne aapko pakad liya ……..”

“waise hamen jo bhi aapke saath kiya, uske liye hamein afsos hai Mr.Rajiv ………aur aapko huyi asuvidha ke liye main aapse maafi maangta hoon…….”

Maine muskurakar usko dekha aur fir Kamal ki taraf dekha ……..wo bhi dheere dheere muskura raha tha …………..

Chay peene ke baad main unn logo se vida lekar wahan se baahar nikla ……Kamal mujhe chhorne baahar tak aaya aur main usko gale se lagaye bina nahi reh paaya…………..aakhir aaj uss hi ki wajah se main iss musibat se baahar nikal paaya tha …………………

fir main apni gaadi mein baitha aur waapas apne flat ki taraf chal diya …………….

______________________________

 

[StoryPublisher]

#128

...

----------------

Dheere dheere drive karta huya main waapas apne flat tak pahunch gaya …………mausam badalne laga tha , aasmaan mein kaale baadal chhaane lage they ………lag raha tha ki kisi bhi samay tez baarish shuru ho sakti hai……..

Apni gaadi ko parking mein khada karne ke baad main waapas building se baahar aa gaya aur paidal hi saamne bane huye restaurent ki taraf chal diya ………..restaurent mein jaakar maine lunch kiya aur fir waise hi paidal chalta hua waapas apni building mein aa gaya ………….ab halki halki boonda-baandi shuru ho gayi thi ………dheere dheere hi chalte huye main apne flat mein pahunch gaya ………….

Andar aane ke baad main kuch der ke liye baitha sochta raha ki ab mujhe kya karna chahiye ……………aaj subah main jitna khush aur relax feel kar raha tha , ab iss samay utna hi jyada uljhan mere dimaag main thi………..kuch baat thi jo mujhe andar hi andar pareshaan kar rahi thi ………..main kitchen mein gaya , apne liye ek cup coffee tayyar ki aur fir balcony mein aa gaya …………

Baarish ab tez ho gayi thi …………barish ki boonde mere chehre par takra rahi thi , aur ek thanda sa ehsaas mere wajood ko de rahi thi ………..par mere dil ke andar jo ek be-chaini si thi , wo door hone ka naam nahi le rahi thi ………….

Baahar girti huyi tez baarish ko dekhte huye , meri aankhon ke saamne pichle 2 mahine mein huyi ek ek baat ghoomne lagi ………….wo ek ek pal mujhe yaad aa rah tha , jo maine beete huye 2 mahine mein gujaara tha ……………chahe wo pyar ke khush-numa lamhe they , ya pareshaani ki na katne waali ghadiyan ……….sab ek film ki tarah meri aankhon ke saamne se guzar rahi thi ………….

Aur fir mere saamne aaj subah police headquarter mein maujood har ek shakhs ka chehra ghoomne laga ……..jo kisi na kisi roop mein , mere saath pichhle 2 mahine ke safar mein maujood tha ……..

Sabse pehle Karan ……………ek khudgarz aur bewafa insaan ……….jisne 2 alag alag ladkiyon ko sirf apne swaarth ke liye istemaal kiya ……….Neha ne apna sab kuch , uske hawaale kar diya tha ………apni jindagi aur izzat ko daanv par laga diya ………par wo dagaabaj hi saabit hua ……….aur aisi be-wafayi usne Priya ke saath bhi ki ………jo sirf uske kehne par wo sab kuch karne ke liye tayyar ho gayi , jo uske jaisi ladki shaayad normal conditions mein kabhi na karti ………aur ek be-wafayi Karan ne apne proffession ke saath bhi ki, uss company ke saath aur uss addmi ke saath ki , jisne usko ek izzat bakhshi aur iss mukaam tak pahunchaya ………jahan wo apna sar ooncha kar ke khada reh sakta tha ………..par shaayad usko paise aur naam ke aisi bhookh thi , jo kisi bhi tarah mit nahi sakti thi …………

Priya ……….uski saari galtiyan maaf karne ke laayak thi , sivaaye ek ko chhor kar ………usne uss devta jaise aadmi ko maarne ki koshish ki , jo uske saubhaagya se uska pita bhi tha ……….ek aisa aadmi jo gairo ke liye bhi sab kuch karne ke liye tayyar tha , fir wo to uski apni aulaad thi …………………uski baaki saari galtiyan , iss liye maaf ki ja sakti thi , kyon ki wo Priya ne nahi ki thi ……..wo ek pyar ki maari ladki ne ki thi ………..jiski sabe badi galti yahi thi , ki wo ek galat insaan se pyak kar baithi ........ek bewafa se………………

Kamal ……..ek aisa dost , jo mujhe bachaane ke liye uss had se bhi aage nikal gaya ……..jo uski naukri & uske farz ne uske liye bana rakhi thi ………..maine Kamal ko kabhi bhi ek sadharan dost se jyada nahi samjha tha , ek aisa aadmi jo bas kabhi kabhi mujhe Club mein mil jaata tha , aur ham dono saath saath kuch samay bita lete they ………par aaj mujhe samajh mein aa gaya tha ki dosti kise kehte hain ……..aur mujhe khud par ghamand bhi ho raha tha ki mujhe Kamal jaisa ek dost mila tha ……

Sharad ……..sahi maayno mein , main khud ko uske saamne sharminda mehsoos kar raha tha ………..main hamesh usko galat samajhta raha ………..jabki , uss bechaare ne jo kuch bhi mere saath kiya , apni behno ki khushiyon ke liye kiya …….mujhe uss se ab koyi gila nahi thi …….par ek hamdardi jaroor thi

Nidhi ……..ab mujhe uski unn baaton ka matlab samajh mein aa raha tha ….jo wo mujh se aksar karti thi ……..aur jinhe main uska majaak samajh kar taal deta tha …….shaayad , wo mujhe pasand karti thi ………..par meri jindagi mein uske liye koyi jagah hai bhi ya nahi , mujhe khud ko hi nahi maloom tha ………….

Aur wo log bhi , jo wahan Police headquarter mein aaj maujood nahi they …….

Mr.Vijay Chaudhary …………..ek chhoti si shikaayat mujhe unn se bhi thi …hosh mein aane ke baad , jab unko maloom tha ki unke oopar hamle ka iljaam mere oopar lagaya ja raha hai , wo bilkul chup rahe …………shaayad , aulaad ka pyar baaki sab baaton par bhaari pad gaya tha …………..aur waise bhi unka badappan , aur unke wo sab ehsaan jo unhone mujh anaath ke oopar kiya they ……….iss chhoti si galti ke aage bahut bade they ……………mere dil mein unke liye kabhi bhi koyi gila nahi tha , aur na hi kabhi ho sakta tha ……………

aur Neha ………….pata nahi kyon , par mujhe uss se bhi koyi shikaayat nahi thi ……….apne bachpan ke pyar ki talaash mein bhatakti huyi ek ladki ……jiske liye uske premi ki baat maano patthar ki lakeer thi …….wo uss aadmi ke liye kuch bhi karne ke liye tayyar thi , jiss se usne pehli baar aur akhiri baar dil se pyar kiya tha ………log munhabbat mein jaan dene ki baaten karte hain , par usne waakayi apne pyar ke liye apni jaan de di thi …………usne mere saath bewafayi jaroor ki thi ……..par uss aadmi ke liye hamesha wafadaar ahi , jisko usne chaha tha …….marte dam tak bhi

Maine tinka –tinka bun ke banaya tha , ashiyaan apna ,

Meri kismat hi jala gayi mera ghar , aur kuch nahi ..

Dil machal ke reh jaata hai , kuch chah-kar bhi na mile to ,

Hai yeh taqdeer ki rehgujar , aur kuch nahi ……

Kahan nashe mein hai dum itna ki bhula doon usko ,

Har ek nashe mein hai yaadon ka Zahar , aur kuch nahi ..

Munhabbat to maine hi ki thi ussse , to usko bewafa kyon kahoon ,

Main har ek izaam leta hoon apne sar , aur kuch nahi …….

______________________________

 

[StoryPublisher]

#129

kuch der yun hi girti huyi baarish ko dekhne ke baad , main andar aa gaya …….aur fir mobile nikaal kar Happy ka number lagaya ……………kuch hi bells ke baad , usne phone utha liya …………..

“Hello ……………Rajiv.!!...............kaisa hai tu ??..........kahan hai …? …….tu theek to hai na ………??” call receive karte hi , ek saath kitne hi sawaal usne poochh daale ………

“man bilkul theek hoon bhaiya ………” maine hanste huye kaha ………” aur ab saari pareshaaniyan bhi khatam ho chuki hain …….” Fir main usko short cut mein saari baaten samjha di …………..saari baat sunne ke baad wo bola ………

“chal achchha hi hua ………asli gunehgaar ke chehra saamne aa gaya ……….ruk , main abhi teri baat daar ji se karwaata hoon ……………..” fir kuch der ke liye udhar se awaaz aani band ho gayi …….aur fir mujhe sardaar ji ki awaaz sunayi padi ………….hamesha ki tarah ……..apne pan se bhari huyi……….

“Raju……………tu theek hai na puttar ..??......ham log 3 dino se tujhe phone karne ki koshish kar rahe they ………par tera number hi nahi mil raha tha ……….?? “

“main bilkul theek hoon bau ji ………….maine saari baat Happy bhaiya ko bata di hai ………….ab sab kuch theek ho gaya hai ………” maine kaha ……….aaj shaayad pehli baar maine unko bauji keh kar sambhodit kiya tha ……aur aisa karte huye mujhe mere dil ke andar se bahut sakoon mila tha …………

“tere se fir milne ki ichchha hai Raju puttar……………ek baar aur jaldi se milne ke liye aa ja beta …………..” sardaar ji bhaavuk hokar bole …………..

“Haan bauji …………mera khud bhi aap logo se milne ka dil kar raha hai……….main aapke paas jaroor aaoonga bauji ……….bahut jaldi aaoonga ….” Maine kaha ……….bolte bolte main khud bhi bahut jyada emotional ho gaya tha …….

Fir maine phone disconnect kar diya ………..main kuch der ke liye wahin bed ke oopar baitha huya sochta raha , aur fir man hi man kuch faisla kar ke khada ho gaya …….ek suitcase mein , maine apne kuch kapde aur jaroori saaman daal liye …….aur fir ek aakhiri baar poore ghar ke dekha aur suitcase utha kar ghar ke darwaaze ki taraf chal diya ………..abhi main darwaaze ke paas pahuncha hi tha , ki doorbell baj uthi ………….

Main chunk gaya aur fir kuch sochte huye darwaaza khol diya ……………jaisi ki mujhe ummeed thi , darwaaze ke saamne Sharad khada huya tha ,aur uske thoda peechhe Nidhi ………..

Kuch der wo dono mujhe dekhte rahe aur mere haath mein pakde huye suitcase ko bhi ……..fir Sharad ne kaha ………..

“ham andar aa sakte hain Rajiv……………??”

“Haan………..Sure ……….please come ………” maine kaha aur darwaaze ke saamne se hat gaya ………wo dono andar aa gaye aur mere peechhe chalte huye drawing room mein pahunch gaye ………..

ham teeno ke sofe par baithne ke baad bhi , kuch der tak wahan ek khamoshi si pasri rahi …………shaayad yahi uljhan thi ki baat kaun shuru kare , aur fir yeh pehal Sharad ne ki …………

“Rajiv……………main yahan tumse maafi maangne aaya hoon ……..hamaare beech bani huyi saari galatfehmiyon ke liye , aur tumko job hi pareshaani huyi , unke liye bhi ……..chahe wo Priya ki wajah se huyi thi , chahe meri wajah se aur chahe uncle ki wajah se ………..main iss ghar ka sadasya hone ke naate , ham sab ki taraf se tumse maafi maangta hoon ………”

“nahi Sharad …………maafi to mujhe aapse maangni hai ………….main apni har ek pareshaani ke liye aapko jimmedaar manta raha , bina kuch bhi soche aur samjhe ………main khud bhi aapse bahut sharminda doon ……..” maine kaha …….aur fir se kuch der ke liye ham sab khamosh ho gaye ……….

“Rajiv ………yeh to mujhe dikh raha hai ki tum kahin jaa rahe ho …….kahan , yeh main tumse nahi poochhonga ……….bas itni hi request kar sakta hoon ki kahin mat jaao ………..ham sabko tumhaari jaroorat hai ……Uncle ne hamesha tumhe apna beta maana hai ………uss hi naate se yahan ruk jaao…………….” Usne meri aankhon me jhaankte huya kaha ………….”aur jo ek baat Uncle tum se kehna chahte they , aur kabhi keh nahi paaye ……….main tumse poochhta hoon ………..Rajiv , kya tum meri behan se shaadi karoge … ??

main fir se kuch der ke liye khamosh ho gaya …………fir uske chehre par dekhta huya bola ………..

“mujhe nahi maloom ki main iss baat ka aapko kya jawab doon Sharad………..dar-asal maine kabhi iss baare mein socha hi nahi …………aur shaayad abhi filhaal mera dimaag aur dil ………iss baare mein sochne ke liye tayaar bhi nahi hai………..”

ek ek baar unn dono ke chehro ko dekhne ke baad maine aage kaha

“ sahi bataaon to mujhe khud bhi maloom nahi hai ki main kahan ja raha hoon ………aur kab tak ke liye ……….bas , kuch samay ke liye iss jagah se door rehna chahta hoon ………..aap log mujhe selfish samajh sakte hain ki main iss musibat ki ghadi mein aapko akela chhod kar ja raha hoon………. Par main unn sab yaadon ko apne jehan se baahar nikaalna chahta hoon ,jo mujhe yahan rehte huye pareshaan kar rahi hain………..ho sakta hai ki main kuch dino mein waapas aa jaaon ,aur ho sakta hai ki kuch mahine lag jaayein ………….par main waapas jaroor aaoonga …………yeh mera aapse vaada hai …………….”

Ek asmanjas sa Sharad ke chehre par dikhayi pad raha tha ……..aur Nidhi ke chehre par bhi pareshaani ke nishaan they …………..par saath hi uske honthon par uski sadabahaar muskurahat bhi thi ………….. wo dono yeh baat jaan chuke they ki main , abhi filhaal wahan rukne waala nahi hoon …………

----------------------------------------------------

Shaam ke 6 baj chuke they ……………..Shataabdi express apni poori raftaar se Delhi ki taraf bhaag rahi thi ………aur main khidki se apna chehra sataaye huye , peechhe ki taraf bhaagte huye pedo ki kataar ko dekh raha tha …………..saamne aasman ka rang laal ho chukka tha …………aasman mein udte huye panchhi shaayad apne ghar ki taraf laut rahe they …………

Main kuch dino ke liye , apni puraani yaadon se door bhaag jaana chahta tha ……..abhi main dilli ja raha tha , aur uske baad meri manzil kahan hogi , mujhe khud ko bhi maloom nahi tha …………par ek baat to main bhi jaanta tha , ki mujhe fir se waapas yahin laut kar aana padega …………………samandar ke kisi jahaaj se udaan bharne waale panchhi ki tarah ………..jo ek nayi duniya ko dekhne ke liye apne ghar ko chhod kar udaan bharta hai ………aur har baar , waapas uss hi jahaaj par laut ke aata hai ………jahan se usne udaan bhari thi ….

The end .......(?)

______________________________