[color=rgb(255,]Update - 09
____________________[/color]
Wo ek madhyam size ka kamra tha lekin hairaani ki baat thi ki kamre ki diwaare aur farsh pakka tha aur ekdam plane, jabki jis kamre se main abhi aaya tha uski na to diwaare plane thi aur na hi farsh. Maine kamre me charo taraf torch ki roshni me nazar ghumaayi to dekha ek taraf ek bada sa lohe ka kuch rakha hua tha. Aisa lagta tha jaise koi instrument ho kyoki uske kone me gol gol do battiya lagi huyi nazar aa rahi thi jo ki ek laal thi aur dusri hari. Maine torch ki roshni me bade dhyaan se use dekha. Uske peechhe kuch mote mote wires nazar aaye jo usse sati diwaar me andar kahi gaayab huye dikh rahe the. Mere dimaag ki batti ekdam se jal uthi. Ye instrument kuch aur nahi balki ek inverter tha. Main chakit tha ki itne saalo baad bhi ye kaam kar raha tha aur yakeenan isi ki vajah se is gupt kamre ka wo darwaza khula tha.
Kuch der tak main us inverter ko dekhta raha uske baad usse nazar hata kar main torch ki roshni me kamre me maujood dusri cheezo ko dekhne laga. Meri nazar kamre ke dusre kone me bane ek desk par rakhe un box par thahar gayi jinhe maine khwaab me dekha tha. Unhe dekh kar jane kyo mere samuche jism me jhurjhuri si daud gayi. Aisa shayad is liye kyoki khwaab me jo dekha tha wo mujhe sach me bhi dikh gaya tha. Main ye sochne par majboor ho gaya ki aisa kaise ho sakta hai? Kahi aisa to nahi ki mere mata pita ki aatmaye aaj bhi is bangle me maujood hain aur unhone hi mujhe khwaab ke roop me ye sab dikhaya tha? Meri is soch me koi logic to nahi tha lekin main chaah kar bhi isse inkaar nahi kar pa raha tha. Main kafi der tak yahi sab sochta raha uske baad maine apne zahen se in saare khayaalo ko jhatka aur un boxes ki taraf badh chala.
Khwaab aur hakikat me bas itna hi fark tha ki khwaab me wo box kamre ke farsh par rakhe huye dikhe the jabki hakikat me wo kamre ke side bane desk ke upar rakhe huye nazar aaye the. Khwaab me maine is inverter ko nahi dekha tha jabki hakikat me yaha ek inverter bhi tha. Desk ke upar rakhe dono box lakdi ke the kintu unki haalat dekh kar saaf pata chalta tha ki lakdi ke bane wo dono box mamuli nahi the. Dono box ke upar dhool chhapi huyi nazar aa rahi thi. Boxes me lage bade bade taale abhi bhi majboot nazar aa rahe the jabki khwaab me jo taale maine dekhe the unme jung laga hua tha.
Maine torch ke focus ko is ummid me diwaar par ghumana shuru kar diya ki shayad in taalo ki chaabhi kahi nazar aa jaye magar kaafi der idhar udhar dekhne ke baad bhi mujhe chaabhi nahi dikhi. Thak haar kar maine waapas un dono box par torch ko focus kiya. Torch ka tez prakash taale par focus tha aur tabhi mujhe kuch mahsoos hua. Dono hi box desk par rakhe huye the. Neeche taraf mujhe aisa laga jaise box ka nichla kinara desk se bas zara sa hi utha hua hai. Maine jaldi se box me lage taale ko pakda aur jor de kar use upar uthaya magar box hila tak nahi. Taale ke dwara uthane se zor kam pada tha is liye maine is baar torch ko apne muh me fansaya aur dono hatho se box ko upar ki taraf uthaya to box thoda peeche ki taraf sarak gaya. Box peechhe sarka to ekdam se meri nazar box ke neeche rakhi us cheez par pad gayi jise main khoj raha tha.
Taale ki chaabhi box ke neeche chhupa kar rakhi huyi thi. Moti si chaabhi thi jo ki peetal ki thi. Box uske upar rakha hua tha is liye desk se wo thoda sa utha hua samajh me aaya tha. Khair chaabhi mili to mujhe khushi si mahsoos huyi lekin fir zahen me sawaal ubhra ki kya ye chaabhi dono taalo me lag jaayegi ya dusre taale ki chaabhi alag hogi? Waise dono box par lage taale ek jaise hi dikh rahe the lekin apni tasalli ke liye maine dusre box ko bhi waise hi dono hatho se uthaya to uske neeche mujhe ek chaabhi aur nazar aa gayi. Yaani dono taalo ki alag alag chaabhi thi.
Kaafi soch vichaar karne ke baad maine dhadakte dil se ek box ka taala khola aur kunde ko pakad kar box ka dhakkan upar kar diya. Torch ke focus ko jaise hi maine khule huye box me daala to meri aankhe waise hi fail gayi jaise khwaab me tab fail gayi thi jab maine box me maujood dher saare sone ko dekha tha. Box ke andar do bhaag the jiske ek bhaag me gold ke biscuits the aur dusre bhaag me dher saari jwellery. Ye sab dekh kar ekdam se mere zahen me ye khayaal ubhra ki kya sach me yaha mere mata pita ki aatmaye maujood hain aur kya unhone hi mujhe aisa khwaab dikhaya tha taaki main hakikat me yaha aau? Kuch samajh me nahi aa raha tha mujhe. Aisa lag raha tha jaise main kisi sapne ki duniya me hu. Box ke andar maujood gold ke biscuits waise hi the jaise maine sapne me dekhe the. Un biscuits me koi marking nahi thi. Aisa lagta tha jaise dher sare sone ko gala kar biscuits me badal diya gaya tha.
Maine box ko band kiya aur dusre box ke taale ko khola. Box ka dhakkan khula to maine torch ki roshni me dekha box ke andar laal kapde ki parat lagi huyi thi. Ek baar fir se khwaab me dekha hua wo box meri aankho ke saamne chamak utha. Main ye soch soch kar hairaan tha ki khwaab me dekha hua sab kuch sach me dikh raha tha. Maine dhadakte dil se aur apne kaapte hatho se laal kapde ko hataya to dekha uske andar moti si panni ki parat bhi lagi huyi hai. Dil ki dhadkane mere kaano me dhaad dhaad kar ke baj rahi thi. Main jaise ye bhool hi baitha tha ki is waqt me viraan pade bangle ke tahkhane me maujood hu. Ek aise tahkhane me jiske bare me baahri duniya ke log kalpana bhi nahi kar sakte.
Panni ko hataya to meri aankhe ek baar fir hairat se fail gayi. Box ke andar do bhaag the jiske ek bhaag me noto ki gaddiya lagi huyi thi aur dusre bhaag me kayi tarah ki files aur kaagjaat rakhe huye the. Is sabko dekh kar ek baar fir se mera zahen us khwaab ke bare me sochne laga. Kafi der tak main is sabke bare me sochta raha uske baad ek gahri saans le kar maine dusre bhaag me dikh rahi files aur kaagjaato ki taraf dekha. Man me sawaal ubhra ki aakhir ye kaisi files hain aur itne saare kaagjaat kis cheez ke ho sakte hain?
Maine ek file ko sawdhani se nikala. Files aur kaagjaat bhale hi itni suraksha se rakhe gaye the lekin waqt ne un par bhi apna asar dikha diya tha. File ka cover thoda nazuk sa ho gaya tha. Maine dhadakte dil se use palta to meri nazar usme maujood kaagaj par padi. Halaaki us kaagaj ke neeche kuch aur bhi kaagaj the lekin main ye dekh kar sahsa chaunka ki pahle kaagaj me ek side Sanjay uncle ki photo lagi thi. Photo passport size ki thi aur kafi purani thi lekin Sanjay uncle ka chehra main hargiz nahi bhool sakta tha. Ekdam se mere dilo dimaag me halchal si mach gayi thi. Bijli ki tarah mere zahen me sawaal ubhra ki kya is file me Sanjay uncle ke bare me saari details hain? Agar aisa hai to fir ye bhi ho sakta hai ki mere papa ke sabhi dosto ki files is box me maujood hogi. Tabhi ekdam se mere zahen me ek aur khayaal ubhar aaya_____Mere pita ne apne sabhi dosto ke bare me aisi files kyo banaayi hongi?
Main us file me maujood kaagajo ko bade gaur se dekh raha tha aur sath hi padh bhi raha tha. File me kayi saare kaagaj the jo alag alag tarah ke the. Main jaise jaise un kaagajo ko padh raha tha meri aankhe hairat se failti ja rahi thi aur sath hi mera zahen dhamake mahsoos kar raha tha. Kareeb do ghante lage mujhe box me rakhi un sabhi files ko dekhne aur padhne me. Mere aankho ke saamne jaise har tasveer clear dikhaayi dene lagi thi. Jane kitne hi aise chehre the jin par naqaab laga hua tha. Mera dilo dimaag ek ajeeb se ehsaas se bhar utha jiske chalte mera chehra shakht ho gaya. Main soch bhi nahi sakta tha ki ek sach aisa bhi ho sakta hai.
Maine apne bag se ek notepad aur pen nikala. Us notepad me maine wo sab cheeze likhi jo un files me maujood thi. Uske baad maine notepad ko waapas bag me rakh liya. Aane wale samay me main ab jo kuch karne wala tha uske liye mujhe paiso ki bhi zarurat thi is liye maine box se paiso ki kuch gaddiya nikaali aur unhe bag me rakh liya. Dono box me taala laga kar maine chaabhi ko waise hi box ke neeche rakh diya jaise wo pahle rakhi huyi thi. Uske baad main us kamre se baahar aa gaya. Seedhi ke neeche jo keel jaisi cheez thi wo asal me gupt darwaze ko kholne wala button tha. Maine us button ko dabaya to darwaza fir se band ho gaya.
Mere paas ab bahut si jankaariya thi jo mere kaam ki thi aur ab main wo karne wala tha jiske liye niyati ne mujhe yaha bheja tha. Main din me bangle se baahar nahi nikal sakta tha kyoki aise me koi bhi mujhe dekh leta aur mere liye mushkil khadi ho jati is liye main upar apne kamre me hi aa gaya tha. Mujhe aaj ka din kisi tarah kamre me rah kar hi guzaarna tha. Kamre me rakhe bed par leta main apne mata pita ke bare me sochne laga tha. Rah rah kar unka chehra meri aankho ke saamne aa jata tha. Unke sath bitaye huye khubsurat pal mujhe yaad aate to meri aankhe chhalak padti. Main bahut koshish kar raha tha ki mujhe ye sab yaad na aaye magar main chaah kar bhi apne zahen se ye sab nikaal nahi pa raha tha.
Us din badi mushkil se mera waqt guzra tha. Khane pine ka jo samaan main khareed kar laaya tha wo waisa hi bag me rakha rah gaya tha. Khane ki ichha hi nahi huyi thi. Dil udaas aur dukhi tha. Baar baar ishwar se apne mata pita ko waapas kar dene ki minnate kar raha tha magar ye bhala kaha sambhav ho sakta tha? Kisi tarah din guzra aur raat huyi to main raat ke kareeb das baje bangle se nikla. Rassi ke sahare hi main apni khidki ke raaste neeche aaya tha aur fir bahut hi sawdhaani se bangle se door hota chala gaya tha.
Raat ko ek taxi kar ke main waapas gaziabad aa gaya tha. Bade kaam ka Shri Ganesh karne ke liye mujhe kuch plans banane the jiske liye mujhe sukoon se bhara thoda waqt chahiye tha.
Us waqt raat kaafi guzar gayi thi jab main dinesh jha ke ghar pahucha tha. Itni raat ko mujhe aaya dekh kar wo jane kaise kaise sawaal karne laga tha mujhse jiske jawaab dene ke baad main upar apne kamre me aa gaya tha. Dinesh ne mujhse khane pine ke bare me puchha to maine use mana kar diya tha. Kamre me aa kar main bistar par pasar gaya tha. Uske baad meri aankh tabhi khuli jab dinesh ki beti poonam ne aa kar mere kamre ka darwaza khatkhataya tha. Usne bataya ki naasta ban gaya hai is liye main fresh ho kar neeche aa jaau. Mere puchhne par usne bataya ki uske papa dinesh subah chaar baje hi auto le kar nikal gaye hain. Dinesh aur uske pariwar ke sabhi sadasya mujh par bharosa karte the aur mujhe maan sammaan dete the. Main aksar sochta tha ki aaj ke yug me bhi aise log hain jo ajnabiyo par itna bharosa karte hain. Bhala wo jaante hi kya the mere bare me??
Fresh hone ke liye main kamre se nikla to meri nazar Ramesh ki biwi aarti par pad gayi. Wo bathroom ke paas hi ek side baithi kapde dho rahi thi. Uska mukh meri taraf hi tha is liye uska saara view mujhe dikh raha tha. Saadi ko usne ghutno tak utha rakha tha jisse uski saanwli taange ghutno tak beparda thi. Upar aanchal dhalka hua tha jiski vajah se uske blauj ke khule huye gale se uski badi badi chhaatiyo ke ubhaar mujhe saaf dikh rahe the. Kapde dhone ki vajah se wo baar baar hil rahi thi jiski vajah se uski chhaatiya uske ghutno par dab jaati thi aur dabne ki vajah se wo kuch zyada hi ubhar aati thi. Ye sab dekh kar mere jism me jhurjhuri si huyi. Jaise hi use mere aane ka abhaas hua to usne chehra utha kar meri taraf dekha. Mujh par nazar padte hi uske chehre par chamak ubhar aayi aur sath hi uske hotho par muskaan fail gayi. Idhar usse nazar milte hi main thoda hadbadaya aur tezi se bathroom ki taraf badh chala.
Pichhle kuch samay se aarti ka jis tarah ka behaviour tha usse mujhe asahaj feel hota tha. Main achhi tarah samajh chuka tha ki use mujhse kya chahiye lekin main uski hasrat ko pura nahi karna chaahta tha. Aisa nahi tha ki mere andar jazbaat nahi bhadakte the balki main to sirf ye chaahta tha ki is sabki vajah se dinesh aur uski family ke saamne meri izzat na utar jaye. Bees saalo baad kahi se itna maan sammaan mil raha tha aur dinesh ke pariwar wale mujhe apna samajh rahe the is liye main ye hargiz nahi chaahta tha ki ek pal me ye sab khaak me mil jaye.
Bathroom se fresh ho kar main seedha apne kamre me gaya aur fir taiyar ho kar neeche naasta karne chala gaya. Dinesh ke bachche school jate the is liye dinesh ki biwi subah jaldi hi unke liye breakfast ready kar deti thi. Main aaya to dekha poonam ke sath uski chhoti bahan aur uska chhota bhai naasta kar rahe the. Sab school ke uniform me hi the. Mujhe dekhte hi Poonam ke alawa sabne mujhse namaste kiya aur fir se khane me lag gaye. Main jab dusri kursi par baith gaya to poonam ne apni maa ko awaaz de kar bataya ki main aa gaya hu. Kuch hi palo me dinesh ki biwi ek thaali me mere liye naasta le aayi. Naaste ke dauraan hi maine Poonam ki maa se dinesh ke bare me thoda bahut puchha aur fir naasta kar ke upar apne kamre me aa gaya.
Bangle ke tahkhane me rakhe box se jo files mujhe mili thi unse mujhe apne pita ke dosto ke bare me bahut kuch pata chala tha. Itna hi nahi balki C.M.S. jaisi sanstha se sambandhit bhi mujhe bahut kuch pata chal gaya tha. Main ye soch kar thoda chakit tha ki C.M.S. jaisi sanstha bees saalo baad bhi apna makaam banaye huye thi. Khair mere liye ab ye jaanna zaruri tha ki aaj ke samay me mere pita ke sabhi dost kin jagaho par apna ashiyana bana rakhe hain aur sath hi duniya ko dikhane ke liye ab wo kaun sa business kar rahe hain?
Dopahar khana khane ke baad main apne kamre me leta is sabke bare me plan bana raha tha. Mera plan tha ki dinesh se main kuch time ke liye kah duga ki main uska auto nahi chalaauga, kyoki mujhe apne kuch zaruri kaam ke chalte iske liye time hi nahi milega. Dinesh ko bhala isse kya problem hogi, use to apne kamre ke kiraye se aur khane ke paise se hi matlab hona tha. Apne zahen me sab kuch set kar ke main araam se shaam hone ka intzaar karne laga tha. Halaaki dinesh dopahar ke do baje bhi ghar aata tha lekin main is bare me usse shaam ko hi baat karna chaahta tha.
Lete lete mujhe neend aane hi lagi thi ki tabhi kisi ne mere kamre ka darwaza halke se khatkhataya. Pahle to maine koi pratikriya nahi di lekin jab dubara darwaza khatkhataya gaya to mujhe uthna pada. Alsaaye man se maine darwaza khola to baahar khade jis shakhs par meri nazar padi use dekh mere zahen me halchal si mach gayi.
[color=rgb(255,][color=rgb(0,]✤༺[/color][color=rgb(255,]✧[/color][color=rgb(0,]༻✤[/color][/color]