Imran Ne Haath Utha Kar Use Khamosh Rahne Ka Ishaara Kiya....
Aur
Singhi Se Bola....Aap Ki Tashreef Avari Ka Maqsad....?
Abhi Tak Khamoshi Se Sab Kuch Dekhta Raha Tha....
Lekin
Ab Dakhal Andaazi Karni Hi Padhi....!
Tumhara Kya Interest Hai....?
Adventure....Aur Yeh To Tum Ne Dekh Hi Liya Hai Ke Tumhari Tajveez (Prastav) Na-Kaabil-E-Qabool Thi....
Varna
Kelly Graham Ke Saath Fraud Kyun Kiya Jata....!
Acha....To Fir....?
Main Tumhe Madad Dene Ko Tayyaar Hu....
Aur
Mere Vasaayel (Resources) Se Tum Bakhoobi Waaqif Ho....!
Kiss Mulk Ke Liye Kaam Kar Rahe Ho....?
Sab Par Lanath Bhej Chuka Hu....Ab Main Khud Hi Ek Bohath Bada Mulk Hu....!
Yani Tum Apne Vasaayel Se Meri Madad Karoge....?
Yaqeenan....Tum Mujhe Kya Samajhte Ho....!
Urdu Mein Ek Lafz Hai....Jise Mein Ek Khatoon Ke Saamne Dohrana Pasand Nahi Karunga....Khwaah Urdu Se Anjaan Hi Kyun Na Ho....!
Haraamipan Chhod Kar Sanjheegi Se Meri Peshkash Par Ghaur Karo....!
Tum Mahez Adventure Ki Khateer Is Hadh Tak Nahi Jaa Sakhte....!
Kya Zaroori Hai Ke Saare Maamlaat Fauri Taur Par Zer-E-Bahes Laye Jaye....!
Main Kelly Graham Se Tanhai Mein Baat Karna Chahta Hu....Imran Ne Kaha
Imran Kelly Ko Apne Saath Aana Ka Ishaara Kar Ke Dusre Kamre Ki Taraf Badh Gaya....!
Kelly Ki Aankhon Mein Uljhan Ke Asaar The....!
Tum Use Kab Se Jaanti Ho....Imran Ne Usse Qashk Lahje Mein Pucha
Jaanti To Bohath Pahle Se Hu....
Lekin
Milne Ka Ittefaaq Pahli Baar Hua....!
Kiss Tarah....?
Kelly Ne Puri Rodaar Dohra Di....
Aur
Imran Pur Tashveesh (Chinta-Janak) Andaaz Mein Sunta Raha....!
Yaqeen Karo....Ab Main Un Logon Mein Wapas Nahi Jana Chahti....Kelly Bilaakhir Boli
Aur
Imran Ne Lambi Saans Le Kar Kaha....Munaseeb Yahi Tha Ke Tum Embassy Wapas Jati....
Aur
Apne Taur Par Hoshiyaar Rahti....!
Lekin Maine To Ek Taxi Mein Safar Kiya Tha....Jaan-Boojh Kar Usse Nahi Mili Thi....Tasavoor Bhi Nahi Kar Sakhti Thi Ke Aise Halaath Se Guzrungi....!
Wo To Tumhare Liye Badi Apniyath Zaaher Kar Raha Tha....!
Na-Kaabil-E-Aitemaad Hai....
Aur
Wo Bhi Mujh Par Aitemaad (Bharosa) Nahi Karta....!
To Fir Ab Kya Karoge....!
Sonchna Padhega....!
Aur Main Kya Karu....!
Filhaal Itna Hi Kahunga Ke Us Par Hargiz Aitemaad Mat Kar Lena....!
Wo Kahe Raha Tha Ke Zeroland Walon Ke Mars Ki Tabaahi Ka Khwaah Wo Bhi Hai....!
Ho Sakhta Hai....
Lekin
Mahez Uski Tabaahi Ke Liye Apne Vasaayel (Resources) Barbaad Karna Singhi Ki Shakhsiyath Ke Khilaaf Hoga....Main Use Achi Tarah Jaanta Hu....!
Acha....To Main Tumhari Marzi Ke Khilaaf Kuch Bhi Nahi Karungi....!
Aur Filhaal Main Bhi Usse Mutafeeq (Sehmath) Ho Jata Hu....
Lekin
Tum Ise Sach Na Samajh Lena....!
Wo Fir Usi Kamre Mein Wapas Aye....Jahan Singhi Unke Intezar Mein Tha....!
Ab Tum Kisi Qadr Bashaash Nazar Aa Rahe Ho....Singhi Imran Ko Baghaur Dekhta Hua Bola
Kya Mujhe Bashaash Na Hona Chahiye....!
Agar Tum Mujhse Mutafeeq Ho Gaye Ho To Tumhe Bashaash Hona Hi Chahiye....!
Halaath Aise Hai Ke Mujhe Mutafeeq Hona Padhega....Imran Muskura Kar Bola
Tumhare Saath Kitne Aadmi Honge....?
Fir Tum Ne Chalaang Lagayi....Abhi Hum Is Masle Par Aur Ghaur Karenge....!
Tum Bohath Dino Se Ghaur Kar Rahe Ho....
Aur
Kayi Parties Amazon Ke Junglon Mein Daakhil Ho Gayi Hai....!
Kya Matlab....!
Main Har Waqt Bakhabar Rehta Hu Bhateeje....Dono Taaqatein Isi Nateeje Par Pahunchi Hai Ke Wo Mars Amazon Hi Ke Jungle Mein Kahin Hai....!
Aakhir Kiss Bina Par Yeh Nateeja Aghaaz Kiya Gaya Hai....!
Yeh Main Nahi....
Lekin
Kam-Az-Kam....Jumla Pura Kiye Baghair Imran Ko Ghoorne Laga
Koi Naya Khayal....Imran Muskuraya
Main Yeh Sonch Raha Hu....
Agar
Wo Khud Hi Is Nateeje Par Pahunch Gaye Hai....
To Fir
Tumhara Picha Kyun Kar Rahe Hai....Hai Koi Jawaab Tumhare Paas....!
Filhaal To Nahi Hai....
Lekin
Kya Waqai Tum Ne Koi Dusra Nazariya Khayam Kiya Hai....Wo Mujhse Bebe De Sof Ka Negative Haasil Karna Chahte Hai Jo Mere Paas Nahi Hai....!
Na Hoga....
Lekin
Tumhare Paas Koi Tajveez (Prastav) Zaroor Hai....
Varna
Tum Kayi Mulkon Ki Confrence Ke Khwaah Kyun Hote....!
Kya Tum Mujhse Bahes Karne Aye Ho....Imran Ne Pucha
Hargiz Nahi Bhateeje....Singhi Bade Pyar Se Chimkaar Kar Bola....Bohath Dino Se Tumhe Khareeb Se Nahi Dekha Tha....Isliye Chala Aya....!
Lekin Joseph Uth Khada Hua....
Aur
Uski Aankhein Shikaar Ke Liye Tayyaar Kisi Cheetah Ki Aankhon Ki Tarah Chamakne Lagi....!
Achanak Imran Ke Halaq Se Aisi Awaazein Aane Lagi Jaise Dam Ghoot Raha Ho....!
Kelly Baukhla Kar Uski Taraf Badhi....Pistol Usne Blouse Ke Girebaan Mein Rakh Liya Tha....!
Arey....Tum Kya Kar Rahi Ho....Piche Hat Jao....Singhi Jaldi Se Bola....Yeh Ab Udhne Laga Hai....!
Fizool Baatein Mat Karo....Kelly Ghurrayi....Chaaron Taraf Se Ghira Hua Hai....Kab Tak Dimaagh Par Asar Na Hota....!
Iske Dimaagh Par Asar Hoga....Singhi Hans Padha
Imran Dheela Hota Chala Gaya....Joseph Use Sambhaalne Ke Liye Jhapta....!
Alag Hat Jaa....Imran Dono Haath Hila Kar Ghurraya....Ab Wo Buri Tarah Khaansne Laga Tha....
Aur
Isi Tarah Khaanste-Khaanste Aisa Laga Jaise Usne Koi Cheez Ugal Di Ho....
Aur
Us Ugli Hui Cheez Ko Chutki Mein Dabaye Hue Seedha Khada Ho Gaya....!
Yeh Dekho....Imran Ne Singhi Se Kaha
Yeh Teen Inch Lambi Ek Chamakdar Steel Ki Nalki Thi....!
Kelly Hairaan Andaaz Mein Palkein Jhapkane Lagi
Aur
Singhi Ne Khankaar Kar Pucha....Yeh Kya Hai....?
Plan....Isme Bebe De Sof Ka Negative Maujood Hai....!
Yeh Kya Kar Rahe Ho....Kelly Bechain Andaaz Mein Boli
Kyun Ke Wo Nalki Imran Ne Singhi Ki Taraf Badha Di Thi....!
Kelly Ki Dakhal Andaazi Ke Bawajood Bhi Singhi Ne Nalki Imran Ke Haath Se Jhapat Li....
Aur
Bola....To Is Fun (Kala) Mein Bhi Kameel Ho Bhateeje....Mujhe Nahi Maalum Tha....!
Negative Ab Mere Liye Bekaar Ho Chuka Hai....Imran Ne Kaha
Kyun Bhateeje....?
Agar Yeh Sach Hai Ke Wo Us Mars Ko Amazon Ke Junglon Mein Talaash Kar Rahe Hai....!
Main Ghalath Nahi Kahe Raha....Yeh Haqeeqat Hai....!
Baherhaal Main Ise Behtar Samajhta Hu Ke Negative Tumhare Hawaale Kar Diya Jaye....!
Yeh Tum Ne Kya Kiya Imran....Kelly Ruaansi Ho Kar Boli
Main Kisi Ka Paband Nahi Hu....Jo Mera Dil Chahega Karunga....!
To Goya Main Kisi Taraf Ki Na Hui....!
Tum Apni Embassy Wapas Jaa Sakhti Ho....!
Singhi Nalki Ka Dhakkan Kholne Ki Koshish Kar Raha Tha....
Achanak
Nalki Ko Aankhon Ke Khareeb Laa Kar Dhakkan Dekhne Laga....
Aur
Fir Aankhon Ke Khareeb Hi Rakh Kar Use Kholne Ki Koshish Ki....
Lekin
Dhakkan Khulte Hi Ajeeb Si Cheekh Uske Halaq Se Nikli....
Aur
Wo Dono Haathon Se Naak Dabaye Hue Farsh Par Lot Lagane Laga....!
Yeh Kkkkk....Kya Ho Raha Hai....Kelly Baukhla Kar Boli
Mujhe Kisi Party Ke Haathon Bech Raha Hai....Imran Ne Muskura Kar Baayin Aankh Dabayi
Joseph Ki Bhaanche Khil Gayi....!
Singhi Uthne Ki Koshish Karta....
Aur
Fir Gir Jata....
Lekin
Ab Uske Halaq Se Awaazein Nahi Nikal Rahi Thi....
Fir
Dekhte Hi Dekhte Wo Bilkul Behis-O-Harkath Ho Gaya....!
Kya Faida Hua....Kelly Bura Sa Muh Bana Kar Boli
Fir Tum Kya Chahti Thi....?
Isi Se Samjhauta Kar Lete....!
Iski Kya Haisiyath Hai....!
Kam-Az-Kam Tumhe Yahan Se Bahar To Nikaal Le Jata....!
Kya Main Khud Nahi Jaa Sakhta....!
Fir Yahi Kya Kam Hai Ke Isne Tumhe Nahi Ghera Tha....
Aur
Tum To Iski Maujoodgi Hi Se Bekhabar The....!
Ghaliban Tumhari Khwaahish Thi Ke Main Isse Sahyog Kar Leta....!
Samjhaute Se Meri Yahi Muraad Thi....!
Yeh Samjhauta Hi Kiya Hai Maine....!
Tumhari Koi Baat Samajh Mein Nahi Aati....!
Imran Kuch Na Bola....!
Singhi Ab Behosh Padha Tha....!
Joseph Sawaaliyan Nazron Se Imran Ki Taraf Dekhe Jaa Raha Tha....Aakhir Imran Ne Use Ishaara Kiya Ke Wo Singhi Ko Utha Kar Dusre Kamre Mein Le Jaye....!
Joseph Ne Khamoshi Se Tameel Ki....
Aur
Kelly Ne Iman Se Pucha....Us Nalki Mein Kya Tha....?
Kuch To Tha Hi....!
Kya Waqai Isme Negative Bhi Hai....?
Wo Formula Maine Thressia Ke Liye Tayyaar Kiya Tha....
Lekin
Shikaar Singhi Ho Gaya....!
Kya Waqai Wo Nalki Tumhare Pet Mein Thi....!
Ghiza Ki Nali Mein....Kya Tumhare Liye Bhi Nikaalu Ek Aur....Imran Gardan Tatolta Hua Bola
Nahi....Mujhe Nahi Chahiye....Wo Baukhla Kar Boli
Itne Mein Joseph Wapas Aa Gaya....!
Aakhir Wo Hai Kaun Boss....? Joseph Ne Pucha
Mujhe Hairath Hai Ke Tum Singhi Ko Bhool Gaye....!
Nahi....Uchal Padha
Maine Pucha Tha Ke Ab Tum Kya Karoge....Kelly Bhanna Kar Boli
Main Saari Parties Se Pahle Wahan Pahunchne Ki Koshish Karunga....
Varna
Wo Kaarkhana Kisi Badi Taaqat Ke Haath Laga Gaya To Bhi Duniya Ke Liye Bohath Bada Khatra Ban Jayegi....!
Kelly Ke Chahre Par Aise Asaar Nazar Aye Jaise Kisi Nanhe Bachche Ki Baatein Sun Rahi Ho....!
Imran Ne Mehsoos Kar Liya....
Aur
Hans Kar Bola....Shayad Maine Apne Qad Se Unchi Baat Kahe Di Hai....!
Main Is Silsile Mein Kuch Nahi Kehna Chahti....!
Ek Baar Fir Tumhe Mashwaara Dunga Ke Apni Embassy Wapas Jao....Isi Mein Tumhari Behtari Hai....Varna....
Main Is Waqt Apne Peshe Se Shadeed Nafrath Mehsoos Kar Rahi Hu....!
Lekin Tum Apni Marzi Se Ise Chhod Nahi Sakhogi....Imran Ne Kaha....Ek Baar Fir Kahunga Ke Singhi Ke Hosh Mein Aane Se Pahle Hi Yahan Se Chali Jao....Mere Baare Mein Frozer Ko Tum Pahle Hi Ittela De Chuki Ho....Ke Ab Main Us Imaarath Mein Maujood Nahi Hu....!
Mujhe Hairath Hai Ke Tum Singhi Ko Bhool Gaye....!
Nahi....Uchal Padha
Maine Pucha Tha Ke Ab Tum Kya Karoge....Kelly Bhanna Kar Boli
Main Saari Parties Se Pahle Wahan Pahunchne Ki Koshish Karunga....
Varna
Wo Kaarkhana Kisi Badi Taaqat Ke Haath Laga Gaya To Bhi Duniya Ke Liye Bohath Bada Khatra Ban Jayegi....!
Kelly Ke Chahre Par Aise Asaar Nazar Aye Jaise Kisi Nanhe Bachche Ki Baatein Sun Rahi Ho....!
Imran Ne Mehsoos Kar Liya....
Aur
Hans Kar Bola....Shayad Maine Apne Qad Se Unchi Baat Kahe Di Hai....!
Main Is Silsile Mein Kuch Nahi Kehna Chahti....!
Ek Baar Fir Tumhe Mashwaara Dunga Ke Apni Embassy Wapas Jao....Isi Mein Tumhari Behtari Hai....Varna....
Main Is Waqt Apne Peshe Se Shadeed Nafrath Mehsoos Kar Rahi Hu....!
Lekin Tum Apni Marzi Se Ise Chhod Nahi Sakhogi....Imran Ne Kaha....Ek Baar Fir Kahunga Ke Singhi Ke Hosh Mein Aane Se Pahle Hi Yahan Se Chali Jao....Mere Baare Mein Frozer Ko Tum Pahle Hi Ittela De Chuki Ho....Ke Ab Main Us Imaarath Mein Maujood Nahi Hu....!
Yaqeen Karo Main Is Silsile Mein Apni Khuvvat Faisla Istemaal Karne Ke Kaabil Nahi Hu....!
Aisi Surat Mein Dusron Ke Mashware Par Amal Karte Hai....!
Main Nahi Jaanti Ke Yahan Se Taxi Ke Liye Kahan Jana Padhega....!
Boss....Jiss Taxi Mein Yeh Log Aye The Bahar Khadi Hai....Joseph Ne Ittela Di
Use Singhi Khud Drive Kar Laya Tha....Kelly Ne Kaha
Achi Baat Hai....To Main Hi Tumhe Embassy Tak Pahuncha Dunga....Imran Ne Kaha
Aur
Joseph Se Bola....Kunji Singhi Ke Jeb Mein Hogi....Nikaal Kar Lao....
Aur
Darwaaze Ko Bahar Se Bolt Karte Aana....!
Kelly Ke Chahre Par Ajeeb Se Asaar The....Aisa Maalum Hota Jaise Imran Ke Mashware Par Amal Karne Ko Dil Se Tayyaar Na Ho....!
Tumhe Fir Make-Up Karna Padhega....Kelly Ne Imran Se Kaha
Tum Iski Fikr Na Karo....Sirf 20 Minute Baad Hum Yahan Se Nikal Chalenge....!
Aur....Wo....Yani Ke Singhi....?
Wo Mera Dard-E-Sar Hai....Main Dekhunga....!
Joseph Ne Wapas Aa Kar Taxi Ki Kunji Imran Ke Hawaale Kar Di....!
Do Ghante Se Pahle Singhi Ko Hosh Nahi Aya Tha....Pahle To Uski Samajh Hi Mein Nahi Aa Sakha Ke Kiss Haal Mein Hai....
Fir
Baukhla Kar Uth Baitha....Kamre Mein Bilkul Tanha Tha....!
Yaka-Ek Use Sab Kuch Yaad Aa Gaya....Dusre Hi Lamhe Mein Usne Bistar Se Chalaang Laga Di....
Aur
Seedha Darwaaze Ki Taraf Aya....
Lekin
Darwaaza To Bahar Se Bolt Kiya Gaya Tha....Iske Ehsaas Hote Hi Piche Hat Aya....Uske Honth Ahista-Ahista Hil Rahe The....Shayad Wo Saari Gaaliyan Imran Se Mansoob Kar Raha Tha Jo Use Yaad Thi....!
Thik Usi Waqt Bahar Se Awaaz Ayi....Kyun Chacha....Ab Tabiyath Kaisi Hai....?
Singhi Tezi Se Bistar Ki Taraf Badha....
Aur
Let Kar Aankhein Bandh Kar Li....Is Baar Usne Imran Ka Khahekhaha Suna....
Fir
Awaaz Ayi....Nahi Chalegi....Main Sab Dekh Raha Hu....!
Singhi Jhalla Kar Uth Baitha....
Aur
Darwaaze Ki Janib Mukka Dikha Kar Dahaada....Is Tarah Tum Ne Apni Maut Ko Dawath Di Hai....!
Pure Do Ghante Baad Hosh Mein Aye Ho....Tumhe Ba-Halath Behoshi Jail Mein Shift Kiya Jaa Sakhta Tha....Imran Ki Awaaz Ayi
Acha To Fir....Singhi Saanp Ki Tarah Phunkara
Is Tarah Maine Tumhe Yaqeen Dila Diya Hai Ke Filhaal Tumhare Saath Kisi Qism Ka Fraud Nahi Karunga....!
Hadh Ho Gayi....Haraamipan Ki....Abay....To Yeh Tu Ne Apni Sadathmandi Ka Yaqeen Dilaya Tha....!
Haa Chacha....!
Acha....Tu Darwaaza Khol....Main Kuch Nahi Kahunga....!
Bolt Sarakne Ki Awaaz Ayi....
Aur
Darwaaza Khul Gaya....
Lekin
Singhi Leta Hi Raha....!
Kya Fauri Inteqaam Lene Ki Sonch Rahe Ho....Imran Ne Kamre Mein Daakhil Hote Hue Sawaal Kiya
Mujhe Yaqeen Hai Ke Tum Ne Kelly Graham Ko Chalta Kar Diya Hoga....!
Tumhari Hi Taxi Se Chhod Aya Hu....Yeh Lo Chaabi Sambhaalo....Imran Ne Chaabi Singhi Ki Taraf Uchaalte Hue Kaha
Wo Tumhe Chahti Hai....!
Mujhe Nahi....Balke Mujhse Kuch Chahti Hai....!
Abay....Tu Duniya Se Yun Hi Be-Maramat Chala Jayega....!
Kaam Ki Baat Karo....Yahan Se Kab Rawaana Ho Rahe Ho....?
To Tum Ne Meri Tajveez (Prastav) Maan Li Hai....!
Tajveez Na Maan Leta To Tumhari Aankhein Jail Hi Mein Khulti....!
Haa....Yeh Sawaal Ghair Zaroori Tha....Singhi Bistar Se Uthta Hua Bola....Bas To Fir Yeh Jagaah Chhod Do....Main Tumhe Apni Khiyaamgah (Nivaas) Par Le Chalunga....Kya Tum Tanha Hoge....?
Nahi....Joseph Bhi Mere Saath Jayega....!
Thik Hai....!
Singhi Unhe Usi Taxi Se Le Gaya....
Lekin
Imran Mehsoos Kar Raha Tha Jaise Joseph Ko Yeh Ishteraak (Partnership) Pasand Na Aya Ho....
Lekin
Usne Iska Izhaar Nahi Kiya Tha....!
Singhi Ki Khiyaamgah Par Pahunch Kar Bhi Joseph Ne Bohath Bura Sa Muh Banaya Tha....Imran Use Nazar Andaaz Karta Raha....!
Imaarath Ke Andar Daakhil Ho Kar Singhi Ne Joseph Ka Baazu Pakdha....
Aur
Ek Janib Ghaseethta Hua Bola....Tum Mere Saath Aao....!
Kkkkk....Kyun....Boss....Joseph Imran Ki Taraf Dekh Kar Haklaya
Nahi Chacha....Imran Un Dono Ke Darmiyaan Aata Hua Bola....Yeh Use Chhod Ne Ki Koshish Kar Raha Hai....!
Kyun....? Singhi Ne Joseph Ki Aankhon Mein Jhaankte Hue Sawaal Kiya
Joseph Ke Muh Se Ajeeb Si Awaazein Nikli....
Aur
Wo Saqti Se Honth Bhinch Kar Haanpne Laga....Uske Baad Pure Jism Par Kanpkapi Si Taari Ho Gayi....
Aur Fir....
Agar Imran Aage Badh Kar Use Sambhaal Na Leta To Farsh Par Gira Hota....Usne Use Khareeb Ke Sofe Par Daal Diya....
Aur
Mudh Kar Singhi Se Bola....Tum Ne Bohath Bura Kiya....Use Ek Baar Fir Zehni Kashmakash Mein Daal Diya....!
Tum Shayad Paagal Ho Gaye Ho....Sharaab To Uski Ragon Mein Daudti Thi....Yeh Use Chhod Nahi Sakhega....Jao....Main Ise Thik Kar Lunga....!
Kiss Tarah Thik Kar Loge....?
Fizool Baatein Mat Karo....Chale Jao....
Varna
Yeh Isi Halath Mein Mar Bhi Sakhta Hai....Tumhe Iska Tajurba Nahi Hai....!
Imran Ek Cheeni Mulaazim Ki Rehnumayi Mein Dusre Kamre Tak Pahuncha....Abhi Tak Wo Is Silsile Mein Daama-Dol Tha....Ke Singhi Ke Saath Aane Ka Faisla Kar Ke Ghalthi Nahi Ki....!
Tum Ne Do-Chaar Bottlein Halaq Mein Undhel Di Hogi....!
Iske Alawa Aur Koi Surat Nahi Thi....Har Waqt Sharaab Ke Zer-E-Asar Rahne Walon Se Sharaab Is Tarah Nahi Chhudayi Jati....!
Imran Ne Laparwaahi Ke Andaaz Mein Shaano Ko Jumbish Di....
Aur
Dusri Taraf Dekhne Laga....!
Abay....Tujhe Kya Maalum....Tu Ne Kabhi Pi Hi Nahi....Singhi Jhunjhula Kar Bola
Khatm Karo....Imran Ne Bezaari Se Kaha....Kaam Ki Baat Karo....!
Sabse Pahle Bebe De Sof Ke Baare Mein Baat Hogi....!
Chacha....Negative Mere Paas Nahi Hai....Yeh Haqeeqat Hai Ke Slide Tayyaar Karte Waqt Barbaad Ho Gaya Tha....!
Lekin Main Ise Tasleem (Sweekar) Nahi Karunga Ke Isse Mutaleekh (Sambhandhit) Sab Kuch Tumhare Zahen Se Meet Gaya Ho....!
Is Silsile Mein Main Kya Kahe Sakhta Hu....!
Brazil Ke Naam Par Tum Chaunke The....
Aur
Shayad Tum Ne Yeh Bhi Kaha Tha Ke Ab Tumhare Jhak Maarne Se Kya Faida....!
Qissa Brazil Hi Ka Tha....!
Kiss Bina Par Yeh Kahe Rahe Ho....?
Bebe De Sof Ko Madh-E-Nazar Rakhte Hue Yahi Kehna Padhega....Kya Tumhe Un Paintings Ke Baare Mein Nahi Maalum Jo Hitler Ki Pasand Deeda Paintings Kahe Laati Thi....
Aur
Jin Par Khattai Gumaan Ya Ghair Maroof Artists Ke Dastakhat The....!
Mujhe iLm Hai....!
Bebe De Sof Unhi Mein Se Ek Thi....
Aur
Us Par Lizrab Naami Artist Ke Dastakhat The....Germans Ne Yeh Naam Kabhi Nahi Suna....Waise Lizrab Ko Ulta Kar Ke Padho To Brazil Banega....!
Yeh Mahez Ittefaaq Bhi Ho Sakhta Hai....
Lekin
Is Hairath Hai Ke Wo Do Parties Bhi Brazil Ke Jungle Ko Chaan Rahi Hai....!
Kisi Khaas Point Ki Talaash Hai....? Imran Ne Sawaal Kiya
Ghaliban Unhe Kisi Khaas Hi Point Ki Talaash Thi....
Lekin
Wo Zameen Par Wahan Tak Pahunchne Ka Raasta Nahi Talaash Kar Sakhe....!
Us Point Ke Baare Mein Bhi Tum Ne Kuch Na Kuch Maalumaat Zaroor Haasil Ki Hogi....!
Haa...Ki To Thi....Unhe Aisi Kisi Jheel Ki Talaash Thi Jo Chandh Saal Pahle Dariyaft Hui Thi....!
Kiss Tarah Dariyaft Hui Thi....?
America Ki Ek Geographical Society Ne Aerial Servey Ke Dauraan Mein Use Dekha Tha....!
To Kya Wo Fiza Se Zameen Ke Raaste Ka Taayen (Determine) Nahi Kar Sakhte....!
Pata Nahi....Kya Chakkar Hai....!
Baherhaal Main Ab Bhi Unki Maalumaat Se Kisi Qadr Aage Hu....!
Thahero....Yun Baat Nahi Banegi....Mere Saath Aao....Singhi Uthta Hua Bola....Wo Use Ek Aise Kamre Mein Laya Jahan Deewaron Par Kayi Bade-Bade Naqshe (Maps) Latak Rahe The....!
Yeh Dekho....Maine Brazil Ke Tukdhe Kar Ke Rakh Diye Hai....Singhi Imran Ki Taraf Mudh Kar Bola....Ab Tum Inhe Dekh-Dekh Kar Haafize (Memory) Par Zor Do....!
Imran Un Naqshon Ko Ghaur Se Dekhta Raha....
Fir
Singhi Se Kaagaz Aur Pencil Maanga....!
Thodi Der Baad Wo Yaadasht Ke Sahaare Bebe De Sof Ka Out-Line Tayyaar Kar Raha Tha....!
Singhi Uske Shaane Par Jhuka Hua Dekhta Raha....
Fir
Imran Ne Khaake Mein Shed Dena Shuru Kiya....
Aur
Singhi Ki Saansein Tezi Se Chalne Lagi....Gadhi Ki Tasveer Mukammal Karne Ke Baad Wo Uske Bachche Ke Khaake Ki Takmeel Karta Raha....!
Main Kuch-Kuch Samajh Raha Hu....Singhi Badhbadhaya
Lekin
Imran Khamoshi Se Kaam Karta Raha....!
Fir Use Pencil Rakh Di....
Aur
Khaake Ko Har Tarah Se Dekh Lene Ke Baad Use Singhi Ki Janib Badhata Hua Bola....Isse Tum Kya Nateeja Aghaaz Karoge....?
Gadhi Mein Brazil Ka Naqsha Poshida Hai....Singhi Ne Use Baghaur Dekhte Hue Kaha....
Fir
Achanak Chaunk Kar Bola....Lekin Bachche Mein Kya Hai....? Yeh Bhi Naqsha Hi Maalum Hota Hai....!
Darasal Yahi Zyada Ahem Hai....Mera Khayal Hai Ke Agar Hum Is Tukdhe Ka Taayen Brazil Ke Naqshe Par Kar Sakhe To Mushkil Asaan Ho Jayegi....!
Maine Jo Tukdhe Tayyaar Karaye Hai Unse Muvaazna (Compare) Karo....Shayad Maqsad Haasil Ho Jaye....
Fir
Dono Ne Sar Jodh Kar Deewar Par Latke Hue Naqshon Ka Jayeza Lena Shuru Kiya....
Lekin
Imran Isse Ghafil Nahi Tha Ke Singhi Uske Banaye Hue Khaake Ka Kya Karta Hai....!
Singhi Ne Wo Shed Tahe Kar Ke Apne Coat Ke Andruni Jeb Mein Rakh Li Thi....!
Ise Jeb Mein Kyun Rakh Liya....Achanak Imran Ne Mudh Kar Singhi Ko Ghoorte Hue Pucha
Ooh Bas....Yun Hi Be-Khayali Mein....Singhi Chaunk Kar Bola....
Aur
Khaake Ko Jeb Se Nikaal Kar Imran Ko Dete Hue Kaha....Ho Sakhta Hai Ke Tum Itne Naqshon Ke Darmiyaan Confuse Ho Jao....Lehaaza....
Thahero....Imran Haath Utha Kar Bola....Mujhe Ek Baar In Sabhiyon Ka Alag-Alag Jayeza Le Lene Do....!
Thodi Der Ki Koshish Ke Baad Bilaakhir Use Kaamyaabi Hui....Yani Gadhi Ke Bachche Wala Maamla Uski Samajh Mein Aa Gaya....
Lekin
Singhi Par Wo Yahi Zaaher Karta Raha Ke Abhi Samajhne Ki Koshish Jaari Hai....!
Achanak Singhi Uske Shaane Par Haath Maar Kar Bola....Khatm Karo....Hum Ise Samajhte Rahenge....
Baherhaal
Mujhe Yaqeen Hai Ke Wo Raah Ka Taayen Ho Jayega....!
To Fir Ab Kya Kare....?
Thressia Par Nazar Rakhi Jaye....Singhi Kuch Sonchta Hua Bola....Ho Sakhta Hai Ke Is Tarah Kisi Jad-O-Jahad Ke Baghair Hi Hum Wahan Tak Pahunch Jaye....!
Kya Tum Jaante Ho Ke Wo Kahan Aur Kiss Bhes Mein Hai....?
Main Jaanta Hu Ke Wo Ab Yahan Maujood Hai....
Lekin
Filhaal Yeh Nahi Jaanta Ke Kahan Hai....!
Fir Kaise Talaash Karoge....?
Mere Apne Zariye Hai....Maine Abhi Tak Uski Taraf Tawajah (Dhyaan) Nahi Di Thi....Sirf Tumhe Dekhta Raha Hu....!
Shukriya....Uncle The Bastard....!
Abay....Main Dekh Raha Hu Ke Abhi Tak Meri Taraf Se Tera Zahen Saaf Nahi Hua Hai....!
Mera Zahen To Khud Apni Taraf Se Bhi Saaf Nahi Hai....!
Teen Safed Faam Aadmi Haath Baandhe Adab Se Khade The....
Aur
Siyaah Faam Aurat Madeline Unhe Saqt Sust Kahe Rahi Thi....
Achanak
Usne Khususiyath Se Ek Ko Mukhateeb Kar Ke Kaha....Gerudo Kahan Hai....?
Apne Thikaane Par Madamme....!
Use Yahan Lao....!
Bohath Behtar Madamme....Usne Kaha
Aur
Kamre Se Chala Gaya....!
Madeline Baaqi Dono Par Barasne Lagi....Tum Log Roz-Ba-Roz Kahel (Aalsi) Hote Jaa Rahe Ho....Tum Se Itna Hi Na Ho Sakha Ke Kelly Graham Hi Par Nazar Rakhte Sakhte....!
Lekin Madamme....Aap Uska Qissa To Khatm Hi Kar Diya Tha....Ek Bola
Yeh Tum Se Kiss Ne Kahe Diya....?
Tab To Fir Wo Puri Tarah Humari Nazar Mein Hai....!
Kahan Hai....?
Apni Embassy Mein....!
Tanha Hai....?
Haa Madamme....Tanha Hi Bahar Nikalti Hai....!
Nigrani Zaroor Hoti Hogi....?
Iske Baare Mein Kuch Nahi Kaha Jaa Sakhta....!
Achi Baat Hai....Sabse Pahle Yeh Dekho Ke Nigrani To Nahi Ho Rahi Hai....Uske Baad Agar Maidaan Saaf Nazar Aye To Use Yahan Le Aao....!
Zaroor Madamme....Nigrani Karne Walon Ko Bhi Dodge De Kar Yahan Le Ayenge....!
Is Baar Koi Ghalathi Nazar Andaaz Nahi Ki Jayegi....Madeline Ne Saqt Lahje Mein Kaha
Bohath Behtar Madamme....!
Un Dono Ke Chale Jane Ke Baad Wo Uth Kar Thahelne Lagi....Andaaz Mein Bechaini Payi Jati Thi....Kabhi-Kabhi Ruk Kar Kuch Sonchne Lagti....
Fir
Thahelna Shuru Kar Deti....!
Thodi Der Baad Darwaaze Par Kisi Ne Dastak Di....!
Aa Jao....Usne Unchi Awaaz Mein Kaha
Aur
Wahi Aadmi Kamre Mein Daakhil Hua Jise Madeline Ne Kisi Gerudo Ko Bulane Ke Liye Bheja Tha....!
Kya Gerudo Nahi Mila....? Madeline Ne Use Ghoorte Hue Pucha
Wo Apni Khiyaamgah (Nivas) Par Maujood Hai Madamme....Lekin....
Lekin Kya....?
Usne Yahan Aane Se Inkaar Kar Diya Hai....!
Wo Kya Paagal Ho Gaya Hai....!
Main Nahi Jaanta Madamme....Usne Darwaaza Bhi Nahi Khola Tha....!
Kya Matlab....?
Darwaaze Ke Khareeb Aa Kar Usne Andar Se Kaha Tha Ke Na Wo Mujhe Andar Bula Sakhta Hai....
Aur
Na Is Waqt Kahin Jaa Sakhta Hai....Maine Aap Ka Naam Liya To Kahne Laga Ke Use Is Waqt Madamme T3B Ki Bhi Parwaah Nahi Hai....Uski Personal Assistant Ki Shumaar-O-Khataar Mein Hai....!
Yeh Gerudo Ne Kaha Tha....?
Haa Madamme....Maine Usi Alfaaz Dohraye Hai....!
Kya Wo Andar Tanha Tha....?
Main Yaqeen Ke Saath Kuch Nahi Kahe Sakhta Madamme....!
Kya Koi Aurat Hai Uski Zindagi Mein....?
Bazaaher To Aisa Nahi Hai....Hum Sab Ek-Dusre Ke Baare Mein Sab Kuch Jaante Hai....!
Madeline Ki Aankhon Se Jhunjhulahat Zaaher Hone Lagi....Usne Behadh Ghussele Lahje Mein Pucha....Kya Usne Madamme T3B Ka Naam Le Kar Wo Baat Kahi Thi....?
Haa Madamme....Isi Par Hairath Hai....!
Tum Jaante Ho Ke Madamme Ka Naam Le Kar Koi Aisi Baat Kahne Ki Kya Saza Hai....?
Mujhe iLm Hai Madamme....!
To Fir Tum Use Saza Diye Baghair Wapas Kyun Aye....!
Agar Aap Yahan Maujood Na Hoti To Main Khud Faisla Kar Leta....!
Thik Hai....Main Khud Use Saza Dungi....Garage Se Gaadi Nikaalo....!
Bohath Behtar Madamme....Usne Kaha....
Aur
Kamre Se Chala Gaya....!
Uske Baad Madeline Bhi Is Kamre Se Nikal Kar Apne Kamre Mein Ayi....
Aur
Jaldi-Jaldi Libaas Tabdil Karne Lagi....Skirt-Aur Blouse Ki Bajaye Jeans Aur Jacket Pahene Aur Bahar Nikal Ayi....!
Siyaah Rang Ki Gaadi Porch Mein Khadi Thi....!
Tum Drive Karoge....?
Bohath Behtar Madamme....Usne Pichli Seat Ka Darwaaza Madeline Ke Liye Kholte Hue Kaha
Gaadi Porch Se Nikal Kar Sadak Par Ayi....
Aur
Fir Shayad 10 Minute Ke Andar Hi Andar Wo Manzil Par Pahunch Gaye....Gaadi Sadak Hi Par Roki....!
Engine Bandh Kara Dene Ke Baad Madeline Ne Driver Se Pucha....Kya Tumhe Gerudo Se Aise Jawaab Ki Umeed Thi....?
Hargiz Nahi Madamme....Mujhe To Aisa Mehsoos Hota Hai Jaise Maine Koi Khwaab Dekha Ho....!
Kya Wo Bohath Zyada Pi Gaya Hoga....?
Wo Sire Se Peeta Hi Nahi Madamme....Behadh Hoshiyaar Aadmi Hai....Pal Bhar Ki Ghaflath Bhi Use Gawaara Nahi....!
Tab Fir Kisi Hungaame Ke Liye Tayyaar Rehna....!
Main Nahi Samjha Madamme....!
Lekin Tum Ne Is Silsile Mein Apni Rai Ka Izhaar Nahi Kiya Tha....!
Main Bado Ke Saamne Zubaan Kholta Hua Darrta Hu Madamme....!
Achi Aadath Hai....
Lekin
Zaroori To Nahi Hai Ke Tum Apni Zahaanat (Buddhi) Ko Kaam Mein Laana Hi Chhod Do....Waise Mauqe Par Zaroor Bolna Chahiye....!
Aainda Khayal Rakhunga Madamme....!
Acha....To Ab Yeh Sonch Kar Imaarath Mein Khadam Rakhna Hai Ke Kisi Dushman Se Muthbedh Ho Jayegi....!
Bohath Behtar Madamme....Main Musalaah....!
Revolver Hoga....?
Haa Madamme....!
Fizool Hai....Aas-Paas Dusri Imaaratein Bhi Hai....Chaaqu Ya Khanjar Behtar Rehta....Tum Iski Fikr Na Karo....Humara Dushman Bhi Yahan Firing Karne Se Bachega....!
Lekin Usne Itni Savdhaani Na Barti To....?
Maine Kaha Tha Ke Iski Fikr Na Karo....Bas Fire Karne Se Bachna....!
Main Khayal Rakhunga Madamme....!
Wo Gaadi Se Utar Kar Compound Mein Daakhil Hue....Yahan Gehra Andhera Tha....
Kyun Ke
Baraamde Mein Roshni Nahi Thi....!
Kya Us Waqt Bhi Baraamde Ka Bulb Roshan Nahi Tha....Jab Tum Yahan Aye The....Madeline Ne Ahista Se Pucha
Us Waqt To Roshni Thi Madamme....!
Revolver Nikaalo....Main Lock Todhungi....!
Revolver Se....!
Nahi....Kisi Aur Tarah....Revolver Ehtiyatan (Savdhani) Nikaalo....Fire Karne Ke Maamle Mein Savdhan Rehna....!
Jaan Par Bane Baghair Fire Nahi Karunga....!
Thik Hai....!
Dono Badi Savdhaani Se Baraamde Mein Aye....
Aur
Driver Ne Sadar Darwaaze Tak Uski Rehnumayi Ki....Key-Hole Se Bhi Yahi Andaaza Hua Ke Andar Bhi Roshni Nahi Hai....!
Madeline Ne Kiss Tarah Lock Khola Iska Andaaza Driver Ko Na Ho Sakha....Darwaaza Khulne Ki Halki Si Awaaz Usne Bhi Suni....
Aur
Madeline Ke Saath Badhta Chala Gaya....Wo Deewar Se Lagi Hui Chal Rahi Thi....
Aur
Driver Ka Baazu Chu Kar Use Bhi Deewar Hi Se Laga Diya....
Fir
Achanak....Madeline Ruk Gayi....
Aur
Piche Hat Kar Use Bhi Ruk Ne Ka Ishaara Kiya....!
Driver Ka Dil Tezi Se Dhadakne Laga....
Aur
Revolver Ke Daste Par Uski Giraft Saqt Ho Gayi....!
Aur Thik Usi Waqt Kamra Roshan Ho Gaya....
Aur
Saath Hi Kisi Ne Uske Revolver Wale Haath Par Zarb Lagayi....
Aur
Revolver Uski Giraft Se Nikal Kar Dur Jaa Padha....!
Wo Chaar Afraad Ke Narghe (Circle) Mein The....
Aur
Chaaron Ke Haathon Mein Silencer Lage Hue Pistol The....Chaheron Ki Banavat Ke Aitebaar Se Pahle Hi Nazar Mein Unki Khaumiyath (Nationality) Ka Andaaza Kiya Jaa Sakhta Tha....!
Madeline Ne Hairaan Andaaz Mein Palkein Jhapkayi....
Lekin
Khauffzada Nahi Maalum Hoti Thi....!
Oohhooo....Yeh To Pata Nahi....Kya Balaa Hai....Piche Se Awaaz Ayi....Main Samjha Tha....Thressia Hogi....!
Madeline Bade Mutmayeen (Santusht) Andaaz Mein Awaaz Ki Janib Mudhi....Usne Apne Haath Bhi Nahi Uthaye The....Jab Ke Uske Saathi Dono Haath Uthaye Hue The....!
Arey....Tum Zinda Ho....Madeline Hans Kar Boli....Uska Mukhateeb Lamba Qad Doobla-Patla Cheeni Tha....!
Tum Mujhe Pehchaanti Ho....? Cheeni Ne Pucha
Singhi Ko Kaun Na Pehchaanega....!
Lekin Main Tumhe Nahi Jaanta....!
Haa....Pahle Kabhi Humari Mulakhaat Nahi Hui....
Lekin
Tum Ne Mera Naam Zaroor Suna Hoga....Madeline....Madamme Ki Chief Of Personal Assistant....!
Naam Suna Tha....Singhi Ne Laparwaahi Se Kaha
Kya Tumhe Mujhse Mil Kar Khushi Nahi Hui....?
Khattai Nahi....Main Samjha Tha Thressia Se Mulakhaat Hogi....!
Haa....Tum Jaante Hoge Ke Madamme Aadna Ghulaamon Ki Zubaan Se Inkaar Sunne Ki Aadi Nahi Hai....Aise Mauqon Par Khud Sazaa Deti Hai....Mujrimon Ko....
Lekin
Maine Yeh Behooda Baat Un Tak Pahunchne Hi Nahi Di Thi....Kya Tum Ne Gerudo Ko Maar Daala....?
Main Khwaamkha Nahi Maarta....Wo Sirf Behosh Hai....!
Khair....Khair....Haa To....Is Mulakhaat Ka Maqsad Kya Hai....?
Thressia Se Mulakhaat Matloob (Demand) Thi....Singhi Use Ghaur Se Dekhta Hua Bola
Mujhe Afsos Hai....Madeline Ajeeb Se Andaaz Mein Muskurayi
Nahi....Tum Usse Meri Mulakhaat Karaogi....!
Mr.Singhi....Kya Tum Nahi Jaante Ke Madamme Se Mulakhaat Asaan Nahi Hai....!
Main Ise Asaan Hi Banana Chahta Hu....!
Bhala Kiss Tarah....Mr.Singhi....?
Tum Meri Madad Karogi....!
Agar Mujhe Maalum Hoga Ke Wo Kahan Hai....!
Tum Isse Inkaar Nahi Kar Sakhti Ke Wo Aaj-Kal Yahin Hai....!
Yaqeenan Main Inkaar Nahi Kar Sakhti....
Lekin
Koi Bhi Nahi Jaanta Ke Wo Aaj-Kal Kahan Thaheri Hai....
Aur
Tum Bhi Achi Tarah Waaqif Ho....Unki Aadath Se....Tum Bhi To Kabhi Humare Bade Rahe Chuke Ho....Madeline Ne Kaha
Aur
Singhi Ko Kisi Qism Ka Ishaara Kar Ke Apne Saathi Ki Taraf Dekhne Lagi....!
Singhi Ki Aankhon Mein Ajeeb Si Chamak Laherayi....
Aur
Usne Apne Aadmiyon Mein Se Ek Ko Mukhateeb Kar Ke Cheeni Zubaan Mein Kuch Kaha....!
Dusre Hi Lamhe Mein Uska Pistol Madeline Ke Saathi Ki Kamar Se Jaa Laga....
Aur
Wo Use Dusre Kamre Ke Darwaaze Ki Taraf Dhakelne Laga....!
Usne Mudh Kar Badi Bebasi Se Madeline Ki Taraf Dekha....
Lekin
Wo Singhi Ki Taraf Mutawajah (Attract) Thi....!
Cheeni Use Dusre Kamre Mein Dhakel Le Gaya....
Aur
Madeline Muskura Kar Boli....Mujhe Khushi Hai Mr.Singhi Ke Tum Tanzeem (Organisation) Ke Makhsoos (Special) Ishaare Abhi Tak Nahi Bhoole....!
Main Tanzeem Ka Mukhaleef (Virodhi) Nahi Hu....Mera Ikhtelaaf (Virodh) Sirf Thressia Se Tha....
Lekin
Wo Dictator Ban Gayi Hai....Yani Thressia Se Ikhtelaaf Karna Goya Tanzeem Hi Se Ikhtelaaf Thahera....!
Main Is Silsile Mein Kuch Kahne Ki Jurrat Nahi Rakhti....!
Usne Sab Ko Ghulaam Bana Rakha Hai....Badon Ki Badi Ban Baithi Hai....!
Please Mr.Singhi....Madamme Ki Shakshiyath Ko Zer-E-Bahes Na Lao.....!
Main Kehta Hu Tum Kiss Se Kam Ho....
Lekin
Afsos Ke Tumhari Jild (Skin) Kaali Hai....Isliye Safed Chamdi Tum Par Hukumat Karne Ka Haq Rakhti Hai....!
Tum Mujhe Varghalane Ki Koshish Kar Rahe Ho Mr.Singhi....!
Thressia Ankhareeb Khatm Hone Wali Hai....!
Sab Apna-Apna Waqt Guzaarte Hai Mr.Singhi....!
Tumhara Shumaar Teesre Darje Ke Badon Mein Hoga....? Singhi Ne Use Ghaur Se Dekhte Hue Pucha
Yeh Durust Hai Mr.Singhi....!
Kya Kisi Rangdar Nasl Se Talookh Rakhne Wala Koi Fardh Avval Darje Ke Badon Mein Shaamil Hai....!
Mera Khayal Hai Ke Dusre Darje Ke Badon Mein Bhi Nahi Hai....Madeline Ne Kahe Kar Thandi Saans Li
Aisa Kyun Hai....?
Afsos Ke Main Nahi Bata Sakhti....!
Tum Jaanti Ho....Achi Tarah Jaanti Ho....Iski Wajah....!
Mahez Jaanne Se Kya Hoga Mr.Singhi....Is Silsile Mein Kuch Kar To Nahi Sakhte....!
Lekin Main Kuch Karne Hi Ke Liye Tanzeem Se Alag Hua Hu....
Aur
Tum Bohath Jald Sunogi Ki Tanzeem Ke Saare Bade Rangdar Naslon Se Talookh Rakhne Wale Honge....!
Abhi Tak To Iske Asaar Nazar Nahi Aye....!
Main Ab Tak Kayi Mauqon Par Thressia Ko Shikast De Chuka Hu....!
Haa....Wo Sard Lahje Mein Boli....Shayad Do Ya Teen Unit Tumhari Koshish Se Toote Hai....
Lekin
Isse Kya Hota Hai....Mr.Singhi....Jitne Arse Mein Tum Ne Unit Todhe Hai....10 Naye Unit Khayam Ho Gaye Hai....!
Suno....Main Tanzeem (Organisation) Ko Koi Nuqsaan Nahi Pahuchana Chahta....Singhi Uski Aankhon Mein Dekhta Hua Bola....Wo To Maine Thressia Ko Mahez Namuna Dikhaya Tha....Ke Main Kya Kar Sakhta Hu....
Aur
Thressia Mein Ab Raha Hi Kya Hai....Ek Imran Ko To Qaabu Mein Na Kar Sakhi....!
Uska Maamla Abhi Tak Samajh Mein Nahi Aya....!
Kya Samajh Mein Nahi Aya....?
Mera Khayal Hai Ke Madamme Use Kisi Qadr Chhut Deti Hai....!
Mahez Khayal Hi Hai....!
Imran Ki Talaash To Mere Hi Zimme Daali Gayi Hai....Madeline Ne Kaha
Lekin Wo Kayi Baar Cheekni Machli Ki Tarah Tumhare Haathon Se Phisal Gaya....!
Yeh Haqeeqat Hai Mr.Singhi....!
Aur Yeh Bhi Haqeeqat Hai Ke Bebe De Sof Ka Negative Uske Paas Nahi Hai....Thressia Jaise Tez Aurat Apna Waqt Barbaad Kar Rahi Hai....!
Tum Bade Vasooq Se Kahe Rahe Ho....!
Main Imran Ke Silsile Mein Yahan Chauthi (4th) Party Hu....Maine Uski Aur Foriegn-Ministry Ke Secretary Ki Baatein Tape Ki Thi....!
Kya Imran Ne Usse Bhi Yahi Kaha Tha Ke Negative Barbaad Ho Chuka Hai....?
Agar Na Kaha Hota To Main Bhi Itne Yaqeen Ke Saath Is Silsile Mein Kuch Na Kahe Sakhta....!
Madeline Ne Laparwaahi Zaaher Karne Ke Liye Shaano Ko Jumbish Di....!
Lekin Tum Ne Apne Aadmi Ko Yahan Se Hata Dene Ka Ishaara Kyun Kiya Tha....? Singhi Ne Use Ghaur Se Dekhte Hue Pucha
