Koi Baat Nahi....Aurtein Humesha Teri Pareshaaniyon Ka Sabab Rahi Hai....!
Tum Samajhte Kyun Nahi Boss....!
Kya Samjhu....? Acha....Tu Samjha De....!
Kya Samjhau....Tum To Bas Bachche Hi Ban Kar Rahe Jate Ho....Yeh Aurat Tumhe Is Taraf Dekh Rahi Thi Jaise Kha Jana Chahti Ho....!
Kachcha....? Imran Ne Hairath Zaaher Ki
Main Nahi Jaanta....Tum Khud Dekh Loge....Joseph Bezaari Se Bola
Tum Ne Suna Nahi....Main Brazilian Fauj Ka General Banne Jaa Raha Hu....!
Aur Uske Baad Mera Kya Hoga....!
Fikr Na Karo....Sab Thik Hi Hoga....Ab To Filhaal Yeh Dekhna Hai Ke Yeh Log Chahte Kya Hai....!
Unke Liye Dopahar Ka Khana Macy Trini Ki Taraf Se Bhijwaya Gaya Tha....Dono Ne Khana Khaya....
Aur
Kuch Der Baad Imran Ne Kaha....Yeh Mujhe Neend Kyun Aa Rahi Hai....!
Equatorial Zone Mein Yahi Hota Hai Boss....Joseph Ne Kaha
Aur
Muh Phula Kar Jamayi Li....
Fir
Bharrayi Hui Awaaz Mein Bola....Khailulah Zaroori Hota Hai Yahan....!
Main Is Laghavat Mein Kabhi Mubtela Nahi Hua....!
Aab-O-Hawaa Boss....Pet Bharte Hi Dimaagh Par Humla Hota Hai....Main To Chala Sone....Joseph Ne Kaha
Aur
Uth Kar Darwaaze Ki Taraf Chala Badh Gaya....
Aur
Imran Aaram Kursi Hi Par Padhe-Padhe So Gaya....!
Dobara Aankh Khuli To Aaram Kursi Jhula Jhul Rahi Thi....Aaram Kursi....Jhula....Imran Baukhla Kar Uth Baitha....Pura Kamra Jhula Jhul Raha Tha....
Aur
Fir To Uski Khopdhi Bhi Jhula Jhulne Lagi....Yeh Kisi Submarine Ka Cabin Tha....
Lekin
Joseph Kahan Hai....Uski Wo Saari Baatein Achanak Yaad Aa Gayi....Jo Usne Chief Trini Ke Mutaleekh (Sambhandith) Kahi Thi....!
Gehre Neele Rang Ka Bulb Cabin Mein Roshan Tha....Imran Ne Uth Kar Switch Board Talaash Kiya....
Aur
Tez Roshni Ka Switch Onn Kar Diya....Cabin Shaandar Tha....Bistar Bhi Shaandar Tha....Ek Janib Mez Par Kuch Kapdhe Tahe Kiye Rakhe The....Jinke Upar Siyaah Rang Ki Artificial Moochein Bhi Rakhi Hui Thi....Ek Taraf Uska Zaati Samaan Bade Saleekhe Se Laga Diya Gaya Tha....Imran Ne Lambi Saans Li
Aur
Aaine Par Nazar Daal Kar Muh Chalane Laga....Is Waqt Sach-Mooch Khud Ko Avval Darje Ka Bewaqoof Mehsoos Kar Raha Tha....
Fir
Us Mez Ki Taraf Badha Jiss Par Kapdhe Rakhe Hue The....Usne Unki Tahe Khol Di....!
Yeh Major-General Ki Vardi Thi....Jiss Par Nishaanat Bhi Maujood The....
Fir
Achanak Unhi Tahe Ke Darmiyaan Ek Photograph Sarak Kar Farsh Par Jaa Padha....!
Camera Photo Tha....Jise Dekh Kar Imran Hairaan Rahe Gaya....Siyaah Moochon Mein Yeh Uski Apni Tasveer Thi....Chahre Par Sirf Moochon Ka Izaafa (Increase) Tha....
Varna
Man-O-Ain Wo Khud Hi Tha....Wo Sonchne Laga....Usne Kabhi Kisi Make-Up Mein Apni Koi Tasveer Nahi Banwayi Thi....
To Fir
Yeh Tasveer....Use Ulat Kar Dekha To Yeh Tahreer (Lekh) Nazar Ayi....!
Major-General Agura....Paidaishi Manaus....Maa-Baap Italian The....!
Imran Sonchne Laga....Is Mokhtasar (Short) Note Ki Kya Gharz-O-Anayath Ho Sakhti Hai....Kya Yeh Mahez Isliye Tahreer Ki Gayi Hai Ke Wo English Bolne Ke Italian Ka Sa Andaaz Ikhtiyaar Kare....
To Fir
Ab Use Kya Karna Chahiye....?
Usne Briefcase Mein Se Apna Samaan Nikaala....
Aur
Un Moochon Ko Apne Naak Ke Niche Jamane Laga....
Aur
Usse Fursath Paa Kar General Ki Vardi Pahen Li....Ab Shayad Hi Koi Kahe Sakhta Tha Ke Yeh Tasveer Usi Ki Nahi Hai....!
General Agura....Imran Ahista Se Badhbadhaya....
Aur
Aaine Ko Aankh Maar Kar Darwaaze Ki Taraf Chal Padha....
Lekin
Fir Ruk Gaya....Aqlmandi Ka Takhaza Yahi Tha Ke Pahle Halaath Ka Andaaza Lagane Ki Koshish Karta....Usi Aasna Mein Switch Board Par Call Bell Ke Push Button Par Nazar Padhi....
Aur
Usne Soncha Ke Pahle Ise Hi Aazmaya Jaye....!
Usne Pay-Dar-Pay Us Par Teen Baar Dabau Daala....!
Zara Hi Der Mein Darwaaze Par Kisi Ne Halki Si Dastak Di....!
Andar Aa Jao....Imran Ne Unchi Awaaz Mein Kaha
Aur
Macy Trini Captain Ki Vardi Mein Andar Daakhil Hui....Usne Bakhaida Taur Par Imran Ko Salute Kiya....!
Haa....Acha....To Tum Ho....Imran Ne Italian Andaaz Mein Angrezi Haankne Ki Koshish Ki
Bohath Khoob....Wo Hans Kar Boli....Tumhari Zahaanat (Buddhi) Se Mujhe Yahi Umeed Thi....!
Lekin Yeh Khwaab Kitna Suhaana Hai....Imran Aankhein Bandh Kar Ke Muskuraya
Khwaab....Kya Matlab....?
Shayad Main Khana Kha Kar So Gaya Tha....Uske Baad Se Ab Tak To Jaaga Nahi....!
Trini Ne Ek Baar Fir Zordar Khahekhaha Lagaya....
Fir
Sanjheedgi Ikhtiyaar Kar Ke Boli....Mujhe Behadh Afsos Hai Mere Dost....
Lekin
General Ki Yahi Scheme Thi....Wo Chahta Tha Ke Tumhe Behadh Raazdari Ke Saath Steamer Tak Pahunchaya Jaye....Tumhe Us Imaarath Se Ek Hospital Ke Staff Ne Steamer Tak Pahunchaya Tha....Jab Tumhe Puri Baat Maalum Hogi To Tumhara Ghussa Foor Ho Jayega....!
Ghussa....Imran Ahamaqana Andaaz Mein Bola....Meri Sabse Badi Badh-Bakhti To Yahi Hai Ke Mujhe Ghussa Nahi Aata....Lavafanga Kahan Hai....?
Ab Lavafanga Kyun Kahe Rahe Ho....Wo Badastoor Joseph Magunda Hai....
Aur
Mutmayeen (Santusht) Raho Ke Wo Bhi Isi Steamer Par Maujood Hai....
Lekin
Uske Jism Par Jahaaz Ke Staff Ki Vardi Hai....!
Tum Khadi Kyun Ho....Baith Jao....Apne General Ki Ijazath Se....
Aur
Zaaher Hai Ke Ab Tum Mujhse Wo Majboori Bhi Bayaan Karogi....Jiss Ki Bina Par Mujhe Is Tarah Yahan Laya Gaya....!
Zaroor....Zaroor....
Lekin
Usse Pahle Main Chahti Hu Ke Tum Kuch Kha-Pee Lo....!
Uske Baad Shayad Samundar Mein Phinkwa Dogi....!
Hargiz Nahi General....Tum To Is Waqt Meri Aankhon Ka Taara Ho....!
Allah Rahem Kare....Imran Urdu Mein Badhbadhaya
Kya Baat Hai....!
Kuch Nahi....Apni Zubaan Mein Izhaar-E-Khushi Kar Gaya Tha Aadathan....!
Is Aadath Par Qaabu Paane Ki Koshish Karo....
Varna
Kisi Mauqe Par Dushwaari Mein Padh Jaoge....!
Ab Savdhaan Rahunga....!
Thahero....Main Abhi Ayi....Coffee Aur Sandwich Ke Liye Kahe Du....Ya Tum Jo Kuch Pasand Karo....!
Coffee....Aur Sirf Do Adad Uble Hue Anday (Eggs)....!
Wo Chali Gayi....
Aur
Imran Thandi Saans Le Kar Chath Ki Taraf Dekhne Laga....!
Chief Trini Ne Waapsi Mein Der Nahi Lagayi....!
Aur Ab Main Tumhe Bataungi Ke Kin Dushwaariyon Ki Bina Par Hum Aisa Karne Par Majboor The....General Agura Apna Zaheni Tavazun (Maansik-Santulan) Kho Baitha Hai....
Lekin
Yeh Baat Chupayi Gayi Hai....Abhi Tak Iska Elaan Nahi Kiya Gaya Hai Ke Wo Paagal-Qaane Mein Hai....
Lekin
Is Muheem Ke Liye Wo Behadh Zaroori Tha....!
Kisi Ne Darwaaze Par Dastak Di....
Aur
Wo Khamosh Ho Kar Darwaaze Ki Taraf Badh Gayi....
Fir
Khud Usi Ne Darwaaza Khola....!
Joseph Coffee Ki Tray Uthaye Hue Kamre Mein Daakhil Hua....Wo Ab Bhi Lavafanga Hi Ke Make-Up Mein Tha....Tray Mez Par Rakh Kar Wo Ek Taraf Moadab Khada Ho Gaya....!
Kya Haal Hai....? Imran Ne Pucha
Khuda Ka Shukriya Hai Boss....!
Boss Nahi....General....Trini Ne Kaha
General....Joseph Ne Bharrayi Hui Awaaz Hue Kaha
Bas Ab Jao....Tum Mutmayeen Ho Gaye Honge....Trini Haath Hila Kar Boli
Aur
Joseph Chup-Chaap Bahar Chala Gaya....
Fir
Trini Imran Ke Liye Coffee Undhelne Lagi....!
Haa....To Main Yeh Kahe Rahi Thi Ke General Agura Is Muheem Ke Liye Behadh Zaroori Hai....Darasal Yeh Ek Purana Naam Hai....General Agura....Us Agura Ke Aakhri Silsile Ka Fardh Hai....Jiss Ne 16vi Sadi Mein Vaadi Amazon Ka Safar Kiya Tha....
Aur
Ghulaamon Ki Tijarath (Business) Karne Wale Spanish Ka Khaatma Kar Ke Vaadi Mein Base Hue Qaabilon Ke Dil Jeet Liye The....Wo Unke Darmiyaan Devataon Ki Tarah Puja Jata Hai....
Fir
Is Silsile Ke Har Fardh Ko Yahi Darja Haasil Hota Chala Aya....Uska Ek Makhsoos (Special) Jhanda Hai....Jo Aaj Ke Agura Ka Bhi Imtiyazi Nishaan Hai....Jungle Mein Basne Wala Har Qaabila Aaj Bhi Us Nishaan Ko Pehchaanta Hai....
Aur
Iski Wajah Yeh Hai Ke Yeh Nishaan Unke Paas Ab Bhi Mehfooz Hai....Wo Aaj Bhi Uski Puja Karte Hai....
Lehaaza
Ab Tum Khud Ko Devataon Ki Aulaad Samjho....Tumhari Wajah Se Hum Un iLaaqon Se Bhi Guzar Jayenge....Jahan Mehzab (Aadhunik) Duniya Ka Koi Fardh Khadam Rakhne Ki Jurrat Nahi Kar Sakhta....!
Kya Saare Qaabilon Ke Zimmedar Afraad Maujooda Agura Ko Pehchaante Hai....? Imran Ne Pucha
Haa....Aur Iski Wajah Yeh Hai Ke Wo Kabhi-Kabhi Unke Darmiyaan Pahunchta Rehta Tha....!
Lekin Mujhe To Un Qaabilon Ki Zubaan Nahi Aati....!
Use Kab Aati Hai....Uske Saath Humesha Teen-Chaar Tarjumaan (Translators) Zaroor Rahte The....So....Is Waqt Bhi Tumhare Saath Maujood Hai....Tum Iski Fikr Na Karo....!
Kya Tumhe iLm Hai Ke Tumhe Kahan Jana Hai....?
Mera Khayal Hai Ke Main Jaanti Hu....Is Dauraan Mein Badi Taaqaton Ne Us Jagah Ke Tayen (Chunau) Ke Liye Itna Literature Frahaam (Pradaan) Kar Diya Hai Ke Kam-Az-Kam Hum Brazilian To Samajh Hi Gaye Hai Ke Hume Us Pur-Israar (Rahassamayi) Jagah Tak Pahunchne Ke Liye Kaun Sa Raasta Ikhtiyaar Karna Chahiye....!
Aur Tumhe Is Haqeeqat Se Bhi Inkaar Na Hona Chahiye Ke Zeroland Tanzeem (Organisation) Ne Jin-Jin Mulkon Mein Apne Unit Khayam Kar Rakhe Hai Wahan Ki Hukumat Mein Bhi Unke Log Paye Jate Hai....!
Haa....Main Samajhti Hu....!
To Fir Is Silsile Mein Jo Savdhani Barti Hai....Un Par Bhi Roshni Daalo....!
Wo Khamosh Ho Kar Imran Ki Shakl Dekhne Lagi....!
Tum Bhi Coffee Piyo....Imran Muskura Kar Bola
Wo Fikrmand Andaaz Mein Apne Liye Coffee Undhelne Lagi....!
Ek Anda Bhi Khao....Imran Ne Ek Aur Mashwara Diya
Macy Trini Ke Chahre Par Hans-Mookh Hone Ki Chaap Lagi Hui Thi....Uska Ab Dur-Dur Tak Pata Nahi Tha....Aisa Lagta Tha Jaise Us Par Achanak Kayi Qism Ki Fikr Ka Yalghaar Hua Ho....Khaali-Khaali Aankhon Se Imran Ko Dekhe Jaa Rahi Thi....Aakhir Bharrayi Hui Awaaz Mein Boli....Uske Baare Mein Kuch Nahi Kahe Sakhti....!
Aur Iski Yaqeen Dahani Nahi Kara Sakhti Ke Zeroland Ke Agent Bhi General Agura Ki Maujooda Halath Se Waaqif Na Honge....!
Tum Thik Kahe Rahe Ho....Wo Bharrayi Hui Awaaz Mein Boli....Hum Ne Is Masle Par Ghaur Nahi Kiya Tha....!
Imran Ek Zordar Khahekhaha Laga Kar Bola....To Is Qadr Fikrmand Hone Ki Kya Zaroorat Hai....!
Nahi....Is Masle Par Ghaur Kiye Baghair Koi Khadam Uthana Munaseeb Na Hoga....!
Kya Tumhare Kisi Officer Ne Bhi Iski Taraf Dhyaan Nahi Dilaya Tha....!
Hargiz Nahi....Yeh Us General Ke Sonchne Ki Baat Thi Jiss Ne Muheem Tarteeb (Set) Di Hai....!
To Fir Ab Sabr Karo....Imran Ne Kaha
Yahi Munaseeb Bhi Hai....Achanak Teesri Awaaz Cabin Mein Gunji
Aur
Wo Chaunk Kar Chaaron Taraf Dekhne Lage....
Lekin
Koi Nazar Nahi Aya....!
Imran Ke Honthon Par Ajeeb Si Muskurahat Thi....
Aur
Macy Trini Ki Sahemgi Ka Kya Puchna....
Lekin
Fir Wo Fauri Sambhal Kar Boli....Yeh Kaun Badh-Tameez Dakhal Andaazi Kar Raha Hai....!
Dakhal Andaazi To Tum Log Kar Rahe Ho....Jo Dusron Ko Sukoon Se Nahi Rahne Dete....Mr.Imran Bilkul Thik Kahe Rahe The....Ke Hum Jahan Bhi Hote Hai....Wahan Ki Wahan Ki Maujooda Hukumat Humare Qabze Mein Hoti Hai....Mr.Imran Humare Mutaleekh (Sambhandith) Jo Kuch Bhi Kahte Hai Bilkul Thik Kahte Hai....
Kyun Ke
Yeh Zeroland Ke Specialist Hai....!
Tum Kaun Ho Saamne Aao....!
Bakwaas Bandh Karo....
Aur
Khud Ko Humara Qaidi Samjho....Ab Yeh Steamer Par Tumhari Koi Nahi Sunega....Isliye Aqlmandi Ka Yahi Takhaza Hona Chahiye Ke Jiss Tarah Ab Tak Rahe Ho Usme Koi Farq Na Aane Do....Yeh Steamer Tumhe Mars Par Le Jayega....
Aur
Tum Ne Dekha....Mr.Imran....Ab Kitni Asaani Se Dobara Humare Haath Aye....Apne Mulk Hi Mein Tum Zyada Mehfooz The....Jab Tak Chahte Chupe Rahte....!
Waah....Yeh Kya Baat Hui....
Aur
Yeh Tum Se Kiss Ne Kahe Diya Ke Main Tumhari Wajah Se Chupa Hua Tha....Mera To Mission Yahi Hai Ke Tumhare Mars Par Kisi Badi Taaqat Ka Qabza Na Hone Paye....
Varna
Mujhe Unse Sahyog Kar Lene Se Kaun Rok Sakhta Tha....!
Tum Yeh Bhi Thik Kahe Raho Mr.Imran....
Lekin
Tum Apne Taur Par Use Tabaah Karna Chahte Ho....!
Main Fardh-O-Wahed (Ek-Maatr) Bhala Kiss Shumaar-O-Khataar Mein Hu....Zaati Taur Par Meri Haisiyath Hi Kya Hai....!
Yeh To Main Nahi Jaanta Mr.Imran....
Lekin
Tum....
Haa....Haa....Jumla Pura Karo....Imran Ne Kaha
Tum Fardh-O-Wahed Ho Jiss Ke Liye Tanzeem (Organisation) Ne Saza-E-Maut Tajveez (Prastav) Ki Hai....
Varna
Hum Apne Dushmano Ko Maar Daalne Ke Kayel Nahi Hai....Hum Unhe Pakadh Kar Unse Kaam Lete Hai....!
Mujhe iLm Hai....
Aur
Ho Sakhta Hai....Tum Is Baar Mujhe Phaansi Par Latka Hi Do....!
Yeh To Waqt Aane Par Maalum Hoga....!
Iske Baad Fir Wo Awaaz Sunayi Nahi Di....
Aur
Wo Dono Ek-Dusre Ka Muh Dekhte Rahe Gaye....!
Yeh Kya Ho Gaya Mr.Imran....Trini Kuch Der Baad Bharrayi Hui Awaaz Mein Boli....Mere Saath 27 Mahereen (Experts) Bhi Hai....!
Sab Zeroland Ke Kaam Ayenge....Imran Ne Laparwaahi Se Kaha....
Aur
Sirf Mujhe Goli Maar Di Jayegi....!
Kya Yeh Haqeeqat Hai....?
Tum Sun Hi Chuki Ho....Tanzeem Ne Pahli Baar Kisi Dushman Ke Liye Saza-E-Maut Tajveez Ki Hai....!
Tab To Bohath Bura Hua....Yani....Tum Khud Hi Unke Jaal Mein Aa Phanse Ho....!
Yeh To Hona Hi Tha....
Aur
Apne Mulk Mein Mar Chuka Hu....
Lehaaza
Zindagi Ka Saboot Dene Ke Liye Kuch Na Kuch Karna Hi Padhta....!
Yaqeen Karo....Main Sirf Tumhare Liye Fikrmand Hu....Aisi Shadeed Mehnath Lete Hai Apne Qaidiyon Se Ke Aankhein Nikal Padhti Hai....
Aur
Is Silsile Mein Yeh Nahi Dekhte Ke Aurat Hai Ya Mard....!
Dekha Jayega....Wo Sar Jhatak Kar Boli....Main Khud Ko Aurat Samajhti Hi Nahi....Main To Kahti Hu...Use Talaash Kiya Jaye....Jiss Ki Awaaz Abhi Hum Ne Suni Thi....!
Khwaab Khayali Hai Macy Trini....Wahi Awaaz Fir Ayi....Is Waqt Steamer Par Sirf Tum Hi Teen Afraad Ho....Tumhare Wo Maahereen Steamer Tak Pahunch Hi Nahi Sakhe Jinka Hawaala Tum Ne Kuch Der Pahle Diya Tha....!
Fir Wo Kahan Hai....? Trini Ne Bohath Dabang Ho Kar Pucha
Wo Dusre Steamer Par Hai....
Lekin
Jab Unhe Maalum Hoga Ke Tum Us Steamer Par Maujood Nahi Ho To Wo Wapas Chale Jayenge....!
Ab Tum Ne Dekh Liya Ke Yeh Log Tumhari Hukumat Par Kiss Hadh Tak Chaye Hue Hai....Imran Ne Kaha
Uski Is Baat Par Namaalum Aadmi Ne Koi Rai Nahi Di....!
Haa....Maine Dekh Liya....Trini Lambi Saans Le Kar Boli
Bas....Ab Tum Bhi Aaram Karo....!
Aakhar Tum Itne Mutmayeen (Santusht) Kyun Nazar Aa Rahe Ho....?
Mera Nazariya Hayaat Yeh Hai Ke Jab Marna Hoga Mar Jaunga....Pahle Se Bore Hote Rahne Ki Kya Zaroorat Hai....Na Apni Koshish Se Paida Hua Hu....
Aur
Na Apne Iraade Se Mar Sakhunga....
Lehaaza
Aish Karo....Kya Samjhi....!
Tum Waqai Ajeeb Aadmi Ho....!
Kayi Baar Unke Chakkar Mein Padh Kar Kharaab Khavaar (Bad-Malnutrition) Hu....
Lekin
Zinda Hu Abhi Tak....Ek Baar Aur Sahi....!
Ise Tum Apna Safar Aakhirath Hi Samjho Mr.Imran....Awaaz Fir Ayi
Kyun Khwaamkhaa Tayein-Tayein Kar Rahe Ho....Humari Baaton Mein Dakhal Andaazi Mat Karo....!
Main Sirf Yeh Chahta Hu Ke Tum Log Koi Ghair Danishmandanah (Na-Samajh) Khadam Na Uthao....!
Aur Tumhe Aagha Karna Chahta Hu Ke Mera Saathi Joseph Magunda Kam-Az-Kam 6 Bottles Ka Asaami Hai....Iska Khayal Rakhna...!
Hume iLm Hai....Tumhe Fikrmand Hone Ki Zaroorat Nahi....!
Mehmaan Nawaazi Ka Bohath Bohath Shukriya....
Lekin
Ab Humari Baaton Mein Dakhal Andaazi Mat Karna....Hum Bachche Nahi Hai....!
Iska Jawaab Na Mila....!
Macy Trini Ki Nazar Us Loudspeaker Par Jami Hui Thi....Jisse Awaaz Aati Thi....!
Isliye Khush-O-Kharam Rahne Ki Koshish Karo....Imran Ne Kaha
Aur
Fir Achanak....Jhuk Kar Use Is Tarah Dekhne Laga Jaise Uske Sar Par Seengh Nikal Aye Ho....!
Is Tarah Kyun Dekh Rahe Ho....!
Zara Uth Kar Darwaaze Ki Taraf Jao....
Aur
Fir Idhar Hi Wapas Aao....!
Kya Matlab....!
Please Chief Trini....Yeh Bohath Zaroori Hai....Meri Khateer Hi Sahi....!
Ajeeb Aadmi Ho....Kehti Hui Wo Uthi....
Aur
Darwaaze Ki Taraf Chal Padhi....
Fir
Darwaaze Par Ruk Kar Uski Taraf Mudhi....!
Oooofffoooo....Kya Ab Tumhara Dimaagh Ulat Gaya Hai....!
Nahi....Main T3B Ka Bhi Specialist Hu....Koi Nahi Jaanta Ke Uski Asli Shakl Kaisi Hai....Apne Aadmiyon Ke Darmiyaan Rahti Hai....
Lekin
Koi Use Nahi Pehchaan Sakhta....
Aur
Isi Liye Wo Aaj-Tak Un Par Hukumat Kar Rahi Hai....
Lekin
Main Use Pehchaan Sakhta Hu....Khwaah Wo Kisi Roop Mein Bhi Mere Saamne Aye....!
Iski Wajah....?
Kya Ab Bhi Iski Wajah Samajh Mein Nahi Ayi....Jab Ke Maine Tumhe Harkath Mein Laa Kar Dekhne Ke Baad Yeh Faisla Sadar Kiya Tha Ke Tum T3B Nahi Ho....!
Main Samajh Gayi....Tum Kya Kehna Chahte Ho....Baaz Jismaani Harkath Aisi Hoti Hai....Jin Par Qaabu Paana Muhaal Hota Hai....
Aur
Tum Aisi Hi Kisi Harkath Ki Bina Par Use Pehchaan Sakhte Ho....!
Yahi Baat Hai Chief Trini....!
Tab To Wo Waqai Tumhe Zinda Nahi Chhodegi....Oohh....Khuda Ki Panaah....Wo Achanak Khamosh Ho Kar Imran Ko Ghoorne Lagi....
Fir
Jeb Se Kalam Aur Notebook Nikaal Kar Uske Safe Par Kuch Likha....
Aur
Imran Ki Taraf Badha Diya....!
Usne Likha Tha....Aakhir Tumhe Ho Kya Gaya Hai....Tum Jaante Ho Koi Humari Baatein Sun-Sun Kar Unke Jawaabaat Bhi Deta Raha Hai....Iske Bawajood Tum Itne Be-Ehtiyaath (Aasavdhaan) Ho Gaye....Ek Bada Raaz Un Par Zaaher Kar Diya....Ab To Waqai Tumhari Khair Nahi....!
Imran Tahreer (Lekh) Padh Kar Ahmaqon Ki Tarah Uski Taraf Dekhne Laga....
Fir
Dono Kaan Marodh Kar Ek Chaanta Apne Gaalon Par Lagaya....!
Trini Ne Honth Sikoodh Kar Izhaar-E-Afsos Karne Ke Se Andaaz Mein Sar Ko Jumbish Di....
Aur
Thodi Der Tak Dono Gumsum Baithe Ek-Dusre Ko Ghoorte Rahe....
Fir
Imran Ne Ek Zordar Khahekhaha Laga Kar Kaha....Coffee Ka Ek Cup Aur Ho Jaye....!
Joseph Bekhabar So Raha Tha Ke Tez Qism Ki Ghanti Ne Use Jaga Diya....Uske Jism Par Khalaasiyon Ka Sa Libaas Zaroor Tha....
Lekin
Use Bhi Rahne Ko Alag Cabin Mila Tha....
Aur
Steamer Par Yeh Unki Teesri Raat Thi....!
Joseph Ne Ghadi Dekhi....Teen Baj Rahe The....Goya Raat Abhi Baaqi Thi....!
Achanak Microphone Se Awaaz Ayi....Mr.Joseph Magunda....Apne Samaan Samet Deck Par Pahunch Jaye....!
Joseph Ne Muh Phaila Kar Jamayi Li....
Fir
Uth Kar Washbasin Tak Aya....Muh Par Paani Ke Cheentein Maare....Do-Chaar Kulliya Ki....
Aur
Cup-Board Se Bottle Utha Kar Cork Nikaali....
Aur
Bottle Muh Se Laga Liya....Shayad Yeh Quota Ki Aakhri Bottle Thi....Isliye Thodi Si Pee Kar Use Safari Thaile Mein Daal Liya....Uske Baad Usne Apne Kapdhe Pahene....
Aur
Samaan Uthaye Hue Deck Par Aa Gaya....!
Yahan Imran Aur Trini Samaan Samet Maujood The....Imran General Ki Vardi Mein Tha....!
Kya Baat Hai General....? Joseph Ne Pucha
Shayad Hum Yahin Kahin Utrenge....Imran Ne Laparwaahi Se Jawaab Diya
Samajh Mein Nahi Aata Ke Yeh Hume Kahan Utaar Rahe Hai....Chief Trini Badhbadhayi
Dekha Jayega....!
Rassi Ki Seedhiyon Ke Zariye Wo Ek Boat Par Utre....
Aur
Fir....Unka Samaan Bhi Utaar Diya Gaya....!
Paanch Musalaah Aadmi Kashti Par Pahle Hi Se Maujood The....!
Macy Trini Ne Ahista Se Imran Se Pucha....Ab Hume Kya Karna Chahiye....?
Filhaal Khamosh Raho....Imran Ne Jawaab Diya
Kashti Par Maujood Afraad Par General Ki Vardi Ka Raub Nahi Padha Tha....Unme Se Chaar Ki Stan-Gun Unki Taraf Uthi Hui Thi....
Aur
Paanchva Kashti Chala Raha Tha....!
Thodi Der Baad Aasmaan Par Halki Si Roshni Nazar Ayi....Ghaliban Subaah Hone Wali Thi....Wo Khamosh Baithe Rahe....Kashti Kisi Namaalum Manzil Ki Taraf Ravaan-Doo Thi....!
Aakhir Imran Ne Unchi Awaaz Mein Kaha....Captain Trini Kya Tum Ung Rahi Ho....?
Nahi General....Main Puri Tarah Jaag Rahi Hu....!
To Fir Baatein Karo....Yeh Log To Gunge Aur Bahere Maalum Hote Hai....!
Haa....Mera Bhi Yahi Khayal Hai General....!
Tumhara Kya Khayal Hai Sergent Lavafanga....!
Andhere Mein Mujhe Koi Khayal Nazar Nahi Aa Raha General Sir....!
Thik Hai....Ujala Phailne Do....Imran Ne Kaha
Un Chaaron Ne Khamoshi Se Unki Baatein Suni....Kisi Ki Taraf Se Bhi Koi Rad-O-Amal (Pratikriya) Nahi Hua....
Fir
Thodi Der Baad Acha Khaasa Ujala Phail Gaya....!
Achanak Kashti Ke Kisi Kone Se Chata (6th) Aadmi Namudar Hua....Yeh Ek Lambe Qad Aur Ghateele Jism Wala Red-Indian Tha....Jism Par Sirf Ek Langoti Thi....
Aur
Haathon Mein Kulhaadhi....!
Kulhaadhi Ko Harkath De Kar Usne Kuch Kehna Shuru Kiya....Uska Mukhateeb Imran Tha....!
Uske Khamosh Hone Par Musalaah Aadmiyon Mein Ek Bade Adab Se Bola....Yeh Mardozi Qabile Ke Sardar Ka Ladka Hai....General Tumhare Isteqbaal (Swagath) Ko Aya Hai....
Aur
Izhaar-E-Khushi Kar Raha Hai....Tum Uski Sar Zameen Par Khadam Rakhoge....Wo Faqr Se Kahe Raha Hai Ke Jahan Devata Agura Ki Aulaad Ke Alawa Mehzab (Aadhunik) Duniya Ka Koi Fardh Khadam Nahi Rakh Sakhta....
Magar
Jo Log Tumhare Saathi Ho....!
Meri Taraf Se Bhi Uska Shukriya Aada Kar Do....Mujhe Bhi Khushi Hai Ke Main Kuch Der Baad Apne Aqidathmandon (Bhakton) Mein Honga....Imran Ne Kaha
Tarjumaan (Translator) Ne Kisi Namanoos Zubaan Mein Imran Ki Kahi Hui Baat Dohra Di....!
Imran Macy Trini Ki Taraf Dekha....Jiss Ke Chahre Par Ajeeb Se Tasoorat (Bhaav) The....!
Idhar Ab Musalaah Aadmi Ne Apni Stan-Gun Kaandhon Par Latka Li Thi....Khattai Yeh Nahi Maalum Hota Tha Ke Imran Aur Uske Saathi Unke Qaidi Hai....
Aur
Ab Wo Aapas Mein Baatein Bhi Kar Rahe The....!
Yeh Bhi Tumhari Fauj Hi Se Mutaleekh (Sambhandhit) Maalum Hote Hai....Imran Ne Ahista Se Kaha
Main Nahi Samajh Sakhti Yeh Kiss Qism Ka Khel Hai....Trini Ne Jawaab Diya
Khel Se Kya Muraad Hai....?
Shayad Yeh Hume Apne Kisi Maqsad Ke Hasool Ke Liye Istemaal Karna Chahte Hai....!
Ho Sakhta Hai....Imran Ne Kaha
Main Nahi Kahe Sakhti Ke Ab Humara Kya Hashr Hoga....!
Kya Tum Andaaza Laga Sakhti Ho Ke Is Waqt Hum Kahan Hai....!
Amazon Hi Ka Koi Dariya Hai....
Lekin
Andaaza Lagana Mushkil Hai Ke Hum Kidhar Jaa Rahe Hai....
Aur
Suno....Yeh Mardozi Qabile Ka Naam Bhi Maine Aaj Hi Suna Hai....!
Iski Fikr Na Karo....Jin Logon Ke Hatthe Chadh Gaye Hai....Ek-Aadh Bilkul Hi Naya Qabila Paida Kar Sakhte Hai....Unse Koi Baidh (Sudhoor) Nahi Hai....!
Dariya Ka Paat Ahista-Ahista Kam Hota Jaa Raha Tha....
Aur
Jungle Dono Taraf Se Un Par Is Tarah Jhuka Aa Raha Tha Ke Ghutan Ka Ehsaan Hone Laga Tha....Jaise-Jaise Waqt Guzar Raha Tha Tapeesh Badhti Jaa Rahi Thi....Aisa Lagta Tha Jaise Junglon Se Bheegi-Bheegi Si Aanch Nikal Rahi Ho....!
Achanak Kashti Baayein Janib Kinaare Se Laga Di Gayi....
Aur
Sabse Pahle Mardozi Qabile Ka Nau-Jawaan Qashki (Sukha) Par Utar Gaya....!
Imran Ke Khareeb Khade Hue Musalaah Aadmi Ne Ahista Se Kaha....General Apna Khandaani Parcham Nikaalo....!
Imran Ne Macy Trini Ki Taraf Dekha....
Aur
Wo Jaldi Se Boli....Thaila....Wo Zard (Yellow) Thaila Kahan Hai....? Maine Jhanda Usi Mein Rakha Tha....!
Main To Sirf Apna Samaan Utha Kar Cabin Se Nikal Aya Tha....Tum Ne Zikr Hi Nahi Kiya Tha Ke Koi Zard Thaila Bhi Mere Samaan Mein Shaamil Hoga....!
To Kya Jhanda Maujood Nahi Hai....Musalaah Aadmi Aankhein Nikaal Kar Ghurraya
Main Nahi Jaanta....Mujhe iLm Nahi Tha Ke Kiss Chakkar Mein Phansne Jaa Raha Hu....
Varna
Khud Hi Har Baat Ka Khayal Rakhta....!
Acha....Acha....Kashti Se Utro....Kuch Aur Soncha Jayega....!
Main Us Waqt Tak Kashti Se Nahi Utrunga....Jab Tak Ke Mujhe Saare Maamlaat Ka iLm Na Ho Jaye....!
Kaise Maamlaat....?
Yahi Ke Mujhe Ba-Haisiyath General Agura Kiss Maqsad Ke Hasool Ke Liye Istemaal Kiya Jaa Raha Hai....!
Tum Saude Baazi Ki Position Mein Nahi Ho....!
Is Vahem Mein Na Rehna....Imran Akadh Kar Bola....Is Waqt Tum Paanchon Mere Rahem-O-Karam Par Ho....!
Wo Kiss Tarah....?
Main General Agura Hu....Unki Zubaan Se Na-Waaqif Hu To Kya Hua....Mere Ek Ishaare Par Tum Paanchon Fanaa Kar Diye Jaoge....!
Wo Kisi Sonch Mein Padh Gaya....
Fir
Bola....Tum Asli Agura To Nahi Ho....!
Isse Koi Farq Nahi Padhega....Main Jo Koi Bhi Hu....Inki Qaabilon Ki History Ka Ek Acha Taleeb-E-Ilm (Student) Bhi Hu....Unke Makhsoos (Special) Ishaaron Se Waaqif Hu....Aise Ishaare Jin Mein Puri-Puri Taqreerein (Speech) Bayaan Hoti Hai....Jungle Mein Saikdhon Aankhein Humari Taraf Nigraan Hai....Main Ek Ishaara Karunga....
Aur
Zaheerile Teer Tum Paanchon Ko Chedh Kar Rakh Denge....!
Aakhir Tum Chahte Kya Ho....?
Mujhe Iska iLm Hona Chahiye Ke Tum Log Mujhe Kiss Maqsad Ke Hasool Ke Liye Istemaal Karna Chahte Ho....!
Hum Tumhare Zariye Unke Ek Moqaddas (Pavitr) Moqaam Tak Pahunchna Chahte Hai....!
Wahan Kyun Pahunchna Chahte Ho....?
Yeh Hume Nahi Maalum....!
Bas To Fir Main Nahi Utrunga....Imran Ne Kaha
Aur
Qaabile Ke Nau-Jawaan Ko Kashti Par Wapas Aa Jane Ka Ishaara Kiya....
Aur
Usne Badi Phurti Se Tameel Ki....!
Isse Koi Farq Nahi Padhega....Main Jo Koi Bhi Hu....Inki Qaabilon Ki History Ka Ek Acha Taleeb-E-Ilm (Student) Bhi Hu....Unke Makhsoos (Special) Ishaaron Se Waaqif Hu....Aise Ishaare Jin Mein Puri-Puri Taqreerein (Speech) Bayaan Hoti Hai....Jungle Mein Saikdhon Aankhein Humari Taraf Nigraan Hai....Main Ek Ishaara Karunga....
Aur
Zaheerile Teer Tum Paanchon Ko Chedh Kar Rakh Denge....!
Aakhir Tum Chahte Kya Ho....?
Mujhe Iska iLm Hona Chahiye Ke Tum Log Mujhe Kiss Maqsad Ke Hasool Ke Liye Istemaal Karna Chahte Ho....!
Hum Tumhare Zariye Unke Ek Moqaddas (Pavitr) Moqaam Tak Pahunchna Chahte Hai....!
Wahan Kyun Pahunchna Chahte Ho....?
Yeh Hume Nahi Maalum....!
Bas To Fir Main Nahi Utrunga....Imran Ne Kaha
Aur
Qaabile Ke Nau-Jawaan Ko Kashti Par Wapas Aa Jane Ka Ishaara Kiya....
Aur
Usne Badi Phurti Se Tameel Ki....!
Musalaah Aadmi Apne Saathiyon Ki Taraf Bebasi Se Dekh Kar Rahe Gaya....Aisa Maalum Hota Jaise Isse Aage Ka Sabaq Use Yaad Hi Na Ho....
Achanak
Unme Se Ek Bola....Hum Inhe Cover Kiye Rahenge....Tum Cabin Mein Jaa Kar Nayi Hidayath Haasil Karo....!
Aur Meri Shart Bhi Apne Bado Tak Pahuncha Dena....Yani Maqsad Maalum Kiye Baghair Main Kuch Bhi Nahi Kar Sakhunga....Imran Ne Kaha
Aur
Wo Use Qahar Aalud Nigaahon Se Dekhta Hua Cabin Mein Chala Gaya....!
Idhar Mardozi Qabile Ka Nau-Jawaan Sar Jhukaye Khada Tha....!
Yeh Tum Ne Kya Shuru Kar Diya....Trini Ahista Se Boli
Khamoshi Se Dekhti Raho....
Agar
Tum Bhi Unhi Se Mili Hui Nahi Ho....!
Main Kyun Mili Hoti....Wo Bigadh Kar Boli
Ab Kisi Ki Kisi Baat Par Yaqeen Nahi Aata....!
Is Situation Mein Main Tumhe Yaqeen Dila Bhi Nahi Sakhti....!
Bas To Fir Khamoshi Ikhtiyaar Karo....Main Tumhe iLzaam To Nahi De Raha....!
Thodi Der Baad Wo Wapas Aa Gaya....Shayad Usne Transmeter Par Kisi Se Baat Ki Thi....!
Thik Hai....Wo Sar Hila Kar Imran Se Bola....Tumhe Maqsad Se Aagha Kar Diya Jayega....Mujhe Khaas Taur Par Hidayath Mili Hai Ke Tumhara Khaas Khayal Rakha Jaye....!
Bohath Bohath Shukriya....Main Jaanta Hu Ke Mujh Mein Aise Hi Surkhaab Ke Parr Lage Hue Hai....!
Hum Apne Taur Par Wahan Tak Pahunchne Ki Koshish Kar Chuke Hai....
Lekin
Kaamyaabi Nahi Hui....Yeh Qaabaili Log Us Raaste Se Waaqif Hai....Jo Nihayath Asaani Se Matlubah (Avashyak) Jagah Pahuncha Sakhte Hai....
Agar
Tum Wahan Pahunchne Ki Khwaahish Zaaher Karoge....To Be-Chu-Va-Char Tumhe Aur Tumhare Saathiyon Ko Wahan Tak Le Jayenge....!
Ab Sawaal Yeh Paida Hota Hai Ke Yeh Qabila Tumhare Haath Kaise Laga....?
Yeh Koi Aisi Raaz Ki Baat Nahi....Jungle Ki Cheezon Ke Badle Yeh Apne Istemaal Ki Cheezein Humi Se Le Jate Hai....
Lekin
Apne Makhsoos (Special) iLaaqon Mein Hume Khadam Rakhne Nahi Dete....
Aur
Suno....Ab Jo Kuch Bhi Puchna Hai....Humare Boss Se Puchna....Hum In Maamlaat Ke Mutaleekh (Sambhandhit) Kuch Nahi Jaante....!
